Лука 2 - Инжил

Иса Масихтинъ тувувы

¹ Сол куьнлерде кесарь Августтынъ буьтин урым ерлериндеги аьдемлер санын язып алув буйырыгы шыкты.

² Сосы язылып алынув Киринийдинъ Сирияда тоьрелик суьруьв кезуьвинде биринши эди.

³ Сонынъ уьшин баьриси де, аьр ким оьз тувган шахарына, язылмага барды.

⁴ Сондай болып Юсуп та, Даут уьйиннен эм тукымыннан болган себепли, Галилеядынъ Назарет шахарыннан, Юдеяга, Дауттынъ Бетлехем деп аталатаган шахарына атланды.

⁵ Онда оьзининъ соьз тавысып турган хатыны Марьем мен бирге язылмага керек эди. Марьем авыраяклы эди.

⁶ Олар онда барганда, Марьемге бала табув заманы етти.

⁷ Марьем оьзининъ Улын, тувнъышын, тапты, Оны боьледи эм отлыкка салды, неге десе конакбайдынъ боьлмесинде оларга орын табылмаган эди.

Койшылар ман маьлеклер

⁸ Сол элде далада койшылар оьзлерининъ суьруьвлери мен куьзет шыгатаган эдилер.

⁹ Бирден олардынъ алдына Раббийдинъ бир маьлеги туьсти, Раббийдинъ нуры оларды ярыкландырды. Суьруьвшилер бек корктылар.

¹⁰ Ама маьлек оларга: «Коркпанъыз, мен сизге де, баьри аьдемлерге де бек куванышлы ийги хабарды билдирмеге келгенмен.

¹¹ Буьгуьн сизге Даут шахарында Куткарувшы тувды: Ол Раббий Масих.

¹² Мине сизге онынъ нышаны: сиз боьленген эм отлыкта яткан балады табаяксыз», – деди.

^13-14 Сонъ анъламастан маьлекке аспаннынъ сансыз маьлеклер аскери келип косылдылар. Олар Аллага шуькир айтып: «Аллаху-Таалага данък, ер уьстинде Онынъ разы болган аьдемлерине тынышлык болсын!» – дедилер.

¹⁵ Маьлеклер олардан коькке тайганда, койшылар бир бирлерине: «Бетлехемге бараяк, онда не зат болганын караяк, Раббий бизге не затты билдирди экен», – деп айттылар.

¹⁶ Олар асыгыслы бардылар да Марьем мен Юсупты эм отлыкта яткан балады таптылар.

¹⁷ Коьргенлеринде, сосы Аьвлет акында оларга не зат белгили болганын айттылар.

¹⁸ Эситкенлердинъ баьриси де койшылардынъ айтатаган затларына сейирсине эдилер.

¹⁹ Марьем, болса, сосы соьзлердинъ баьрисин де коьнъилине ювык алып, юрегине салды.

²⁰ Сонъ койшылар эситкенлери, коьргенлери эм оларга калай билдирилгени болса, солай ок болганы уьшин Аллады данъклай эм Ога шуькир айта, артларына кайттылар.

Исады Алладынъ уьйине аькелдилер

²¹ Сегиз куьн озганнан сонъ, Саьбийге суьннет аьдетин этпеге керек заманы еткенде, Ога карында болаяктан алдын маьлек пен билдирилген Иса атты бердилер.

²² Муса пайхамбарга буйырылган Тауратка коьре тазаланув куьнлери оьткенде, балады Ерусалимге, Раббийдинъ алдына салмага деп, аькелдилер.

²³ Неге десе, Раббий берген Тауратта белгиленуьвге коьре, аьр бир тувнъыш эр саьбий Раббийге багысланмага керек.

²⁴ Эм Раббий берген Таураттынъ билдируьвине коьре курманлыкка эки куьмири, яде эки коьгершин балапанды аькелмеге тийисли эдилер.

²⁵ Сол вакытта Ерусалимде Шимон атлы аьдем болган. Ол туврашыл, Аллады сыйлаган эм Исраилге тынышлыкты уьмитлеген эр эди, эм Алладынъ Кие Рухы онда эди.

²⁶ Алладынъ Рухы ман Ога, Масихти коьрмей, оьлмееги билдирилген эди.

²⁷ Сол куьн Шимон, Кие Рух пан коьнъилленип, Алла уьйининъ каралдысына барган эди. Ата-анасы Иса Аьвлетине, Тауратта буйырылган аьдетти эттиреек болып, аькелген заманда,

²⁸ Шимон оны койнына алды, Аллага шуькир айтып:

²⁹ «Дуныядынъ Бийи, Сенинъ соьзинъ толды; мен, сенинъ кулынъ, энди тынышлык пан оьлермен.

^30-32 Неге десе энди Сенинъ буьтин халклар алдына аьзирлеген куткарувынъды, баска миллетлерге билим ярыгын ашаякты эм Оьз Исраил халкынънынъ данъкын шыгараякты коьзим мен коьрдим!» – деди.

³³ Исадынъ ата-анасы баласына айтылатаган соьзлерге сейирсиндилер.

³⁴ Сонъ Шимон оларга ийгилик тиледи эм баладынъ анасы Марьемге: «Сосы Аьвлет Исраилде коьплердинъ йогарга оьрленуьвине де, коьплердинъ тоьмен туьсуьвине де себеп болаяк. Ол шет кагылаяк нышан болаяк.

³⁵ Сенинъ оьзинънинъ янынънан да кылыш оьтеек. Соьйтип коьплердинъ акылындагы ойлары ашыкланаяклар», – деди.

³⁶ Булайда тагы да Ашер ырувыннан Пануелдинъ кызы Ханна пайхамбар да бар эди. Кызлай косылган эри мен тек ети йыл яшаган, а соьле кавдыраган картлыгында эди.

³⁷ Сексен доьрт ясындагы тул хатын оразасы, дувасы ман кеше-куьндиз Аллага кылынып, Онынъ уьйининъ каралдысыннан таймайтаган эди.

³⁸ Сол вакытта ол да аьдемлерге ювыклап, Аллага шуькир айтып, Ерусалимнинъ куткарылувын саклайтаганлардынъ баьрисине Саьбийдинъ акында хабарлайтаган эди.

Назаретке кайтув

³⁹ Юсуп пан Марьем Раббийдинъ буйырыгына коьре баьри затларын эттиргеннен сонъ, Галилеяга, тувган шахары Назаретке кайттылар.

⁴⁰ Аьвлет оьсе барды, акылланды, яны беркиди; Алладынъ шапагаты Онда эди.

Яс Иса Алла уьйинде

⁴¹ Аьр йыл сайын Онынъ ата-анасы Ерусалимге пасха байрамына баратаган эдилер.

⁴² Ол он эки ясына еткенде, аьдеттегинше, олар тагы да Ерусалимге байрамга келдилер.

⁴³ Байрам куьнлери кутылып, артларына кайтаятырганда Иса Масихтинъ Ерусалимде калганын Онынъ ата-анасы эскермей калдылар.

⁴⁴ Ол баскалар ман бирге келеди деп, ойладылар; соьйтип бир куьнлик йолды оьткеннен сонъ, Оны кардаш-ювыкларынынъ арасыннан излеп басладылар.

⁴⁵ Сонъ, таппаганларында, Оны излей, Ерусалимге кайттылар.

⁴⁶ Уьш куьннен сонъ Исады Алла уьйининъ каралдысында устазлар арасында олтырып, оларды тынълай эм оларга сорав сала турганда, табадылар.

⁴⁷ Оны тынълавшылардынъ баьриси де Онынъ акыллылыгына, берген явапларына сейирсинетаган эдилер.

⁴⁸ Ата-анасы Оны коьргенде аьжейипсиндилер эм Ога анасы: «Балам! Сен бизге булай неге эттинъ? Мине Сенинъ атанъ ман мен Сени излестирип, кайгырып юримиз», – деди.

⁴⁹ Иса: «Мени излемеге сизге неден керек эди? Яде сиз Меним Атамнынъ уьйинде болмага керегимди билмединъизбе?» – деп сорады.

⁵⁰ Ама олар оьзлерине айтылган соьзлерди анъламадылар.

⁵¹ Иса олар ман бирге Назаретке кайтып келди эм оларга бойсынувлы болды. Онынъ анасы болган затлардынъ баьрисин де юрегине салды.

⁵² Иса оьсти эм акыллана барды. Оны Алла да, аьдемлер де суьетаган эдилер.