Галатияшылар 1 - Инжил

¹ Аьдемлерден йиберилмей яде аьдемлердинъ ярдамы ман сайланмай, Масих Исадынъ эм Оны оьлилерден тирилткен Атасы Алладынъ ыхтыяры ман элши болган Паулдан

² эм мени мен бирге туратаган кардашлардынъ баьрисиннен Галатия элининъ иман ямагатларына салам!

³ Атамыз Алладан эм Раббийимиз Масих Исадан сизге шапагат эм тынышлык болсын.

⁴ Атамыз Алладынъ ыхтыяры ман Масих, аьлиги аьйлежи заманнан бизди куткараяк болып, куьналарымыз уьшин Оьзининъ янын берген.

⁵ Ога оьмирлер бойы данък болсын! Амин.

Ялгыз бир Ийги Хабар бар

⁶ Масихтинъ шапагаты ман сизди Оьзине шакырган Алладан сондай тезлик пен баска «ийги хабарга» коьшетаганынъыз мени сейирсиндиреди.

⁷ Йок баска ийги хабар, ама сизде тынышсызлык тувдыратаган эм Масихтинъ Ийги Хабарын терисиннен коьрсетеек болатаган аьдемлер бар.

⁸ Эгер биз яде коьктен маьлек келип, сизге оьзимиз насихат эткен Ийги Хабарга карсы бир хабарды айтып басласа, Алла сонынъ язасын берсин!

⁹ Алдын айтканымдай, соьле де айтаман: ким сизге, кабыл эткенинъизге карсы баска хабарды уьйретеди, Алла сонынъ язасын берсин!

¹⁰ Мен аьдемлерден ме макул коьруьвди излеймен яде Алладан ма?

¹¹ Аьдемлерге ме ярамага шалысаман? Эгер мен соьлеге дейим аьдемлерге яраяк болган болсам, Масих кулы болмас эдим.

Паул калай элши болды

¹² Кардашларым, сизинъ билгенинъизди суьемен: мен сизге насихатлаган Ийги Хабар аьдемнен тувыл, неге десе мен оны аьдемнен алып уьйренмегенмен, оны мага Масих Иса ашкан.

¹³ Сиз меним ювыт динине берилген алдынгы яшавым акында, эм мен Алладынъ иман ямагатын калай аявсыз кувып, йок этеек болып каьрлегенимди эситкенсиз.

¹⁴ Халкымда коьплеген тенълерим арасында, ювыт дининде алдыга барып, ата-бабаларымнан калган аьдетлерди сакламага мендей болып оьлшемсиз бек шалыскан йок эди.

^15-16 Аьле ана карнында мени сайлаган эм шапагаты ман Оьзине кызмет кылмага шакырган Алла Оьз Улын мага эм мен аркалы ашпага макул коьрди эм Онынъ акындагы Ийги Хабарды миллетлерге яймага буйырды. Сол вакытта мен эш бир аьдемнен маслагат излемедим.

¹⁷ Ерусалимге Меннен алдын элши болганларга бармадым. Тек Арабистанга бардым да сонъ Дамаск шахарына кайттым.

¹⁸ Уьш йылдан сонъ Ерусалимге, Кефа ман танысаяк болып, бардым эм оны ман он бес куьнди озгардым.

¹⁹ Тек онда Раббийдинъ оьгей иниси Якуптан баска элшилерден биревди де коьрмедим.

²⁰ А сизге язаятырганым Алла алдында оьтирик тувыл.

²¹ Оннан сонъ Сирия эм Киликия эллерине бардым.

²² Юдеядынъ иман ямагатларында мен эш биревге де белгили тувыл эдим.

²³ Олар меним акымда тек бир зат эситкенлер: оларды бир заманларда кувган, алдын йок этпеге шалыскан аьдем иманды соьле оьзи насихатлап юреди.

²⁴ Олар меним уьшин Аллады данъклайтаган эдилер.