Ашылув 19 - Инжил

Раббийди мактанъыз

¹ Сонъ коькте уьйкен ямагаттынь коьтеринки давысына усаган авазды эситтим: «Аллелуя! Куткарылув, данък эм куьш – Алламыздан.

² Неге десе Онынъ оькимлери тувра эм акыйкат: каьхпелиги мен ерди йойган уллы каьхпеге Ол оьким шыгарды эм кулларынынъ каны уьшин оьш алды».

³ Тагы да: «Аллелуя! Каьхпединъ янганыннан туьтин оьмирлер бойы шыгаяк», – дедилер.

⁴ Сонда йырма доьрт тамада эм доьрт янувар тагында олтырган Аллага сежде этип: «Амин! Аллелуя!» – дедилер.

⁵ Тактан тагы да бир сес: «Алламыздынъ баьри куллары – Кишкейиннен уьйкенине дейим Оны сыйлаганлар, Оны данъкланъыз!» – деди.

⁶ Тагы да уьйкен ямагаттынъ давысына, шорылдап аккан сувлардынъ эм куьшли коьк гуьрилдевдинъ тавысына усаган сестинъ: «Аллелуя! Неге десе буьтин дуныяды туткан Раббий Алламыз Патшалык этеди!

⁷ Куванаяк эм шатланаяк! Аллады данъклаяк! Неге десе Козыдынъ неке кыюв тойынынъ заманы келди, Онынъ келини аьзир болды.

⁸ Алла оны таза эм йылтыраган юка кетенге кийиндирди», – дегенин эситтим. Бу юка кетен – Аллага багысланганлардынъ туврашыл ислери.

⁹ Маьлек мага: «Яз: „Козыдынъ тойына шакырылганлар – бактылы!“» – деди. Тагы да: «Бу соьзлер – уьшини мен де Алладыкы», – деп косты.

¹⁰ Ога сежде этеек болып, мен аягына йыгылдым. Тек ол: «Булай этпе! Мен Исага шаатлыкларын юргисткен (иман) кардашларынънынъ эм сенинъ кызмет досынъман. Аллага сежде кыл! Эм бил: Исага шаатлык этуьв – пайхамбарлыктынъ рухы», – деди.

Ак аттынъ уьстинде атлы

¹¹ Сонда мен коьк ашылганын эм онда ак ат турганын коьрдим. Уьстиндеги Атлыдынъ аты – Сенимли эм Акыйкат. Атлы тувра оьким кеседи эм согысады.

¹² Онынъ коьзлери – от ялынындай, басында коьплеген тажлары бар, уьстинде оьзиннен баска бирев де билмеген аты язылган эди.

¹³ Онынъ абасы (кийими) канга баткан эм Ога «Алладынъ соьзи» деген ат берилген эди.

¹⁴ Атлыдынъ артыннан соьйтип ак атлардынъ уьстинде таза эм ак юка кетенлерге кийинген коьктеги аьскерлер бара эдилер.

¹⁵ Миллетлерди енъер уьшин, атлыдынъ авызыннан оьткир кылыш шыгады. Оларды темир таягы ман багаяк. Буьтин дуныяды туткан Алладынъ кызган ашувынынъ шагырын шыгарган юзим эзгишинде юзим тапталаяк.

¹⁶ Абасында эм бутында патшалардынъ Патшасы эм бийлердинъ Бийи деген аты язылган.

¹⁷ Мен тагы да бир маьлекти коьрдим. Ол, куьнде турып, коьктинъ ортасында ушкан баьри кусларга:

¹⁸ «Патшалардынъ, аьскер аькимлердинъ, куьшлилердинъ, атлардынъ эм атлылардынъ, азатлардынъ эм ыргатлардынъ, уллылардынъ эм кишкейлердинъ – баьрисининъ этин емеге йыйылып, Алладынъ уллы тойына келинъиз!» – дегенин эситтим.

¹⁹ Сонъ йырткыштынъ, дуныя патшаларынынъ эм олардынъ аьскерлерининъ атта Олтырган эм Онынъ аьскери мен согыспага йыйылганларын коьрдим.

²⁰ Йырткыш эм онынъ алдында аьлемет нышанлар коьрсеткен, соьйтип, йырткыштынь тамгасын алып сынтасына табынганларды алдаган ялган пайхамбар есирге алындылар. Экиси де янып турган отлы, коькиртли коьлге тирилей тасландылар.

²¹ Калганлар атта Олтырганнынъ авызындагы кылышы ман оьлтирилдилер. Баьри куслар олардынъ этлерине тойдылар.