2 Салоникшилер 3 - Инжил

Бизим уьшин дува этинъиз

¹ Соны ман, кардашлар, бизим уьшин дува этинъиз, Раббийдинъ хабары тез яйылсын эм, сиз эткендей, оьрметленсин.

² Керексиз эм яман аьдемлерден бизди Алла коршаласын деп, дува этинъиз. Баьри аьдемлерде де ынанув йокты да!

³ Ама Алла соьзине берк, Ол сизди эркли этер эм яманлык этетаганнан коршалар.

⁴ Буйырганларымызды калай толтыратаган болсанъыз, солай ок этеексиз деп, Раббийге таянып, сизге сенемиз.

⁵ Раббий юрегинъизди Алладынъ суьйимине эм Масихтинъ сабырлыгына кайырсын.

Ислемей яшаманъыз

⁶ Кардашлар, сизге, ислемей бос юретаган эм бизден алган окувга иермейтаган аьр бир кардаштан эрек турынъыз деп, Раббий Исадынъ аты ман буйырамыз.

^7-8 Бизден калай коьрим алмага керегинъизди, сиз оьзинъиз билесиз де. Неге десе биз сизде болганда, ислемей, бос юрмегенмиз. Эш биревден де кесек оьтпекти босына ашамаганмыз. Сизинъ биревинъизге авырлык аькелмес уьшин, куьшимизди аямай, кеше-куьндиз шалысып, куллык эткенмиз.

⁹ Сизден ярдам алмага эркинлигимиз бар болса да, сизге коьрим болар деп, куллык эттик.

¹⁰ Сонда ок, сизде болган заманымызда сосындай буйырык беретаган эдик: «Ким куллык этпеге суьймейди, сол ашамасын!»

¹¹ А энди, сизде эш куллык этпей, бос юретаган, баскалардынъ куллыгына кирисетаган аьдемлер бар деп, эситемиз.

¹² Сосы аьдемлерден Раббий Иса Масих аты уьшин тилеймиз, тынышлыкта куллык этпеге эм оьз оьтпегин ашамага буйырамыз.

¹³ Сиз, кардашларымыз, ийгиликти эте турып, арыганлыкка берилменъиз.

¹⁴ А эгер бизим хатта язылганга ким болса да тынъламаса, оны белгилеп, уялтар уьшин айкаспанъыз.

¹⁵ Тек ога душпанга карагандай карамай, (иман) кардашынъызга насихат бергендей этинъиз.

Сонъгы саламлар

¹⁶ Раббий Оьзи – тынышлыктынъ булагы, аьр заманда да, аьр яктан да тынышлык берсин! Раббий сизинъ баьринъиз бен де болсын!

¹⁷ Мен Паулман. Бу салам соьзлерди оьзимнинъ колым ман язаман, соьйтип, аьр хатты ПАУЛ деп, белгилеймен. Мине солай язаман.

¹⁸ Раббийимиз Иса Масихтинъ шапагаты сизинъ баьринъиз бен болсын.