1 Яхъя 5 - Инжил

Алла Улына сенуьв

¹ Исадынъ Масих болганына ынанган аьр ким Алладан тувган. Атады суьйген аьр ким Оннан тувганды да суьеди.

² Аллады суьйип, парызларын толтырганда, Алладынъ балаларын суьйгенимизди анълармыз.

³ Аллады суьюв – Онынъ парызларын толтырув, олар да авыр тувыл.

⁴ Неге десе Алладан тувган аьр ким дуныяды енъеди. Дуныяды енъмеге мырсат берген – ол иманымыз.

⁵ Иса Алладынъ Улы болганына ынанганнан баска ким енъер дуныяды?

⁶ Сув ман эм кан ман келген – Ол Иса Масих. Ол тек ялгыз сув ман тувыл, сув эм кан ман келген. Мунынъ акында шаатлык эткен – Рух, а Рух – акыйкат.

^7-8 Шаатлык эткенлер уьшев: Рух, сув, кан; уьшеви де бир шаатлыкта.

⁹ Биз аьдем шаатлыгын кабыл этемиз, Алла шаатлыгы болса оннан уллырак, неге десе ол – Алладынъ Оьз Улына берген шаатлыгы.

¹⁰ Алладынъ Улына ынанганнынъ оьзинде Алладынъ шаатлыгы бар. Аллага ынанмаган Оны, оьтирикши деп, санайды, неге десе Алладынъ Оьз Улына берген шаатлыгына ынанмайды.

¹¹ Сол шаатлык бу: Алла бизге оьмирлик яшав берген эм сол яшав – Онынъ Улында.

¹² Оьзинде Алладынъ Улы болганнынъ яшавы бар. Оьзинде Алладынъ Улы болмаганнынъ яшавы йок.

Оьмирлик яшав

¹³ Мен бу затларды сизге – Алладынъ Улына ынанганларга оьмирлик яшавынъыз бар экенин билинъиз деп яздым.

¹⁴ Алладынъ алдында таьвекеллимиз: биз Алладынъ ыхтыярына келисли бир зат тилесек, Ол бизди эситеди.

¹⁵ Биз не зат тилесек те, Онынъ эситкенин билемиз. Сога коьре, Алладан не зат тилесек те, соны алатаганымызды да билемиз.

¹⁶ Ким кардашынынъ оьлим аькелмейтаган куьнага киретаганын коьрсе, сол онынъ уьшин дува этсин. Дувасы ман кардашына яшав берер. Бу тек оьлим аькелмейтаган куьна эткен аьдемлер уьшин болар. Оьлим аькелетаган куьна да бар, онынъ уьшин дува этсин деп айтпайман.

¹⁷ Аьр туьрли яманлык – куьна, ама оьлимге аькелмейтаган куьна да бар.

¹⁸ Алладан тувган аьдем куьна этпейтаганын билемиз, неге десе тек Алладан тувган (Иса Масих) сол аьдемди саклайды, ибилис ога тийип болмайды.

¹⁹ Биз Алладан болганымызды билемиз, соьйтип те сав дуныя ибилистинъ юргистуьвинде болганын да анълаймыз.

²⁰ Тагы да билемиз, Алладынъ Улы келген эм Акыйкатты таныр уьшин бизге акыл берген. Биз Акыйкаттамыз, Онынъ Улы Иса Масихтемиз. Ол – акыйкат Алла эм оьмирлик яшав.

²¹ Балаларым, оьзинъизди бутлардан сакланъыз!