Tito 3 - Wounaan Meu

Jãga wenʉrraju aai nʉ Ẽwandam iek ʉkha nʉm khʉʉn

¹ Tito, pʉch aig chi ʉkha durrum khʉʉnag deeu phʉʉrba jaaubá, mʉg jẽb gaai chi porkha thʉnʉm khʉʉn ipierraanaa ĩchab nem wajapham wawaagjã sĩi nem par daúa ooba amkhĩir.

² Amag ni dich khapeen iwiir ãbam eugarjã khaigba iekhapiba jaaubá, magnaa ĩchab sĩi khõinaa wenʉrranaa, thumaam khʉʉn dʉi o ajapha, chum khĩir masi dʉrdʉr aju khãyau sĩi dich khapeen daupii. Magta amag jaaubá.

³ Pua khaphʉ sim, warran maachjã bʉ̃ʉrjã khĩirjug chukhumjo aawai sĩi Ẽwandam ipierraajã khábata wenʉrrajim. Mag i ipierraajã khaba narr gaaimua i aar barju khʉdjã khaugba okhoo wenʉrrarr aawai sĩi mʉg jẽb gayam nem dichdeu khõchagagta ee wenʉrrarr gaaimua ich magʉmuapaita sĩi maach phẽethʉg wai nʉmjo naajeejim. Mag dich khaibag ee narr aawai dichta jũrr chikham khãaijã ʉ̃rpai am iigjeejim, chikham dʉi khujʉrpaim iekhau. Mag nʉm dʉi ĩchab õrau maach oomapha aawai ĩchab maach garmuajã dʉi am oomapha aajeejim.

⁴ Mag naajieb mamʉ Ẽwandam maach peerdʉ aaujemua ʉu ich Chaai pʉibarmua chadcha ichdeu õor dau aug khaug paraanaa jãsene simjã thumaam khʉʉnag khaphʉ apijim.

⁵ Mag irua maach peerdʉ autarr chan nem ajapha wau wenʉrrarr gaaimuajã khabajim; irua maach peerdʉ autarran, sĩi ich garmua maach dau aug khaugwi ajim. Mag maach dau aug khaug nʉm aig, ich Ẽwandam Akharau maach pekau do badag barbapʉimjo thum chugpaabapäaiwaita, ya tag warr dich wenʉrraajerrjo khaba, jũrr maach khĩirjugta chi iiurig paapʉijim.

⁶ Magaagta Jesucristo maach peerdʉajem gaaimua Ẽwandamau ich Akhaar pʉijim, maach dʉi ogdʉba maach khaigper nʉrramkhĩir.

⁷ Mag, maach khaibag ee wetju arrta jũrr Ẽwandamau maach khaibag thum chugpaapʉiwia ich aar ober wenʉrrajujã maachig khaphʉ apijim.

⁸ Mua cha jaau chirʉmʉn chadcharam iekhau. Maguata muan pʉrʉgjã ich magta amag jaau nʉʉ apim khõsi chirʉm, ar Ẽwandam iek ʉkha durrum khʉʉnaujã ãba nem ajapha wau nʉm gaaipai durramkhĩir. Pãrau magta amʉn chadcha ʉu kherʉm, õrau nemdam ig nʉmjã pãrau par daúa ooba naawai.

⁹ Mamʉ oob pua sĩi ar maadeu igmapham iek gaaimua chan par pʉch iphithur õor ipeer ahau iekha chitam. Oob sĩi jooingarm khʉʉnau nem waaujerrpai ig iyʉʉ am khõchgau pʉch phidagta warag werba sĩsiu am. Oob sĩi Moiseeu ley phã pʉatarr gaai nem jaau sĩsidʉm iek igam khõchgaupai warag pʉch khapeen dʉi khĩir jʉ̃adʉbaademua meeukha chitam. Jãg nʉmua chan pod maadeu õrag Ẽwandam iek ʉkhapi aubam. Mag ʉu khaba sim.

¹⁰ Ãbmua khãijã pãach ee Ẽwandam iek maachdeu ʉkha nʉm chaaur jũrr parhooba jaauwai mag woun wawibá. Mamʉ par pʉchdeu biek numí wawibarm khãijã bʉ̃ʉrjã pʉch iek ũrba abaawai, pãach Ẽwandamag jeeu nʉm aig magʉm khʉʉnag pãachdeu nem wau nʉm oob amag waupimiet.

¹¹ Magʉm khʉʉnaun amach odegpai sĩi ich mag nem khaigba jaau wenʉrraju khĩirju naawaita mag wenʉrrʉm. Mag amach wawitarrjã ũrba warag pekau wau wenʉrrʉm gaaimua maadeu khaphʉ nʉm, ichiita Ẽwandamau am gaai mas ab khaba mas deeju.

Dich khapeenau nemdam ig nʉm oowai sĩi par daúa oobaju aai nʉm

¹² Tito, mʉchdeun Artemas khabamʉn Tíquico khãijã pʉ aar pʉiju khĩirju chirʉm. Ãb khãijã pʉch aar barbaimaawai ichiita mʉ oon beeb khaba Nicópolis phobor ee mʉ oobahur; jãig mʉ chiraju. Mʉg noseg jaran ich jãigmua ogdʉba chiraju khĩirju chirʉm, deeu dochʉumie burr nʉm ora.

¹³ Ĩchab abogado Zenas juag oonaa Apolos juagjã oobá. Am biekkhaju aawai, pʉch paarmua thachdamjã jʉr deewi amau nemdam igju thumaa khĩirjunaa phedeebapʉi.

¹⁴ Thum ar maachjo Ẽwandam iek ʉkha durrum khʉʉnaujã ĩchab magta dich khapeenau nemdam ig durrum oowai sĩi par daúa ooba aju aai nʉm. Magta maadeu o ajapha chikham juag oo wenʉrrʉmʉn, magan ʉu maach par khábata wenʉrrʉm.

Pablo khapeen salud

¹⁵ Tito, mʉg iekdampai ajim pʉrʉg mʉg ẽsap gaai phã deepʉim ig chirarr. Mʉig maach khodnaan mʉ dʉi nʉm khʉʉnaujã amach thumaam khʉʉnau pʉrʉg salud deepʉi nʉm. Maach khodnaan pʉch aar cha maachdeu ogdʉba ʉkha wenʉrrʉm iek gaaimua maar mau nʉm khĩirjuwia ig durraajem khʉʉnagjã ĩchab maar salud deebá. Mʉʉn ãba Ẽwandamagta pãar kõit jeeu chiraajem, pãar dʉi ogdʉba ich mag pãar thʉa wai nʉrramkhĩir. Ayoo kake, Pablo