Tito 2 - Wounaan Meu

Jãga õor wawiju aai nʉ

¹ Tito, pʉchdeu õrag nem jaauwai ar chadcha Ẽwandam iek chaar thãraucha ʉkhaajem khʉʉn wenʉrraajemjota amag wenʉrrapi jaaubá.

² Jooin wawiewai donnaanjo parhoob nem wauju khãyau ajapha khĩirjunaata nem waupi jaaubá amag. Mag nʉm dʉi ĩchab khĩir masita apibá, õrag amach okho amkhĩir. Magnaa ĩchab mʉg Jesucristo iek maachdeu ʉkha nʉm gaaijã ubʉ wenʉrrʉm dʉi thumaam khʉʉn kha khõsinaa ĩchab phithurg waauwaijã khĩir thũu ãwaat khaphʉ ãwatpi jaaubá.

³ Ich agjo ũanaanagjã chadcha Ẽwandam iekpai ʉkhanaa irigpai jeeujem khʉʉnjota wenʉrrapi jaaubá, seunem nem ĩgkha nʉrrjee khaba, nag pigjã khaba. Magju khãai amag agpierraata wenʉrrapi jaaubá, chaainpaim khʉʉnau mag oowai amjã ich agjota wenʉrraju aai nʉm a khap amkhĩir.

⁴ Magnaa ĩchab amach khãai chaainpaim khʉʉnjã wawie khaphʉta wawipi jaaubá, amach jaain daupiinaa chaainjã jãsene amkhĩir;

⁵ mag nʉm dʉi ĩchab nem waauwaijã khĩirjug paraa nem waunaa, deeum emkhooi dʉijã oob pʉpʉr aju khãyau ich jaaijã ichdeuta khaphʉnaa degam nemjã ichdeuta thum khaphʉ amkhĩir; magnaa ĩchab thumaam khʉʉn dʉi o ajaphanaa ich jayau nem mag aawai ipierraa aa khaugamkhĩir. Magta amag pʉch ipaarmua wawipi jaaubá; magbaawai ni ãbmuajã Ẽwandam iek maadeu ʉkha nʉm igwia khaigba iyʉʉ abaju.

⁶ Ich agjo chi emkhooin agtha chaainaam khʉʉnagjã ajapha khĩirjunaata nem waupi jaaubá, dau phiphirag chukhu.

⁷ Mamʉ am mag wenʉrramkhĩran, pʉchdeujã pʉch chitʉmpierr ajapha nem waunaa agpierraata chitá ĩchab. Ẽwandam iek jaauwaijã chadcha nem agchata jaaubá, bʉ̃ʉrjã ibʉʉr wauba,

⁸ Cristoou jaaupi simjo iek ajapha iekhamamua. Maagwai ãbmuajã pʉ iekhatarr seunemeg phebaju. Mag nʉm dʉi ĩchab cha maachdeu Ẽwandam iek ʉkha nʉm igwia, ar warag chaaur iekhaajem khʉʉnaujã amachdeu pod pãar eugar khaigba iekhaju ooba aawai warag jaauju khaugbaju.

⁹ Ar sĩi chikham chogkha par phidkha nʉm khʉʉnagjã ĩchab amach patronnaan ipierraanaa amau khõsi aajemjota nem waupi jaaubá, nem jaauwaijã waumaaugau dʉi ʉkha ʉkha aba.

¹⁰ Amag wir aig amach patronnaan nem jĩgkhapiba jaaubá. Am nem jĩgkhaju khãyau warag amach patronnaan nemjã amach chi mor khʉʉn denjo ajaphata waupi jaaubá, maagwai mag nem jaauwaijã degolp amach meer am nem aair abaju khãijã a khĩirjuba nem jaaum khõsi jaaumkhĩir. Õrau pãar mag oowai, “Ãa chadcha jãkhʉʉnau ʉkha nʉm iekhan chadcha nem ajaug kherʉm” aju, Ẽwandam maach peerdʉajem iek maachdeu ʉkha nʉm igwia.

Khani Ẽwandamau maachig khaphʉ apiejẽ

¹¹ Ẽwandamau ichdeu õor dau aug khaugaag ich Iewaa pʉijim, mag pʉibarm gaaimua maach thumaam khʉʉn ʉu peerdʉju aai nʉm a khap amkhĩir.

¹² Mag ich garmua maach peerdʉ awaag maach dau aug khaugtarrpí, jũrr maadeu dich khĩirjug khaigbam thum isegnaa mʉg jẽb gayam nem sĩi dich o khõchagjã warre werba sĩuju aai nʉm, jũrr ajapha khĩirjunaata nem waunaa õor dakhĩirjã agcha wenʉrrʉmua ãba Ẽwandamagpai ichdeu khõsi simjo jeeu wenʉrraag.

¹³ Jesucristoou maachig beeju a jaau pʉatarr ag ed pa nʉm ora, maachin ich magta onee i nʉ wenʉrraju aai nʉm, chadcha mag i beeju khaphʉ naawai. Ich beem edan edau bʉ wʉʉ jẽer urumjo ooimʉta dau daau maachig ich oopiju. Maata maach Ẽwandam anaa maach peerdʉ aaujem Jesucristoou.

¹⁴ Ich mag Jesucristota maach kõit ʉdʉraa ich thõopijim, magbarmua maach khaibag thum chugpaapʉiwia maach peerdʉ awaag, mag peerdʉ auwia ya ich den chaarkha nʉisiewai jũrr ãba ich atheepaita nem ajapha waum khõsi wauju khĩirju wenʉrramkhĩir.

¹⁵ Tito, cha mʉchdeu pʉchig jaau chirʉmjoo mʉ imeerba ich mag jaaumamua am wawibá. Pʉchdeu mag jaau sim ũrba nʉm khʉʉnag warre meeurrau sĩubá, bʉ̃ʉrjã pʉch ipeer ahau apiba. Pʉchta am por aawai puata amag mag iekhaju aai chirʉm. Oob pʉch igwia iwiir ãbamʉgjã, “Pua chan marag mag iekhaju khaba simta mag iekha sim” apim.