Tito 1 - Wounaan Meu

Salud

¹ Mʉʉn Pabloou, Ẽwandam chog anaa ĩchab Jesucristoou ich i jaaumkhĩir jʉr autarr. Magtarr aawai mʉ phidagan, ar ich Ẽwandamau jʉr aumam khʉʉnag warag i iekta ʉkhamkhĩir amag jaau nʉmʉu, mag jaaumam gaaimua chadcha Ẽwandam iek maachdeu ʉkha nʉm chaarta thumaam khʉʉnau khaugphomamkhĩir.

² Mag maachdeu ʉkha nʉmʉn, ʉ̃gthar paaukhabaimaawaijã ich magta Ẽwandam dʉi maach iiu nʉisiju a jaau simʉu. Mag maachig ich dʉi ich mag wenʉrrapiju a jaautarran, ich Ẽwandam bʉ̃ʉrjã seu chukhu khitʉmuachata mʉg jẽb ompaaju nawe mag jaaujim.

³ Magtarr aawai ya ĩs ewag pawiata õrau i iek jaau durrum gaaimua mag iek thumaam khʉʉnau ajapcha khakhapdo pamam. Magua mua ich mag iekta jaau chitʉm, mag jaaumkhĩirta Ẽwandam maach peerdʉajemua mʉ jʉr auwi pʉitarr aawai.

⁴ Tito, muata mʉg ẽsap pʉrʉg phã deepʉi chirʉm. Maach numiim khʉʉnau ãbam iekpai ʉkha wenʉrrʉm gaaimua pʉjã ĩchab mʉch chaaijo ig chitaawai, maach Aai Ẽwandamag jeeunaa maach Por Jesucristo maach peerdʉajemʉgjã jeeu chirʉm, amachdeuta pʉ dau ee aug khaug paraanaa pʉ ʉu wai nʉm dʉi ĩchab pʉ khõinaa wai wenʉrramkhĩir.

Chijãgʉm wounaanta iglesia ee chi porkhamkhĩir jʉr auju aai nʉ

⁵ Ar dojãrr Creta phʉram gaai mua pʉ werpʉatarran, agtha nem inju pom thʉnaawai, magʉm thum inwia ĩchab phoborpierr chi ʉkha durrum khʉʉn nʉnʉidʉmpierr õor jʉr auwi chi porkhapimamkhĩir ajim, ich jãg mʉchdeu pʉchig jaau pʉatarrjo.

⁶ Mag Ẽwandam iek ʉkha nʉm khʉʉn porkhaju wounan thumaam khʉʉn dakhĩir ajaphata nʉrraju aai sim, magba akhiin õor dakhĩir parhooba aawai, jũrr ichigpata bigaaum khʉʉnau iekhakha aju. Mag chi porkha sim khʉʉn ʉʉi ãbpaita paraa aju aai sim. Chi chaainaujã ĩchab Ẽwandam iek thãraucha ʉkhaju aai nʉm. Maagwai nem bʉ̃ʉr abarm gaaimua õrau am eugar khaigba iekhaba ni ãbmuajã am igwi, “Jãkhʉʉnan chi dau loknaanau; amachig nem jaauwaijã dʉita warag ʉkha ʉkha sĩerrjeem” abaju.

⁷ Chi ʉkha durrum khʉʉn porkha sim wounan ãba Ẽwandam atheeta phidkha sĩewai thumaam khʉʉn daar agchata nʉrraju aai sim, ichta ʉ̃rpai chirʉm awia bithurgam khʉʉn iek ũrmaphajã khaba, khĩir khʉʉukhakharrso khaba, nag pig khaba, dich khapeen dʉijã khujʉʉrnem khaba, ni sĩi nemdam bʉ̃rʉʉm wau nʉm paarjã ãba phatkhonta ahau ajujã khĩirjuba.

⁸ Magju khãai õor ich aig beewaijã, ich aig jẽerpim khõsi jẽerpinaa, thumaam khʉʉn dʉi o ajaphata nʉrraju aai sim. Magnaa ĩchab sĩi donjo parhoob nem wauba, Ẽwandam dau na nem agchata waunaa ãba Ẽwandam khõchagpierrpaita nʉrraju aai sim, sĩi dich khõchagpierr aba.

⁹ Maach peerdʉajem iek ichdeu khaugtarr gaaita warag wʉrppa aju aai sim, tagam khʉʉnagjã iek ajapha iekhamamua wawie khaphʉnaa, cha maachdeu ʉkha nʉm iek igwia warag chaaur iekhamaajem khʉʉnagjã ajapha jaau khaphʉ jaaumamua Ẽwandam iigta phũrreu awaag.

Nem parhoob jaau wenʉrrʉm khʉʉnag ikhʉaba iekhaju aai nʉm

¹⁰ Pua khaphʉ sim, pãach eepaijã ar amach wawiewai ũrba warag chaaur ʉkha ʉkha aajem khʉʉn khapan thʉnʉm. Makhʉʉnan sĩi nem maadeu igmaphamta jaau wenʉrrʉmua warag õor khũgur wenʉrraajem. Mamʉ ʉ̃rcha mua mag jaau chirʉmʉn, ar chi ʉkha nʉm khʉʉnan amach mor gaai dauchachmaju aai sĩsidʉm a jaaujem khʉʉn igwiata mag chirʉm.

¹¹ Jãgʉm khʉʉnan i khõorjʉ̃ sĩumaju aaita sĩsidʉm. Magba aawai sĩi phatkhon paarpam khõchgaupai jãg nem jaauju aai khabampa jaau wenʉrrʉmua õor di enter khũgur pʉamaajerram.

¹² Ĩchab pua khaphʉ sim, Cretapien amach jãg chitheem gaaimua amach eepai ãb Ẽwandam i jaaumie gaai thʉ̃r wai narrau am igwia, “Cretapien khai nem seunemnaa nem khaibag saakienjota sĩerrjeem; magnaa sĩi khuseugnaa degpai thach bipom khoju appaita khaphʉ sĩerrjeemgui” ajim.

¹³ Chi mag iekhatarr wounaun chadcha ag eyaata iekhapʉijim, am chadcha ich magta sĩerrjee aawai. Maagwai mua pʉrʉg, ikhʉaba iekhabá a chirʉm, maach ipierr Ẽwandam iek ʉkha durrum khʉʉnag cha maadeu ʉkha nʉm iek eepai agcha wenʉrramkhĩir;

¹⁴ maagwai judionaanau amach khĩirjug eepai ompaawia parhooba am eugar nem jaau wenʉrrawiajã magʉm khʉʉn iek asekasba, ni ar maachjo Ẽwandam iek chaar ʉkha narrta iseg pʉawia parhoob wenʉrrʉm khʉʉnau nem waupi jaau nʉm khʉʉnagjã magʉm khʉʉn ipierraa am ugua. Makhʉʉnau jaauwai nem parhooba kho nʉmua wa nem parhooba pʉrbarmua khãijã Ẽwandam dau na maach ãarjem a jaaujem.

¹⁵ Mamʉ ar khĩirjug wajapha wai nʉm khʉʉnag chan mag khabam, nem thʉnʉm thum ajapha thʉnʉm. Mamʉ ar Ẽwandam iek ʉkhaba ni khĩirjugjã ajapha khaba nʉm khʉʉnag chan, bʉ̃ʉrjã nem ajapham chukhum, amachdeu khaigba khĩirju nʉm gaaimua sĩi khĩirjug memerkhomjo sĩsid aawai.

¹⁶ Amachdeupain aman Ẽwandam denkha nʉm aajem; mamʉ amach nem wau nʉm gaaimua merag chukhu sĩerrjeem, sĩi par iiupaita mag nʉrrjeem aawai. Amach mag wenʉrrʉm gaaimua õraujã am kha isee aajem. Ʉkha nʉm anʉmta warag Ẽwandamau nem waupi jaau sim ichaaurta ʉkha ʉkha sĩerrjeem. Jãgʉm khʉʉn chan bʉ̃ʉrjã serbiibata sĩerrjeem nem ajapham wawaag.