Santiago 5 - Wounaan Meu

Riknaanag amach khĩircha jaautarr

¹ Riknaan, mʉ iek ũrbat: Ĩsin chad jũrr pãragta mʉ iekhaagpam. Ẽwandamau mʉg durr i agkham ed pãach gaai jua khʉaba deeju khĩirjuwia icharaucha bĩebat.

² Ĩs pãrau pãach phatkhonta ig nʉm, mamʉ mag simʉn, Ẽwandamagan sĩi nemmíjota sim. Pãrau jãg khajũa wajapha jũa nʉmʉn, jãan irigan sĩi nemchaainau thʉrrkhich simjo bʉ̃ʉrjã maadeu nem igbata sĩsidʉm.

³ Pãrau jãg phĩr phatkhon dʉi wai nʉmʉn, irigan jãan sĩi jierr chi sõsphemjo baleebata paaukhamam warag. Jãg pãach phatkhon baleeba paaukhamamjo, pãachjã mʉg atag paawai ag dʉi okhoob khaba okhooju. Pari mag simʉgta, ya mʉg maach i agkhaju khãai khapan khaba waaurmam eejã, warag pãrau magʉmʉg eenaa nem pom paarpa aujuuta ẽkhaajem.

⁴ Mamʉ pãade mʉ iek ũrbat: Pãach phatkhon ʉʉrkham khõchgauta pãrau õordam pãach phidag ee phidkhapiejem khʉʉnagjã aai phagba sĩerrjeem. Maagwai mag pãach phidag ee phidkha durraajem khʉʉnauta pãachdeu amach dʉi maagjem jũrr, Ẽwandamag pãar gaai jua khʉaba deepi jaau nʉm. Amau mag jeeu nʉm chan maach Por Ẽwandam chi jua thierriu ũr sĩewai par okhoopibam.

⁵ Chadcha mʉig eegar pãachigan pãar nem ajaauga thʉnʉm, pãachdeu nem ig nʉmjã thum paraanaa pãach khõchagpierr nem wau nʉmua. Mag pãach khõchagpierr nem wau nʉmuan, di eegarm nemchaai thõopäaig õtpaapi nʉmjo, pãachdeupaita pãach õtpaa arrum, Ẽwandamau ichdeu mʉg durr i agkham ed sĩi irig pãach thõopʉimkhĩirjo.

⁶ Pãachdeuta õordam iekkhõr chukhu amach kõit iekhajupaijã jaauju khaugba khitheem khʉʉnjã khaibag waupi jaaunaa thõojã thõopimaajem, pãachta ʉ̃rpai nʉm awi.

Phithurg aauwai warag Ẽwandamagta jeeunaat

⁷ Hermanonaan, Ẽwandamau magʉm khʉʉn gaai jua khʉaba deeju khap, ich jãg amau pãach dau aphʉʉ wai naawiajã magʉm igba maach Por Jesucristo deeu beejuuta nʉbat. ¿Pãrau ooba aajẽ, jãga nemjĩir jĩirjem khʉʉnau amach nemjĩirdam phierraag noseg ig nʉmjã da cheba aawai ichiita nʉajẽ?

⁸ Pãachdeu ʉkhatarr iek gaai ubʉ nʉmuata pãraujã ich agjo maach Por Jesús beeju nʉbat; í barcheju ed chan ya pom waaurba sim.

⁹ Khodamnaan, pãach mag phithurg au wenʉrrawiajã oob magʉm gaaimua jũrr pãach eepai chi parpem dʉita dau phuu amiet, eeu magʉm paar Ẽwandamau jũrr pãachigta “Pãrau jãgju khaba naajimwai” adukham. Mag bigaaum khʉʉnjã jaauju aai simʉn ich Ẽwandamau. Ichta ya beeimʉʉ sĩebahab, maach thumaam khʉʉnag agdaujo dichdeu nem waaujerrpierr jawaag.

¹⁰ Keena, pãade oobat: Warrgar Ẽwandam i jaaujerr khʉʉnjã maachjo chikhamnau dau aphʉʉ waunaa phithurg aupiejeejim, mamʉ magʉmjã ʉu amau ãwatpäaijeejim. Magtarr aawai maadeujã agjo am denjo jʉmju aai nʉm.

¹¹ Pãade khĩirjubat: ¿Ĩs ewagjã maadeu, “Jãg warrgarwejã phithurg au nʉmjã ʉu ãwatpʉi nʉm khʉʉnan chadcha Ẽwandam dʉi onee nʉm” aba aajẽ? Pãrau ũurjem, jãga jooi Job khararr meperau ajappha ich dau aug waupitarrjã ʉu ãwatpʉijĩ, maimua mag ʉu ãwatpʉitarr jũrr jãga maach Por Ẽwandamau õor dau aug khaug paraa khitaawai ʉu i eeg oojĩ. Ĩsjã maadeu makhʉʉn jooin denjo ãwatpʉi nʉmʉn, jãga irua maachjã eeg ooba abarju.

¹² Tagam nem mua jaau chirʉm ũrmapha awiajã cha mua jawaagpam chan oob par jʉ̃gʉupai ũrmiet keena. Õrau mag pãach dau aphʉʉ apiewai, ich agjo aju awi, oob sĩi aai khĩirjuba iekhamiet. Magju khãai pãach iekhaawaijã chadchata iekhabat. Nem wauju khai, warre wauju abat; wa waubam khai, ich agjo warre waubam abat. Mamʉ mag iekhaawaijã oob edjã igwi, mʉg jẽb igwi, wa deeum nem inag parhoobam igwia khãijã nem wauju a iekhamiet, eeu magba akhiin mag pãach iek gaaimuapai Ẽwandamauta pãach khaibag waudukham.

¹³ Pãar ee ãb khãijã mag phithurg au sim khai, okhĩirjuu aju khãai, warag Ẽwandamagta jeeubá. Wa jũrr ãb khãijã onee sim khai, Ẽwandamta thumeukharbá.

¹⁴ Ãb khãijã mor mas sim khai, iglesia eem chi pornaan thʉ̃rkhʉʉibá, ich kõit Ẽwandamag jeeumkhĩir. Magbaawai amau beewi chi aaunaan nemkhaúa kha phuur nʉm dʉi maach Por Jesús jua theeg tho nʉmua irigta jeeumaju, monaaupʉimkhĩir.

¹⁵ Mag pãachdeu jewaagpamjã chadcha monaauju khĩirjunaata jeeumʉn chi aaunaan chadcha Ẽwandamau monaaupʉiju. Mag monaaubapäaiwai ich pekau gaaimuata mag mor mas sĩerr khai, chi pekaujã chugpaapʉiju ich Ẽwandamau.

¹⁶ Keena, chadcha Ẽwandam na ajapha nʉm khʉʉnau irig jeeu nʉm khʉʉn iekhan chadcha ichdeu ʉkhaajeewai, muan pãragan, pãach pekau wai nʉmjã agdaujo dich khapeenag meerba jaaunaa jũrr agdaujo dich khapeen kõitjã Ẽwandamagta jeeubat a chirʉm. Magnaata pãrau jeeumʉn, mor mas khekhedʉm khʉʉnjã monaauju.

¹⁷ Mʉ seukha chirʉm am ugua, pãade khĩirjubat: Pãrau ũurjem warrgar jooi Elías aajerr: Ijã ĩchab maach phithurg au nʉmjo phithurg au jẽedʉ khitaajeejim aajem; mamʉ mag khitʉmua sĩi warag Ẽwandamag noseg chepiba jeeubaawai, chadcha Ẽwandamau i iek ʉkhawi año thãrjup awi jãrr bʉ̃ʉrjã noseg cheba sĩsijim anaabá.

¹⁸ Maimua mag año thãrjup awi jãrr nʉm ee, deeu ichdeupai jeeumamua nosegdam chepi jeeubaawaita, Ẽwandamau noseg pom chepijim aajem. Magta ʉu ĩchab nemjĩirdamjã deeu khoju paarpajim aajem. Magua pãach Ẽwandamag jeeuwai oob sĩi pardeu khõs khãijã jeeu nʉm amiet.

¹⁹ Khodamnaan, ãbmiecha paawai pãade mʉ iek ũrbat: Ãb khãijã pãar ee maach peerdʉajem iek ichdeu ʉkha sĩerr isegwi sĩi parhoob ichdeu am aig nem wau nʉrrʉmta deeu ãbmua khãijã wawí auwi ũwaai khʉd ajaug ee phaibapʉimʉn,

²⁰ magan mag parhoob nʉrrarrau pekau pom sĩerrjã ʉu Ẽwandamag chugpaapi atham. Magbarm aig ĩchab Ẽwandamau mag woun gaai jua khʉaba deeju arrta ʉu ʉdʉʉr deepiba peerdʉ atham. Ayoo keena. Mʉgdam ajim pãrag jaaum ig chirarr. Santiago