Santiago 4 - Wounaan Meu

Parhoobam khʉʉnjo aawain Ẽwandamta iseg nʉm

¹ Ĩs mua pãrag jeeu ookhim: ¿Jãgwiata pãar jãg pãach eepaijã khõinaajã khaba iek phithuurga thʉnʉm dʉi, chikham dʉi khĩir masi dʉrdʉrnaa jũrr bebe aajerráma? Mua oowai jãan sĩi pãach thãar ee jãg pãachdeu nem waum khõsimpaita waum khõchkha thʉnʉm gaaimuau.

² Pãraun chikham nemta pãach den apim khõsi aajem aajem; maimua mag pãachdeu nem ig nʉm pod paarpaba aawaijã, par iekhaupai chikham thõojem akhiin, chadcha thõopʉikham a iekhaajerram anʉm. Pãach khãai bigaaum khʉʉndam puesto ajapcha khãijã wai nʉm oowai magjã khõchkhaba, jũrr pãachta garpabam aig chan nem pʉaba sĩerrjeem aajem. Magʉm gaaimuata pãach eepaita juurhi phiidʉ thʉnʉmjo thʉnaabahab. ¿Pari khan jãgwi mag pãachdeu nem ig nʉmjã pod paarpaba aajẽ? Ẽwandamag jeeuba aawaima.

³ Maimua mag ichig jeeuwaijã irua deeba aajem. ¿Jãgwi? Ya mag pãachdeu nem ig nʉm paarpabaadeewai agua sĩi pãach o khõchagpierr nem wawaagta ig nʉmjã ichdeu khaphʉ sĩewaima.

⁴ Pãran Ẽwandam iek ʉkha nʉm anʉmta, sĩi i iek ʉkhaba aajem khʉʉnjo jãg pãachdeu khõchagpierr nem wau nʉm gaaimua, ʉʉi jaai paraamta deeum dʉi sĩejemjota thʉnʉm. ¿Pãrau khaugba nʉ, pãachdeu mag amau nem wau nʉmta dʉi waum khõchkhaawai jũrr Ẽwandamta iseg nʉm? Ar sĩi amach khõchagpierr nem waaujem khʉʉn dʉita khapeerkhaawain jũrr Ẽwandam dʉita iekkhõr paarpa nʉm.

⁵ Mamʉ Ẽwandamau maach ich dʉipaita naapim khõsi sĩewai ich iek gaaijã, “Mua mʉch Akhaar pãrag dee chirʉm chan sĩi parhoobam khĩirjug auwi magʉm nem khaigbampa wau wenʉrramkhĩir khabam” a sim. (Zac. 8:2; Dt. 4:24; Éx. 20:5)

⁶ Mamʉ Ẽwandam maach dʉi o wajaug khitaawai, mag wenʉrramkhĩirjã ichdeuta maach juag oojem. Õor dʉi ich mag khitʉm igwi, ichdeupai ich iek phãpitarr gaai, “Ar mʉjã igba amach juapaaupaita wenʉrraajem aajem khʉʉn chan mʉchdeujã igba chitʉm” a sim. “Magarrau amach serbiibag khap mʉchdeu nem jaau chirʉm wawaagjã mʉch juapadam iigjem khʉʉnan chadau, mʉch garmuajã am juag oojem” a phãpijim Ẽwandamau. (Pr. 3:34)

⁷ Magua Ẽwandamagta ideu ichdeu ampierr apibat pãach dʉi. Magnaa meperag pãach thʉ aum ugua, thethe thierrkhabat. Mag ichdeu podba abaawai irua pãar ogkhawi pãar ogdʉ pʉaju.

⁸ Ẽwandamta pãach aig dʉi phẽs thʉ̃r ahau abat; magbaawai ichdeujã pãrau ich ig nʉm khap pãar dʉi ogdʉba nʉrraju. Pekaúa jua phʉisimjo sĩsidʉm khʉʉn, irigta ideu pãach pekau ʉpibat. Pãar jãg Ẽwandamau khõsimjo nem waum khõsinaa ĩchab parhoob pãach khõchagpierr nem waum iigjem khʉʉnjã, ideu irigta pãach thãar ajaug paapibat.

⁹ Pãach pekau pom nʉm khĩirjuwia, gaai machgau icharaucha bĩenaa idawaa abat. Jãg pãach pekau ee naajeewai oneenaa iukhaau aajerr khĩirjuwia, jũrr icharaucha o jãsehne bĩewia okhĩirjuu abat.

¹⁰ Deeu pʉaba muan pãragan, pãach serbiibag khap Ẽwandamagta chaigpa nʉmua pãach dau aug khaugpibat a chirʉm. Mag khaita pãar deeu ajaug paapʉiwi mʉg atag pawiajã thumaam khʉʉn dakhĩir irua pãar ajaug pheju.

Dich khapeen jaauju khaba nʉm

¹¹ Hermanonaan, oob dich khapeen eugar iek khaigba iekhamiet. Mag dich khapeen jaau simuan jũrr Ẽwandamau Moiseeg ich iek phãpitarr gaai dich khapeen kha khõsi api jaau simta warag serbiibag phenaa ichdeuta khapcha sim a sim. Mag sim aiguin mag iek gaai jaau sim khãai ich iekta ajapcha sim a sim.

¹² Mamʉ chadcha khaita ich aar auju wa khaita isegju a jaauju wounan ãbpaita sim; ma Ẽwandamau. Ich mag Ẽwandamauta mag dich khapeen daupii api jaau sim leijã deetarr aawai, ¿ichdeuta khapcha sĩebá? Magtarrta, ¿jãgwi maach agdaujopai thʉnʉm khʉʉnauta dich khapeen jaauju aai nʉ?

Dich juapaata tho iekhaju khaba nʉm

¹³ Pãar ar sĩi pãachdeu nem waum aig nem waaujem khʉʉn, mʉ iek ũrbat: Pãar iekhaawai, “Ĩs wa nan khãijã maach chum deeum phobor ee wetwi jũrr jamta año ãb phidkhaju” a iekhaajem, “phatkhon pom ganaag.”

¹⁴ Mamʉ mag nʉm chan pãach mag iekhatarr noramjã agtha monakha naaju wa ya meewi naaju khãijã khaugba nʉmta mag iekhaajem. ¿Pãrau jʉʉnthumie bau wejom ooba aajẽ? Mag bau wejoowi deeu nʉʉpai awi oowai, ¿chukkhu thʉnaaba aajẽ? Maachin jãgta khitheem; maadeu iwiir ãbmuajã dich thõju ed khaugbam.

¹⁵ Jãg pãach juapaaupaita nem thum waaujemjo iekhaju khãai, ¿jãgwi pãrau sĩi, “Maach Por Ẽwandamau khõsnaa maach monakha wai simʉn, maachdeu khĩirju nʉmjo wauju” aba aajẽ?

¹⁶ Pari magba pãrau chan pãach dajẽkhu khitheemjã khĩirjubanaa, okhar naspawi nem waujupata khĩirjuwia, pãachta warag tho iekhaajerram. Jãg dich juapaata tho iekha nʉm chan Ẽwandamau khõchkhaba sĩerrʉm, ichta tho iekhaju aai nʉm tho iekhaba aawai. Jãg nʉm khʉʉn chan amach mag nʉmjã oob pãrau Ẽwandamau khaugbamjo sĩi khĩir okhoopʉiju amiet.

¹⁷ Pãade ũrbat: Nem ajapha aju aai sim khaphʉ simjã wauba simʉn, magan mag sim aigjã warag Ẽwandamau oowai pekaukha ober sim.