Santiago 3 - Wounaan Meu

Jãga sĩerrʉ́ maach meukhĩir

¹ Hermanonaan, oob thumaam khʉʉnau Ẽwandam iek jawaag maestronaan khaju appaita khĩirjumiet. Pãrau khaugba narr khai, khap abat: Maach chi maestronaankha nʉm khʉʉnta maachdeu deeum khʉʉnag jaau nʉmjo agpierraa khaba wenʉrrʉmʉn, maach gaaita Ẽwandamau jua khʉabacha deeju.

² Maach chan iwiir ãbmuajã thumaa Ẽwandamau nem khõsim appaita wauba aajem. Ãb khãijã bʉ̃ʉrjã seukhaba chikham khĩir wa chikham eugar khãijã iekhaba aajeekhiin, magan mag wounaun ichdeu nem wau simjã thum Ẽwandam dau na ajaphata waau khaphʉ aajeekham.

³ Pãrau oowai cabaai pom sĩewiajã i i ee waaijʉ̃naa ewag eudʉawai, ¿dichdeu arram khõsimpierr arrba aajẽ?

⁴ Ich agjota sim ĩchab barcojã. Ideu par barco pom chiraju, chi phũjã nem theeg we thʉnaaju, mamʉ mag nem pom simʉn timondam bʉ̃rʉʉ khitʉmua chi capitanau ichdeu arrampierr pheerthʉpʉpʉig arrjem.

⁵ Ich jãgta khitʉm ĩchab maach meukhĩirjã. Oowai chan pom khaba khitʉm, pari mag simuan iek pooma iekha thʉnʉʉuju akhiin, iek pom maach jʉ̃gaag khabampa iekha thʉnʉʉuju. ¿Pãrau oowai õtdau khĩirdam bʉ̃rʉʉmuajã phʉajẽb pom khar chará ooichaar eem magwe orpʉiba aajẽ?

⁶ Ajapcharan maach meukhĩran ĩchab õtdau khĩrau. Maguata jãg õtdaúa ichdeu barmampierr phaamaajemjo, ichta benenjo sim, iek khaigbam iekhamamua maach pekau paarpapieg. Mag õtdau khĩirkha sim thõm ugua chi dosãtau ijeeuba phuphuakhamjo sĩewaita maach meebam aiguin maan ideu thõpiba ich mag phuu wai simjota sĩejem, warag parhooba iekhapieg.

⁷ Maguata pãade khĩirjubat: Õrau mʉg jẽb gaaim nemchaain khĩirpierr daumeerpaa aaujem: pabʉ eem nemchaain chi khõrpim khumjom, nem ichpan, nemkhõr, phũas eem ãwarrpa daumeerpaa aaujem.

⁸ Mamʉ dich meukhĩir chan ãbmuajã pod thʉbep auba aajem. Jãan pabʉ eem nem maach khoojem khãaijã ʉ̃rpainaa nem khaibagcha sĩerraawai, jãgua chan ʉdʉʉr ich daumeerpapiba, khierr ach denjo ich garmuata õor khaibag waaujem.

⁹ Mag sim meukhĩraupaita maach Aai anaa maach Ẽwandam tho iekhanaa, ich ag meukhĩraupai dich khapeenjã ãaukhanaa thõp iekhabaadep aajem, Ẽwandamau maach thumaam khʉʉn ich khĩir thegwiata ompaatarrjã khĩirjuba.

¹⁰ Ajapcharan jãg nʉm aiguin, ich ag iiupaita iek ajaphamjã iekhanaa iek khaigbampa iekhabaadep aajem. Khodamnaan, maadeu chadcha Cristo iek ʉkha nʉm khai, pod magju khaba nʉm.

¹¹ ¿Pãrau oowai ãbam dosĩg eepai do khopham joi au nʉm dʉi warre ãba do khiyaamjã joi aaujẽ?

¹² Ich jãg higo bʉ gaai olivo dau phierrba ni uva gaaijã pod higo phierrba aajemjo, dojã ierrmuata ich mag khiyaa oberche sim ee pod ich ag eemuapai do khop oberbam. Magua dich iekhaawaijã ãba iek ajaphampaita iekhaju aai nʉm.

Jãga thʉnʉ́ Ẽwandamau dee sim khĩirjug wai nʉm khʉʉn

¹³ Ãb khãijã pãar ee ichdeuta õor wawieg nem khĩirjug khaauga ichdeuta thum khaphʉ sim a khĩirju sim khai, magan chadcha ich mag sim bigaaum khʉʉnag khap amkhĩir agpierraanaa nem ajapha wau nʉrrʉmuata ich oopibá. Thumaam khʉʉn dʉi mag ich o ajapha simjã igba magba aajemjoo simʉn, magan chadcha i khĩirjug paraa sim.

¹⁴ Pari magba pãrau pãach thãar eepai khãijã pãachta jũrr chikham khãaijã ʉ̃rpai am khõsinaa pãachdeu nem jaau nʉmpaita ũrpim khõchgau õrag jaau nʉm khai, magan oob chadam iekta jaau nʉm awia pãachta ajapha nʉm amiet. Pãach mag wenʉrrʉm aig sĩi chikham khũgurta wenʉrrabahab.

¹⁵ Jãgʉm khĩirjug chan Ẽwandamau dee sim khabam, jãan sĩi ich mʉig eegarm khĩirjugpaiu. Jã sĩi dosãt khĩirjug khabahab; ichdeuta õrag mag khĩirjupi sim.

¹⁶ Maguata mag iwiir ãb warm khʉʉn khãaijã ʉ̃rpainaa ich iekpaita ũrpimjã khõsi aadephʉm aig, magʉm gaaimua sĩi warag nem khaigbamta parhooba amachdeu khõchagpierr waaujem.

¹⁷ Mamʉ jũrr ich Ẽwandamaucha khĩirjug deewi wai nʉm khʉʉn magba, am Ẽwandam na nem agcha wau nʉmua ajapha nʉm. Mag nʉm dʉi amau sĩi õor khõinaa apijuuta ẽkhanaa dich khapeenag athuucha nem waupi jaauba aajem. Amau jũrr warm khʉʉnau amach khĩirjugdam jaaum iigwaijã agjo ũrm khõsi ũurjem. Õor dau aug khaug paraanaa, iwiir ãbamʉgpaijã ee aba, chadchata iekhanaa nem ajaphata waaujem, amachdeu iekhaajemjo.

¹⁸ Ar mag khõinaa wenʉrram khõsi aajem khʉʉnan nem waauwaijã nem thum agchata waaujem, amach mag nem wau nʉm oowi bigaaum khʉʉnaujã amach denjo nem agchata waunaa khõinaa wenʉrramkhĩir.