Santiago 2 - Wounaan Meu

Iwiir ãbam khʉʉnpai daupii aju khaba nʉm

¹ Khodamnaan, pãrau maach Por Jesucristo ich Aai Ẽwandam dʉi ãba sĩerrʉm iekta ʉkhaajeewai mua pãrag magkhim: Pãrau pãach ee phatkhon paraam khʉʉn dʉipaita ajapchanaa jũrr aphʉʉm khʉʉndam dʉi aair aba aju khaba nʉm.

² Khanim nemjo pãar khapanaa culto ee nʉm; mag nʉm ee õor numí dubbaichem: ãb rik, maimua ãb sĩi dau aphʉʉ khitʉm. Chi rik khajũa wajappha ooihmʉ jũanaa jĩgpir gaaijã phĩr denta sorrtik phuphup sim.

³ Magbaawai mag oowia irig, “Mʉigta jupbá, mʉigta pʉ athee wajapcha sim” awia, irig sie wajapcharam gaai juppibarm. Maimua ãbakhai jũrr aphʉʉ khitaawai khajũadam jooiraa jũa khitʉm oowi jũrr irig, “Pʉdeu ich jampai bʉjãau sĩsí,” wa magbam khai, “Jãig jẽkhʉt oo chirsí” amʉn,

⁴ magan pãraun iwiir ãbam khʉʉnagpaita eenaa jũrr tagam khʉʉn kha isee nʉm. Mag nʉm aig pãrau pãachdeu ʉkhatarr iek gaai jaau simjo khĩirjuba, sĩi am khajũa ajapha jũa nʉm oo nʉm gaaimuapaita mag nʉm.

⁵ Cristo gaaimua khodamnaan, pãade mʉ iek ũrbat: Maadeu pod aphʉʉm khʉʉndam kha isee aju khaba nʉm. Jãg aphʉʉm khʉʉndamjã amachdeu maach peerdʉajem iekta ũrwi ʉkha naawai mʉig eegarweran aphʉʉ khithee awiajã paraam khʉʉn khãaijã wajapcha wenʉrramkhĩir ich Ẽwandamau jʉr autarr khʉʉn khabahab. Mag nʉm dʉi ĩchab mag ich daupiim khʉʉnta thum ich aar auju atarr aawai amjã ʉ̃gthar ich mag i dʉi wenʉrraju khʉʉn khabahab.

⁶ Mamʉ magʉmta pãachdeuta jũrr am kha isee aajem. ¿Pãrau khaugba nʉ, riknaanauta pãach dau ee aug khaugba nemdam bʉ̃rʉʉm atheejã pãach thet pʉpʉr aajem? ¿Amachdeu khabá ĩchab chi thethemnaan aarjã pãach arrnaa pãragta ʉ̃rcha phagpi jaaujem?

⁷ ¿Amach khabá Cristo igwiajã i jũur iyʉʉ sĩerrjeem? Mag Cristo iek ʉkhawi i denkha naawai pãach por choopitarrta, ¿jãgwi mag Cristo jũur iekhaajem khʉʉnagta pãrau ee aajẽ?

⁸ Pãrau Ẽwandamau ich iek phã sĩsidʉm gaai jaau simjo pãach khapeenta thumaa wir aig pãachjo daupii nʉmʉn chadau, chadcha ʉu kherʉm, Ẽwandamau ʉ̃rcha waupi jaau simta wau naawai.

⁹ Mamʉ mag i ipierr nʉm anʉmjã sĩi iwiir ãbpaita daupii aadephʉm chan, magan pãran warag pekauta wau nʉm. Mag nʉm aig mag i iek pãachdeu asekasba nʉmuapaita woun denjo pãar Ẽwandam dʉi kulp pom nʉmjã dawaa jaau sim.

¹⁰ ¿Jãgwi pãrag mag chirʉ́? Ãbmua khãijã pod Ẽwandamau Moiseeg ley deetarr thumaa ʉʉrkha auba ãb khãijã waaurpʉimʉn ichiita kulp pom sim, pod ley thum ʉʉrkha auba sĩewai.

¹¹ Pari maigjã ¿jãga mag ober sĩma? Pãade ũrbat: Ich ãbam Ẽwandamaupai, “Oob chikham thõom” anaa, “Oob chikham ʉʉijã waum” ajim. Pari magtarrta pua õor thõoba awiajã chikham ʉʉi waumʉn, magan ichiita pekaukha ober sim, mag irua ley jaautarr ichaaur abarm aawai.

¹² Pãrau khaphʉ nʉm, mag Ẽwandamau ich iek pãrag ʉkhapitarr chan sĩi pekaúgta ʉdʉʉr pãach ʉ̃rpapimkhĩir khaba, thumaam khʉʉn agdaujo kha khõsi amkhĩirta ich iek pãrag ʉkhapijim. Magtarr aawai, mag iek pãachdeu ʉkhatarrauta Ẽwandamau pãach jaauju khap, muan pãragan, iekhaawaijã agpierraa iekhanaa nem waauwaijã thumaam khʉʉn dʉi nem agchata waubat a chirʉm.

¹³ ¿Jãgwi mua pãrag mag chirʉ́? Maan Ẽwandamau ichdeu õor i agkham edjã ar dich khapeen dau aug khaugba aajerr khʉʉn chan agjo am dau aug khaugba isegju aawaita mag chirʉm. Magarrau ar dich khapeendam dau aug khaug paraa aajerr khʉʉnan chad, mag Ẽwandamau õor i agkham edjã amach khaibag waubaju khap, i ogkhaba naaju.

Chadcha ʉkha nʉm khai jãga aju aai nʉ

¹⁴ Keena, Cristo gaaimua khodamnaan, ¿khan ajaug sĩ pãrau khĩirjuawai, maadeu “Muan thãraucha Ẽwandam iek ʉkha chitʉm” aju, mamʉ mag simta Jooirau dich khapeen juag oopi jaau simjo khaba nem wau sim? ¿Pãrau khĩirjuawai ʉkha sim anʉmta mag nem wau sim woun chadcha peerdʉju khai?

¹⁵ Khanim nemjo woun ãb sim; ma, Cristo iek ʉkha kherʉm gaaimua maach khodkha sim. Mag simta khajũajã chukhu ni thachdamjã khoju chukhu kherʉm.

¹⁶ Mamʉ ya i ma nʉrrʉm oowia ãbmua khãijã irig, “Ʉu mawia biwaa chitá; oob jĩchagagjã pʉch gaai mas apim” a sim; mamʉ mag sim chan irua nem igjudamjã deepʉiba simta mamagkham. ¿Pãrau oowai mag ʉuta sĩ?

¹⁷ Ich agjota sĩebahab Ẽwandam iek ʉkha nʉmjã. Maadeu thãraucha ʉkha nʉm anʉmta dich khapeen juag oo nʉmua bʉ̃ʉrjã am dau aug khaugba nʉm chan, magan parta mag ʉkha nʉm anʉm.

¹⁸ Wa ãbmua khãijã, “Mua chan chadcha warm khʉʉn denjo nem ajapham wauba chitab mamʉ, mʉch thãar eepain chadcha ʉkha chitʉm” khãijã aju. Mamʉ mag khabam. Jãga mua khap abarju, chadcha irua mag ʉkha sim, Ẽwandam iek gaai jaau simjo ich khapeenjã dau aug khaugba simta. Ajapcharan Ẽwandamau jaau simjo mʉch khapeen dʉijã ajapha chirʉm gaaimuata mag ʉkha chirʉm aju aai chirʉm.

¹⁹ Pua khaphʉ sim, maach Ẽwandam ãbpai khitʉm. Pua mag khaphʉ sim aig nem ajaug sim. Mamʉ mag khaphʉ nʉmuapai pod ʉ̃gthar oberbam. Meperaujã khaphʉ sim, Ẽwandam ãbpaita sĩerrʉm; mamʉ amau ĩchab i ogkhaajem, amach gaai jua khʉaba aju khaphʉ naawai.

²⁰ Khĩirjug chukdam, khaphʉ abá: Ẽwandam iek thãraucha ʉkha nʉm anʉmjã ichdeu waupi jaau simjo wauba nʉm chan, chadcha ʉkha nʉm khabam.

²¹ Pua khĩirjuawai ¿khan gaaimua Ẽwandamau jooi Abrán khararrag chadcha i pekau chukhu arrjo chirʉm a jaaujĩ? ¿Ich chaai ĩgkhaba irig ofrendakha thõo deeju arr gaaimua khabajĩ? Ajapcharan ichdeu i ipierraa arr gaaimuama.

²² Pʉde khĩirjubarí: Abranau mag wauba arr akhiin, ¿jãga irua Ẽwandam iek chadcha ʉkha chirʉm akhajĩ? Ẽwandamau ichig nem mag abaawaijã ich ipierraa arr gaaimuata Abranau chadcha ich iek thãraucha ʉkhaajerrjã õrag khap apijim.

²³ Mag ich ipierraa arr aawaita ag nawe Ẽwandamau irig, “Pua chadcha mʉ iek ʉkhabarm gaaimua pekau chukhu arrjo ʉu pʉ mua mʉch aar aub khaba auju” atarrjã par khabajim, chadcha thãraucha ich iek ʉkhatarr aawai. Magtarr aawai, Abranau mag ich chaai ĩgkhaba ichig deeju ẽkhabarm aigta õragjã khap apijim, mag par iiupai khaba thãrauchata ichdeu Ẽwandam iek ʉkha sĩerr. Mag nʉm dʉi ĩchab mag thãraucha ʉkhawia ich ipierraa arr aawaita, ich Ẽwandamaujã jooi Abrán warag ich khapeerkha aujim.

²⁴ Maigta pãrau oo naabá, Ẽwandamau ãb khãijã pekau chukhu arrjo sim a jawaag chan, sĩi thãrau ʉkha nʉmpai khabam. Ʉkha nʉm dʉi ichdeu waupi jaau simjo ich ipierraa nem waauwaita chadcha pekau chukhu arrjo sim a jaaujem.

²⁵ Ũan Rahab khahʉrrarr chi durpathierrmiejã ich agjota ajim ĩchab. Pãrau khĩirjuawai, ¿khan gaaimua Ẽwandamau ijã pekau chukhu arrjo ʉu i eeg oojĩ? ¿Israelnaan ich di aig jẽerpiwi am chig am ugua meraa phobor igaau jiir burrpʉiwia jũrr deeum khʉd gar pʉitarr gaaimua khabajĩ?

²⁶ Ajapcharan jãan mʉgta sim keena. Jãg maach meebaadeewai ya maach gaai tag maach akhaar chukhu aadem aig, ¿maach chi meemkha sĩsiba aajẽ? Ich jãgta sim ĩchab thãraucha Ẽwandam iek ʉkha nʉm anʉmjã. Dichdeu ʉkha chirʉm anʉmjo bigaaum khʉʉndam dʉijã nem ajapha waubam chan, magan maan chi thõmjo simta iiu sim a sim, thãraucha ʉkhaba simta mag ʉkha sim a sĩewai.