Santiago 1 - Wounaan Meu

Salud

¹ ¿Jãgpai nʉ keena? Mʉʉn Santiagoou, Ẽwandam chog anaa ĩchab maach Por Jesucristo chog. Durrpierr maach meeun judionaan Cristo denkha nʉm khʉʉn pãach nʉnʉidʉmpierr pãragta mua saludaa chirʉm.

Ideu Ẽwandamagta dichig khĩirjug deepiju aai nʉm

² Khodamnaan, nem thumaamua pãach khĩirpierr chachmawiajã warag oneeta abat.

³ Pãrau khaphʉ nʉm, mag prueba khĩir pogkhe pãach gaai burr nʉmuata mʉg maadeu ʉkha nʉm iek isegkhimjo aadep aawaijã magʉm gaaimuata ʉu warag juapá jãpmaajem, magʉm ãwaat khaugaag.

⁴ Mamʉ mag prueba ãwat wenʉrrʉmuata ideu Ẽwandamag pãach wajaug paapinaa pãachig khĩirjugjã deepibat, ichdeu khõsimjo nʉisieg.

⁵ Mamʉ magʉm prueba ãwataag pãar ee iwiir ãb khãijã mag ich Ẽwandamau khõsimjo aju khaugba sim khai, ichigta jeeubat. Magbaawai irua khĩirjug deemamua khaugpiju. Ẽwandamau nem deewai chan maach denjo mag, “Mua khachpaita deejujã” aba, ni chikham khĩir phʉʉrnaajã nem deeba aajem.

⁶ Mamʉ mag pãachdeu irig khĩirjug jeeuwaijã chadcha pãachig deeju khĩirjunaata jeeubat. Ar mag amachdeu jeeubarmjo deebaju khãijã khĩirju nʉm khʉʉn khĩirjugan sĩi phũasdau phũu parhoob ichdeu arrm aig arrjemjota sĩsidʉm.

⁷ Ar mag deebaju khãijã jewaagpam a khĩirjunaata jeeu nʉm khʉʉnau chan oob amachdeu jeeu nʉm maach Por Ẽwandamau deeju amiet.

⁸ ¿Jãgwi mag chirʉ́? Ĩs amachdeu nem wauju khĩirjutarrjã noram paawai jũrr deeum khĩirjugta au sĩerrjee aawaima, amachdeu jeeubarmpaita amachig deeju khĩirjuba. Mag khĩirjug ãba khabam gaaimuata pod Ẽwandamau nem khõsimpai waujujã aba sĩerrjeem.

⁹ Ãb khãijã mʉig eegarm khʉʉnau oowai serbiibanaa dau aphʉʉ khitʉm mamʉ chadchata Cristo denkha khitʉm khai, mʉg atag pawiajã Ẽwandamau ichig nem thum jʉ̃apiju khap, mag hermano onee abá.

¹⁰ Maagwai jũrr rik agjo Ẽwandam iek ʉkha sim gaaimua mʉig eegar ich phatkhon wai sim okhoowiajã, mag ich Cristo denkha simta mag phatkhon khãaijã ajapcha sim khap, onee abá. ¿Jãgwi mag chirʉ́? Riknaanan pamaarjota khithee aawaima. ¿Pãrau pamaar khiugphebaadem ooba aajẽ?

¹¹ Edau pes wʉʉbaadee, khiurbaadee, sĩi khʉʉijem. Mag khʉibaadee ooimʉ thʉnarrjã warre chi ooimʉg okhoojem. Riknaanjã ich agjota thʉnaabahab. Phatkhon warag paarpaju ẽkha nʉm ee meebaadee magʉm nem thumaa sĩi werpʉajem.

Khan jãgwiata nem khaigbam wauju khĩirjuajẽ

¹² Woun ãbmua mag prueba khĩir pogkhe ich gaai burr nʉmjã ʉuta dʉi juapadam ubʉ ãwatbapʉimʉn onee abá. Mag amʉn magan ich Ẽwandamauchata irig, “Ʉu chadchata pua jʉmpʉijim” awia, ich aar auwia, ich mag ich dʉi wai sĩsiju, thum mʉig eegar aawai ich daupii aajerr khʉʉnan warrgarwejã magta ich aar auju jaautarr aawai.

¹³ Mag prueba ãwat nʉm ee nem khaigba wauju khĩirjubaadeewaijã oob ich Ẽwandamauta maachig magʉm khĩirjupi sim amiet. Ẽwandamau chan nem khaigba waujojoopaijã khaba aajeewai maachigjã ichdeu chan irua magʉm khĩirjug deeba aajem.

¹⁴ Maachin nem khaigba wauju khĩirjug dʉi thaaba naawaita magʉm nem waum khõchkhaajem. Maguata magʉm nem wauju khĩirjubaadeewaijã sĩi wounagamjo ʉdʉraa dich eudʉ arrpiejem.

¹⁵ Mamʉ mag khĩirjubaademjã isegba wai nʉmuata jũrr pekaúg paajem. Maimua mag pekau maach gaai ajap thierrpa sĩsiewai jũrr maguata warre okhoom iek okhoopiwi Ẽwandamagjã maach isegpiejem.

¹⁶ Khodamnaan, mag prueba ee nʉm aigjã Ẽwandamauta mag nem khaibag wauju khĩirjug deejim awi oob wir aig pãachdeupai pãach khũgurmiet mag khĩirju nʉmua.

¹⁷ Ẽwandam edjã ee nem thʉnʉmpa wautarraun maachig nem thum nem ajapham appaita deejem. Ich chan maach mʉig eegarm khʉʉnjo cambibierrso khaba sĩerrʉm. Mag sĩewai prueba ee nʉm aigjã iruata magʉm khĩirjug deejim awi i gaai thʉju khaba nʉm.

¹⁸ Mag maach dʉi ajapha sĩerraawai ewag pawi agjo ich chaainkhaju khʉʉn khãaijã maachta nacha ich chaainkha aujim, ichdeu maach peerdʉ aaujem iek ũrpibarm gaaimua. Mamʉ mag ich chaainkha autarr chan maach garmua khaba, ich garmuata mag ich chaainkhapim khõsi sĩerr aawai ajim.

Par jʉ̃gʉupai ũrba Ẽwandamau jaau simjo aju aai nʉm

¹⁹ Khodamnaan, mʉg mua pãachig jawaagpam iek khĩir eyaa abat: Maachin thumaam khʉʉnta jʉ̃g ʉ̃rʉʉ aju aai nʉm, Ẽwandam iek jaau nʉm ũraag. Mag jʉ̃g ʉ̃rʉʉ naaju aai naab mamʉ, iekhaagpaawain ajapha khĩirjunaata iekhaju aai nʉm. Ẽwandam dʉi wa i iek gaaimua khãijã oob meeukhakharrso amiet.

²⁰ Mag meeukhakharrsota nʉm chan Ẽwandam najã ʉu khábata nʉm, ichdeu khõsi simjo khaba naawai.

²¹ Magua mua pãrag mag chirʉm: Jãg Ẽwandam na parhooba maach ãrpiejem nem pãach gaai sĩsidʉm thum warre isegbapʉit. Magnaan chadau khĩir machag chukhu Ẽwandam iek pãach thãar ee autarrta warag bãaupibat, ũr nʉmua. Jãg iekta nem jua theeg sim, pãar peerdʉ awaag.

²² Ich Ẽwandamau jaau simjo aag chan sĩi par jʉ̃gʉupai mag i iek jaau nʉm ũr nʉʉ aju khaba, chadcha ich iek gaai waupi jaau simjota aju aai nʉm. Magba nʉm chan magan pãran pãachdeupaita sĩi pãach khũgur wai nʉm, mag ũr nʉmpaita ʉu simpii awi.

²³ Ar maach peerdʉajem iek ũr nʉmjã ag gaai jaau simjo khaba nʉm khʉʉnan sĩi woun ãb khomariipai espheg ee ich khĩir oojemjota nʉm.

²⁴ ¿Jãgwi? Irua ich khĩir ootarrta, deeu ag khur nʉʉpai awia khĩirjuawai, khaugba sim jãga sĩejĩ i khĩir.

²⁵ Mamʉ ĩchab ar Ẽwandam iek amachdeu ũrbarmta khĩir okhooju khãai, warag wajapha khĩirjunaa ag gaai jaau simjo wau nʉm khʉʉnan mag amach nem wau nʉm gaaimua onee aju. Mag amachdeu ũr nʉmjã thum Ẽwandamau ichdeu waupim khõsim iekta jaau sĩewai i ipierraa nem wau nʉmua tag warramjo pekaúgta amach ʉ̃rpapiba nʉm.

²⁶ Ãbmua khãijã, “Mʉʉn culto waaupierr peerthʉba manaa ich Ẽwandamau jaau simjo chitʉm” a sim, mamʉ mag simta dich khapeen khaibag jawaag wa chikham khĩir iekhaag khãijã bʉ̃ʉrjã ithʉbepba sim chan, magan maguan ichdeupaita ich khũgur sim, Ẽwandamau waupi jaau simta wauba sĩewai.

²⁷ Maach Aai Ẽwandamau ich denkha nʉm khʉʉnag waupi jaau simʉn, wouchnaandamau wa khoopaa ʉʉinau khãijã nemdam ig nʉmjã audeenaa am okhĩirjuu aawaijã am khĩir jãsenkha nʉmʉu. Mag nʉm dʉi ĩchab sĩi parhoobam khʉʉnau nem waaujem nemjã wauba aajem khʉʉnta chadcha i denkha nʉm khʉʉnau.