Romanos 9 - Wounaan Meu

Jacob chaain ewagam khʉʉnta Ẽwandamau ich chaainkha autarr

¹ Aay keena, mʉch imeerba, maach meeun israelnaan parhooba aaidʉ wenʉrrʉm khʉʉn khĩirjuwia chadcha mʉ gaai masi chiraajem. Cristo denkha chirʉmuata mag iekha chirʉm. Mag nʉm dʉi ĩchab ich Ẽwandam Akharauta mʉrʉg jajaau aajeewai mʉchdeujã khaphʉ chirʉm, mʉch seukhaba chirʉm.

² Mʉch mag chirʉm gaaimua, maach meeun khĩirjuapierr mʉ thãrau pod ãwatbajujo aadep aajem, amau Cristo iek ʉkhaba naawai.

³ Mʉchdeu Cristo isegwia mʉchta i jua machgau dau aphʉʉ ich mag chitʉmua jũrr amta ʉu wenʉrraju khaphʉ akhiin, mua magʉmjã aba warag Cristoog mʉch gaaita jua khʉaba deepikham, am kõit. ¿Khan gaaimua mag chirʉ́? Pãach thumta chadcha mʉch meeun aawai mʉch khodnaanjo naawaima.

⁴ Maach israelnaanta ich Ẽwandamau jʉr autarr khabahab, ich chaainkha awaag. ¿Maach jooin dʉi khabajĩ, ichta am wetum na jʉʉnthumiejo khõrr jĩumamua edaarjã ĩchab am arar wʉʉ wai nʉrrarr? Maach atheeta ĩchab ich Ẽwandamau maach jooi Moiseeg ich iek phãpijim. Maach jooinag khabajieb, jãga irig jeeuju aai nʉ a jaaunaa ĩchab am chaain ewagam khʉʉn eeta õor peerdʉajemjã thaabaju jaautarr.

⁵ Maach jooin Abrán, Isá maimua Jacob ajierram, warrchajã Ẽwandamau jʉr autarr, am gaaimua ewag pawi maach meeun ompaa awaag. Ẽwandam Iewaa maach peerdʉ awaag wounag paawaijã mag jooi Jacob chaain ewagam khʉʉn eeta thaabachejim. Ich mag parhoobam chaaindamjo thaabachetarr wounpaita Ẽwandam aawai nem thum thʉnʉmjã ichdeuta khap sim. Magua, iita thumaam khʉʉnau ich mag mʉg atagjã tho iekhaju aai nʉm.

⁶ Pari mag maach peerdʉ awaag Ẽwandamau ich Chaai päaiwaijã, maadeu khaphʉ nʉm, maach meeunau chan wajap i igba, ãaur khʉʉnaupaita i igjierram. Magjieb mamʉ Ẽwandamau maach jooin dʉi ich iekhatarrjo abajim aju khaba nʉm. Ichdeu maach jooi Israelag, ajapcharan ich Jacoogpaima, maach meeun khapan apiju atarrjo, ichiita maach meeunan chadcha khapan thʉnʉm. Pari mag khapan thʉnʉm ee, thumaam khʉʉn chan Ẽwandam chaain chaar khabam, israelnaan awiajã.

⁷ Wajapcharan israelnaan anʉm khʉʉnan, ich jooi Israel khararr denjo wajapcha Ẽwandam iek ʉkha nʉm khʉʉnta chadcha israelnaan charau. Magua, jooi Abrán chaain ewagam khʉʉn awiajã, Ẽwandamau oowai, thum chan israelnaan chaar khabam. Ẽwandamau jooi Abranag, “Mʉg atagjã pʉ chaain khapan aju” ajim chadcha. Magtarr aawai jooi deeum chaai Ismael aajerr gaaimua agjo chaain paraa ajieb mamʉ, Ẽwandamau oowai, mag den chan i chaain chaar khaba, ãba Isá chaainpaita ewag pawiajã i chaain chaarkha nʉisijim.

⁸ Magua maadeu khaphʉ aju aai nʉm, Abrán chaain ewagam khʉʉn awiajã thum chan Ẽwandam chaain chaar khabam. Ãba ar Abrán khararr denjo ich Ẽwandamau nem wauju abarm ʉkha nʉm khʉʉnta i chaain charau.

⁹ ¿Pãrau khĩir eyaa nʉ, ich Ẽwandamau Abranag nem deeju jaautarr? Irua magjiebma Abranag: “Mʉg año urumuata Saraau pʉrʉg chaai oo deeju” ajim, mag chaai oobarm gaaimuata ich õorkhaju khʉʉn paarpaju igwi.

¹⁰ Mag, chadcha mag chaai Isá anʉm thaabawia ya jooipa sĩsiewai ʉʉi Rebeca anʉm dʉi pajim. Maimua ya Rebeca meísnaan gaai auwimʉʉ aadem ee,

^11-13 Ẽwandamau irig, “Pʉ chaain chi jooin aphobaadee chi naamta jũrr ich eeum chogkhaju” a jaaujim. Magju igwia ĩchab Ẽwandamau ich iek phãpitarr gaai, “Jacobta mua ʉ̃rcha daupii ajugui” ajim, “chi naam Esaú khãai.” Pari Ẽwandamau mag iekhaawai agtha amach ãd bi ee naajim, amau nem khaigbam wa ʉuum khãijã wauju nawe. Mag Ẽwandamau chi eeum Jacob dʉita wajapha aju atarran, chi Jacoou nem wajapha wautarr gaaimua khaba, warrgarwe ich Ẽwandamau i dʉita magju arr aawai ajim, Ẽwandamau ichdeu õor igbarmta iigjem a khap amkhĩir.

¹⁴ Mag Ẽwandamau chi naam dʉi magbanaa chi eeum dʉita magtarr aawai, ¿maadeu “Ẽwandamau sĩi parhoobata nem wau sĩerrʉm” aju aai nʉ? Pod mag iekhaju khaba nʉm.

¹⁵ Biek ãb ich Ẽwandamau Moiseeg magjim: “Mua chan sĩi õrau khĩirjuajemjo khĩirjuba, mʉch khĩirjugpierrta nem wau chitʉm” ajim. “Muan mʉchdeu õor dau aug khaugam khõsim khʉʉnta eeg oo chitʉm” ajim.

¹⁶ Ichdeucha mag sĩewai sĩi õrau amachdeu nem wau nʉm gaaimua wa amachdeu waupim khõsi nʉmjo khaba, Ẽwandamau ichdeu eeg oom khõsi oo sim gaaimuata am dʉi mag ʉu aajem.

¹⁷ Ichdeu mag nem waaujem igwia ĩchab ich iek phã sim gaai Egipto durram rey igwia magjim: “Pʉch thãar theegau mʉ ichaaur chirʉm gaaimua, pʉrʉg mʉch jua theeg oopinaa mʉg durr gayam khʉʉnagjã mʉch jua theeg khakhapdo amkhĩirta pʉ mua reikhapi chirʉm” ajim.

¹⁸ Wajapcharan Ẽwandamau mʉgta sim: Ichdeu dau aug khaug paraa am khõsim khʉʉnta dau aug khaaugjem; pari ich agjo ĩchab ichdeu thãar theeg apiju khʉʉnan warag thãar theegta apiejem.

¹⁹ Pari mua mag chirʉm ũrwia ãbmua khãijã, “Mamʉ ichdeu mag simta, jãgwi irua õor khaibag ee pʉibarju mag ich iek ũrba arr paar. ¿Ichiita amau ichdeu khõsi simjo wau nʉm khabá?” aju.

²⁰ Pari mag awiajã, ¿ichiita ich mag ober sĩebá? Maach khai agá sĩi Ẽwandam maachjom khʉʉnjo i jawaag. ¿Maach sĩi ichdeu ompaatarr khʉʉn khabá? ¿Pãrau oowai thũriu ich khatarrag, “Khanthee pua mʉ jãg khapʉijĩ” aju aai sĩ?

²¹ Chi thũr khamieuta ichdeu kham aig khaju aai sim ich jẽbeu. Sĩi thũrjom parhooba jua chogaagpai khanaa ãbam jẽb denpai sĩi thepjom khãijã ooimʉ khamaajem agjo, sĩi õor di chaauram khʉʉn beewaipai ag ee au khoog. Ich agjota nʉm maachjã: Ẽwandamau maach dʉi ichdeu am aig aju aai sim.

²² Mag sĩewai ichdeu khõsi simjo warre õor khaibag ee pʉikhiinjã, khaíu i ichaaur abarju. Pari magba ich jua theeg oopieg õor amach pekau gaaimua sĩi khaibag ee pʉiju aai sĩerrta, ich khĩir machag ãwat wai sĩejem.

^23-24 Ich agjo ĩchab ich wajaug oopieg maach chi thʉ̃rkha autarr khʉʉnjã khaibag ee pʉiba sĩi eeg oowai, khaíu i ichaaur abarju. Ichiita ich aar awaag ichdeu thʉ̃rkha aum aig thʉ̃rkha auju aai sim, judionaan wa judionaan khabam khʉʉn awiajã.

²⁵ Magua, mag judionaan khabam khʉʉnpa thʉ̃rkha auju igwi, ich Ẽwandamau Oseas khararrag ẽsap phãpitarr gaai jaauwai: “Warr mʉ õor khaba arr khʉʉnjã mʉch õorkha aumaju; maimua mʉchdeu daupii khaba arr khʉʉnjã ĩchab daupii aju” ajim Ẽwandamau. (Os. 2:23)

²⁶ Maimua ĩchab ich Oseas ẽsap phãtarr gaaipai agjo ich Ẽwandamau judionaan khabam khʉʉnag, “Pãar chan mʉ phobor khabam” atarrta, deeu ũwaai naspawi ichdeupai amag, “Pãarjã ĩchab ich mag iiu sĩerrʉm ag Ẽwandam chaainkha nʉisiju” ajim. (Os. 1:10)

²⁷ Pari jũrr Judionaan igwia, jooi Isaías khararrau magjim: “Jooi Jacob chaain ewagam khʉʉn khapan sĩi phũas igaaum mosdau khapanagjo thʉnaawiajã, thum chan peerdʉtkhaba, ãaurpaita peerdʉtkhaju” ajim,

²⁸ “mʉigmua atag maach Por Ẽwandamau mʉg durr i agkham ed tag ich khĩir machag ãwatba warre am gaai jua khʉabata deeju aawai.” (Is. 10:22-23)

²⁹ Ẽwandamau mag ãaur khʉʉnjã dau aug khaugba akhiin, ãbjã peerdʉbaju. Magju igwia ĩchab nawe ich Isaías khararrau mʉg phãjim: “Maach Por chi jua thierriu maach dau aug khaugwi maach jooin den chaain ewagam khʉʉnjã chukhu apitarr amuan, ĩsin maachin Sodomapien Gomorrapien dʉi arrjota ya chukhu aajeekham” ajim. (Is. 1:9)

Judionaanaujã ĩchab maach peerdʉajem iek ʉkhaju aai nʉm

³⁰ Ẽwandamau ich iek gaai mag jaau sĩsidʉm ũrwia maadeu khan abarjuma. Judionaan khabam khʉʉnau chan nem wajapha wau nʉm gaaimua amach peerdʉjujã ẽkhaba naajim; mamʉ Jesucristo amach kõitpa meetarr ʉkha nʉm gaaimua Ẽwandamau ĩchab amjã pekau chukhu arr khʉʉnjo apʉijim.

³¹ Mamʉ jũrr judionaanau magba, mag ley gaai jaau sim ipierraa nʉm paarta Ẽwandamau amach khaibag chukhu arrjo apʉijupii awi, ãba mag leita ʉʉrkhaju ẽkhaajeejim. Pari par mag ʉʉrkha auju ẽkhaajerrjã pod ʉʉrkha auba arr gaaimua, Ẽwandamau am pekau chukhu arrjo wajaug paapʉibajim.

³² ¿Khan jãgwi? Mag ley gaaipai naam khõchgau Cristo amach kõit meetarrjã igba, sĩi nem wajapha wau nʉm paarta Ẽwandamau amach pekau chukhu arrjo apʉijupii awiama. Amachdeu Cristo igba narr gaaimuata sĩi khʉdjã ee mokpor pom sim dʉita thẽubaimamjo ajierram.

³³ Õrau Cristo dʉi magju igwia, Ẽwandamau ich iek gaai jaauwai, “Mua woun ãb pʉi chirʉm” a sim “Jerusalén phobor ee. Ar i igba abarm khʉʉn atheen, maan sĩi warag ag gaaimua õor bʉheu suwi burrmkhĩir khʉdjã ee mok jiir simjota aju, chadcha amau i oowai mʉchdeu pʉitarrjã ʉkhaba i igbaju aawai. Mamʉ ʉu i isegba warag i au nʉm khʉʉn chan naspawiajã ũwaai amach daujã merag phebaju, wajaphata i dʉi nʉisiju aawai” a sim, ich Ẽwandamaucha, Cristo igwia. (Is. 28:16)