Romanos 8 - Wounaan Meu

Ẽwandam Akharau jaaumamjo wenʉrraag

¹ Mamʉ ʉu magba, maach ya Jesucristo iek ʉkhawi ich denkha nʉm khʉʉnau chan tag pekaúgta ich mag ʉdʉʉr dich ʉ̃rpai apiju khaba nʉm, mag pekau waaujerr paarjã okhoopimaaugau ya maach ich denkha naawai.

² Pari magaagan chi Ẽwandam Akharau maach ich Cristo denkhapi athamua mag maach okhoopiju arr jua eemua peerdʉ athaawaita mag pekaúgta maach ʉ̃rpai apiba aajem.

³ Wajapcharan mʉgta ajim: Moiseeu phã pʉatarrau pod pekau jua eemua maach khaigper aubajim, mag pekau maach dʉi thaabatarr gaaimua pod mag ley ʉʉrkha auba arr aawai. Pari Ẽwandamau magbajim. Ẽwandamaun ich Iewaachata maach wounaan khĩir thegwia pʉijim. Mag ich mʉg maach chi pekaupanjo khitajieb mamʉ, bʉ̃ʉrjã pekau waubajim. Mag pʉiwia maach khaibag kõit thõopibarmua, maach gaai aju arrta warag ich Chaai gaaita ʉdʉraa mas apijim, magbarmuata jũrr mag pekau maach dʉi jua theeg sĩerrta warre jua theeg chukhu apäaig.

⁴ Magta ajim Ẽwandamau, ichdeu ley deetarr gaai maachig waupi jaau simjo wenʉrramkhĩir. Magaag ya tag warr maach pekau ee wenʉrraajeewaim khĩirjugjo khaba, ich Ẽwandam Akharau waupi jaaumamjota nem wau nʉm.

⁵ Ar sĩi amach bi eem khĩirjug dʉipai bãauwi pekau wau wenʉrrʉm khʉʉnan, sĩi amach khõchagpierrta nem wauju khĩirju sĩerrjeem. Pari ar Ẽwandam Akharau jaau sim ipierraata nem wau nʉm khʉʉnan, ãba ichdeu khõsi simjota nem wauju khĩirjuajem.

⁶ Ẽwandam Akharagta ʉdʉraa dich dʉi ichdeu ampierr api nʉmʉn, khõinaa Ẽwandam dʉita ich mag wenʉrraju. Pari magba sĩi dichdeu nem waum khõsimʉgta ʉdʉraa ich mag dich gaai ʉ̃rpapimʉn, jũrr okhoom iekta okhooju.

⁷ ¿Jãgwi mag okhooju? Sĩi mag dichdeu nem khõsimʉgta ʉdʉraa dich gaai ʉ̃rpapinaa jũrr Ẽwandam ichaaurta nem waaujeewaima. Dich mag nem wau nʉm gaaimua i ipierraajã aba, wa mag i ipierraa aju ẽkhakhiinjã, ichiita podbaju.

⁸ Ar mag sĩi amachdeu nem khõchagpierrta nem waaujem khʉʉnau chan pod bʉ̃ʉrjã Ẽwandam oneeupi auba aajem, amachdeu nem wau nʉm gaaimua.

⁹ Pari pãar magba nʉm. Pãrau agtha mag sĩi pãach khõchagpierr nem wau wenʉrraba, ich Ẽwandam Akharau nem waupi jaau simjota nem waaujem; majã chadcha mag i Akhaar wai nʉm khai mamʉ. Pari ãbmua mag Akhaarta chukhu sim chan magan ma chan Cristo den khabam.

¹⁰ Pari chadcha Cristo pãar thãar ee sĩejem khai, pãach pekau gaaimua pãar moron jẽbeg paaukhawiajã, pãar akharan ich mag iiu sĩsiju, ya ich Ẽwandamauchata pãar khaibag chugpaawi bʉ̃ʉrjã pekau chukhu arrjo apʉiwia naawai.

¹¹ Chadcha mag Jesucristo phiriu autarr ag Akhaarta pãar thãar ee sim khai, magan mag pãar mor jẽbeg paaukhabarmjã deeu Ẽwandamau mag ich Akhaar pãar ee sĩejem gaaimuapai deeu phiriutkha auju.

¹² Jãan magau keena, cha mʉchdeu jaau chirʉmjo. Maachin chadcha Ẽwandam Akharagta ideu ichdeu ampierr apiju aai nʉm maach dʉi. Pari jũrr dichdeu khõchagpierr nem wawaag chan bʉ̃ʉrjã magju khaba nʉm.

¹³ Pari pãrauta ũrbamjo sĩi pãach khõchagpierrta ich jãg nem wau wenʉrrʉmʉn, pãran ichiita okhoob khaba okhooju. Mamʉ pãrau mag sĩi pãach khõchagpierr aju khãai, mag Ẽwandam Akharau pãach juag oo nʉm dʉi pãach garmuata warre podpʉpʉi amʉn chadau, magan okhooba ich mag pãar ʉu wenʉrraju.

¹⁴ Khaphʉ abat: Thum ar Ẽwandam Akharagta ʉdʉraa amachig ichdeu nem jaaum aig jaaupinaa i ipierr nem wau nʉm khʉʉnta chadcha Ẽwandam chaainau.

¹⁵ Mag ich Akhaar deebarmua ich chaainkha autarr chan, sĩi mʉig eegar chikham chogkha nʉm khʉʉnau amach patronnaan ogkhaajemjo ich okho wenʉrramkhĩir khabajim. Magju khãai mag ich Akhaarta deetarr aawai irig jeeuwaijã chadcha ich ag Akharaupai bʉ̃ʉrjã inag chukhu irig Aai ichepiejem.

¹⁶ Mag ich Akhaar maachig deetarrauta jũrr maachig jajaaukhamjo aajem, chadcha maach Ẽwandam chaainkha nʉm.

¹⁷ Mag chadcha i chaainkha naawai, ich Ẽwandamau ich aar paaukhabaimaa, maachig deeju a simjã chadcha deeju, magbaawai Cristo dʉi ãba maachdeujã nem thum wai naamkhĩir. Pari mag ich Ẽwandamau Cristo dʉi arrjo maach dʉijã wajapcha amkhĩran, ich jãg Cristo dau aphʉʉ mʉig eegar nʉrraajerrjo maachjã agjo i gaaimua dau aug au wenʉrraju.

Mʉg atag Ẽwandamau maach dʉi wajapha aju

¹⁸ Iin mʉig eegar aawain maachin chadcha mag dau aug wau wenʉrraju; mamʉ jũrr mʉg atag ʉ̃gthar paawaita wajapcha naaimaju khĩirjuawai chan, mag dau aug wau nʉmjã sĩi warag maadeu igbata sim.

¹⁹ Chadcha mag sim khap aag pãade khĩirjubat: Maadeu khaphʉ nʉm, mʉg durr gaai maimua edjã eejã nem thʉnʉm thum ya ĩs chan warr Ẽwandamau amach ompaatarrjo khaba thʉnʉm. Mʉg maach wounaan dau aug wau nʉmjo, ĩchab amjã waragta eegar paaukhamam. Pari maadeu khaphʉ nʉm ĩchab, am mag thʉnaab mamʉ, Ẽwandamau maach phiriutkha auwia ĩchab amjã deeu wajaug paapʉiju. Magua amachdeujã magju khaphʉmjo, Ẽwandamau maach ichdeu wajaug paatarr khʉʉn dʉi dau daau beejuuta wounaan denjo sĩi nʉ khodthʉnʉm.

²⁰ Warr Ẽwandamau mʉg durr ompaawai chadcha wajaphata waupʉijim, mag gaaimua õor phithurg chukhu wenʉrramkhĩir. Pari magtarrta mag Adán pekau gaaimua chi durrpata warre ãr jopjim. Mag ãr sĩsimjã ich khĩrau khaba, ich Ẽwandamauta magpijim. Mamʉ ichdeu khaphʉ sĩejim, ich mag khaigba sĩerram iek khaba,

²¹ ewag pawiajã deeu ũwaai ichdeupai aaunaanjo por khoreu athamua maach ich chaainkha nʉm khʉʉn dʉi ãba wajaug paapʉiju.

²² Maadeu khaphʉ nʉm, mʉg durran ʉʉi chaai awaagpaawai bi machgau idaau aadep aajemjota sim. Pari mag idaau thʉnaawi ya athaawai onee aadeejemjo, ĩchab mʉg durrjã cha ich simjo sĩerram iek khaba, ichiita ijã ĩchab deeu durr wʉjʉúg paju.

²³ Mamʉ ĩs mag mʉg durr appai khaba, maach ich Ẽwandam Akhaar wai nʉm khʉʉnpata gaai machag nʉm, Ẽwandamau da maach awaan beeba aawai. Magua maadeu jopkhaa i beepim khõsi nʉm, mag maach ich chaainkha ich dʉi thum ãba phe athaawai maach mor mʉg dajẽkhu khitʉmta tag meejã khaugba ich mag iiu nʉisieg. Mamʉ mag Ẽwandamau ya maachig ich Akhaar deetarr aawai maadeu khaphʉ nʉm, maach dʉi magju a simjã chadcha ichdeu jaau simjo aju.

²⁴ Chadcha maachin ya peerdʉwi nʉm. Pari mag mʉg atag ich Ẽwandamau maach dʉi wajapha aju a simjã ʉkha naab mamʉ, maach daúa chan agtha ooba nʉm. Pãrau khaphʉ nʉm, nem maadeu dich daúa ooju khĩirju sĩerr ya oobarm aigmua tag oom khõchag khaba aadeejem, ya dichdeu khĩirju sĩerrjo dich daúacha oobaawai.

²⁵ Mamʉ ich agjo mag dichdeu oom khõchag thʉnʉmjã chadcha agtha ooba sim khai, magan oobam aigjã nem pʉabaju. Magua, mag dau aug wau wenʉrrawiajã ãba Ẽwandamau mʉg atag maach dʉi wajapha ajuuta khĩirju wenʉrrʉm.

²⁶ Mamʉ mag khĩirju nʉm appaijã khaba, ich Ẽwandam Akharauta maach akhaardam kha thũu aadeewai ʉu maach akhaar juag oojem, magʉm phithurg waauwaijã ãwatamkhĩir. Magʉm gaaimua maadeu pod Ẽwandamag jeeuju khaugbam iekhau sĩi “¡Eh, Ẽwandam!” aawaijã, ich chi Ẽwandam Akharauta maach khĩirjug khaphʉ sim aawai, jũrr ichdeuta maach kõit warre ich Ẽwandamagchata jaaumaajem.

²⁷ Ẽwandam chi Ayauta maach khĩirjug khaphʉ aajeewai, i Akhaar maach ee simuajã mag maach khĩirjug igwia maach kõit nem jeeuwai, khaphʉ aajem khanta jaau sĩ. Mag, ich Akharaujã ichdeu khõsimjota jeeu sĩewai ʉkhab khaba i iek ʉkhaajem.

Phithurg ãwat nʉm gaaimuata Cristoou maach khõsi aajemjã warag khapcha pamam

²⁸ Maimua maadeu khaphʉ nʉm ĩchab, maach chi Ẽwandam khõsi nʉm khʉʉnan dau aug waauwaijã magʉm gaaimua warag mʉg atag paawai dich ʉu amkhĩirta ʉdʉraa magpiejem. Wajapcharan ich Ẽwandamau khõsi simjo maach chadcha ich iek ʉkhabaawai peerdʉ autarr khʉʉn dʉita mag ʉu aajem, chadcha maachta ichdeu thʉ̃rkha autarr khʉʉn aawai.

²⁹ Mag ichdeu maach thʉ̃rkha auju nawe, agtha mʉg durr gaai õor chukhu nʉwe, ichdeun ich iek ʉkhaju khʉʉn khaphʉ arr aawai, makhʉʉnta ich Chaai wajapha khitʉmjota wajaug paapʉiju aadejim, magbarm gaaimua ich Chaaita ewag pawiajã wajaug paakhabarm khʉʉn ag naam chi jooikha sĩsimkhĩir.

³⁰ Mag ich Chaaijo wajaug paakhaju atarr aawai ĩs chadcha maach ich athee thʉ̃rkha auwia ich denkha atham. Mag ichdeu thʉ̃rkha aumam khʉʉnan am pekau chugpaapʉiwia warrjã pekau chukhu arrjo apäaijem. Mag, ag najã pekau chukhu arrjo apʉiwi ich aar paaukhabaimaawain chadau ich Chaai wajapha wai simjo maachjã wajapha ich dʉi wai sĩsiju.

³¹ Mag chadcha ich Ẽwandamau ich aar phe auwi ich Chaai dʉímjo maach dʉijã wajapha aju khĩirjunaata khaphʉ abat, mua pãrag jaaukhim: Õraun chadcha maach dʉi khaigba awiajã Ẽwandamau ichdeu maach dʉi nem magju a sim aig, khaíu jũrr i jua chaaur nem waubarju.

³² Ẽwandamau ich Chaaijã ĩgkhaba, sĩi warag ʉdʉraa maach thumaam khʉʉn kõit thõopibarmua nem dee nʉmjo deetarrta, jãgwi irua sĩi maachdeu nem inag ig nʉmjã deeba abarju.

³³ Ich Ẽwandamauta õor wajaug paapʉiwi warrjã ich mag pekau chukhu arrjo sim a jaaujemta, khaíu i ichaaur maach ichdeucha jʉr autarr khʉʉn igwia irig, “Jãkhʉʉnan agtha pʉ dʉi kulp pom nʉm” abarju.

³⁴ Cristota maach kõit meewia deeu iiu phiidʉwia maach peerdʉ autarrta, khaíu jũrr ichaaur maach khaibag waupibarju. Ante magpimaaugau ichdeuta ʉ̃gtharjã maach kõit jeeu sim. Maimua ichta mag maach kõit iekhaagjã Ẽwandam dʉi iek theeg sĩebahab.

³⁵ Mag sim dʉi maach nʉmta, ¿pãrau khĩirjuawai maach phithurg au wenʉrrʉm dʉi õrau khãijã maach khaibag waukhiin, Cristoou maach dau ãaukhaawai khai? Wa khoju chukhu nʉm dʉi khajũajã chukhunaa, sĩi chikhamnau maach dakhãkhãu nʉʉ awia maach thõobpʉikhiinjã, ¿pãrau khĩirjuawai Ẽwandamau tag maach khõchkhamapha aawai khai? Mag khabam. Magʉmuapai chan Cristo dʉi agdaujo maach khõsi nʉm pod khecheu aubam. Bʉ̃ʉrjã nem inag chukhum, Cristoou maach daupii wai sim tag daupii apiba aag.

³⁶ Pari ichiita ich Ẽwandam iek phã sim gaai jaau simjo, maach mag dau aphʉʉ aju igwia ĩchab David khararraujã Ẽwandamag magjim: “Pʉ gaaimua maran thõjuuta jʉʉrjem. Nemchaain kheechjem aar oveja thõon arrumjota aajem õrau maar dʉi, bʉ̃ʉrjã maach dau aug khaugba.” (Sal. 44:22)

³⁷ Pari phithurg au wenʉrrawiajã mag maach daupigau ʉdʉraa ich thõopitarr gaaimuata magʉmjã podpʉpʉi aajem; wajapcharan Cristo gaaimuama. Mamʉ mag appaijã khaba, mag phithurg ãwat nʉm gaaimuata ĩchab ich Cristoou maach khõsi aajemjã warag khapcha pamam.

³⁸ Magua mua khaphʉ chirʉm, ni ãbmuajã pod Cristo jua eemua maach khecheu aubaju: mʉig eegar ich mag phithurg au wenʉrrʉmua, juau thõo nʉmua, Ẽwandam chognaanau, edjã eem dosãt beneu, sĩi parhoobam beneu, nem dau chigaa oo nʉmua, mʉg atag nem obeberg maju khĩirju nʉmua,

³⁹ ʉ̃gthaa edjã ee nem inag thʉnʉmua, mʉg jẽb gaai wa mʉg jẽb eegar nem parhoobam nem ich Ẽwandamau wautarr sĩsidʉmua khãijã pod i jua eemua maach khecheu aubam.