Romanos 7 - Wounaan Meu

Cristo denkha nʉmʉn ʉʉi jaai paraamjota sim

¹ Cristo gaaimua khodamnaan, pãrau ley khaphʉm khʉʉn aawai pãrau meraa khaba nʉm, lein maach iiu durrum orapaita maach dʉi iek theeg sĩejem.

² Pãade khĩirjubat: Ʉʉi jaai paraamjã ich agjota sĩebahab. Ley gaai jaauwai, chi jaai meebam aiguin ich jaai gaai jʉ̃gadau jʉ̃ simjota sim anʉm, pʉaju khaba. Pari chi jaai meebaadeen chadau mag jʉ̃ simjo sĩerrta ẽedʉbaademjo sim, tag jaai chukhu aadeewai.

³ Pari mag jaai paraa simta deeum emkhooi dʉi khapes amʉn magan pekauta waubarm, ich jaai khabam dʉi aawai. Pari chi jaai meebaadeen chadau ya deeum jaai auju aai sim, mag ich jaai gaai jʉ̃ simjo sĩerrjã ya ẽedʉbaademjo sĩewai. Mag, khoopawia ich ap sĩsimta jaai au simʉn magan pekau khabam.

⁴ Khodamnaan, pãarjã ĩchab ich agjota naabahab: Warran leita pãar jaaijo sĩejim. Magua ichiita pãrau ag gaai jaau sim ipierraa ab khaba aajeejim. Pari tag pekau waumaaugau ya pãar Cristo dʉi meetarrjo naawai ya mag ley pãar dʉi tag iek theeg chukhu sĩsim. Ya ĩsin pãran jũrr Cristo deneu, ar meewia deeu iiu phiidʉtarr denma. Mag i denkha naawaita Ẽwandam dau na nem wajapha wau wenʉrraju.

⁵ Warr maach parhoobam khʉʉnjo sĩi dich pekau ee wenʉrraajeewai leíu maachig nem parhoob waupiba jaau sĩejim. Pari magtarrta nem khaigbamta waupi jaautarrjo warag parhoobam nemta waum khõchkha phobaadewi sĩi okhoo nʉisijim.

⁶ Pari mag narrta ĩs jũrr nem khaigbam waumaaugau Cristo dʉi ãba meewi nʉisimjo nʉm. Mag Cristo dʉi meebarmua ĩsin maachin ãba Ẽwandam chognaanau, ya mag leita maach khãai ʉ̃rpai khaba sĩewai. Pari mag i chogkha nʉm chan mag ley gaai jaau sim ʉʉrkha nʉmua khaba, ich Ẽwandam Akharau wenʉrrapi jaau simjo wenʉrrʉmuata mag i chogkha nʉm.

Pabloou ich pekau khaug autarr

⁷ Mag khai, ¿magan Ẽwandamau ley deetarran pekaupá? Mag khabam. Ẽwandamau ley deetarr chan pekau khabam. Pari mag ley khurau khabamuan, mʉch pekau paraa chirʉmjã khaugba chirakham. Mag ley gaai “Oob chikham nemta pʉch den apim khõsi am” aba sĩekhiin, mua bʉ̃ʉrjã khaugba chitakham, magpai nʉmua pekaukha ober sim.

⁸ Pari mag ley khaug athamjo abaawai chi pekaúata warag mʉrʉg chikham nem khõsi aju aai khaba chirʉmpata warag khõchkhapibarmjo ajim. Pari ley chukhumuan magbakham. Wajapcharan ley chukhum aiguin, pekaun sĩi iek theeg chukhuta sim, nem khaigbam maachig waupieg.

⁹ Warr agtha daumeraa chiraajeewain mʉch pekau wai chirʉmjã khaugbata chirarr aawai mʉ ʉu chirajim. Pari maimua ya mʉchdeu chi ley gaai jaau sim khaug athaawaita, ĩchab mag mʉchdeu nem wauju khabamta waum khõchkhakhakham gaaimua

¹⁰ warre mʉch okhoo chirʉmjã khaphʉ chirsijim. Magta ajim. Wajapcharan mʉchdeu khĩirjuawai, mag ley ʉʉrkha nʉmuata mʉch peerdʉ aujupii chirajim; pari magtarrta jũrr ich ag leíupai warag mʉch okhoojuuta mʉrʉg jaaubarmjo jaaubaawai

¹¹ mua khaphʉ aadejim, chi pekaúata sĩi mʉch khũgurbarm. ¿Pari jãga magjĩ? Par ley thum ʉʉrkha aubaju ʉʉrkha chitarr gaaimuama. Wajapcharan mag ley thum pod ʉʉrkha aubam gaaimua, warag pekau wau chirʉmuata mua khaug athajim ĩchab, chadcha mʉch okhoo chirʉm.

¹² Magua khaphʉ abat keena: Ẽwandamau ley deetarr chan pekaujo khaigba khaba sim, ich Jooiraucha deetarr aawai. Mag lein chadcha chi wajaphamʉu, ichdeu nem khõsimta waupi jaaunaa maach ʉu wenʉrramkhĩirta deetarr aawai.

¹³ Magua, ley gaaimua chan mʉ okhooba, pekau gaaimuata okhoo chirajim, leíu wajaug jaau sim chaaur sĩi mʉch khõchagpierrta nem wau chitarr gaaimua. Pari mag ley gaaimuata ĩchab mua khaphʉ aadejim, pekau chadcha nem wajapham khaba sim. Wajapcharan Ẽwandam iek gaaimuata maadeu khaphʉ nʉm, pekau chadcha athuuchata khaigba sim.

¹⁴ Maadeu khaphʉ nʉm, ʉ̃gtharmuata ley deejim. Pari mʉʉn sĩi ich mʉig eegarpaimʉu. Mag chiraawai pekauta wounjo mʉch porkha wai chitʉmjo, irua nem khõsimta wau chitʉm gaaimua i chogkha chitʉm.

¹⁵ Khaugbam khar mʉ jãga chiraajem khai. Pari mʉch imeerba, chadcha Ẽwandamaujã khõsinaa mʉchdeujã nem waum khõsimta wauba, agtha nem khaigbam mʉchdeu waumaphamta waaujem.

¹⁶ Mag leíu waupiba sim nemta mʉchdeujã waumapha chirʉm aig, magan mʉch paarmua mag ley wajapha sim a chirʉm.

¹⁷ Magua mʉchdeu khõchkhabam nem wau chirʉm aig, sĩi juau ogthom khabam. Magʉm wau chirʉm chan mʉchdeucha khaba, mʉch dʉi thaabatarr pekau mʉ gaai ʉ̃rpa simuata mag waupi simjo aajem.

¹⁸ Mua khaphʉ chirʉm, mʉg chirʉm aig chan bʉ̃ʉrjã thãar wajaug chukhu chirʉm Ẽwandam dau na. Magua, nem wajapha waum khõsi chirʉmjã pod wauba aajem.

¹⁹ Magju khãai mag nem wajapha waum khõsimjã waubanaa nem mʉchdeu waumaphamta waaujem.

²⁰ Pari mag mʉchdeu nem waumapham waauwaijã, sĩi mʉch khĩrauta wauba, mʉch dʉi pekau thaabatarrauta warag mʉ gaai ʉ̃rpawi magʉm waupim khõsi aawaita magʉmpa waumaajem.

²¹ Magua mua mʉchdeupaijã mʉch khaphʉ chirʉm, mʉch khĩirjuguan nem wajapham appaita waum khõsim ee, nem khaigbam wauju khĩirjugta maach na garpapakhamjo aajem.

²² Maagjeeb mamʉ Ẽwandamau ley deetarran mʉch thãrau khõsinaa ichiita ag igar chirʉm.

²³ Pari mag Ẽwandam ley khõsi chirab mamʉ, mua khaphʉ chirʉm, jũrr ãb agjo mʉ mor ee simuata mʉchdeu khĩirju chirʉm chaaur khĩirjug khĩet mʉrʉg khĩirjupi sim, ichdeuta ganaag. Ma, chi pekau mʉch dʉi thaabatarrau. Ichdeuta woun denjo mʉ pʉr wai simjo aajem, ichdeu nem khõsimta waupieg.

²⁴ ¡Eh, apkhiitʉ mʉdam! Magʉm khĩirjubaadeewaita onegjã chukhu chiraajem. ¿Khaíuwaata mag maach mor ee pekau sim jua eemua maach khaigper athaagáwa?

²⁵ Ãba ich Ẽwandamaupaita maach Por Jesucristo gaaimua maach khaigper auju aai sim. Magua irigta ʉu ajim a chirʉm, ich mag Jesucristo gaaimua. Wajapcharan mʉgta sim: Mʉch odiiun, Ẽwandamau khõsimta wau chitʉmua i chogkha chitam khõsi chirʉm. Pari mag chirʉmta, Cristo khurau khabamuan, pekauta agtha wounjo mʉ khãai ʉ̃rpai sĩekham.