Romanos 6 - Wounaan Meu

Pekau wawaagan maachin chi meemjo nʉm, mamʉ Cristo athee nem wawaagan iiu nʉm

¹ Mag pekau athuucha waauwaita Ẽwandamau maach dʉi wajapcha aajem anaawai, magan ¿warag ich magta pekau wau wenʉrrajupá, mag pekau wau nʉm Ẽwandamau chugpaapʉpʉikhampierr chadcha ich maach dʉi wajapha khitʉm khap aag?

² Mag khabam. Jesucristo dʉi naawai tag pekau waumaaugau ya maach chi khechamjo nʉmta, jãga mag bʉ̃ʉrjã dich khaibag pʉaba agtha pekau wau wenʉrraju aai nʉm abarju.

³ Pãrau khaphʉ nʉm, Jesucristo iek ʉkhawia maach i thʉ̃r gaai por choowi i denkha nʉm khʉʉnan ya i dʉi õor ãbpaimjota nʉm. Mag naawai tag pekau wauba aagjã warre i dʉi ãba khechtarrjota nʉm, ¿ma pãrau khaugba nʉ?

⁴ Wajapcharan mag maach por choo nʉm aig, warre Cristo dʉita ãbam jẽbdegpai beppʉitarrjota nʉm, tag pekau waujujã khaugba aag. Pari mag meebarmjo arran, sĩi tag warramjo nem khaigbam wauba aagpai khaba, jũrr ich Cristo simjota wenʉrraagau. Wajapcharan Ẽwandamau ich Chaai phiriu autarrjo, maachjã ich athee iiu phiidʉbarm khʉʉnjota api sim, ãba ichdeu khõsimjo wenʉrramkhĩir.

⁵ Mag nem khaigbam waumaaugau Cristo dʉi ãba meetarrjo naawai agjo i dʉi ãba phiidʉbarmjota nʉm, jũrr nem wajapham appaita wawaag.

⁶ Magua, maadeu khaphʉ nʉm, warr maach Cristo dʉi khaba naawai dich khõchagpierr nem wauju khĩirjug wai narrjã ya ich Cristoou ich dʉi ãba pakuls gaai meerpbapʉimjo ajim, magbarmua magʉm khĩirjug warre jua theeg chukhu aadeewai tag mag pekaúgta dich khãai ʉ̃rpai apiba amkhĩir.

⁷ Chadcha maach meewai chan tag nem waujujã khaugba aadeejeewai pekaúajã maach ogdʉpäaijem, ya tag ich ipierraa abaju khaphʉ sĩewai. Ich agjota sim ĩchab Cristo dʉi meebarmjo aawaijã: pekaúa pod maach dʉi iek theeg chukhu sim.

⁸ Mag ya maach Cristo dʉi khechwi nʉmjo naawai maadeu khaphʉ nʉm, maachjã ĩchab ich Cristo simjota wenʉrraju, pekaúgta ʉdʉʉr dich ʉ̃rpapiba.

⁹ Maadeu khaphʉ nʉm, Cristo iiu phiidʉtarr aawai tag meebam; í tag maach dajẽkhum khʉʉnjo khaba sĩsim.

¹⁰ Cristo meetarran, õor pekau paarta meetarr aawai, chi pekau jãg ichdeu õor dajẽk aajemjã warre ich Cristo garmuata podpʉijim. Pari mag meetarrta deeu iiu phiidʉwia sĩerrʉmʉn, ich gaaimua jũrr õragta Ẽwandam tho iekhamkhĩrau.

¹¹ Mag pãar ya Cristo ich garmua mag pekau podpʉitarr dʉita naawai tag pekau waumaaugau ya chi khechamjota abat. Magarrau Cristo dʉi nʉm gaaimua Ẽwandam athee nem wajapha wawaagan chadau jũrr khĩir ubagta abat.

¹² Pekaúg chan oob ʉdʉraa pãach gaai ʉ̃rpapimiet, sĩi warrgar pãachdeu nem waum khõsimpai waaujerr wawaag.

¹³ Nem khaigbam wawaag chan ni bʉchkhun awiajã oob pekaúgta pãach gaai ʉdʉʉr apimiet. Mag khãai Ẽwandamagan chadau pãachta sĩi khajapham nem jua choogjemjo ideu pãach dʉi ichdeu ampierr apibat. Ya pãar mag nem khaigbam wau wenʉrramaaugau, Cristo dʉi ãba meewia deeu iiu phiidʉwi naawai, Ẽwandamagta pãachdeupai warre pãach thum thʉsĩebapʉit.

¹⁴ Pãrau magta amʉn pekau chan bʉ̃ʉrjã pãar dʉi iek theeg chukhu sĩsiju. ¿Khan jãgwi? Pãrau sĩi pãachdeu khĩirju nʉmjo Moiseeu ley phã pʉatarr ʉʉrkha nʉmua khaba, ãba Ẽwandamau ich garmuata pãach pekau ee wenʉrrapimaaugau ʉu pãrag khĩirjug dee sĩewaima.

Ẽwandam chogkha naawai nem agchata wauju aai nʉm

¹⁵ Mag, mua Moiseeu ley phã pʉatarr ʉʉrkha nʉmua khaba ãba Ẽwandam maach dʉi wajapha khitaawaita maach peerdʉ aaujem a chirʉm aig, ãbmua khãijã, Ẽwandamau maach chig abaju awi, “Magan warag pekau wauju aai naabahab” aju. Pari magjã khabam.

¹⁶ Magju khãai wajapha khĩirjunaata nem waubat. Pãrau pãachdeuta jaauju aai nʉm, ¿pekaúgta ʉdʉʉr pãach ʉ̃rpapim khõsi nʉ, okhoom iek okhoog, wa Ẽwandam chogkham khõsita nʉ, i ipierr nʉmua i aar oberaag? Pãachdeu igbarmta pãar porkha sĩsiewai maguata pãar ich chogkha wai sĩsiju.

¹⁷ Warran pãran chadcha pekau chogkha nʉmjota naajim, pãach khõchagpierr nem waaujerr gaaimua. Pari ĩs jũrr pãar gaaimua Ẽwandamagta ʉu ajim a chirʉm, pãachig jãga wenʉrraju aai nʉ a jaautarr iekta pãrau thãrauchata ʉkha naawai.

¹⁸ Mag pekau jua eemua Ẽwandamau ʉu pãar peerdʉ autarr aigmua ĩsin pãran jũrr i chognaanau, ichdeu nem khõsimjo nem agchata wau wenʉrraawai.

¹⁹ Mua mag chikham chogkha nʉm jaau chirʉmʉn, sĩi cha mʉchdeu jaau chirʉm wajapha khaphʉ amkhĩirta mag ejemplo pãrag jaau chirʉm. Magba akhiin pãrau pod khaugbaju, khanta mua jaau chirʉ́. Mag mʉchdeu jaau chirʉmjo, ich jãg warr sĩi pãach khõchagpierr nem khaigbam waaujerr gaaimua pekaúgta ʉdʉʉr pãach ʉ̃rpapiejerrjo, ĩchab ĩsjã warre pãachdeupai pãachta thum Ẽwandamag thʉsĩebapʉit, ichdeu khõsimjo nem wajaphata wau nʉmua chadcha i õorkha ãba i atheepai wenʉrraag.

²⁰ Chadcha warr pãar sĩi pãach khõchagpierr nem wau nʉm gaaimua pekau chogkha nʉmjo naajeewai chan Ẽwandamau waupi jaau simjo waujujã khĩirjuba aajeejim, agtha i õor khaba narr aawai.

²¹ Pari ĩs ewag panaa oowai, khan wajaug sĩejĩ mag khaigba wenʉrrarr. Ante ĩs magʉm khĩirjuawai warag maach chigaata sim, mag dich nem khaigba wau nʉm gaaimua sĩita warag maach okhoopiejeewai.

²² Pari ĩs chan pãar warr pekau chogkha narrjo khaba nʉm; ĩsin pãran jũrr Ẽwandam chognaanau. Pari mag i chogkha nʉmʉn chadau ante maach athee wajaugta sim, mag nʉmuata i õorkha i atheepai wenʉrranaa i aar oberwi i dʉi naaimaju aawai.

²³ Pekau chogkha nʉmjo nʉmuan sĩi warag maach okhoom iekta okhoopiejem. Pari jũrr Ẽwandamau ich chogkha wenʉrrʉm paar maachig deeju jaau simʉn, ʉ̃gthar pawiajã ich mag ich dʉi phe wai sĩsijuuta jaau sim, maach Por Jesucristo dʉi õor ãbpaimjo naawai.