Romanos 4 - Wounaan Meu

Jãga Abrán Ẽwandam dau na pekau chukhu arrjo sĩsijĩ

¹ Pãade khĩirjubat, jãga warrgar maach jooin Abrán khararrjã pekau chukhu arrjo sĩsijĩ Ẽwandam dau na.

^2-3 Ẽwandamau oowai jooi Abrán ich dau na nem wajapha waaujerr gaaimuata kulp chukhu apʉimuan, Abranau wir aig ich tho iekhaju aai sĩekham. Pari Ẽwandam iek phã sim gaai jaauwai, bʉ̃ʉrjã chaain chukhu nʉm ee, Ẽwandamau ichig chaain khapan apiju jaautarr iek ʉkhabaawaita Ẽwandamau i khaibag isegpʉiwi i tag kulp chukhu apʉijim a sim, sĩi mag ʉkhatarr paarpai. Magua pod irua Ẽwandam dau na ich tho iekhaju khaba sĩejim, mag iekhaag nem wautarrjã chukhu arr aawai.

⁴ Maadeu khaphʉ nʉm, õor phidkhapiwi phag nʉm chan sĩi par dee nʉm khabam. Mag phagbarmʉn ich phidkhatarr paarta phag nʉmʉu, ichiita irig phagab khaba phagju aai naawai.

⁵ Pari Ẽwandamau ich iek ʉkhaa chaar ʉkha nʉm khʉʉn pekau chugpaa nʉm chan mag khabam. Amau amach igamkhĩir nem wajapha wauba aajerr awiajã, pari amau ãba Cristoouta chadcha amach peerdʉ auju aai sim awi amach thãraucha ʉkhamʉn chadau, mag ʉkha nʉm gaaimuata ag najã pekau chukhu arrjo apʉiju.

⁶ Mag, am nem wajapha waaujerr paarjã khaba, sĩi am pekau Ẽwandamau chukhu arrjo abapʉim khʉʉn onee nʉm igwiata jooi David khararraujã jaaujim.

⁷ Mag irua phãtarr iek gaai mag sim: “Ar Ẽwandamau am khaibag chugpaawi amau pekau waaujerrjã igba abarm khʉʉnta chadcha onee nʉm.

⁸ Ar maach Por Ẽwandamau amach mag khaigba narrjã wajapha waupʉinaa tag magʉm iekjã igba abarm khʉʉnta onee aju” a phã sim. (Sal. 32:1-2)

⁹ Mag simta, ¿pãrau khĩirjuawai, mag onee aju anʉmjã sĩi judionaan meheu phʉʉrbich nʉm khʉʉn atheepai khai? Wa ĩchab judionaan khabam khʉʉn atheepata jaau sĩwa. Chaig mʉchdeu jaau chirarrjo, mag Ẽwandamau jooi Abranjã ich mag pekau chukhu aajerrjo wajaug paapʉijim anʉmʉn, ichdeu thãraucha ʉkhatarr gaaimua ajim.

¹⁰ Pari wajapha khĩirjubat. ¿Jãagwaichata mag i wajaug paapʉijĩ? ¿Meheu phʉʉrbichtarr khur, wa ag nawe? Ag nawe khabajieb.

¹¹ Mag phʉʉrbich nʉmta chi dauchach ajim, thãraucha ʉkhabaawai ich Ẽwandamau wajaug paapʉinaa pekau chukhu aajerrjo apʉi nʉm den. Magtarr aawai ich jooi Abranta judionaan denjo mag meheu phʉʉrbichba naawiajã pari thãraucha ʉkha nʉm khʉʉn porkha sĩsijim. Magta ĩchab ewag pawiajã ʉkhaa chaar ʉkha nʉm khʉʉnan ich mag jaar aajerrjo ĩsjã Ẽwandamau wajaug paapäaijem.

¹² Mag phʉʉrbichbarmua ĩchab ichta mag phʉʉrbich nʉm khʉʉn porkha sĩsijim, majã pari ichdeu ʉkhatarrjo ʉkha nʉm khʉʉn den mamʉ. Pari mag phʉʉrbich wai naawiajã, ichiita Abranau ich den phʉʉrbichju nawe ʉkhatarrjo, amaujã thãrauchata ʉkhaju aai nʉm.

Ẽwandamau ichdeu magju atarrjo ajuun ich iek ʉkha nʉm khʉʉn dʉita magju

¹³ Ẽwandamau Abranag jaauwai, i chaain ewagam khʉʉnagta irig deeju arr durr jʉ̃apiju ajim. Pari irig mag jaautarr chan mag sĩi Moiseeu ley werpʉarr ʉʉrkhaajerr gaaimuajã khaba, ich Ẽwandamau ichig magtarr chadcha ʉkhatarr aawaita mag deeju jaaujim. Mag ich iek ʉkhabaawai bʉ̃ʉrjã pekau chukhu arrjo Ẽwandamau i wajaug paapʉijim.

¹⁴ Mag sĩi ley ʉʉrkha nʉm khʉʉnta irua mag wajaug paapäaijem akhiin, magan parta Ẽwandam iek thãraucha ʉkhaajeekham. Mag ichdeu ley deetarr ʉʉrkhaawaita mag maach wajaug paajem akhiin, magan maach dʉi magju a jaautarrjã pod magbakham, ãbmuajã pod ag gaai jaau simjo thum ʉʉrkha auba aajeewai. Magua, ley ʉʉrkha nʉm gaaimuapai chan õor peerdʉbam.

¹⁵ Lein warag Ẽwandamau õor gaai jua khʉaba deeju khap apiegta sim, ley paraam aigjã ichiita õrau pod ag gaai jaau simjo aba aajeewai.

¹⁶ Magua mag Abranag jaautarrjo maach dʉijã wajapha ajuun, i iek chadcha ʉkha nʉm gaaimuapaita magju. Mag gaaimuapai aawai maach peerdʉ aauwaijã õrau khaphʉ aju, dichdeu nem wau nʉm paar khaba, ʉu ich garmuata maach peerdʉ au sim. Mag sĩi ʉkha nʉm gaaimuapai aawai, ewag pawiajã maach mag ʉkha nʉmua Abrán chaainkha nʉm khʉʉnauta aub khaba auju, Ẽwandamau deeju jaautarr.

¹⁷ Irig mag iekhatarr jaauwi ich Ẽwandam iek phã sim gaai, “Pʉ mua chadcha õor durrpierram khʉʉn aaikhapiju” a sim. Mag iekhatarr Ẽwandamauta õor mee sĩsid arrjã phiriutkhanaa nem chukhu arr eejã ompaa aaujem iekta ʉkhajim Abranau.

¹⁸ Ẽwandamau ichig magtarr aawai, ya jooiraa pamta chaaijã chukhu narr ãba, Abranau chadcha ich chaai paarpaju khaphʉ sĩsijim, ichta mag õor pom durrpierr thʉnʉisiju khʉʉn aaikhaju igwi, Ẽwandamau ichig, “Pʉ chaain khapaana chitaju” a jaautarrjo.

¹⁹ Irua khaphʉ sĩejim, ichjã jooiraanaa i ũan Sarajã ũanaa khitarr aawai amach pom wenʉrrabaju. Pari mag jooiraa sĩerr awiajã irua khaphʉ sĩejim, Ẽwandamau ichig jaautarr aawai ich chaai chukhu meebaju. Magua mag peer cien años sĩerr ãba, Abranau ãba ag iekta jʉ̃g thõba wai sĩsijim.

²⁰ Irua mag “Mua ʉkhabamjã” aba, sĩi Ẽwandamau ichig chaai deeju atarr chadcha paarpajuuta warag khĩirjunaa, “Puan pʉchdeu nem magju atarrjã chadchata wau sĩerrʉm” aajeejim Ẽwandamag, i tho iekhamamua.

²¹ Irua khaphʉ sĩejim, chadcha Ẽwandam jua theeg sim, ichdeu nem magju atarr wawaag.

²² Ichdeu mag khaphʉ ʉkha sĩerr gaaimuata, Ẽwandamau ich iek phãtarr gaai jaau simjo pekau chukhu arrjo i wajaug paapʉijim aajem.

²³ Mag Abranau ʉkhaa chaar ʉkhatarr gaaimua Ẽwandamau i kulp chukhu paatarr jaau nʉm chan i appaijã khaba,

²⁴ ewag pawia maachjã agjo kulp chukhu paapʉiju khʉʉn igwiapata mag phãpijim Ẽwandamau ich iek gaai. Wajapcharan mag maach Por Jesús phiriu autarr ag Ẽwandam gaai thãraucha ʉkhaawaita ĩchab ich Ẽwandamau maach pekau chugpaawi kulp chukhu narrjo maachjã aaujem.

²⁵ Mag maach Por Jesuuta Ẽwandamau maach pekau paar õrag ʉdʉraa thõopijim, mag thõotarrta deeu phiriu athamua maach pekau chugpaapäaig.