Romanos 3 - Wounaan Meu

¹ Pari mag nʉmta ãbmua khãijã, “Khan gaaimua magan maar judionaanta judionaan khabam khʉʉn khãaijã Ẽwandam dau na ʉucha nʉmma” wa “Khan wajaug sĩ, mag phʉʉrbich nʉmua dich mor gaai dauchach nʉm” akhiin,

² jaauju pooma thʉnʉm. Pari chadcha maachta deeum khʉʉn khãaijã ʉucha nʉmʉn, maach meeunagta ich Jooiraujã thumaam khʉʉn athee ich iek phã deetarr gaaimuau.

³ Pari magtarrta, ¿jãg ãaur khʉʉnau ʉkhamaphamjo nʉmjãma? ¿Pãrau khĩirjuawai am mag nʉm gaaimua ich Jooirau aju aajerrjã chadcha magba sĩi ich mag khĩir okhooju khai?

⁴ Magju abá. Thumaam khʉʉn nem seunem awiajã ich Ẽwandam chan seu chukhu sĩerraawai ichin iin nem agchata jaaujem. Maach khaibag jawaagjã ich mag sĩerrʉm igwi jooi David khararrau Ẽwandam iek gaai magjim: “Pua õor khaibag jaauwaijã amau, ‘Puan nem agchata jaaubarm’ aju. Chad khabam nem õrau pʉch gaai thʉawaijã pʉchdeuta ganab khaba ganju” a phãjim, “pʉchta agpierraa chitaawai.” (Sal. 51:4)

⁵ Pari mag maach khaigba nʉm gaaimuata warag Ẽwandam maachjo khaba agpierraa sĩerrʉmjã maadeu khaphʉ nʉm khai, magan ¿jãgáwa? Sĩi parhoobam khʉʉnau khĩirjuajemjo khĩirjukhiin, magan Ẽwandamau pod õor amach pekau gaaimua dau aphʉʉ apiju khaba sim aju aai nʉm, mag pekau gaaimuata ich agpierraa chitʉmjã wajapha khaugpiejeewai.

⁶ Pari ma chad khabam. Mag akhiin magan Ẽwandaman agchajã khaba parhoobata nem wau sĩerrʉm akham. Ẽwandam ichpa magta sĩerrʉm akhiin, jãga ichdeu maach i agkham edjã pãar khaigba naajim wa ʉu wenʉrrajim khãijã aju maachig.

⁷ Wa magba ãbmua khãijã pʉaba, “Pari mag mʉch khaibag chirʉm gaaimua jũrr mua õrag Ẽwandamau õor dʉi agpierraa nem waaujem igwia i wajaugta phepi chirʉmjo chirʉmta, jãga magʉm gaaimua Ẽwandamau mʉ dau aphʉʉ apibarju” aju.

⁸ Pari mag amau jaau nʉmjo mag khaigba nʉm gaaimua i wajaugta phepimjo nʉm khai, jãgwi warag nem khaigbamta wauju khaba nʉ, magʉm gaaimua jũrr ich mag i wajaugta phemkhĩir. Chi mag nʉm khʉʉnaun amachdeu mag khĩirju nʉm gaaimuata õrag jaauwaijã, muan magta jaau chitʉm aajem, magʉm gaaimua mʉ eugar seukha nem ĩgkham khõchgau. Pari chi mag nʉm khʉʉnan, Ẽwandam dʉi khujʉr nʉmjo nʉm gaaimua, i jua machag ãwatab khaba ãwatju.

Maachin thum pekaupanau

⁹ Magan ¿maachin jãgata nʉmma? ¿Maach chi judionaanta judionaan khabam khʉʉn khãaijã Ẽwandam na wajapcha nʉ? Magjã khabam. Maachin, chaig mʉchdeu jaau chirarrjo, judionaan khabam khʉʉn dʉi ãba judionaan awiajã thum pekaupanau, Ẽwandam iek phã sim gaai jaau simjo.

¹⁰ Mag i iek phã sim gaai jaauwai, “Ẽwandam dau na wajapham khʉʉn chan ãbjã chukhum” a sim.

¹¹ “Ẽwandamau wajapha wenʉrrapi simjo chan ãbmuajã i denjo khĩirjuba sim; ãbmuajã i igmaphamjota sim.

¹² Thumaam khʉʉnauta i aar baarjem khʉd isegnaa khʉd khaibag garta wet thʉnʉm. Thumaam khʉʉnta warag ãr thʉnʉisim; i dau na wajapham khʉʉn chan ãbjã chukhum” a sim. (Sal. 14:1-3; 53:1-3)

¹³ “Jãgʉm khʉʉnan sĩi chikham eugar khaigba iekhaagpaita sĩsidʉm. Seukha nem jaaunem sĩsidʉm” a sim. (Sal. 5:9) “Par iekhaupai chikham thõojem akhiin, jãgʉm khʉʉnaun nemkhierr denjo õor dajẽk aju” a sim. (Sal. 140:3)

¹⁴ “Am iin, sĩi chikham thõp iekhaagpaita sĩsidʉm gaaimua ihasimjota sĩsidʉm” a sim. (Sal. 10:13)

¹⁵ “Sĩi bʉ̃ʉr abarm gaaimua chikham thõojuuta khĩirju sĩsidʉm;

¹⁶ amach wenʉrrʉmpierr sĩi õor dau aphʉʉ apijuuta ẽkhaajerram.

¹⁷ Amach mag nʉm gaaimua bʉ̃ʉrjã khõinaa wenʉrraju khaugba nʉm” a sim. (Is. 59:7-8)

¹⁸ “Ẽwandam okho aju khĩirjug chan bʉ̃ʉrjã khĩir ee paba aajerram” a sim. (Sal. 36:1) Magta phã sim ich Ẽwandam iek gaai.

¹⁹ Chamʉg Ẽwandam ley gayam mua jaaubarm chan oob pãrau sĩi ãba judionaan khabam khʉʉn atheepaita mag jaau chirʉm amiet. Maadeu khaphʉ nʉm, mʉg iekhan maach judionaan atheepata mag phãpijim, maagwai Ẽwandamau mʉg durr i agkham edjã thumaam khʉʉn amach khaigba narr khap, Ẽwandamau amach khaibag wauju jaaubarm ũurwaijã sĩi khĩu i iek ũrmkhĩir.

²⁰ Chi lein sĩi maach pekau pom khitheem khap apiegpaita ich Ẽwandamau phãpitarr aawai mag ʉʉrkha narr gaaimuapai chan pod Ẽwandamau maachig, “Pãar pekau chukhu naawai mʉ dʉijã iekkhõr chukhu nʉm” abaju.

Jãga Ẽwandamau maach kulp chukhu apäaijẽ

^21-22 Pari ĩs jũrr Ẽwandamau maachig khap api sim, jãga mag i dʉi iekkhõr pom nʉmjo narrta pekau chukhu arr khʉʉnjo nʉisí. Chadcha warrgarwejã ichdeu ley phãpitarr gaai jaaunaa sĩi ich i jaaumienagjã ichdeu magju ich mag jaaupiejeejim. Pari magjujã mag ley ʉʉrkha nʉm gaaimua khabam ajim. Ĩs mag pekau chukhu arrjo nʉmʉn, Jesucristo iek thãraucha ʉkha nʉm gaaimuata, judío wa judío khaba awiajã, Ẽwandamau thum mag pekau chukhu narrjo phe wai sim. Mag Cristo khurau khaba akhiin chan ni ãbjã peerdʉbam;

²³ thumaam khʉʉnta amach pekau gaaimua amachdeupai Ẽwandamag amach isegpi nʉmjo i warpta wenʉrrʉm, ichdeu waupim khõsim waujojoopaijã khaba.

²⁴ Mag Ẽwandam warpta wenʉrrʉmjo naab mamʉ, í thumaam khʉʉn dʉi wajapha khitaawai mag dichdeu nem ajapha wau nʉm paarjã khaba, ich garmuata mag maach i dʉi iekkhõr pom narrjã igba, Jesucristo gaaimua maach pekau chugpaawia iekkhõr chukhu sĩi ich dʉi dau parii apiejem.

²⁵ Warrgarwe ichdeu õor peerdʉ aaujeewai chadcha õor pekau wau nʉmjã oobamjota am aaujeejim, ich Iewaa pʉi nʉm ora. Pari ĩs ya Ẽwandamau mag Jesucristota õor kõit thõmkhĩir pʉibarmua maachig khaphʉ api sim, chadcha warrgarm khʉʉnjã auju aai sĩejim. Pari mag auju ayaa apiegan Cristo meewia ich bag ãrbarmua ichta õor pekau chugpaajem khapijim, ich Ẽwandamau.

²⁶ Mag, warrgar aajerrjo ĩsjã chi Jesús iek ʉkha nʉm khʉʉn chan ya tag kulp chukhu nʉm aju aai sim Ẽwandamau, chadcha am khaibag paarjã Jesuu ʉdʉraa ich thõopitarr aawai.

²⁷ Mag khai magan Moiseeu ley phã pʉarr ʉʉrkha nʉmuata kulp chukhu nʉm awia pod dich thoju khaba nʉm. Ẽwandamau mag maach kulp chukhu apʉi simʉn, mag ley ʉʉrkha nʉmua khaba, ãba Jesús iek thãraucha ʉkha nʉm gaaimuata mag maach kulp chukhu apʉi sim.

²⁸ Wajapcharan maan mʉgta sim: Ẽwandamaun Jesús iek thãraucha ʉkha nʉm khʉʉnta ya tag kulp chukhu nʉm a jaaujem. Irua mag sĩi ley gaai jaau sim iekta õrag ʉʉrkhapi jaauba sim, ich dʉi amach pekau gaaimua kulp chukhu nʉm a jawaag.

²⁹ ¿Wa pãrau khĩirjuawai Ẽwandam sĩi maach judionaan denpaí, warrgarwejã maach jooinagta ich iek phã derr aawai? ¿Í ĩchab durrpierram khʉʉn Ẽwandam khabá? ¿Mag iek maach jooinag phã deetarrjã thumaam khʉʉn athee khabajĩ? Chadcha ichpaita durrpierram khʉʉn Ẽwandamma.

³⁰ Tag Ẽwandam chukhu ãba ich appaita sĩerrʉm. Ichdeupaita chadcha Jesucristo iek ʉkhaa chaar ʉkha nʉm khʉʉnan, judío wa judío khaba awiajã, magʉmjã igba thum ãba ya bʉ̃ʉrjã kulp chukhu narrjo apäaijem.

³¹ Magan jãgáwa. Mag maadeu ʉkhaa chaar ʉkha nʉisiewai, ¿mag ley maach athee tag baleeba aadep sĩeb? Baleeba sĩsim abá. Mag baleeba apiju khãai, mag ʉkhaa chaar ʉkha nʉmuata warag ʉ̃rcha i baleepi nʉm khabáwa, warrgarwejã ich magta Ẽwandamau ʉkhapi jaaujerr aawai.