Romanos 2 - Wounaan Meu

Ẽwandamau khaigbam khʉʉn dʉi ichdeu ampierr aju

¹ Pari ãbmua khãijã, í chan magba chirʉm aju. Mamʉ pua chadcha mag khĩirju chirʉm khai, õor wajapham awiajã, mʉ iek ũrbá pʉrʉg jaaukhim: Pua chikhamnaan jaauwai pʉchpaita dʉi wir aig jaau sĩebahab, amau nem wau nʉmta pʉchdeujã dʉi waaujeewai. Magua pua pod, “Mʉ chan Ẽwandam dau na khaibag chukhu chirʉm” aju khaba sim.

² Pari maadeu khaphʉ nʉm, Ẽwandamau õor dʉi amachdeu nem waaujempierr aajem. Magua maadeu khaphʉ nʉm, magʉm nem khaigbam waaujem khʉʉnan irua amach khĩircha jaaunaa ich jua machag ãwatab khaba ãwatpiju.

³ Pari pʉ, chikham igwia jãan mag sĩerrʉm aajemta, pʉchdeujã amau nem waaujem khĩir ich agjo wauba aajeeb. Mag simta, ¿pua khĩirjuawai pʉchta Ẽwandam jua eemua peerdʉju a chirʉ́? Pʉ chan peerdʉbam.

⁴ Chadcha Ẽwandamau warre pʉ gaai mas deeba aajem. Pari mag pʉch chig aba aajeewaijã, puan pʉch wajapha sĩewaita mag pʉch chig aba aajempii sim. Pari pua khaugba sim, mag irua ʉu pʉ dichba aajemʉn, pʉch khaibag isegwia ich jʉrmkhĩirta mag pʉ chigjã aba sĩi warag oobamjoo aajem.

⁵ Pari Ẽwandamau mag pʉ ig simta, pʉch jʉ̃g theeg gaaimua pʉch garmuata i igjã igba, sĩi warag ichdeu õor i agkham ed amachdeu nem khaigba waaujerrpierr amach khĩircha jaaunaa am gaai jua khʉaba deeju edta pʉch gaai mas amkhĩir ich khĩir machag sĩi ãwat phiepi simjo sim.

⁶ Mag edta dich nem waaujerrpierr agdaujo ichdeu khap maach dʉi aju.

⁷ Ar ʉ̃gthar oberwia bʉ̃ʉrjã meeba ich mag wajapha wenʉrraju khĩirju nʉm dʉi Ẽwandamagta amach tho iyʉʉ apim khõchgau warag nem wajapham appai wauju ẽkhaajem khʉʉnan, irua ich denkha auju, ich mag ich dʉi wenʉrramkhĩir.

⁸ Pari ar i igar khabanaa warag nem khaigbamta waum khõchkhaajem khʉʉn dʉin, khĩir machag thʉnʉmua warre am gaai jua khʉabata irua deeju.

⁹ Magbaadeewai judionaan mag nem khaigba waaujem khʉʉnta wajap dau aug wauphobaadem dʉi okhĩirjug pooma ajurau. Pari wajapcharan amach appaijã khaba, judionaan khabam khʉʉnjã nem khaigbam waaujem khʉʉnan, thumta ĩchab ich agjo aju.

¹⁰ Mamʉ magju khãai judionaan ar nem wajapham waaujem khʉʉnan ʉ̃gtharjã ich dʉi wajaphata wenʉrrapiju. Mag nʉm dʉi ĩchab ichdeuta am tho iekhanaa khõinaa ich dʉi phe wai nʉrraju. Pari irua magjujã judionaan dʉipai khaba, thum judionaan khabam khʉʉn awiajã nem wajapha waaujerr khʉʉn dʉin ich agjo aju.

¹¹ Irua mag ãaur khʉʉnpaita daupiinaa iwiir ãbam khʉʉn kha isee khaba aajeewai judionaan awiajã chi khaigba nʉm khʉʉnan, judionaan khabam khʉʉn dʉi khaibag ãba thʉnʉm, Ẽwandamau oowai.

¹² Judionaan khabam khʉʉnau chadcha judionaan denjo Moiseeu ley phã pʉatarr chukhu nʉm. Mag chukhu naawai mag ley gayam iek khaugba pekau waaujerr khʉʉnag Ẽwandamau mag iek igbaju. Pari ichiita amjã okhoob khaba okhooju, amach pekau gaaimua. Mamʉ mag Moiseeu ley phã pʉarr wai naawai ag gayam iek khaphʉ nʉmta pekau waaujerr khʉʉnagan chadau, ag gaai jaau simjo ipierraa khaba arr gaaimuata Ẽwandamau amag ag iek eudʉwi warre am dau aphʉʉ ajujã jaauju.

¹³ Wajapcharan mag ley gayam iek khaug chirawiajã ag ipierraa khabam chan Ẽwandam na wajaug chukhu sim. Magarrau ũrwia ag ipierraa simʉn chadau ich Ẽwandamaujã wajapha sim a sim.

¹⁴ Pari jãg judionaan khabam khʉʉnau Moisés ley chukhu nʉmta, sĩi amach khĩirjug eemuapai ag gaai jaau simjo nem waauwai, merag chukhu sim amachdeujã khaphʉ nʉm, khani wauju aai nʉ wa waubaju aai nʉ. Mag nʉm aig maata amachigan am leíu.

¹⁵ Maguata mag nem wajapha waauwai, mag leita amach khĩirjug ee wai nʉmjo aajem. Mag naawai, khar nem wajapha waauwai wa khaigba waauwaijã, maguata amag jajaaukhamjo aajem, ʉu sĩ wa khaigba sĩ. Mag amach khĩirjug eepai jãga wenʉrraju aai nʉ a khaphʉ naawaita, maach i agkham edjã Ẽwandamau Moisés ley igba, amachdeu khaphʉ aajerraupaita õor denjo warag am khaibag waumjo aju wa am kõit iekhamjo aju.

¹⁶ Maigta mua mʉg maach peerdʉajem iek jaauwai jaaujemjo, chadcha Ẽwandamau ich Iewaa Jesucristoogta õrau meraa nem waunaa amach odegpai khaigba khĩirjuajerrjã dawaa amag jaaupiju.

Jãga nʉ judionaan Moisés ley wai nʉm khʉʉn

¹⁷ Mua jũrr judionaanag magkhim, mʉ iek ũrbat: Pãar iek mag pãarta judionaan aawai Moiseeu ley phã pʉarr ʉʉrkha nʉmuata pãach peerdʉju anaabma. Magnaa, pãar meeunta ich Ẽwandam õor aawai, ichiita peerdʉju awi pãachdeupai pãach thoojem.

¹⁸ Pãachdeuta irua nem waupim khõsimjã khaphʉnaa mag ley gaai jaau simjo khanta wauju aai nʉ wa wauju khaba nʉ a khaphʉ nʉm aajem.

¹⁹ Pãar iek mag pãachdeupaita mag ley khaugbam gaaimua dau khĩsumjo nʉm khʉʉnjã jaau arrnaa sĩi khĩchag eemjo wenʉrrʉm khʉʉn bʉjã wʉʉpʉiju aai nʉm aajem.

²⁰ Wajapcharan pãachdeuta khaugbam khʉʉnag jaau khaugnaa khĩirjug meraapaim khʉʉnagjã jaau khaug nʉm aajem, mag ley gaai chadam iek phã wai naawai pãachdeuta nem thum khaphʉ nʉm awi.

²¹ Ma chadcha magju aaima. Pari pãachdeu chikhamnag mag jaau nʉmta, khan jãgwi pãachdeu jaaujemjo aba aajerramma. Pãachdeun õrag nem jĩgkhapiba jaaujemta, jãgwi pãachdeun chadcha jĩgkhaajerramma.

²² Pãachdeun pãach khapeenag chikham ʉʉinjã waupiba jaaujemta, jãgwi pãachdeujã chikham ʉʉin waaujerramma. Pãrau khõchkhaba aajem, õrau amach juau nem waunaa maata amach ẽwandam awi agʉg jeeu nʉm oowai. Amau mag nʉm aig chadcha khaigba sim; pari pãachdeu mag nʉmta, jãgwi pãrau amau amach ẽwandamag jeeujem deg nem wajapham wai sĩsidʉmjã jĩgkhaajẽ. ¿Mag nʉmjã pekau khabá?

²³ Pãachdeupain pãachdeuta mag ley gaai chadam iek phã wai nʉm awi, aata wounjo thoojerram. Pari mag iekha nʉmta, ag gaai jaau simjo khaba, Ẽwandam ichaaur nem wau nʉm gaaimua jũrr bigaaum khʉʉnag Ẽwandam eugarta khaigba iekhapiejem.

²⁴ Pãachdeu jãgju khapta ich Ẽwandamaucha pãar jooin igwia ich iek phãpitarr gaai, “Pãach gaaimuata ar chi mʉ iek ʉkhaba nʉm khʉʉnaun warag mʉ eugarta khaigba iekhaajem” a jaaubajieb.

²⁵ Wajapcharan mʉgta sim: Chadcha ar Moiseeu ley phã pʉarr iek wajapha ʉʉrkha simʉgan meheu phʉʉrbich nʉmjã ʉu sim. Pari mag phʉʉrbich wai simjã mag ley ʉʉrkhaba sim chan, parta mag phʉʉrbich nʉmua Ẽwandam õorkha nʉm ag dauchach ich gaai wai sim.

²⁶ Pari magba mag meheu phʉʉrbichba ni judiojã khaba simuata mag ley gaai jaau sim wajapha ʉʉrkha simʉn, magan meheu phʉʉrbichba sĩewiajã, maata Ẽwandamagan phʉʉrbich simjo sim, ich dau na wajapha sĩewai.

²⁷ Magua, Ẽwandamau maach i agkham edjã chi mag ley gaai jaau sim ipierraa simuata, pãar denjo mag chi dauchach ich mor gaai chukhu awiajã, ich garmua pãar jaauwímʉcha jaauju, pãrau pãachta Ẽwandam õor awia irua jaautarr dauchachjã pãach mor gaai wai nʉmta mag i ley phã wai nʉm gaai jaau sim ipierraajã khaba narr aawai.

²⁸ Pãrau khaugba nʉ, judiokha nʉm chan sĩi maach dennaan judionaan aawai õor dakhĩir dich jooin i pʉaba wenʉrrʉm khaba, ni sĩi Ẽwandam denkha nʉm khʉʉn dauchach wai chirʉm anʉmjã khabam.

²⁹ Judío chaar abarmʉn, sĩi dich morta dauchachpiju khãai, Ẽwandam dau na thãar wajapha nʉmʉu. Mag nʉm aiguin chadau sĩi judionaan i ʉʉrkha nʉmua khaba, ich Ẽwandam Akharauta mag maach thãar wajaug api sim. Magta thãar wajapha nʉmʉn chadau, dichjopaim khʉʉnau khaba, ich Ẽwandamauta chadcha maach ʉu wenʉrrʉm aju.