Romanos 1 - Wounaan Meu

Salud

¹ Romapien, maach ãba Cristo iek ʉkha nʉm gaaimua khodkha thʉnʉm khʉʉn, ¿jãgpai nʉ keena? Mʉʉn Pabloou, Jesucristo chog. Muata pãrag mʉg ẽsap phã deepʉi chirʉm. Ich Jesucristoouta mʉ jʉr aujim, jãga Ẽwandamau maach peerdʉ aaujẽ a jaaujem khamkhĩir.

² Mag ich Ẽwandamau jãga maach peerdʉ auju a sim iekhan jooingarwe ich iek jaaumienag phãpitarr iekpaiu.

³ Wajapcharan mag iekhan Ẽwandamau ich Chaai igwiata mag phãpijim, maach Por Jesucristo igwia. Maach mʉig eegarm khʉʉn dʉi ãba sĩeicheegpain, rey David khararr chaain ewagam khʉʉn eeta sĩi parhoobam khʉʉnjo thaabachejim.

⁴ Mamʉ mag amau i thõotarrta deeu iiu phiidʉtarr gaaimua, maimua Ẽwandam Akhaar i dʉi sĩejeewai ag jua theegau õor ajaug paajem gaaimua, ichta Ẽwandam Iewaa chi jua thierrkha sĩerrʉmjã õrag khap apiejem.

⁵ Mag Jesucristoouta ʉu mʉ jʉr auwia i iek jaaujemkha chitʉm, mag i iek jaau chitʉm gaaimua meupierram khʉʉnau irigta ʉdʉraa amach peerdʉpinaa i ipierraa amkhĩir.

⁶ Mag meupierram khʉʉn a chirʉm aig, muan pãarpata jaau chirʉm, pãarjã ich Jesucristoouta ich denkha autarr aawai.

⁷ Mag pãar Romapienjã Ẽwandamau jãsene aajem khʉʉn aawai pãragta mʉg ẽsap phã deepʉi chirʉm, pãarjã i õor aawai. Muan maach Aai Ẽwandamagjã jeeunaa maach Por Jesucristoogjã pãar kõit jeeu chiraajem, pãar ʉu eeg oonaa pãar khõinaa phe wai wenʉrramkhĩir.

Pabloou Romapien oon mam khõchkhaajerr

⁸ Keena, deeum nem jaauju nawe pãrag jaaukhim: Muan Jesucristo gaaimua ich mag Ẽwandamagta ʉu ajim a chiraajem, pãachdeu ʉkhatarr iekta agtha ogdʉba durrum igwia deeum durram magwe pãar eugar õrau wajapha ig iyʉʉ aajem paar.

⁹ Muan ãba Ẽwandam Iewaau maach peerdʉ aaujem iek warag õrag khaphʉ apijuuta ẽkha chiraajem. Magua, ich Ẽwandamaujã khaphʉ sim, mua ichig jeeupierr chadcha pãar kõit jeeujem.

¹⁰ Mag nʉm dʉi ĩchab nawe pãar oom khõchag chiraajeewai irig jeeu chiraajem, pãar oon mʉch pʉimkhĩir, majã ichdeu mag khõsi chirʉm khai mamʉ.

¹¹ Mag pãar dʉi khĩircha oom khõchag chirʉmʉn, pãachdeu ʉkhatarr iek gaaita warag ubʉ paaukhamamkhĩrau. Pari magamkhĩran, mʉchdeu pãrag Ẽwandam iek jaau chitʉm gaaimua ich Ẽwandam Akharagta pãar dʉi ichdeu khõsimjo apim khõsi chirʉm.

¹² Mamʉ wajapcharan mag pãachpaita mua jaau chitʉm gaaimua ubʉ khaba, agdaujo maach thumaam khʉʉnta khĩir onee apim khõsi chirʉm, maach thumaam khʉʉnau ãbam iekpaita ʉkha naawai.

¹³ Cristo gaaimua khodamnaan, mua pãrag khaphʉ apim khõsi chirʉmʉn, biek khapan mʉchdeu pãar oon majujú aajemʉu; pari magʉmjã agtha pod maba chirʉm. Mamʉ ʉuta pãar aar barkhiin, deeum durr maawai aajemjo, muan pãar eejã õor khapanaam khʉʉnagta warag Ẽwandam iek ʉkhapim khõsi chirʉm.

¹⁴ Mamʉ agtha mag khapanaam khʉʉnau ʉkhaba aawai debpaarta paraa chirʉmjo Cristo dʉi mʉ chigaa chiraajem, thumaam khʉʉnag ich iek jaaumkhĩir mʉ jʉr autarrta ãaur khʉʉnagpai jaau chiraawai. Mua jaauju aai chirʉm chi thethemnaanag, bʉ̃ʉrjã serbiiba khitheem khʉʉnag, khĩirjug khaugkham khʉʉnag, khĩirjug meraa khitheem khʉʉnag, thumaam khʉʉnagta jaauju aai chirʉm.

¹⁵ Maguata chadcha pãar jam Roma phobor ee naajem khʉʉnagjã maach peerdʉajem iek jaaum khõchag chirʉm.

Jãga aajẽ maach peerdʉajem iek ʉkhaawai

¹⁶ Mag Ẽwandamau maach peerdʉ aaujem iek ũrwia ʉkha nʉm gaaimuata thum chi mag ʉkha nʉm khʉʉnan ichdeu peerdʉ aaujeewai mʉ chan i iek jawaag bʉ̃ʉrjã chigaa aa khaugba chitʉm. Iin chadcha nacharan judionaan eepaita jaaujeejim. Magtarrta ĩs ewag pawia durr chaaur judionaan khabam khʉʉnagpa jaaujem, amjã agjo peerdʉtkhamkhĩir.

¹⁷ Mag maach peerdʉajem iek ʉkhaawaipaita Ẽwandamau maach chi ʉkha nʉm khʉʉn pekau chukhu apäaijem, warrjã ich magta pekau chukhu narrjo. Ichdeu magju igwia nawe ich iek phãpitarr gaai jaauwai: “Ar chi mʉ iek ʉkha nʉm gaaimua bʉ̃ʉrjã pekau chukhu aajerrjo nʉm khʉʉnta mua ich mag mʉch denkha auju” a sim. (Ab. 2:4)

Jãga nʉ õor Ẽwandam igbam khʉʉn

¹⁸ Pari ar thum Ẽwandam ogkhaba i dau na maach inaam nem waunaa dich khapeen dʉijã nem agcha khaba aajem khʉʉn gayan, ya Ẽwandam khĩir machag burrimʉʉ sim, mag nem khaigbam waum khõchgau i i chaarta ũrjojoopaijã khaba naawai.

¹⁹ Pari Ẽwandamau mag am gaai khĩir machag meeuju a simʉn, ichdeucha õrag ich jua oopi sim gaaimua i khaphʉ aju aai nʉmta juau ogthom mag khaugbamjo naawaiu.

²⁰ Chadcha Ẽwandam chan ãbmuajã ooba aajem, pari amau wajapha khĩirjukhiin, nem thum thʉnʉm irua wautarr oowiapai, “Ãa, jãgan chadcha Ẽwandam sim” aju aai nʉm. Ichdeu mʉg durr ompaatarr aigmua ewag pawiajã merag chukhu sim, ichta chadcha Ẽwandam aawai warrgarwejã ichpaita ich mag jua theeg sĩerrʉm. Pari mag i jua oo nʉmta, juau ogthom i igjojoopaijã khaba aajem. Magua pod amau, “Ẽwandam sim khaugba naawaita mag ʉkhaba aajem” aju khaba nʉm,

²¹ chadcha Ẽwandam sim khaphʉ nʉmta mag ʉkhaba naawai. Mag i sim khaphʉ nʉmta, i khĩrag eejã aba, ni amach nem ig nʉm deejem paarjã irig ʉu ajim aba sĩerrjeem. Magju khãai warag amachdeu nem parhoobam wau nʉm gaaimua, khĩirjugpata ãr thʉnʉmua sĩi maadeu nem igmaphamta khĩirju sĩsidʉm; wajapcharan Ẽwandam iek atheem sĩi edaramjota sĩsidʉm.

²² Amachdeupain amau nem thum khaphʉ nʉm aajem; pari mag khaphʉm anʉmta, khĩirjug chukhumjo warag parhoobata nem wau nʉm.

²³ Mag naawaita maach ompaatarr Ẽwandam ich mag thõojã khaugba sĩerrʉmʉgta jeeubanaa warag nem parhoobam nem amachdeupai wau nʉmʉgta jeeujem. Sĩi maach dajẽkhu khitheem khĩirkha waunaa, nem ichpan khĩirkha waunaa, nemchaain bʉ jayapamjom waunaa, wa sĩi jẽbjã gaai jãau jẽedʉ sĩerrjeemjoo khãijã waunaa magʉmʉgta jeeujem, magʉmta amach ẽwandam awia.

²⁴ Pari amach mag thʉnʉm gaaimua Ẽwandamau warag amag oobamjo apʉiwia amach thãar ee nem khaigba wauju khĩirju sĩsidʉmta warag ʉdʉraa amag waupi sim. Mag, amach wir aigpai chikham õor dʉijã sĩi parhooba thʉnʉm gaaimua, maach chi bigaaum khʉʉnta chigaa aajem.

²⁵ Mag nʉm dʉi amau amach garmua maach Ẽwandam chaarta isegnaa jũrr nem parhoobamʉgta ee thʉnʉm. Ich chi nem thum ompaatarragta jeeuju aai nʉmta, irigta jeeuba, sĩi irua nem waumarragta jeeu nʉm.

²⁶ Amach mag nʉm gaaimuata Ẽwandamau warag amag oobamjo sĩi nem maach inaamjo sĩsidʉmta warag ʉdʉraa amag waupi sim. Magphobaadeewai chará chi ʉʉinaujã sĩi amach ʉʉin aphata amachdeu am aig emkhooin dʉímjo thʉnʉm.

²⁷ Maagwai chi emkhooinjã ich agjo warag ʉʉinjã igba, amach emkhooin aphata ʉʉin dʉímjo am khõchkha thʉnʉmua maach chi bigaaum khʉʉnpata chigaa apiejem, mag amachdeu waum aig maach inaamjo nem wau nʉmua. Mamʉ am jãg nʉm paar chan Ẽwandamau am gaai jua thũu deebam.

²⁸ Amau amach garmuata Ẽwandam igba naawai ich Ẽwandamaujã amag oobamjo apʉiwia sĩi parhoobam khĩirjug maadeu igmaphamta warag ʉdʉraa amag khĩirjupi sim, magbaawai parhoobam nem wauju khabamta amach khõchagpierr waumkhĩir.

²⁹ Maguata sĩi wir aig dich khapeen dʉijã nem agcha aba, parhoobata thʉnʉm: dich õor khabam dʉi khapese, nem khaigbamjã thumta waum khõsi, chikham nemjã dich den apim khõsi, nem khaibag, chikhamnau nem wai nʉm oowia agjo paarpam khõsi, juaujã chikham thõo, chikham dʉi khujʉʉrnem, seunem, chikham khaibag waaunem,

³⁰ chikham jaaunem, chikham khĩirchajã iekhaanem, Ẽwandamjã khõchkhaba, chikham serbiibag pheenem, amachdeupai amach tho iekhaanemnaa sĩi nem atcharag, chikham khaibag wauju khĩirjuanem, chaainjã dennaanau iekhaawai amachig khabamjo ipierraajã khaba,

³¹ Ẽwandam iek atheejã jʉ̃g khĩchag, amach iekhatarrjã chadcha agjo aba, dich khapeenjã kha khõchkhaba, khĩir aubaademjã khĩir thũa chʉuunaa dich khapeenjã dau aug khaugbata thʉnʉm.

³² Mag thʉnʉmʉn, amach mag nʉm paar jerrba Ẽwandamau khĩmie durr amach barkhʉʉiju khaphʉ nʉmta mag thʉnʉm. Pari magʉmta warag amach jua pʉaba, parhooba nem waunaa bigaaum khʉʉnau amach denjo waauwaijã magta khõsi thʉnʉm.