San Mateo 27 - Wounaan Meu

Jesús Pilato aar arrtarr

¹ Maimua ya ãspabaadeewai phadnaan chi pornaan judionaan tagam khʉʉn agjo chi thethem khʉʉn dʉi biirdʉnaa deeu iekhawi warre Jesús thõopʉiju khĩirju phobaadejim aajem.

² Mag amach ap iekhawi, jʉ̃gadau jua bʉʉrkhanaa, Pilatoota Romaam reíu pʉiwia gobernadorkha sĩerr aawai, irigta thõopi jaaumkhĩir i aar arrjierram.

Judaau ichdeupai ich o jorrkaa thõotarr

³ Mag Jesús thõopi jawamkhĩir Pilato aar jua bʉʉrnaa athaadem ũrbaawai chi Judaau deeu ũwaai thumaa ewag khĩirjuwia, chi phadnaan pornaan chi thierrnaan dʉi nʉm aar mawi, mag Jesús paar ichig phatkhon phagtarr thum ũwaai amag deeimajim anaabá.

⁴ Mag deeimawia magjim anʉm: —Jãg woun bʉ̃ʉrjã nem khaigba wautarrjã chukhu khitʉmta pãrag pʉr deetarr gaaimua, mʉʉn chadcha pekau pooma waubarm. Jã chan bʉ̃ʉrjã iekkhõr chukhu sĩejimgui ajim anʉm. Pari magbaawai amachdeu jũrr irig, —¡Ideu mag simgui ajim anʉm; maata magan maar gaai mas sĩeba! Maigjã pʉchta pʉ mag chirabahab ajierram anʉm.

⁵ Amachdeu ichig magbaawai mawia chi phatkhon Aai i jeeujem deg barpʉawi igbaadejim aajem. Mag mawi, ichdeupai pa gaai ʉ̃gthaa jʉ̃gad jʉ̃naa, thoom khẽu ich o gaai jʉ̃naa, baudʉ ich o jorrkaa thõojim aajem.

⁶ Mag barpʉabajeewai phadnaan chi pornaanau chi phatkhon phe auwi, —Mʉg phatkhon õor thõoju paarta phagtarr aawai pod maadeu ofrenda ee ausĩubamgui ajierram anʉm.

⁷ Maimua ag khur deeu amach ap iekhawia ag phatkhonau jẽbta per auju ajierram aajem, durr warpmua õor bee nʉm khʉʉn meebaawai ag ee aukheraag. Mag phatkhon Jesús param arrau jẽb per autarr, Campo del Alfarero a thʉ̃r sĩejim.

⁸ Mag jẽb gaaita Judaau ich thõotarr aawai ĩs ewag pawiajã mag jẽb agtha “bag ãrtarr param phatkhonau jẽb per autarr” a thʉ̃r sĩerrʉm.

⁹ Amau mag phatkhonau mag jẽb per atham aig, ĩchab magju nawe Ẽwandam i jaaumie Jeremías khararrau iekhatarr eyaa oberjim agjo. Irua nawe iekhatarr mʉg ajim: “Israelnaanau chi precio jaautarrpierr treinta piezas auwi

¹⁰ ag phatkhonau el Campo del Alfarero per aujierram, maach Por Ẽwandamau mʉrʉg jaautarr ipierr” a phã sim. (Zac. 11:12-13)

Jesús Pilato khĩirphee wai narr

¹¹ Mag arrwi chadcha Pilato na wai naaimajim aajem. Magbaa Pilatoou irig, —¿Chadcha pʉʉta judionaan Reí? a jeeujim anʉm. Magbaawai Jesuu irig, —Pua khabá khaphʉ jaaubapʉimgui ajim anʉm.

¹² Mamʉ irua mag iekhabarm ũrbaawai phadnaan chi pornaanau chi thethem khʉʉn dʉimua warag i eugar seukha i khaibag jaauphobaadejim anaabá. Mamʉ ich khĩir mamagkhamjã Jesuu bʉdam ãbjã iekhaba, warag khĩuu sĩejim aajem.

¹³ Mag am iek ʉkhaba aawai deeu ich Pilatooupai irig, —Pua chan pʉch khĩir mag iekha nʉmjã ũrbahab, sĩi khĩuu jʉmaag ajim anʉm.

¹⁴ Pari par ich Pilatooucha magtarrjã, ni bʉ ãbjã jʉ̃ʉ abajim aajem. Mag ich khĩircha iekha nʉmjã sĩi khĩuu ichig khabamjo sim oowi Pilatoou ich odegpai, “Mua õor mʉg ooba chitʉmgui” ajim anʉm.

Amach chi judionaanaupai Jesús thõopi jaautarr

¹⁵ Mag ag nawejã mag phiesta ee paawai õrau jaaubarm presota chi gobernadorrau sĩi ich jãg obeerpäaijeejim.

¹⁶ Maagwai preso ãb sĩi thʉ̃rphoo sĩerrʉm sĩejim, Barrabás a thʉ̃r sim.

¹⁷ Mag õrau jaaubarm presota sĩi obeerpäaijerr aawai, Pilatoou ich odegpain Jesuuta sĩi obeerpʉim khõsi sĩerr aawai, mag õor pom wejomʉg jeeumamua, —¿Chijãata pãrau sĩi ich jãg pʉapʉipim khõsi nʉ: Barrabás, wa Jesús ich Ẽwandamau pʉiju aajerr anʉm? a jeeujim aajem amag.

¹⁸ Chi Pilatoou khaphʉ sĩejim aajem, amau amachdeu Jesuu nem wau nʉrrarrjo pod nem waubam gaaimuata mag i pʉr dee wai narr.

¹⁹ Magnaa õor dakhĩir ich juupjem sie gaai oo sĩsijim anʉm. Mag oo simta i ʉʉirau irig, —Jãg wounan õor wajaphamʉuwai; oob jã chan khaibag waupi jaaum. Edaar mʉ khãai khõrkhaa khaibag khãai khõrkha ʉajim i gaaimua a jaaupʉijim anaabá.

²⁰ Mamʉ mag nʉm ee, chi phadnaan pornaanau tagam khʉʉn chi thethem khʉʉn dʉimua warag õor wawikha thʉnʉʉujim anʉm, sĩi Barrabaata obeerpi jaaunaa Jesús thõopi jajaau amkhĩir.

²¹ Ya mag wawikha thʉnʉm ee, deeu chi gobernadorrau jeeumamua amag, —Mʉg numí nʉm aig, ¿chijãata pãrau sĩi chigjã aba obeerpʉipim khõsi nʉ? a jeeujim anʉm. Magbaawai amachdeu Barrabaata obeerpi jajaau aajeejim anaabá.

²² Magbaa deeu Pilatoou amag, —Magan jãg Jesús mag warrgarwe ich Ẽwandamau pʉiju jaaujerrta mʉg nʉrrʉm anʉm dʉi ¿mua jãgajuma? ajim anʉm. Magbaawai thumaam khʉʉnau ihãba, “Pa gaaita meerpbapʉpʉi” aajeejim anaabá.

²³ Magbaa, —¿Pari khan nemta irua khaigba waujĩma, pãrau mag warre i thõopi jaau nʉm? ajim anʉm chi Pilatoou. Ichdeun sĩi pʉapʉim khõchgau par mag jeeu ohookhamjã warag pa gaaita meerppi jajaau aajeejim anʉm.

²⁴ Pilatoou Jesús pʉapʉiju ẽkha nʉm podba sĩi waragta õor phogdʉmam oobaawai do aibeepiwi thumaam khʉʉn dakhĩir jua sũgpʉijim aajem. Magnaa, —Pãrau mʉg woun iekkhõr chukhu simta thõomʉn mʉ chan bʉ̃ʉrjã kulp chukhu chirʉm, maan ya pãach appaim nemeu; mʉ gaai thʉmiet ajim anʉm amag.

²⁵ Magbaawai thumaam khʉʉnau sereu phobaademua warag, —Marau pʉ gaai thʉbam; maachta maach chaain dʉi kulp paraa nʉisibajupa ajierram anaabá.

²⁶ Mag chadcha amachdeu jaau narrjo, Pilatoou Barrabaata sĩi obeerpʉiwia, Jesús wʉpi jaaunaa, pakuls gaai meerppʉimkhĩir warre soldaaun jua ee thʉsĩepʉijim aajem.

²⁷ Magbaawai gobernador di aar arrwi mam pabaimaawai chi soldaaunau amach khapeen khapan thʉ̃rkha auwi amach jãrrcha wai naajim aajem.

²⁸ Magnaa i khajũa ʉ̃rʉm ẽerpʉinaa, jũrr dewam phurii simta jũapipʉinaa,

²⁹ miu den werjũchkha simta porsirkha jũapipʉijierram aajem. Magnaa ĩchab i juachaar gar padamjã joothʉpʉijierram anaabá. Magnaa mag amach rey anʉmua i wau nʉmuata i khĩirphee jĩepor phõbkhanaa, —¿Jãgpai chirʉ́ Judionaan Rey? aajeejim anʉm.

³⁰ Magnaa jũrram khʉʉnau beewi, i gaai icho thunaa, i jua ee amachdeu padam joopʉitarraupai i porchajã wʉmaajeejim aajem.

³¹ Mag i dau aphʉʉ wau wai nʉʉ awia, amachdeu irig khajũa jũapitarr deeu ẽer auwia, ich khajũa chaardamta deeu jũapinaa, maimuan chadau pa gaai meerphepäain athaadejierram aajem.

Jesús pakuls gaai meerphetarr

³² Mag wai oberwi ag dʉi wetumua khʉd ee woun ãb Simón anʉm deeum phobordam Cirene anʉm eem dʉi thẽujierram aajem. Mag dʉi oobaawai chi soldaaunau jũrr ajués magʉgta Jesuu pakuls arrmatarr arrpijierram.

³³ Mag arrmamua buchagdam Gólgota anʉm aar paaukhabaimajim. Mag Gólgota aawai “porpá durrsĩ” aawaiu.

³⁴ Mag mam paaukhabaimaa vino hiel anʉm dʉi nem achaaga waaureu simta domkhĩir deejierram. Mamʉ Jesuu sĩi bʉ̃rʉʉ do oowi tag dobajim.

³⁵ Ya pakuls gaai meerphenaa jiirjop sĩuwia, amach chi meerphe narr soldaaunaupai, khaíuta chi khajũa jʉ̃abarju khai awi, jẽb gaai mokdaudam baraag paaukhajierram aajem, mag nʉmua gan aumaag.

³⁶ Maimua mag chi khajũa amachpierr wai nʉisiewai thʉa nʉmua warag khʉt ohoodo aphobaadejim anaabá, chi pakuls dakha.

³⁷ I meerphe jiir wejom por ʉ̃r ẽsapdau phãkha sim gaai jaau sĩejim, khan gaaimuata i mag wai naajĩ. Chi ẽsapdau gaai “Chamʉʉta Jesuu, Judionaan Rey” a phã sĩejim.

³⁸ Mag i meerphe wai nʉm dʉi ĩchab i bigaau chi nem jĩgmien numí agjo pa gaai amach khĩkhĩetdo meerphe sĩujierram: ãb i juachaar gar, ãb i juawe gar.

³⁹ Mag i meerphe wai narr õor diichjem dakha arr aawai dich nʉm khʉʉnaujã i wau nʉm iekhau warag irig eerpanaa ʉ̃i phʉʉrphʉʉrnaa,

⁴⁰ —Wa jãgʉm khaba puan mag Aai i jeeujem dijã thum pogueupʉinaa deeu khãai thãrjuppaim ee eu dʉnʉʉuju aajerrta, jãg pua wir aig pʉchpai peerdʉ aubama. Pʉ chadcha Ẽwandam Iewaa khai, magan jãg pakuls gaaimua eeg ʉʉrbabaad aajeejim irig.

⁴¹ Mag nʉm dʉi chi phadnaan pornaanau, Moiseeu ley phã pʉarr jawaag chi machnaanau tagam khʉʉn chi thierrnaan dʉimua irig,

⁴² —Deeum khʉʉnan peerdʉ autarrta pʉchta podbahabma. Pʉ judionaan rey khabá; maar dakhĩir jãg pakuls gaaimua eeg ʉʉrbabaad. Mag oobaawain chadau marau ʉkhaju aajeejim.

⁴³ Pʉ iek mag Ẽwandamau pʉ chig apibaju anarr aawai, chadcha ichdeu pʉ khõsi sim khai, nau irua pʉ khaigper auju. Magaag pʉchdeuchajã pʉ Ẽwandam Iewaa anarrau aajeejim irig, ya pakuls gaai pawiajã.

⁴⁴ Jũrram khʉʉnau irig mamagkham ũrwi mag chi khaibagnaan numí i bigaau agjo jiir ʉid thʉnarr khʉʉnaupa warag i wau iekha naajim anaabá.

Jesús meetarr

⁴⁵ Edausĩe thʉnʉm ee, degolp edau khĩbaadem abarmʉn sĩi warre edaramjota joisijim. Mag khĩ thʉnʉʉ awia edau phʉʉibaajer las tres naata deeu aardʉbaadejim.

⁴⁶ Magbaadem ee Jesuu thet, “Elí, Elí, ¿lema sabactani?” ajim anaabá. Mag sim aig maach meúan, “Aay, Ẽwandam, ¿khantheeta pua mʉ mʉg dau aphʉʉ chirʉmjã mʉrʉg oobamjoo aadema?” a khitʉm ajim.

⁴⁷ Ãaur khʉʉn aig narr khʉʉnau mag i iekhabarm ũrtarr aawai jũrr amach khapeenag, —Keena, pãade ũrbat: Maguan warrgar Ẽwandam i jaaujerr Elías khararrta ich aig thʉ̃r simwai anaajim, irua iekhatarr khaugbam gaaimua.

⁴⁸ Irua magbarm bʉrre ãbmua khaphigbaadewi, putjo ũhũphe khitʉm gaai vino adchuchúu simta dorrdʉnaa waibeewi, pa gaai bʉʉrnaa i i aig ʉa aujim, ag gaaim bereu domkhĩir.

⁴⁹ Pari ãbmua i dʉi mamagkham ee, ãaur khʉʉnau jũrr, —Ideu i sĩubá, daau nau Eliaau i jãigmua eeg jiirpʉyaan pierrju aajeejim.

⁵⁰ Mag jochkherʉʉ awia, thet äa a khitawia, warag chaaupabaadejim.

⁵¹ Mag i chaaupabaadem dʉi ĩchab Aai i jeeujem deg ierrgajãrcha put nem parrg thuur eu wejorrta ʉ̃gthaamua eeg sʉrr abarmʉn warre jãrrcha thoophem numiita jijirar joisijim. Magbarm dʉi ʉʉur theega duuibaademua mokporpa thorrchecheukham dʉi

⁵² õor aukhertarr jẽbdipa weeudʉtkhamam ee, khechtarr khʉʉnta deeu phiidʉtkhawi iiu nʉrrjee aadejim. Mag deeu iiutarr khʉʉn ʉu wajapha Ẽwandam iek ʉkha durrumta otarr khʉʉn ajim.

⁵³ Makhʉʉn Jesús iiu phiidʉtarr ẽudee amach jẽbdegmua oberdʉtkhawi Jerusalén phobor ee wetjierram. Mag am phobor ee naaimatarrjã õor khapankham khʉʉnau oojierram.

⁵⁴ Magbaawaita capitán soldaaun dʉi Jesús pakuls gaai jiir wejom eegar narr khʉʉnau mag ʉʉur theeg duuibaadem ee, mamagkham oophobaadee jãphierr nʉm iekhau warag, —Mʉg wounan chadchata Ẽwandam Iewaa ajim ajierram.

⁵⁵ Mag i pʉr auju nawejã ĩchab ʉʉin i juag oojerr khʉʉn khapan Galileamua i dʉi beetarr aawai makhʉʉnau i dʉi mamagkham warpmua oo naajim.

⁵⁶ Mag warpmua oo narr ee naajim: María Magdalena, ãbakhai María, Santiago dʉi Josenaan am ãd, maimua jooi Zebedeo chaain ãdjã dʉi aig sĩejim.

Jesús aukhertarr

⁵⁷ Maimua ya phãarmam ee, rik José anʉm beejim. Ich mag woun Judea durr phobordam Arimatea anʉm aram ajim. Chi Jesús thõoju nawe ya ichdeujã Jesús igar sĩejim.

⁵⁸ Mag sĩewai Pilato aar mawia ya Jesús mee kherʉm mordam aukheraan maag jeeuwimajim aajem. Mag jeeubaimaa Pilatoou ich soldaaunag deepi jaaujim aajem.

⁵⁹ Magbaa Joseeu mawia, ya chi meemdam eeg paa auwi, arrwi, dĩesdam memerkhogjã chukhu bäpphä khitʉm ee pʉreunaa,

⁶⁰ ag nawe ichdeu ich athee durrbʉ khõpag ee jẽbdi iiur khorpitarr ee aukherthurjim, wajapcharan ich jẽb gaaima. Magnaa mokpor pom simua chi jẽbdi i ee wajapha joothʉ pʉawia igbaadejim.

⁶¹ Mamʉ mag chi José Arimateapierr petamjã María Magdalena chan maba, ãbakhai María dʉi amach numpai chi aphʉʉmdam aukhertarr jẽbdi aig ohoodo nʉisijim.

Soldaaunag Jesús aukhertarr jẽbdi thʉapitarr

⁶² Ag noram sĩi jua ʉ̃ʉijerr ed, wajapcharan sabarhedma, chi phadnaan pornaan Moiseeu Ẽwandam iek phã pʉarr wajapcha ʉʉrkhaajerr khʉʉn dʉi Pilato aar wetwia

⁶³ irig, —Marau khĩir eyaa nʉmgui ajim anʉm, jãg seunem nem jaau sĩerrarrau jaauwai, iin meewiajã khãai thãrjup nʉm ee deeu iiu phiidʉju a iekhatarr.

⁶⁴ Magtarr aawai khãai thãrjup soldaaunag chi jẽbdi aig thʉapibá; magba akhiin eeu degolp chi khapeenau edaar beewia, chi binaan amach jua khap ausĩunaa, naspawia chadchata deeu iiu phiidʉjim adukham. Magta aju atheen magan warram khãai warag atchata seukha nem jaau nʉisijugui ajierram aajem, Pilatoog.

⁶⁵ Magbaawai Pilatoou amag, —Pãachdeu mag nʉm khai, magan soldaaunan ar thʉnʉm. Phe arrwi pãachdeu khõchagpierr chi jẽbdijã wajapha phãarnaa jʉʉrthʉ pʉabajet ajim anʉm.

⁶⁶ Magbaawai chadcha soldaaun phe arrwi mag chi jẽbdi ee mokdau joothʉ sĩerr ʉ̃rjã wajapha dusnagjo simua jʉʉrthʉpʉijierram anaabá. Magnaa chi soldaaunag khãai thãrjup ogdʉba aig thʉapi jaaujierram aajem.