San Mateo 19 - Wounaan Meu

Jesuu ʉʉi pʉapiba jaautarr

¹ Mag marag nem jaau sĩi awi, Galileamua mawia jũrr Judea sĩeimajim, Jordán igaau thoogar dʉrba edau obeerjem bi gar.

² Mag i petamjã õrau khaugpʉitarr aawai õor pooma i ẽudee wetjim. Mag õor pom thʉnʉm ee aaunaan khapan thʉnarr aawai magʉm khʉʉnpa monaaupʉi maajeejim.

³ Mag nʉm ee fariseonaan eem khʉʉn ich Jesús aigcha beewi juau ogthom irig, —¿Pua oowai sĩi nem bʉ̃ʉr abarm gaaimua maadeu dich ʉʉi pʉaju aai nʉ? aichejierram.

⁴ Magbaawai Jesuu amag magjim: —Ẽwandam iek phã sim gaai thʉ̃ʉrwai, ¿pãrau ooba aajẽ, warrcha chi ompaatarr Jooiraujã emkhooi ʉʉi dʉita ompaajim a sim?

⁵ Magtarr aawaita emkhooi ich ʉʉi dʉi pabaademʉn ich dennaan kha ogdʉajem, ya ich ʉʉi dʉita ãba nʉrraag. Ya magbarm aigmua warran agdaujo amach appai naajerrta, õor ãbpaimjo ich mag nʉisiejemgui ajim.

⁶ Mag nʉisim chan ya tag amach ãhãbdo nʉrrjee aba, õor ãbpaimjo nʉisijugui ajim. Mag warrgarwejã ich Ẽwandamauta mag papitarr aawai pod iwiir ãbmuajã i ichaaur awi dich õor pʉaju khaba nʉmgui ajim amag.

⁷ Magbaawai jũrr amach garmua irig, —Pari pua mag simta, ¿khan jãgwi Moiseeu jaauwai dich ʉʉi pʉagpaawai ẽsap gaai “Mua ya pʉ pʉa chirʉm” a phãnaa irig deeju aai sim a simma? ajierram irig.

⁸ Magbaawaita Jesuu amag, —Pari jã, nem jaauwaijã pãach jʉ̃g theeg sĩerrjeem gaaimua khabahab ajim. Moiseeun chadcha ʉdʉraa ʉʉin pʉapiejeejim, pari warrcha ich Jooirau ompaawai chan mag pʉamkhĩir khábata ompaajimgui ajim.

⁹ Pãade mʉ iek ũrbat: Ʉʉi bʉ̃ʉrjã deeum dʉi pʉrpʉr khaba simta sĩi pʉam khõchgaupai pʉawia deeum ʉʉi au simʉn maan pekauta wau simgui ajim. [Mag ich ap sim awi chikhamnau pʉatarr ʉʉita au sim wounjã pekauta wau sim, agtha chikham ʉʉikha simta au sĩewai ajim jũrr amag.]

¹⁰ Magbaawaita maach eem khʉʉnaupai ãaur khʉʉnau jũrr, —Maach emkhooin dich ʉʉi dʉi magta aju aai nʉm khai, magan warag ʉʉi aubajuuta simgui ajierram.

¹¹ Magbaa jũrr ich Jesuu marag, —Thumaam khʉʉnau chan cha mua jaau chirʉm iek pod khaugbam; ãba ich Ẽwandamau khaugpi sim khʉʉnaupaita khap ajugui ajim.

¹² Maimua, Pãrag jaaukhimgui ajim, jãgwi mag thumaam khʉʉn pod ʉʉi auju khaba nʉ. Ãaur khʉʉn bi eeweta mag ʉʉin awaag khaba thaaba nʉmgui ajim. Pogkha ya chi jooin pawiajã phãrr japʉi nʉm, khapes apimaaugau. Maagwai pogkha mag phãrr jaba nʉmta, pari amachdeupai Ẽwandamau nem jaau sim wajapcha wawaag awi, bʉ̃ʉrjã khapes aba ich mag thʉnʉmgui ajim, ʉʉinjã khĩirjuba. Mag jaauwi ãbmiecha paawai ichdeupai magjim: —Dichdeu oowai ʉʉijã chukhu chitaju ʉu podjojoo sim khai, magan ich magta nʉrraju aai simgui ajim, ʉʉi chukhu.

Jesuu chaain kõit Ẽwandamag jeeutarr

¹³ Mag nʉm ee, jũrram khʉʉnau Jesús aig chaain aibee thʉnaajim, am gaai pʉrnaa Ẽwandamag am kõit jeeumkhĩir. Pari mag jũrram khʉʉnau chaain aibebeekham oowi chi aibee nʉm khʉʉnagta maachdeuta meeukha naajim, tag aibeepimaaugau.

¹⁴ Mamʉ mag marau iekha nʉm ũrbaawai Jesuu jũrr maachigta, —Ideu mʉ aig chaain aibeepibat. ¿Khanthee pãrau am beepimapha nʉ? ajim. Chi jooin awiajã, chamʉ khʉʉn chaainjo mʉ iek ʉkhakharrso ʉkha nʉm khʉʉnta mʉg jẽb gaaijã ʉu wenʉrrawi ʉ̃gtharjã onee wenʉrrabajup ajim.

¹⁵ Magnaa warag am por ʉ̃r jua ausĩunaa, Ẽwandamag am kõit jeeuwi, warag aigmua chawag maar phe arrjim.

Ẽwan phatkhon paraam Jesús dʉi iyʉʉ athurtarr

¹⁶ Biek ãb woun ãb ẽwan sĩerrau Jesús aig beewi i dʉi iyʉʉmamua, —Maestro, ¿khan nem wajaphamta mua wauju aai chirʉ́ ʉ̃gthar oberaag? Mʉrʉg jaaubá ajim.

¹⁷ Magbaawai Jesuu irig, —¿Khanthee mag nem wajaphamta wawaag pua mʉrʉg jeeu chirʉ́? Nem wajaphamʉn ãba ãbpaita sim; ma Ẽwandamau. Mamʉ pʉ chadcha ʉ̃gthar oberm khõs chirʉm khai, Ẽwandamau ich iek phãnaa Moiseeg deetarr gaai jaau sim ipierraa abá ajim irig.

¹⁸ Magbaa, —Pari ag gaai jaau sim eem, ¿chijãg igwiata pua mag jaau sĩ? ajim, chi ẽwan mag i dʉi iyʉʉ aan berrau. Magbaa Jesuu irig magjim: —Oob õor thõo chitam; oob pʉch õor khabam dʉijã khapes a chitam; nem jĩgkham; seukhajã chikham eugar nem jaau chitam;

¹⁹ pʉch aaijã daupiinaa pʉch ãdjã daupii abá, maimua pʉch khapeenjã wir aig pʉchdeu pʉch khõsi simjo daupii abá ajim ich Jesús garmua.

²⁰ Magbaawai chi ẽwanau, —Mua magʉm thum ʉʉrkha chitabahab. ¿Khani mua wauju agtha waaur chirʉ́? ajim.

²¹ Magbaawai deeu ich Jesuupai irig, —Pʉ chadchata wajapcha am khõsi chirʉm khai, pʉch nem perkhʉʉipʉinaa chi phatkhon aphʉʉm khʉʉndamag jigbapʉi ajim. Mag khaita ʉ̃gthar pawiajã pʉ ich mag nem wajapham paraa chitaju. Mag perkhʉʉipʉinaa jigpʉiwi, mʉ dʉi marrau ajim.

²² Pari ich mag woundam chadcha phatkhon paraam arr aawai Jesuu ichig magbarm ũrwia warre okhĩirjuu petajim.

²³ Mag woundam okhĩirjuu petam oobaawai jũrr maragta ich Jesuu, —Phatkhon paraam khʉʉnta Ẽwandam chi Porkha sim aar oberaagan chadchata thethe simgui ajim.

²⁴ Phatkhonpanta ʉ̃gthar Ẽwandam chi Porkha sim aar oberju khãyau, camello pom jãg maach wounaan khãaijã ʉ̃rpai sĩerrʉmta phithurg chukhu nobeeu kach ee thoogar ober dichjugui ajim.

²⁵ Mag i iekhabapʉim ũrwia chadcha jʉ̃gderraa nʉmua maach i dʉi wenʉrraajerr khʉʉn eem ãaur khʉʉnau, —Mag khai, magan ¿khaita peerdʉagáwa? anaajim.

²⁶ Pari magbaa ich Jesuu marag oonaa, —Õragan chadcha phithurgma mag ũurwai. Mamʉ Ẽwandamag chan bʉ̃ʉrjã phithurg chukhu simgui ajim.

²⁷ Jesuu magbaawai mag chi ẽwan phatkhon paraam dʉi iyʉʉ narr khĩirjuwia, —Maraun chad pʉ dʉi wenʉrram khõchgau maach nemdam wai narrjã khĩirjuba, sĩi thumaa phepʉawi pʉ dʉi ogdʉba wenʉrrabma. Mʉg pʉch dʉi ogdʉba wenʉrrʉm jũrr ¿khandamta marau au durrajuma mʉg atag paawaijã? ajim Pedroou.

²⁸ Magbaawai Jesuu magjim: —Cha mʉ iekha chirʉm iekhau mʉg durr jooi edaujã dʉi thum chi iiurig pawia mʉch chi Emkhooi Iewaa õor Porkhaag khu juupjem wajappha khitʉm gaai oo chirsim ed, pãar mʉg mʉ ogdʉba mʉ dʉi wenʉrraajem khʉʉnta mʉ jup chirʉm bigaau porkhau doce nʉm gaai ohood ajugui ajim. Pãachdeuta mʉ dʉi pãach ipaarmua jooi Jacob khararr chaain doce narr khʉʉn ag chaain ewagam khʉʉnagjã khap jajaau aju, jãgaju Ẽwandamau am dʉi.

²⁹ Maimua ar thum chi mʉ gaaimua wa mʉ iek jaaum khõchgau khãijã amach di, amach naamkhʉʉn, amach eeugpeen, amach aai, amach ãd, amach chaain wa sĩi amach jẽb khãijã khaugba pʉa nʉm khʉʉnagjã amach nem okhootarr khãyaujã ʉ̃r ag atcha deewi mʉch dʉita ich mag wenʉrramkhĩir mʉch aarcha phe aujugui ajim.

³⁰ Pari mag ed ãaur khʉʉn ar mʉig eegar aawai amachta chikham khãaijã ʉ̃rʉʉcha nʉm aajerr khʉʉnta ʉ̃gthar Ẽwandam aar paaukhaimaawaijã jũrr serbiibacha aajerrjoo nʉisijugui ajim. Maimua jũrr ar mʉ gaaimua chikhamnau serbiibag pheejerr khʉʉnta jũrr warm khʉʉn khãaijã ʉ̃rcha nʉisijugui a iekhamajim ich Jesuu, marag ũrmkhĩir.