San Mateo 17 - Wounaan Meu

Jesús sĩi bʉ̃ʉmjo aaderr

¹ Mag ich Jesús maar dʉi iyʉʉ simua mag maar khapeen ãaur khʉʉnag amach daúa ich oopiju jaautarr khur seis días aadem ee, cerro pom sim gaai petajim. Mag ich mam dʉi phe arrjim: Pedro, Santiago maimua Juan, ich Santiago eeum.

² Mag mam wetwi am dakhĩirta Jesús khĩir chaaupabaadejim aajem. I khĩir oowai mʉg edau ãsdawam khĩirjota bʉ̃ʉ thʉnʉisijim aajem; maagwai i khajũa chará phuumjo aadejim aajem, ich bäpgau.

³ I magbaadem ee oowai warrgarm jooin Moiseeta Elías dʉi iyʉʉ dʉnʉnʉihdʉ naajim aajem, Jesús dʉi.

⁴ Mag oobaawaita Pedroou Jesuug, —Señor, ʉu chi agamjo nem wajaug maar mʉig nʉmgui ajim aajem. Pua khõs akhiin mua rãichdidam thãrjup eukham ajim anʉm: ãb pʉ athee, ãb Moisés athee maimua ãb Elías athee.

⁵ Mamʉ Pedro mag iekha dʉnʉm ee, jʉʉnthumie baug beewi am joodʉ athaichejim anaabá. Magbarm ee mag chi jʉʉnthumie eemuata woun iekjo, “Chamʉʉta mʉ Iewaa mʉchdeu jãsehne wai chitʉmʉu, õor peerdʉ aumkhĩir mʉchdeu jʉr autarr. Irua nem jaau simta ipierraa abat” a iekhabarm ũrjierram anʉm.

⁶ Amach chi dʉi wenʉrrarr khʉʉnaucha jaauwai, amachdeu mag ũrbaawaita jãphierr phobaadem iekhau warag kanieu thʉkhookhanaa eeg khokhood aphobaadejim anaabá, khĩeb jẽb gaai dagau dʉrkha.

⁷ Magbaa Jesuu am aig beenaa am gaai juau sĩesĩenaa, —Phiidʉtkhabat, oob jãphierrmiet ajim anʉm.

⁸ Magbaawai chadcha amau phiidʉtkhanaa oowai, tagam khʉʉn chukhu, ãba Jesús appaita sĩejim anaabá.

⁹ Maimua deeu jerag beejierram aajem. Mag ʉʉrbagkha wedurumua chi Jesuu amag, —Mʉg pãachdeu ootarr oob deeum khʉʉnag jaaumiet. Ya mʉch chi Emkhooi Iewaa meewia deeu phiidʉbaawain chadau jaaubat ajim aajem.

¹⁰ Magbaawaita jũrr amach garmua irig, —¿Jãgwi Ẽwandam iek jawaag chi machnaanau jaauwai, mag Elíata ich Ẽwandamaucha pʉiju jaaujem na beeju aajẽ? ajierram aajem irig.

¹¹ Magbaawai ich Jesuu, —Chadcha chi been Elíata nacha beema ajim anʉm. Pari mag i beeju jaautarran, mag Ẽwandamau pʉiju aajerr õrag nʉpi jaaumkhĩirta beeju jaaujimgui ajim anʉm.

¹² Pari Elías ya barthurjim. Mag i barthuurwaijã amau i khaug auba, sĩi warag deeum khʉʉnpii awi i dʉi amachdeu ampierr awi warag i thõopʉijierramgui ajim anʉm. Amachdeu i dʉi jãgtarrjo mʉch chi Emkhooi Iewaa dʉijã ajugui ajim anaabá. Mʉg chirʉmʉn mʉʉn wajap am jua machag ãwatjugui ajim anʉm amag.

¹³ Pari Jesuu amachig magbaawai warre khaug athajierram anaabá, warrgar Ẽwandam i jaaujerr Elías khaba, Juan chi õor por choomie igwiata mag sim.

Jesuu chaai mor eem mepeer jẽupʉitarr

¹⁴ Mag wedurumua ya maar tagam khʉʉn dʉi narr aig jer paaukhabaichem ee, woun ãb beewi i khĩirphee phõbkhanaa irig chaigpamamua magchejim:

¹⁵ —Señor, mʉ chaai wai chirʉm thõthõrrso khitʉm. Mʉ ap chitʉm mʉ chaai dau aug khaugwia monaaubapʉi aichejim. Jãg khitʉmʉn nem theegta baarjem. Khar chará ooju chukhu aawai barbaademua õt eejã burrjem; wa magbamʉn do eejã sĩi dobojo aimaajemgui ajim.

¹⁶ Mua mʉig pʉ khapeen aig aibeetarrjã amau podbajierramgui ajim.

¹⁷ Magbaawai Jesuu magjim, õrag eerpanaa: —Pãran chadcha pãach thãar khaibag gaaimuata Ẽwandamau jãg chaai monaaujujã khĩirjuba nʉm. Pãrau jãg Ẽwandam jua theeg simjã khaugbamjo nʉm, ¿ich jãgta sĩi mua ãwat chitaju aai chirʉ́ pãrau oowai? ¿Khan atchata pãrau mʉ pãach dʉi chitapim ig nʉma? ajim, ajapcha ʉkhaag. Magnaa, Mʉ aig mag chaai aipidut ajim.

¹⁸ Magbaa chadcha chi chaai ich aig aipierrwai chi meperag meeurraunaa oberpi jaaubaawai, i ipierr oberbaadejim. Magbarm aigmua chi chaai monakha ich mag sĩsijim.

¹⁹ Mag chi chaai monaautarr khur maach ap paaukhawi marau ich Jesuug, —¿Jãgwi marau pod jãg chaai mor eem mepeer obeerpi aubajĩ? a jeeujim.

²⁰ Magbaawai ich Jesuu marag magjim: —Jãan pãachdeu mʉg chaai Ẽwandamau monaaujujã khĩirjuba narr gaaimuaugui ajim. Pãrau Ẽwandam jua theeg sim khaphʉnaa pãachdeu nem mag abarmjo apiju khĩirjunaata nem waukhiin, Ẽwandam athee chan phithurm nem chukhu aajeewai, chadcha pãachdeu jajaaukhampierr ich mag pãachdeu jaau nʉmjo apiju. Pãar khĩirjug oojem anaa chi pomag mostaza daudam ar maach dau ee paba khitaajemjo khãijã khitakhiin, chag durrsĩig khãijã, “Jopai mʉigmua mawia chum dʉnʉʉubaimá” abaawai chadcha phithurg chukhu mawia pãar ipierr pãachdeu jaaubarm aar dʉnʉʉuwimajugui ajim. [

²¹ Magnaa ichdeupai, Jãg mepeer khĩir chan sĩi iekhabarmuapai oberba sĩerrʉm. Jãg oberpi awaagan, bʉ̃ʉrjã thach khoba sĩi Ẽwandamagpai jeeu nʉʉ awiata oberpi jaaubaawai obeerjemgui ajim marag.]

Pʉaba Jesuu chikhamnau ich thõoju jaautarr

²² Galilea durr maach ich Jesús dʉi ãba wenʉrraajeewai ichdeu marag magjim: —Mʉch chi Emkhooi Iewaa mʉg chirʉmʉn chi thierrnaanag pʉr deebaawai

²³ sĩi amau mʉ thõopʉiju. Mamʉ mag amau mʉ thõowiajã khãai thãrjup nʉm ee deeu mʉ iiu phiidʉjugui ajim. Maachigcha mag jaaubaawai chadcha maar okhĩirjuu aphobaadejim.

Aai i jeeujem di paarjã phagju aai narr

²⁴ Jesuu maar ich dʉi phe arrwi Capernaum phobor barimajim. Magbaawai Aai i jeeujem di paar phatkhon jeeujem khʉʉnau Pedro ich appai sim aar wetwia irigta, —¿Pʉ maestroou chan Aai i jeeujem di paar phagju aai simta phagba aajeeb? aimajierram aajem.

²⁵ Magbaawai irua, —Keena, mʉ maestroou phagba aajeeb a chirajim aajem amag. Maagwai ya maar maach jẽer narr di aar naajim. Maimua ya chi Pedro maach aar barbaimaawaijã jũrr Jesuu irig ich ag iekpai, —¿Pua jãga khĩirju chirʉ́ Simón? ajim. ¿Pua oowai mʉg durr gaai reinaan thʉnʉm khʉʉnau chijã khʉʉnagta debpaar jeeujẽ: amach khodnaanag wa sĩi parhoobam khʉʉnag?

²⁶ Magbaawai Pedroou irig, —Amach khod khabam khʉʉnagma ajim. Magbaata Jesuujã, —Chadcha chi khodnaanau chan phagba aajemgui ajim. Magua muajã mʉch Aai gaaimua agjo phagbaju aai chirabahab. Chi Aai i jeeujem di i den aawai muajã phagba, pãraujã phagbaju aai nʉmgui ajim.

²⁷ Mamʉ amag maach eugar iekham ugua maadeujã ichiita phagju aai nʉmgui ajim Pedroog. Maimua, Thʉrrdo ee do ʉabamí ajim. Nau nacha pʉch jua gaai khobaichem pua jiir atham o ee phatkhon sĩeju. Mag phatkhonau ʉu pua mʉ kõitjã phagwi, pʉch denjã phagpʉijugui ajim Jesuu Pedroog. Magbaawai Pedroou chadcha ichig jaautarrjo ajim.