San Mateo 14 - Wounaan Meu

Juan chi õor por choomie thõotarr

¹ Mag Jesús nem khĩir pogkhe õor dakhĩir wau nʉrrʉm jaar ĩchab Erodeta Galilea durr reikha sĩejim. Mag ag na õrau nem ooba aajempa ich Jesuu wau sim sĩi bĩi wejom chi Erodeeu ũr athaawai

² ich dʉi ãbam degam khʉʉnag, —Maan Juan chi õor por choomie khararrta deeu iiu phiidʉwia mag nʉrrʉmgui ajim anʉm; maguata mag õor mor masim khʉʉnpa monaau nʉrrabahab ajim anaabá.

^3-4 Irua mag sĩerran mʉga ajim aajem: Maata ich Erodeeu ich naam Felipe ʉʉi Erodías anʉmta khecheu auwi sĩejim anaabá. Mag atheeta Juanau chi reíg, “Pua pod pʉch naam ʉʉi khecheu auwi pʉch ʉʉikha auju khaba simgui” ajim anʉm. Mamʉ sĩi ichig magbaawai warag Juan pʉr aupi jaauwi, cárcel deg phãar sĩupinaa cadenau jʉ̃ sĩupijim anaabá.

⁵ Ichig mag iekhatarr aawaita chi Erodeeu i thõopʉim iigjeejim anʉm. Mamʉ thumaam khʉʉnau Juanau Ẽwandam iekta jaau sim khaphʉ narr aawai, irua thõopʉikhiin, jũrr õrau ichta khaigbaju a khĩirjuwia pod thõoba aajeejim aajem.

⁶ Mamʉ mag nʉm ee, biek ãb chi Erodes año cumpliitarr ag phiesta kha nʉm ee chi Erodías kha jemkhajim aajem, õor khapan thʉnʉm na. Mag i jemkha sim oowia, ich Erodeeu khõchkha thʉnʉisiwi,

⁷ ich bãaurrag, “Pʉchdeu nem khõsim mʉrʉg jeeubá; mʉch imeerba mua deeb khaba deejugui” ajim anaabá.

⁸ Mamʉ magbarm chi ãdaujã ũrtarr aawai ich chaai wawí sĩujim anʉm. Magbaawai chi chaairau ich bãaurr jooyag, “Magan mʉ athee Juan chi õor por choomie porta thep ee audeebá; jãata mua khõsi ʉmgui” ajim anʉm.

⁹ Mamʉ mag Juan porta ichig jeeubaawai warre chi rey okhĩirjuu aadejim anaabá. Mamʉ ichdeu õor thʉ̃rkhʉʉitarr dʉi ãbam mes gaai nʉmuata mag ichig jeeubarm nem deeju a iekhatarr aawai

¹⁰ chadcha Juan cárcel deg sĩerr aar õor pʉiwia thõonaa, chi por appai thep ee waibeepi jaaujim anaabá.

¹¹ Magbaawai i ipierr wetwi, chadcha ichdeu jaautarrjo thõonaa, chi por thʉapnaa aibeewi, chi daupeer mag chi jemkha sĩerrag deechejierram aajem. Magbaa ichdeu jũrr ich ãdag deejim anaabá.

¹² Mag chi Juan o thʉapbapʉim abaawai, i dʉi wenʉrraajerr khʉʉndamau beewi, arrwi, aukherjierram anaabá. Maimua ya mag amau i thõobapäaiwaita maar aig Jesuug jawaan beejierram.

Jesuu õor cinco mil jãhogtarr

¹³ Mag Juan o thʉap thõobarm ich aar jaaubaimam ũrwia, okhĩirjugau warag chawag õor chukag aar maju abaawai, marau i joo arrjim. Pari mag wetumua ya maar dojãrr paaukhabaadem õrau oopʉitarr aawai ag dakha phobor nʉnʉidʉm eem khʉʉnau jũrr khʉd garmua maar na ereubaadejim.

¹⁴ Maimua ya jopimawia ooimaawai i na õor pooma thʉnaajim. Magbaawai am dau aug khaugwi am aaunaanjã monaaupʉimajim.

¹⁵ Mag nʉm ee, ya kheeuraa aadeewai maach garmuata irig, —Mʉg õorjã chukag eeta ya kheeuraa aadem; amag wetpi jaaubá, phobor ee wetwi amach athee khojudam per aumkhĩir anaajim.

¹⁶ Magbaawai, —Khoju jʉraanpai chan am wetju khaba nʉm. ¿Jãg pãachdeuta am jãhogbamma? ajim, ich Jesuu maachigta.

¹⁷ Magbaawai marau, —Maar khoju chukhu nʉmgui ajim amag deeg. Ãba pandamta cinco wai nʉm dʉi ãwarrdamta dau numpai wai nʉm ajim irig.

¹⁸ Magbaawaita ichdeu, —Makhʉʉndam mʉ aig aipidut ajim.

¹⁹ Mag chadcha ich aig aipierrwai õor pom mag thʉnarrag, —Phũak ee ohood abat ajim. Maimua mag pandam cinco narr dʉi chi ãwarrdampa phe auwia ʉ̃gthaag eerpanaa, Ẽwandamag ag paar ʉu ajim anaa, ichdeupai chi pan thorreunaa marag ʉapʉimajim. Magbaawai jũrr maachdeuta õrag jigmajim.

²⁰ Mag jigmamua, jigmamua, ich iiu aawai thumaam khʉʉnau amachdeu khom aig khotarrjã dʉrr apiwi, pan pom sobjim, chi ãwarrjã agjo. Mag chi sobtarr phe aunaa oowai thʉbʉt khapan docen ãb oberjim chi ipiirkham.

²¹ Mag ed mag Jesuu jãhogtarr khʉʉn chi khapanag cinco mil naajim, emkhooin appai, ʉʉin beerba ni chaainjã beerba.

Jesús dojã ʉ̃r nʉrrarr

²² Mag õor pom thach khopiwi jũrr maachta ich na maach dʉrbagkhatarr jap ee wetpi jaaujim, ich na thoom igar naaimamkhĩir. Maagwai ichin agtha ich aig sĩsijim õor oopäaiwai.

²³ Maimua õor thum ereuwia ich appai aadeewaita, i iek buchag gaai ich appai ich Ayag jewaan majim aajem. Maagwai ya edau kheubaadeewaijã mam ich appai chirajim aajem.

²⁴ Magʉmich maran ya dojãrr naajim. Mamʉ maar khĩir garmuata phũ we thʉnarr aawai maar japan phũasau oppherta jiir ahau khajim.

²⁵ Maimua ya ãspa urumuata ich Jesús maar ẽudee beejim. Pari mag urumjã sĩi dojã ʉ̃rta jẽb thetag gayamjo urajim.

²⁶ Mag dojã ʉ̃rta jẽb gayamjo maachig urum oobaawai jãphierrwi maar ähäi khaphobaadejim. Mag jãphierrnaa ähäikhamua, —Keena, akhaar khabahaba anaajim marau.

²⁷ Pari magbaawai ich Jesuu, —Keena, oob jãphierrmiet; mʉ khabahab ajim marag.

²⁸ Magbaa Pedroou irig, —Señor, chadcha pʉchta Jesús khai, magan mʉjã pʉchjo dojã ʉ̃r pʉch aar mapibá ajim.

²⁹ Magbaawai irig, —Beejuma ajim Jesuu. Magbaawai chadcha Pedroou jap eemua waaidʉbaadewi Jesús khĩirphee dʉdʉrgmaa ajim, dojã ʉ̃rta durramjo.

³⁰ Pari phũas dau dapag oowi jãphierrbaadejim. Mag jãphierrbaadem ee ĩchab ya ierrpamajim. Magbaawaita maach Porog, —Señor, mʉ oobahur, mʉʉn ierrpamamgui ajim.

³¹ Magbarm bʉrre Jesuu i jua gaai pʉrnaa, —¿Khanthee pua pʉch ierrpaju khĩirjujĩ? Jãgan pua chan mua pʉchig nem mag aawaijã mʉ iek ʉkhaba chirabma ajim irig.

³² Maimua ya am jap ee waaidʉtkhabaadee chi phũ meuu aadejim.

³³ Mag chi Jesús jap ee pabaadee i khĩirphee kanieu phõbkhanaa, —Chadcha pʉʉta Ẽwandam Iewaau anaajim, marau irig.

Genesaretpien Jesuu monaaukhatarr

³⁴ Mag wetumua thoom igar Genesaret durr phẽeubaimajierram.

³⁵ Mag Jesús barbaimam õrau khaugphobaadee, sĩi ag perás bĩi joisijim. Mag amachdeu khaugphobaadee i aig õor mor masim khʉʉn aibeenaa irig,

³⁶ —Maar aaunaanag pʉch khajũahidam gaaipai khãijã pʉrpibá aajeejim, monaaumkhĩir. Mag chadcha thum i khajũa gaai pʉrmam khʉʉnan warre monaaukha maajeejim, mag sĩi pʉrbarmuapai.