San Mateo 1 - Wounaan Meu

Jooin Jesucristo dau naweram khʉʉn

¹ Mua pãrag ĩgkhakhim, jãga warrgar David reikha sĩerrjo, Ẽwandamau jũrr ich Iewaa Jesucristoogta mʉg durr gaai chi Porkhamkhĩir ichdeucha pʉijĩ. Mag Jesucristojã mag rey David khararr ag chaain ewagam khʉʉn den ajim a khap amkhĩir, ag nawe jooi Abrán khararr sĩejerr aigmua ewag pawi khĩeb chi Jesús thaabatarr aig pãrag jaaukhim.

² Maataa, ich jooi Abrán, Isá aai ajim anaabá; maagwai, Isá jũrr Jacob aai; Jacob jũrr Judá aai. Mamʉ mag Judá ich appai khaba, tagam ich khodnaanpa doce naajim aajem, ich khurau, ich jooi Jacob chaainpai.

³ Mag ich Judá, Fares aai anaa ĩchab Zara aai ajim aajem; am ãd, Tamar a thʉ̃r sĩejim aajem. Mag Fares, Esrom aai ajim; maagwai chi Esrom jũrr Aram aai.

⁴ Ich Aram, Aminadab aai ajim aajem; maagwai chi Aminadab jũrr Naasón aai. Naasón jũrr Salmón aai ajim aajem.

⁵ Chi Salmón, Booz aai ajim aajem, Rahab dʉím; maagwai chi Booz, Obed aai, Rut dʉím. Obed jũrr Isaí aai ajim aajem;

⁶ maagwai chi Isaí jũrr mag rey David khararr ag aai ajim aajem. Mag chi rey David, Salomón aai ajim aajem, Urías jua eem ʉʉi khecheu autarr dʉím.

⁷ Salomón, Roboam aai ajim aajem; maagwai Roboam jũrr Abías aai; maimua chi Abías jũrr Asa aai.

⁸ Ich Asa, Josafat aai ajim aajem; maagwai Josafat jũrr Joram aai; maimua chi Joram jũrr Uzías aai.

⁹ Uzías, Jotam aai ajim aajem; maagwai chi Jotam jũrr Acaz aai; maimua Acaz jũrr Ezequías aai.

¹⁰ Chi Ezequías, Manasés aai ajim aajem; maagwai Manasés jũrr Amón aai; maimua chi Amón jũrr Josías aai.

¹¹ Chi Josías, Jeconías aai ajim aajem. Mag chi Jeconías khod ãbam khʉʉn khapan sĩejim anaabá, maach jooin israelnaan Babiloniapienau amach durrag pʉrkha arr nʉm jaar.

¹² Mag am chikhamnau amach durr pʉrkha arrtarr khur, Jeconías chaai paarpajim aajem. Ma, Salatiel a thʉ̃rjim aajem, Zorobabel aai.

¹³ Ich Zorobabel, Abiud aai ajim aajem; maagwai chi Abiud jũrr Eliaquim aai; maimua chi Eliaquim jũrr Azor aai.

¹⁴ Ich Azor, Sadoc aai ajim aajem; maagwai chi Sadoc, Aquim aai; maimua chi Aquim jũrr Eliud aai.

¹⁵ Chi Eliud, Eleazar aai ajim aajem; maagwai chi Eleazar, Matán aai; maimua chi Matán jũrr Jacob aai.

¹⁶ Chi Jacob, José aai ajim aajem. Mag Joseeta, María jaai ajim anaabá; maimua chi María, Jesús ãd. Mag Jesuuta maadeu ich Ẽwandamaucha pʉiwia beejim aajem ag Jesuu, amach peerdʉ aumkhĩir warrgarwe õrau nʉajerr.

¹⁷ Wajapcharan, mag jooi Abrán khararr sĩerr aigmua ewag pawi David reikha sĩsiju jaar pa nʉm aar, catorce generaciones dichjim anaabá. Mag David sĩsiewaim aigmua ewag nassi pawi maach jooin israelnaan Babiloniapienau pʉrkha arrtarr jaar pa nʉm aar agjo catorce generaciones dichjim aajem. Mag maach jooin Babiloniapien durr narr aigmua ich Ẽwandamaucha pʉiju jaaujerr ewag nassi pawi thaabache nʉm jaar pa nʉm ora agjo catorce generaciones dichjim anaabá; ajapcharan maach Por Jesús thaabache nʉm jaarma.

Jesucristo thaabatarr

¹⁸ Mag Jesucristo thaabatarran mʉgta ajim aajem: Chi María, ewag pawi i ãdpaju, ya Joseeu iek dee wai sĩejim aajem, ag dʉi paag. Pari mag sĩi iek dee wai sĩewai agtha ag dʉijã khaba nʉmta bi ee pabaadejim anaabá. Pari ma chan chikham denjã khaba, ich Ẽwandam Akharauta ich iiu aawai mag i bi ee papijim anaabá.

¹⁹ José chi jaaipajuun Ẽwandam dau na nem agchata waaujerr aawai, sĩi warre ich ʉʉi chi thethemnaanag jaauju khãyau, ichta warag sĩi khĩuu oberju khĩirjubaadejim aajem.

²⁰ Ya irua mag pʉaju khĩirjubaademta, Ẽwandam chog ʉ̃gtharmua beewi irig, —José, David khararr chaain ewagam khʉʉn bi eem, oob pʉch ʉʉi pʉaju khĩirju chiram ajim anʉm. Jãg chaai irua bi ee wai sim chan deeum den khaba, ich Ẽwandam Akharauta jõorpitarr khabahab ajim anʉm.

²¹ Mariaau jãg chaaidam athaawai i thʉ̃rdam Jesús a thʉ̃rbá. I thʉ̃r magta thʉ̃rju, ichdeuta ich phobor amach pekau ee thʉnʉm peerdʉ auju aawai a jaaumajim anaabá chi Ẽwandam chogau.

²² Mamʉ thum mamagkharran, ich i jaaujem khʉʉnag maach Por Ẽwandamau phãpitarr gaai jaau simjoo obeberg mamkhĩirta magpibajieb. Mag irua phãpitarr gaai mag sim:

²³ “Ʉʉi õor meraa khitʉm bi ee pawi chaai ooju. Mag chaai thʉ̃rdam Emanuel a thʉ̃rju” a phã sim. (Is. 7:14) Mag Emanuel a simʉn, “Ẽwandam maach dʉi sim” aawaiu.

²⁴ Maimua mag chi José khãi werba thʉnaawi daukhanpawi phiidʉbaadeeu, Ẽwandam chogau ichig jaautarrjo tag María pʉaju khĩirjuba, ich mag ag dʉi sĩsijim aajem.

²⁵ Pari mag ag dʉi ya ich ʉʉikha wai sĩerrjã, chi chaai auba nʉwe chan José bʉ̃ʉrjã ich ʉʉi dʉi khapes aba aajeejim anaabá. Ya maimua chadcha chi Ẽwandam chogau jaautarrjo chi chaaidam athaawai, Joseeu i thʉ̃rdam Jesús a thʉ̃rjim aajem, ichig thʉ̃rpi jaautarrjo.