San Marcos 8 - Wounaan Meu

Jesuu õor cuatro mil jãhogtarr

¹ Biek ãb deeu ũmaai Jesús aig õor pooma biirdʉbaichejim aajem. Mag nʉm ee bʉ̃ʉrjã thach khoju chukhu narr aawai Jesuu ich khapeenta ich aig thʉ̃rkha aunaa amagta magjim anʉm:

² —Õor pom mʉg thʉnʉm mʉ dau ee dau aphʉʉ durrum. Ya khãai thãrjup pam am maach aigmua bʉ̃ʉrjã ogdʉba, thachdam khojujã chukhu durrumgui ajim anʉm.

³ Ich jãg thachdamjã khopiba amach diig pʉikhiin, khʉd ee wetumua jãdaúa phʉreuju, pod amach di aarjã barba. Magʉm ãaur khʉʉn chará warpmua bee nʉm aawai pod barba khãijã ajugui ajim anʉm.

⁴ Mamʉ Jesuu amachig magbaawai jũrr chi khapeen garmuata irig, —Mʉg maach õor chukag ee nʉm, ¿jamaam thach maadeu amag deebarju? ajierram anʉm.

⁵ Magbaawaita Jesuu amag —¿Pãrau pan dau kharr wai nʉ? abaawai, amachdeu, —Marau pandam sietepai wai nʉmgui ajim anaabá.

⁶ Mag pan siete wai nʉm abaawai Jesuu mag õor pom wejomʉg, —Jẽkhʉt jupkhabat ajim anʉm. Magnaa mag pan siete narrdam jua ee phe aunaa, ag paar Ẽwandamag ʉu ajim anaa thorreuwia, jũrr ich khapeenag ʉapʉimajim aajem, mag õor pom thʉnʉmʉg jigmamkhĩir.

⁷ Mag dʉi ĩchab ãwarrdamjã daudam khapan khaba wai narr aawai mag paarjã Ẽwandamag ʉu ajim anaa jũrr deeu amag ʉapʉimajim aajem, õrag jigmamkhĩir. Magbaawai chadcha chi khapeenau ichdeu jaautarrjo thumaam khʉʉnag jigpʉijierram aajem.

⁸ Mag jig phʉʉrdʉdʉgmamua agdaujo amachdeu khom aig khowi, khʉd biwaau phobaadee thumjã khopʉiba, thʉbʉt siete ipiirkha aujim anaabá.

⁹ Mag khojujã chukhu narr ee irua jãhogtarr khʉʉn chi khapanag cuatro mil naajim aajem. Mag kho dichwi amachig wetpi jaaubaawai, ereubaadee,

¹⁰ ich Jesujã deeu bote ee waaidʉjim aajem. Magbaawai chi khapeenau deeum durr Dalmanutaag i joo arrjierram aajem.

Fariseonaanau amachdeu nem ooba aajem waupi jaautarr

¹¹ Mag mawia ya chi Jesús barbaimam khaugphobaadeewai i aig beejierram aajem, fariseonaan. Mag beewia ogthom daau chadcha i Ẽwandamau pʉitarrta jãg nʉrrʉm khai a khap aag awi irig, —Magan maar dau na ag na õrau nem ooba aajem nem waubá aichejierram anʉm irig, marau oog ithee.

¹² Ichig magbaicheewai chadcha am ipierr waukhiinjã ich iek ʉkhabaju khap warag sĩi jãpho duraa ʉ̃inaa, —¿Khan atchata mua pãar dakhĩir nem wau chitajuuta pãrau mag mʉrʉg nem waupi jaau nʉma? ajim anʉm amag. Mua chan pãar dau na bʉ̃ʉrjã nem waubamgui ajim anʉm.

¹³ Amag mag iekhapʉiwi ichta warag am aigmua petajim aajem. Maimua mag mawi ich khapeen dʉi bote ee waaidʉwi ag khĩirphee dʉrbajim aajem, ich ag thʉrrdo eepai.

Jesuu ich khapeenag fariseonaanjo apiba jaautarr

¹⁴ Mag wetumjã khĩir ee pab jap ee khoogjã khoju arrba awi pandam dau ãbpaita wai khodjorrajim aajem.

¹⁵ Mag ereu phobaadewia khodjorrom ee, Jesuu ich khapeenag, —Khĩir khaphʉ wenʉrrat ajim anʉm. Oob fariseonaan ben maimua Erodes benjã jãg levadurajo sim pãach gaai dʉrbapimiet ajim anʉm.

¹⁶ Amachig mag iekhabaawai amach khoog panjã chukhu naawaita mag iekha simpii awi jũrr wir aig amach eepai mag pan aubeeba arrta ig naajim anaabá.

¹⁷ Pari Jesuu amachig mag iekhabarmjã bʉ̃ʉrjã khaugba naajim aajem. Mag ichdeu iekhabarmjã khaugba warag sĩi ich ichaaur iyʉʉ nʉm khaug athaawaita amag magjim anʉm: —¿Pãach odegan pãraun sĩi pan chukhum gaaimuata mua pãachig magjimpii naab? ajim anʉm. Mua maata pãrag jaauba chirʉm. Jãgan jãg nʉm aiguin pãrau chan mua nem waaujemjã agtha khaugbata naabma ajim anaabá.

¹⁸ Pãar dau paraanaa kachjã wai nʉm; pari mag nʉmta sĩi dau khĩsumjonaa kachjã khĩsumjota nʉm. Pãrau mua nem wau chitʉm oojemjã, ¿khĩir ee paba nʉ,

¹⁹ ar pandam cincopai narrau mua õor cinco mil narr jãhogtarr? Thumaam khʉʉn kho dichwia imie phobaadeewai, ¿thʉbʉt kharr ipiirkha aujĩ, chi sob? Amachig mag jeeubaa i khapeenau, —Thʉbʉt khapan docen ãb ipiirkha aujimgui ajierram anʉm irig.

²⁰ Magbaawai deeu ichdeu amag, —Maimua agjo ar pandam sietepai narrau mua õor cuatro mil narr jãhogtarr edjã, ¿amau khotarr sob thʉbʉt kharr phe aujĩwi? ajim anʉm. Magbaawai, —Thʉbʉt siete ipiirkha aujimgui ajierram anʉm.

²¹ Magbaawaita ichdeu, —Chadma ajim anʉm. Mamʉ pan igju awiajã, ¿pãrau chan deeu mua ompaa aujujã khĩirjubata naab? ajim anʉm. Mua chan levadura chaar jaauba, fariseonaanau nem khaigba jaaujemta jaau chirʉm; pari mag nʉmta pãrau pod khaug auba nʉmgui ajim anʉm amag.

Jesuu woun ãb dau khĩsu sĩerr monaaupʉitarr

²² Mag wetmamua Betsaida phobor ee barimajim aajem. Mag barbaimaawai õrau woun ãb dau khĩsu khitʉm i aig waibeewi irig chaigpachejierram aajem, i gaai pʉrbaawai i dau monaaumkhĩir.

²³ Magbaa Jesuu mag chi daudam khĩsu khitʉm jua gaai pʉrnaa chawag phobor igaau arrjim anʉm. Mag arrwi i dau ichoou phuurnaa i gaai pʉrnaa irig, —¿Pua ʉu oo chirʉ́wi? ajim anʉm.

²⁴ Magbaa chi dau khĩsu khitʉmua, —Eera, mua õor pabʉjo sĩsidʉmta dʉrdʉr nʉrrjeem oo chirʉmgui ajim anʉm.

²⁵ Magbaawai deeu Jesuu i dau eudam aaithʉ aaithʉnaa irig, —Deeu dau ẽe oobá ajim anʉm. Magbaawai chadcha deeu dau ẽe oobarau warre warp dawaa ich mag oo sĩsijim anaabá.

²⁶ Mag dau khĩsu sĩerr monaau sĩsiewai Jesuu ich diig pʉyaagpamua irig tag phobor ee beepiba jaaujim aajem.

Pedroou jaauwai Jesuun warrgarwe ich Ẽwandamau pʉiju aajerrau a jaautarr

²⁷ Jesús mag woun ãb dau khĩsu sĩerr monaaupʉitarr khur ich khapeen dʉi durr Cesarea de Filipo anʉm eem phobordam nʉnʉidʉmʉg majim aajem. Mag wetumua ich Jesuu amag, —Õrau mʉ igwia iyʉʉ nʉm ũurwai, ¿am iek mʉ khai aajẽ? ¿Pãrau ũrba aajẽ? a jeeujim anʉm.

²⁸ Jesuu amachig mag jeeubaa chi khapeenau irig jũrram khʉʉnau, —Am iek pʉ Juan chi õor por choomie aajem. Deeum khʉʉnau jaauwai, pʉʉta Elías aajem, warrgar Ẽwandam i jaaujerr. Maagwai pogkha jaauwai, pʉ sĩi warrgar agjo Ẽwandam i jaaujerr khʉʉn eem aajemgui ajierram aajem irig.

²⁹ Magbaa jũrr amachigcha, —¿Ma pãachdeujãma? ¿Pãrau khĩirjuawai mʉ khai agá? a jeeujim anʉm amag. Magbaawai Pedroou, —Pʉʉn Cristoou ajim anʉm, warrgarwe ich Ẽwandamaucha jʉr auwia õor peerdʉ aumkhĩir pʉiju jaaujerr.

³⁰ Mamʉ Pedroou ichig magbaawai, —Chadcha pua ag eyaa jaaubapʉim, mamʉ oob bʉ̃ʉrjã chikhamnag jawam ajim anʉm. Warm khʉʉnagjã jaaupibajim aajem.

Õrau ich thõoju Jesuu jaautarr

³¹ Maimua Jesuu wir aig ichpai jaaumamua magjim anʉm ich khapeenag: —Mʉch chi Emkhooi Iewaa chadcha dau aphʉʉ aju aai chirʉm. Mʉ dau ãaukha isegwia Jerusalenpie jooin chi thethem khʉʉnau phadnaan chi porkha nʉm khʉʉnaupa Moisés iek jawaag chi machnaan dʉimua mʉ thõomkhĩir pʉr deejugui ajim anʉm. Mamʉ amau mag mʉ thõowiajã khãai thãrjupam ee phiidʉwi deeu mʉ iiu chirsijugui a jaaujim aajem ich khapeenag.

³² Mag, ich dau aug wauju ich khapeenag ũramkhĩir ajapha jaaumajim aajem. Mag irua iekhabarm ũrbaawai Pedroou Jesús chawag warrwia irig, —¿Khantheeta pʉ mag iekha sĩma? Õrau pʉ dʉi magju khaba nʉmgui ajim anʉm irig.

³³ Pedroou mag iekhabaawai Jesuu tagam khʉʉn ich khapeenag ewag phʉʉrba eerpanaa jũrr Pedroogta khĩir masi, —Jopkhaa mʉ aigmua chawag petá ajim anʉm. Pua chan Ẽwandamau nem waum ig simjã khaugba, sĩi parhoobam khʉʉnjota khĩirju simgui ajim anʉm. Meperauta pʉrʉg mag iekhapi sĩebahab ajim anaabá irig.

Jãga aju aai nʉ Jesús dʉi khapeerkhaag

³⁴ Magwia Jesuu ich aig õor thʉnarr khʉʉn dʉi ich khapeenpa ãba thʉ̃rkha aunaa magjim anʉm: —Chadcha pãrau mʉ iek pãach thãraucha ʉkha nʉm khai, ed eepierr magan mua nem waupi jaau chirʉm appaita waubat ajim anʉm, “Mʉchdeuta khap chirʉm mʉchdeu nem wauju” a iekhaba. Mʉ gaaimua chikhamnau dau aphʉʉ pãach thõoju khĩirjuwia khãijã, magʉmjã igba, waragta ʉkhanaat ajim anʉm.

³⁵ Ar chi mʉg jẽb gaai mʉ gaaimua bʉ̃ʉrjã phithurg aumapha wenʉrrʉm khʉʉn chan meem edjã ʉ̃gthar oberbamgui ajim anʉm. Magarrau ar chi mua nem jaau chirʉm waum khõchgauta amach nemjã khĩirjuba sĩi warag mʉ gaaimua wa mʉg õor peerdʉajem iek gaaimua khãijã dau aphʉʉ anʉm khʉʉnan chadau ʉ̃gtharcha oberjugui ajim anʉm.

³⁶ Magnaa amag, Pãrau oowai ¿khan wajaug sĩ ajim anʉm, woun ãbmua mʉg durr thum ichdeupai jʉ̃a wai sĩsim, pari mag sim meebaadee khĩmie durr petam? ¿Irua ich durr thum ich dʉi arrju aai sĩ? Pod arrbam.

³⁷ ¿Khanta mʉg jẽb gaai atcha nem parhẽpagcha sĩerrʉ́ ajim anʉm, agua dich akhaar ʉ̃gthar phag wai oberaag?

³⁸ Maimua ãbmua khãijã ĩs mʉg õor pekau poomanaa Ẽwandam iekjã thãraucha ʉkhaba thʉnʉm eeta mʉ gaaimua wa sĩi mʉ iekdam jaaujupai khãijã õor dakhĩir chigaa amʉn, mʉg mʉch chi Emkhooi Iewaajã thumaam khʉʉn Porkhanaa mʉch Aai jua theeg dʉi ʉ̃gthar i chognaan thʉnʉm khʉʉnpa mʉg durr chachaan beem edjã ĩchab ich khĩircha eerpanaa chigaa warag, “Mua bʉ̃ʉrjã pʉ khaugba chitʉm” a iekhajugui ajim anʉm.