San Marcos 7 - Wounaan Meu

Sĩi jua sũgba thach kho nʉmuapai chan maach ãrba aajem

¹ Khãai ãb Jerusalén phobor eemua Jesús aig beejierram aajem, Moiseeu Ẽwandam iek phã pʉatarr wajapcha ʉʉrkhaajem khʉʉn dʉi ich ag Ẽwandam iekpai jawaag chi machnaanpa.

² Mag beewia amachdeu oowai i khapeen juajã ʉbata thach kho nʉm oobaawai ʉu khábata nʉm ajim anaabá.

³ (Amau mag iekha narran, amach chi judionaan thum amach jooin i pʉaba warrgarwe thach khoopierr ajapha jua ʉnaa khoojemta warm khʉʉnau ich jãg juajã sũgba kho narr aawaita mag iekha naajim anaabá. Maguata am meeun chan jua ʉb khaba chan thach khoba aajeejim aajem, Ẽwandam dau na amach ãrju awia.

⁴ Maguata merrkau ee udthurwia beeujã, amach jooinau jaaujemjo, jua ʉba chan pod thach khoba aajem aajem. Mag tag amau nem waaujem khĩir khapan thʉnʉm amach warrgarm khʉʉn jooin i pʉaba, maguata amau thum amach do doojem jarr, thep, jiedopjomjã thum ʉkhapʉiwi ĩchab amach khãaijem putjã thum jãkhapäaijem anaabá.)

⁵ Amach ich mag sĩerrjeem khapta chi fariseonaanau maestronaan dʉimua ich Jesuug, —¿Khan jãgwia pʉ khapeenau warrgurwe maach jooinau jaaujem ipierraa khaba, sĩi juajã ʉba ich jãgta thach kho nʉma? ajierram anaabá.

⁶ Mag ichig jeeubaa jũrr ich Jesús garmua amag magjim anʉm: —Pãach jãg Ẽwandam iek gayam pãachdeu nem jaaujemjo khaba jũrr ag chaaur nem wau sĩerrjeem khapta Ẽwandamau ich i jaaumie jooi Isaías khararrag pãach igwia ich iekhatarr iek mʉg phãpijimgui ajim anʉm: “Pãran sĩi par iekhaupaita mʉ iek ʉkha nʉm ʉkha nʉm aajem. Pari mag nʉm chan par chadcha thãraucha ʉkhabamta mag sĩerrjeem. Pãach mag nʉm gaaimua pãar thãar chan mʉ dakhajã khaba, sĩi mʉ warpta thʉnʉm.

⁷ Jãg nʉm aiguin parii pãach iphithur pãrau mʉrʉg jeeuju. Pãrau jaau nʉmjã sĩi wir aig pãach khĩirjugpaiu; jã mʉ iek khabam” ajim warrgarwe Ẽwandamau, pãar igwia. (Is. 29:13)

⁸ ’Mag chirʉmʉn pãachdeujã Ẽwandamau nem jaau sim ipierraa khaba, sĩi pãach jooin iigta ee am khõchgau warag irua nem jaau sim ichaaur sĩi pãach juagam nem ʉkhakha aju appai khap sĩerrjee aawaita mag chirʉmgui ajim anʉm amag.

⁹ Amag mag iekhapʉiwi ichdeupai ĩchab magjim anʉm: —Sĩi pãach jooin iigta ʉ̃rcha ee am khõchgau pãrau Ẽwandam iek chaar gaai jaau simta warag asekasmapha aajem.

¹⁰ Jãgju khapta warrgarwe jooi Moisés khararrau, “Pʉch aai pʉch ãd dʉi jãsenenaa okho abá” ajim anʉm. Maimua, “Ar iwiir ãbmua khãijã ich aai wa ich ãd khãijã thõpnaa ãaukha simʉn, maan warreta thõopʉiju aai nʉm” a sim.

¹¹ Pari Ẽwandamau ich iek gaai mag jaau simta jũrr pãar iek mag ãbmua khãijã dich ayag wa dich ãdag khãijã, “Pãrau ig nʉm mua wai chirab mamʉ pod mua deeju khabam, ya thum Ẽwandam itheem aawai” a iekhaju aai sim anʉm, dich dennaan dau aug khaugba.

¹² Magnaa pãar iek mag ya chi mag iekhabarmua chan mag dich dennaan iwiir ãb khãijã dau aphʉʉ kherʉm oowiajã agʉg oobamjo aju aai sim aajem anʉm, bʉ̃ʉrjã agʉg ooba.

¹³ Jãg pãach jooin iigta ee nʉmua pãrau Ẽwandamau nem waupi jaau simta warag isegpʉi nʉm khabahab ajim anʉm amag. Mag nʉmta ewagam khʉʉnagjã pãrau ich magta khaugpi wetum; mamʉ magpaijã khaba, mag tag pãrau nem khaigba jaaujem nem khĩir khapan thʉnaabahab ajim anʉm amag.

Thach kho nʉmuapai chan maach ãrba aajem aajem

¹⁴ Jesuu mag iekhawia ich aig õor thʉ̃rkha aunaa amag, —Pãade thumaam khʉʉnau mʉ iek wajapha ũrbat ajim anʉm.

¹⁵ Mʉg jẽb gaai chadcha õor pekaudam paraa khitheem. Pari sĩi parhooba thach kho nʉmuapai chan Ẽwandam na õor ãrba aajem. Ẽwandam na õor ãrpiejemʉn pãach thãar ee nem khaigbam khĩirjunaa iekhaawaita pãachdeupai pãach ãrpiejemgui ajim anʉm. [

¹⁶ Magnaa amag, Jʉ̃g ʉ̃rʉʉnaa wajapha ũrbat ajim anʉm cha mua pãrag jaau chirʉm.]

¹⁷ Jesuu õrag mag iekhawia ichta jũrr aigmua chaaug petajim aajem. Maimua ya deg paaukhabaimaawai chi khapeenauta deeu ich ag iekpai irig jeeu naajim aajem, amachig jaaumkhĩir.

¹⁸ Mag ichig jeeubaawai jaaumamua, —¿Wa mag chan pãraujã agtha mag iek khaugbata naab? ajim anʉm amag. Mua khabá pãrag, “Sĩi thach kho nʉm gaaimuapai chan pekau paarpaba aajem” a chirʉmgui ajim anʉm.

¹⁹ Thachdam kho nʉmʉn sĩi buch eepaita sĩeimaajem, thãar eejã dubba. Mag buch eepai sĩewi chebapäaiwai deeu chukhu aadeejemgui a jaaumajim aajem. Irua mag sĩerr aiguin Ẽwandamau maachig nem khomkhĩir deetarr chan ni ãbjã khaigba khaba sĩsidʉm a sim ajim.

²⁰ Mag iekhamamua pʉaba ich Jesuu amag, —Õor pekau paarpa nʉmʉn thãar eemua khĩirjug khaigbam ober nʉmuata pekau paarpa nʉmgui ajim anʉm.

²¹ ¿Khan jãgwia mag sĩ? Thãar eeta magʉm khĩirjugjã thum ompaa auwia mammuata dawag ober thʉnaawaima ajim anʉm. Mammuata ober thʉnʉm: dich ʉʉi khabam dʉi khapes aju khĩirjug, nem jĩgkhaju khĩirjug, maimua õor thõoju khĩirjug.

²² Mag tag ober nʉm: chikham nemta dich denkha aum khõsi aju khĩirjug, deeum ʉʉin wauju khĩirjug, parhooba nem khaigbam nem wauju khĩirjug, chikham khũgurju khĩirjug, chikham ãaukha iekha nʉm, wir aig dich tho nʉm, maimua sĩi donjo khĩirjug chukhu nem wau nʉm.

²³ Magʉm nem thum thãar eemua dawag oberdʉtkha thʉnʉmuata Ẽwandam dau na õor pekau paarpapiejem a jaaumajim aajem amag.

Ʉʉi ãb Israelpie ʉʉi khaba simua Jesuug chaigpatarr

²⁴ Jesuu maig õrag jaau sĩewia petajim aajem, Tiro durr Sidón dʉi nʉmʉg. Mag mawia õor aig jẽerimajim aajem. Mamʉ mag ich deg pabaimamjã õrag khaugpimapha sĩejim anaabá.

²⁵ Mag ich khaugpimapha sim ãba, ʉʉikhaardam thõthõrrsom beneu baarjerr ãdau mag i barbaimam ũr athaawai, Jesús aar mawia i khĩirphee kanieu phõbkhabaimajim anʉm.

²⁶ Mag ʉʉi deeum durr Sirofenicia anʉm durram ajim anaabá. Ich mag ʉʉirau Jesús aar mawia chaigpaimajim anʉm, ich chaai mor eem thõthõrrsom ben obeerpʉimkhĩir.

²⁷ Magbaa, judionaan khabam khʉʉn chan agtha monaauju khaba chirʉm awi, Jesuu ich mag ʉʉirag ogthompai, —Ideu nacha Ẽwandam chaainta thachdam khopi athá. Mua pua jaau simjo pʉ chaaita nacha monaaukhiin, mua oowai dich chaainag deeju arr panta khecheunaa saakienag deebarmjo ajugui ajim anʉm irig.

²⁸ Magbaa chi ʉʉyau pʉaba, —Señor, pua jaau simʉn chadau. Pari iin saakienaujã chaain jua bigaau chi pichag mes eegar khʉimam khoojemgui ajim anʉm. Maagjeewai mʉ Israelpie ʉʉi khaba ʉab mamʉ, ¿pua mʉ chaaijã dau aug khaugbaju khai? ajim anʉm irig.

²⁹ Magbaata Jesuu irig, —Pʉch jãg iekha ʉm gaaimua pʉ chaai mor eem mepeer ya oberbaadem. Ya pʉ pʉch diig maju aai ʉmgui ajim anʉm irig.

³⁰ Mag Jesuu ichig “Pʉch diig maju aai ʉm” abaawai, chadcha mawia ooimaawai, i chaai chadcha monakha put ee werba jẽer sim ooimajim aajem, Jesuu jaautarrjo chi mepeer ya i mor eemua oberbaaderr aawai.

Jesuu woun ãb kach khĩsunaa meu khʉkhʉaa khitarr monaautarr

³¹ Mag chaai monaaupʉitarr khur Jesús majim aajem, Tiromua Galilea thʉrrdoog. Mag mamua Sidón phobor ee dichwia Decápolis durrjã agjo dichjim aajem.

³² Mag Galilea pabaimaawai õrau i aig waibeejim anaabá, woun ãb kach khĩsunaa meu khʉkhʉaa khitʉm. Mag chi waibeetarr khʉʉnau Jesuug chaigpaimajim anʉm, amach aaunaandam gaai pʉrbarmua monaaupʉimkhĩir.

³³ Magbaawai Jesuu chi woun mag kachdam khĩsunaa meu khʉkhʉaa khitʉm ich ap chawag arrnaa, i kach ee jĩgpiriu phĩ oonaa, deeu ich jĩgpir gaaipai ichooujã omnaa, jũrr i meukhĩir gaai jãrpʉijim aajem.

³⁴ Maimua ʉ̃gthaag eerpanaa, jãpho duraa ʉ̃inaa chi wounag, “¡Efata!” ajim anʉm. Mag sim aiguin maach meúan “¡Kach aardʉbaad!” a sim ajim anaabá.

³⁵ Jesuu mag iekhabarm bʉrre mag kach khĩsu sĩerrjã warre kach aardʉbaadem dʉi chi meukhĩirjã agjo nem wajaug agua iekha sĩsijim anaabá.

³⁶ Magbaawai õor aig narr khʉʉnag, —Mʉg mua jãg woun monaaubarm oob chikhamnag jaaumiet ajim anʉm ich Jesuu. Mamʉ mag amachig jaaupiba arr ãba, warag amachdeu jaaum aig jaaujeejim anaabá.

³⁷ Mag oowia õor thum dauderraa nʉm iekhau i igwia, “Jesuuwan nem thum wajaphata wau nʉrraajem. Maguata kach khĩsum khʉʉnjã kach aardʉpinaa meu meraam khʉʉnjã wajapha iekhapimaajem” a iekha naajim anʉm.