San Marcos 3 - Wounaan Meu

Woun ãb jua jʉsar khitarr

¹ Biek ãb deeu jua ʉ̃ʉijem ed Jesús mawi Judionaan Ẽwandam iek jaaujem deg dubimajim aajem. Maig woun ãb ooimajim anʉm thoom juadam jʉsar khitʉm.

² Maig naajim aajem ĩchab fariseonaan, Moiseeu Ẽwandam iek phã pʉatarr wajapcha ʉʉrkhaajem khʉʉn. Makhʉʉnau Jesuug bʉ̃ʉrjã dau thõba naajim anʉm, amach dakhĩir Jesuu jua ʉ̃ʉijem ed mag woun monaaubapäaiwai irig, “Jãgan pua chan jua ʉ̃ʉijem edjã ʉʉrkhabata chirab” a iekhaag, mag nʉm dʉi ĩchab magʉm gaaimua thethem khʉʉnagjã i khaibag waupi jawaag.

³ Mamʉ Jesuu amau mag khĩirju nʉm khaphʉ sĩerr aawai warag chi jua jʉsar khitʉmʉgta, —Phiidʉwia dayag pidú, maimua mau õor jãrr dʉnʉʉubaiche ajim anʉm.

⁴ Magnaa jũrr chi fariseonaanagta, —Pãrau oowai ¿khan nemta maadeu wauju aai nʉ ajim anʉm, jua ʉ̃ʉijem ed? ¿Õordam dʉi ajapha aju wa õor khaibag wauju? ¿Õor peerdʉ auju, wa õor thõoju? ¿Khani ʉucha sĩ? a jeeujim anʉm amag. Mamʉ amachig mag jeeutarr ni ãbmuajã bʉ̃ʉrjã i iek ʉkhabajierram anaabá.

⁵ Mag ni ãbmuajã ich iek ʉkhaba abaawai amag khĩir masi eerpanaa warag okhĩirjuu aadejim anʉm, ichdeu oowai amau bʉ̃ʉrjã wir aig amach khapeen dau ee aug khaugba nʉm oowia. Magwia chi jua jʉsar khitʉmʉgta, —Dayag jua ʉabá ajim anʉm. Mag chadcha i ipierr ʉ̃gthaag jua ʉabaawai warre jua monakkha sĩsijim anaabá.

⁶ Mag chi fariseonaanau amach dakhĩir mag woundam monaaubapʉim oobaawai khĩir machgau warag amachta daau paaukhabaadejierram aajem. Maimua rey Erodes igarm khʉʉn chi thethemnaan dʉi ãba biirdʉwia, “Jãga akhiin maadeu jãg Jesús pʉr auwia thõopʉikhamgui” a khĩirju nʉisijim anaabá.

Jesuu Galilea thʉrrdo igaau õor pom monaaupʉitarr

⁷ Maigmua Jesuu ich khapeen ich dʉi phe arrjim aajem, ich ag Galilea eepai thʉrrdo pooma simʉg. Mag i mam dʉi õor khapaana Galileapien Judeapienpa wetjim aajem.

⁸ Jesuu mag õor mor masim khʉʉn monaau nʉrrʉm a ũrphobaadeewai õor pooma i aig bee thʉnʉisijim anaabá: Jerusalenpien, phobor Idumea anʉm aram khʉʉn, dojã Jordán anʉm ee edau obeerjem garm khʉʉn, maimua phobor Sidón anʉm dʉi Tiro dakha phobordam nʉnʉidʉm eem khʉʉnpa beejierram aajem.

⁹ Mag õor pom bee thʉnaawaita Jesuu ich khapeenag ya ag nawe jaau wai sĩejim aajem, sĩi ich ithee bote khĩir khaug wai naamkhĩir, atcha õor pom aadeewai thet ich phẽeuthʉ aum ugua ag ee waaidʉag.

¹⁰ Ich mag ed Jesuu õor pooma monaaukhapʉijim aajem. Mag õor pom monaaumam amach daúa oo narr aawaita warag jũrram khʉʉnau i gaai juaucha pʉrchem iigjeejim anaabá, amachjã monaaumkhĩir.

¹¹ Mag õor pom wejom ee naajim aajem ĩchab, mor ee thõthõrrsom ben paraa sĩsidʉm khʉʉn. Magʉm khʉʉnau Jesús oowai warag aig beenaa, i khĩirphee kanieu phõbkhanaa wiwiukhamuata, “Pʉʉn chadcha Ẽwandam Iewaau” aajeejim anʉm.

¹² Mamʉ Jesuu chi mepeenag meeurrau sĩiujeejim anaabá, thumaam khʉʉn jʉ̃gdaar mag ich jaau wenʉrram ugua.

Jesuu ich dʉi ogdʉba wenʉrramkhĩir doce jʉr autarr

¹³ Mag Jesuu õor pom monaau nʉrrarr khur durrsĩ gaai waaidʉwia ich dʉi wenʉrrarr khʉʉn eem ichdeu khõsim khʉʉn ich aig thʉ̃rkha aujim aajem.

¹⁴ Mag ich aig thʉ̃rkha auwia mag õor khapan ich dʉi wenʉrrʉm khʉʉn eem ichdeucha doce jʉr aujim aajem, ich iek õor ee jaau wenʉrramkhĩir pʉyaag. Ich makhʉʉnta ich iek jaaujem khʉʉnkha thʉ̃rjim aajem, apostolnaan.

¹⁵ Maimua mag doce jʉr autarr khʉʉnag ĩchab ich jua theegjã deejim aajem, ich denjo õor mor masim khʉʉn monaaunaa mor ee mepeer khaigbam sĩsidʉmpa jʉr werpmamkhĩir.

¹⁶ Mag ichdeu doce jʉr autarr khʉʉn thʉ̃r, mʉkhʉʉn ajim: Simón, (ichpai Jesuu Pedro a thʉ̃rjim);

¹⁷ Santiago, jooi Zebedeo iewaa, (ichpai ĩchab Jacobo aajeejim); Juan, agjo jooi Zebedeo iewaa, chi Santiago eeum; (Makhʉʉn Santiago Juan dʉita amach numwe Jesuu “Boanerges” a thʉ̃rjim aajem, am ibʉʉr wau thʉ̃r; mag “Boanerges” a sim aiguin, khõrg pagthʉmjo sĩerrjeem a simʉu.) Maimua mag tag

¹⁸ Andrés, Felipe, Bartolomé, Mateo, (ichpai Leví a thʉ̃r sĩejim); Tomás, Santiago, chi Alfeo iewaa, (ichpai agjo Jacobo a thʉ̃r sĩejim); Tadeo, (ichpai Judas anaa Lebeo aajeejim); Simón chi Cananista, maimua

¹⁹ Judas Iscariote, (ich maguata ewag pawi thethem khʉʉnag Jesús pʉr deeju ajima, i thõomkhĩir). Mag ich khapeen ich dʉicha ogdʉba wenʉrraju khʉʉn jʉrkha auwi degag beejierram aajem.

Õor iek meperauta Jesuug juapá dee sĩejim aajem

²⁰ Mag beewi õrau i deg pabaichem khaug athaawai i aig õor pooma biirdʉbaadejim aajem. Mag õor pom bee thʉnaawai bʉ̃ʉrjã jua par khabam gaaimua Jesujã thach khoba ni i khapeenjã pod thach khoba naajim aajem.

²¹ Jesús aar mag õor pom jũrr phẽphẽeukham gaaimua pod thachjã khoba sim a ũr athaawai chi khodnaanau i awaan wetjierram aajem, lokiebaadeewaita mag thachjã khoba simpii awia.

²² Mag nʉm dʉi ĩchab Moiseeu Ẽwandam iek phã pʉatarr jawaag chi machnaan Jerusalén phobor eemua beetarr khʉʉnaujã i igwia, “Jãan dosãtnaan por Beelzebú aajem dʉi khapeerkha sĩewai ag juapaauta jãg õor mor eem mepeenjã dau daau jʉrkhʉʉi nʉrrabahab” anaajim aajem.

²³ Mamʉ am mag iekha nʉm ich Jesuu khaphʉ sĩerr aawai warag ich aig am thʉ̃rkha auwi amag, —Mua pãrag jeeu ookhimgui ajim anʉm: ¿Pãrau khĩirjuawai meperau ichdeupai wir aig ichjom khʉʉn dawag jʉrkhʉʉiju khai? Meperau chan ben khaigbam chawag jʉrba aajemgui ajim anʉm.

²⁴ Gobiernoou khãijã õor pom ich igar thʉnʉm jãrrcha thoonaa amach wir aigpai werbʉpikhiin, amach wir aigpai obapäaiwai mag gobierno ich mag nem jua theeg sĩerrabaju.

²⁵ Wa magbam khai, woun ãb ich chaain dʉipai meeukhawi amach wir aigpai werbʉkhiin, warag aaidʉju.

²⁶ Ich agjota simgui ajim anʉm, mepeerjã. Meperau wir aig amach eepai juurhi phiriupʉikhiin, magan warre amach opʉijuuta ẽkha phobaadem.

²⁷ Magnaa amag, —Pãade mʉ seu awi wajapha khĩirjubat ajim anʉm. ¿Khaíu mʉg nʉm aig sĩi ãb jierrnem wajapham dʉi ich di thʉa sim aig dubwi i nem jĩgkhaju khai? Sĩi khapanaam khʉʉnau wa i khãai ʉ̃rʉʉcharamua i ibʉʉr auwi khabam chan pod i nem jĩgkhabam. Ich agjota sĩebahab ajim anʉm, mepeerjã. Mʉ i khãai jua theeg khaba chirakhiin, muajã pod õor mor eem mepeen jãg dau daau jʉr werpbajugui ajim anʉm.

²⁸ Mag iekhamamua ich Jesuupai amag magjim aajem: —Pãade pãach jʉ̃gʉucha wajapha ũrbat cha mua jawaagpam: Ẽwandamaun chadcha õor khaibag thumaa chugpaaju, am parhoob iekhamarrpa thum.

²⁹ Mamʉ pekau ãb sim, maan mua Ẽwandam Akhaar jua theegau nem wau chitʉm oo nʉmta warag mepeer gaai thʉ nʉmʉu. Mag pekau chan Ẽwandamau bʉ̃ʉrjã perdonaabamgui ajim anʉm, i Akhaar igwiata mag iekha naawai. Magua Ẽwandam Akhaar igwiata mag khaigba iekhamʉn, mag wounan Ẽwandam dʉi iekkhõr poomata ich mag chirsijugui ajim anʉm, perdonaajã khaugba.

³⁰ Jesuu amag mag iekhatarran, Moiseeu Ẽwandam iek phã pʉarr jawaag chi machnaanau ich Jesús igwia “Jãan Beelzebú dʉi khapeerkha sĩewaita jãg nem jua theeg õor mor eem mepeenjã jʉrkhʉʉi nʉrrʉm” a iekha narr aawai ajim aajem.

Jesús eeugpeenau amach ãd dʉimua i dʉi iekham ig narr

³¹ Mag nʉm ee ich Jesús ãd i eeugpeen dʉi i aig beejierram aajem. Mamʉ sĩi õor pom thʉnʉm khurau pod i aar dubba, daaugajãrpai nʉisiwia jũrr amach garmuata dawag i thʉ̃r naajim aajem.

³² Magbaawai i aig narr khʉʉnau irig, —Pʉ ãdau pʉ eeugpeen dʉimua pʉ ʉ̃phʉʉinpa daaugajãr pʉ jʉr wenʉrrʉm, pʉ dʉi iekhaag aajem a jaaujierram anʉm irig.

³³ Magbaa ichdeu amag, —¿Chijã agá mag mʉ ãd, maimua chijã khʉʉn agá mag mʉ eeugpeen? ajim anʉm.

³⁴ Magnaa ich bigaau ohoodo narr khʉʉnag eerpanaa magjim anʉm: —Chamʉ khʉʉnta mʉ ãd anaa mʉ eeugpeenau.

³⁵ Mʉrʉgan Ẽwandamau khõsimjo nem wau nʉm khʉʉnta mʉ ãd anaa mʉ ʉ̃phʉʉinau, maimua ĩchab makhʉʉnta mʉ khodnaanau ajim anʉm amag.