San Marcos 12 - Wounaan Meu

Khaibag sĩsidʉmta nemjĩir thʉa narr

¹ Maimua Jesuu ich aig õor pos thʉnʉm khʉʉnag mʉg nem ĩgkhaadam jaaumamua magjim anʉm: —Woun ãbmua uvado jĩirjim aajem. Mag jĩirwia ag igaau ajapha thuur phʉʉrdʉpʉiwi ich agjo aig di eu kherjim aajem, ag eegar chi uva cho piirjʉwaag. Magnaa ĩchab didamjã nasãdjo ʉ̃gthaa eu dʉnʉʉujim aajem, ag gaaimua warp dawaa oo phʉʉrdʉdʉ aag. Mag nem thum aaipa sĩuwi, chawag mam khõchkhabaadeewai, chi nemjĩirdo deeum khʉʉnag alquilaapʉiwi, ichin jũrr deeum durr warp petajim aajem.

² Mag mam mawi sĩi awia, ya uva waaubaadem khĩirjunaa, jooirau ich chog ãb pʉijim aajem, chi thʉa narr khʉʉn aar, ich paatem ich ithee deepʉimkhĩir.

³ Pari mag irua ich chogdam pʉitarr di garm khʉʉnau sĩi amach aar barpinaa pʉrphobaadewi, wʉ wai nʉʉ awia, sĩi deeu ich jua kharraa jʉrbapäaiwai, ich juadam parii barjim anaabá.

⁴ Magbaawai ich mag jooi chi uva papau dewam ich chog pʉijim aajem. Mamʉ majã agjo amach aar barpinaa, warm dʉi atarr khãaijã atcha wʉ wai nʉmua porjã khõoppʉiwi, sĩi i khĩir parhooba iekha thʉnʉʉuwia, ĩchab jʉrpʉijierram aajem.

⁵ Magbaawai jooirau deeum pʉijim aajem. Ma paawai chará amach aar barpinaa warre thõopʉijierram anaabá. Magtarr khurjã ich mag ich chognaan khapan päaijeejim aajem, mamʉ makhʉʉnjã warm khʉʉn atarrjo ĩchab khar sĩi mas wauwi päaijeejim anʉm; magbajuun warre thõopäaijeejim aajem.

⁶ ’Maimua ya ãbmiecha tag pʉijujã chukhu aadeewai ich iewaa ãbpai khitaawai bʉ̃ʉrjã chig aba aajerrta pʉijim aajem. I khĩirjugan ich chaai aawai i ogkhaju awiata pʉijiebma.

⁷ Mamʉ par ich jooi iewaa ãba sĩi amach aar barpinaa amach wir aigpai, “Keena, chamʉʉta chi iewaa aawai mʉguata mʉg atagjã jũrr ich aai nemjĩir jʉ̃aju khabahab” ajierram anʉm. “Jãg sĩpí warre maadeu i thõopʉijugui” ajierram anʉm, mʉg uvado jũrr maach denkha awaag.

⁸ Mag, chadcha khapanaam khʉʉnau pʉrphobaadewi, thõopʉinaa, chi uvado igaau eudʉ deethurjierramgui a jaaumajim anaabá.

⁹ Maimua mag nem ĩgkhaadam opʉiwia ich iek ũr narr khʉʉnag magjim aajem: —Pãrau khĩirjuawai ĩsjã agtha mag uvado sim anaa chi thʉa narr khʉʉnjã ich akhʉʉnpai akhiin, ¿jãgaju khai ajim anʉm, magʉm wounaan dʉi? Par irua ich chaai ãbpai khitʉm pʉitarrpata mag thõobapʉim oobaawai, mawia warre amach thum khechpʉiwia, ich uvado jũrr deeum khʉʉnagta jaau pʉabjejugui ajim anʉm ichdeupai.

¹⁰ Magnaa amag, —¿Pãrau Ẽwandam iek phã sim gaai thʉ̃ʉrwai ooba aajẽ ajim anʉm, “Di eu narr khʉʉnau isegtarr dibigta jũrr chi dihãd jãrramkha sĩsim” a sim?

¹¹ “Ẽwandam maach Porouta mag dibig wajaphamjo api sĩewai õrau oowaijã ʉuuta oo nʉm” a phã simgui ajim anʉm. (Sal. 118:22-23)

¹² Jesuu mag nem ĩgkhaadam jaau simua amachta jaau sim khaug athaawai chi fariseonaanau maestronaan dʉimua Asamblea eem khʉʉnaupa ãba ich maigwe i pʉr aum ig naajim anaabá; mamʉ mag i pʉr athaawai jũrr õrau amachta khaigbaju khĩirjuwia warag i dichba amachta ereujim aajem.

Reígjã deenaa Ẽwandamagjã ich paat deepi jaautarr

¹³ Magbaawai chi pornaanau Jesús aar fariseonaan pʉijierram aajem rey Erodes igar narr khʉʉn dʉi, makhʉʉnau i dʉi iyʉʉmamua nem jeeumam khãijã khaugba ipeerdʉ iekhabapäaiwai magʉm gaaimua i pʉr awaag ithee.

¹⁴ Magbaawai makhʉʉnau ereuwia i aar barimawia irig maguimajierram anʉm: —Maestro, marau khaphʉ nʉm, pua nem agchata jaaujem. Pua mag sĩi pʉchdeu oowai magjoo abaawai mag awi parhoobjã nem jaauba, ante pua chadchata thumaam khʉʉnag jaaujemgui ajim anʉm, jãgata aju aai nʉ Ẽwandamau nem jaau sim eyaa wenʉrraag. Pua chan sĩi õrau amachdeu nem jaaum aig nem jaau nʉmʉgjã pʉch khũgurpiba, wa sĩi pʉchdeu oowai magjoo abaawai ag bʉrre sĩi magau aba aajem. Magua marau pʉrʉg jeeum ig nʉmgui ajierram anʉm: ¿Chadchata maach meeun judionaanaujã durrpierram khʉʉn rey Roma sĩejemʉgta impuesto phagju aai nʉ wa phagju khaba nʉ? ajierram anʉm.

¹⁵ Mamʉ mag amau sĩi ich imeraa pʉr awaagta mag ichig jeeubaichem khaphʉ sĩerr aawai amag magjim anʉm: —¿Pãrau khantheeta sĩi mʉ imeraa pʉr auju ẽkha nʉma? Daaig phatkhon chi dau daí mʉ aig aipidut; mua pãrag oopikhimgui ajim anʉm.

¹⁶ Magbaawai chadcha irig phatkhon chi dau daídam deejierram anaabá. Mag deebaawai jũrr ich Jesús garmua amag, —Pãrau chamʉg phatkhon gaai, ¿khai khĩirta oo nʉ, maimua ĩchab ag gaai khai thʉ̃rta phã sĩ? ajim anʉm. Magbaawai amachdeu, —Romaam rey César khĩir khabahab ich thʉ̃r dʉi ajierram anʉm.

¹⁷ Magbaawai Jesuu amag, —Pãrau mag khaphʉ nʉm khai, magan reíg ich paat deenaa, Ẽwandamagjã agjo ich paat deebat ajim anʉm. Amachig magbaawai sĩi jʉ̃gderraa nʉisim iekhau warag amachta khĩu nʉisijim anʉm.

Maach meebarm chadcha deeu iiu phiidʉju khai a jeeutarr

¹⁸ Biek ãb agjo Jesús aig beejierram aajem saduceonaan. Makhʉʉnau jaauwai ya maachta meebaadem chan tag bʉ̃ʉrjã maach akhaar iiuba aajem aajem. Amach mag nem jaau sĩerrjeem gaaimua iyʉʉmamua juau ogthom irig magjierram anaabá:

¹⁹ —Maestro, jooi Moisés khararrau Ẽwandam iek phã pʉarr gaai jaauwai, woun ãb ʉʉi paraa simta mag ʉʉi dʉi chaaijã chukhu meemʉn jũrr chi khod ãbam wai sim khai, magua ich ag ʉʉipai auju aai sim a sim, ag dʉi ich naamʉu chaain ooba arr aawai jũrr i ithee oo deeg, mag oo deebarm i chaainkha nʉisimkhĩir.

²⁰ Maimua amachdeupai warag irig nem ĩgkhamamua magjierram anʉm: —Biek ãb ãbam khod appai emkhooin siete naajim aajem. Am naam chi nacharamua ʉʉi auwia ich mag chaai chukhu wenʉrrʉm ee meejim aajem, chi emkhooi.

²¹ Magbaawai jũrr chi eeumʉu wir aig ich khojaaupai auwi mag dʉijã agjo chaai ooba, chi emkhooita meejim aajem. Magbaa jũrr ich mag ʉʉipai ag eeumʉu auwia mag dʉijã chaai ooba, agjo ich naamkhʉʉnjo meejim aajem.

²² Ich mag ewagjã ãbam ʉʉiraupai mag siete narr thum thegdʉpʉitarrjã ni ãbam dʉijã chaai oobajim anaabá. Maimua ya ẽudeecha paawai chi ʉʉijã agjo meejim aajem.

²³ Magua marau pʉrʉg khap aag ithee jeeum ig nʉmgui ajierram aajem: Khechtarr khʉʉn mʉg atag Ẽwandamau deeu phiriutkha atham edjã mag amach thumaam khʉʉnau ãbam ʉʉipai autarr aawai, ¿chijãata chi jaai khʉ chaarkhajuma? ajim anʉm.

²⁴ Magbaawaita Jesuu amag magjim anaabá: —Pãrau chan bʉ̃ʉrjã Ẽwandam iek phã simjã khaugba, ni i jua theegjã khaugba nʉm gaaimuata sĩi warag khĩirjug chaaurta khĩirju nʉmgui ajim anʉm.

²⁵ Otarr khʉʉn deeu iiu phiidʉtkha phobaadem chan bʉ̃ʉrjã jua pʉpʉr abaju, ya am ʉ̃gtharm Ẽwandam chognaan thʉnʉm khʉʉnjo nʉisiju aawai.

²⁶ Mag õor otarr khʉʉnjã deeu iiuju khap aag ¿pãrau Moiseeu Ẽwandam iek phã pʉarr gaai thʉ̃rba aajẽ? Ag gaai Ẽwandamau Moiseeg, “Mʉʉta pãar jooin Abrán khararr Ẽwandam anaa ĩchab jooi Isá khararr ag Ẽwandamau, maimua Jacob khararr denjã agjo” a sim.

²⁷ “Ẽwandam chan oob mag sĩi chi khecham khʉʉn Ẽwandam khabam. Ẽwandaman chi iwam khʉʉn Ẽwandamau” a phã sim. Irigan nawe khechtarr khʉʉn awiajã agtha iiu nʉmgui ajim anʉm. Magnaa, Pãachta chadcha sĩi chaaurta khĩirju nʉmgui ajim anʉm amag.

¿Chijãata mandamiento ajapcha ʉ̃rʉʉcha sĩ?

²⁸ Moiseeg Ẽwandamau ich iek phãpitarr iek jawaag chi machnaan eem ãbmua mag am ijẽjẽbkham ũr sĩi awi, Jesuu ich dakhĩir wajapha ag eyaa jaaubapäaiwai, jũrr i aig beewi irig, —¿Chijãata Ẽwandam iek phã pʉarr gaai maachig nem waupi jaau sim eem chi ʉ̃rʉʉcharam agá? ¿Khanta ʉ̃rʉʉcha Ẽwandamau maachig waupim khõsi sĩ? ajim anʉm.

²⁹ Magbaa Jesuu mag wounag, —Ẽwandamau ich iek gaai nem waupi jaau sim chi ʉ̃rʉʉcharamʉn mʉgta phã simgui ajim anʉm: “Ũrbathʉ̃ keena, israelnaan: Maach Por Ẽwandaman ichta ãbpai thumaam khʉʉn Porkha sĩerrʉm.

³⁰ Maach Por Ẽwandam sĩi par iiupai khaba, pʉch thãrauchata khõsinaa pʉchdeu wauju ayaampierr ichdeu khõsimjo abá” a sim. Maata Ẽwandamau nem jaau sim chi ʉ̃rʉʉcharamʉugui ajim anʉm.

³¹ Maimua ãbakhai ag garm ich agjopaimʉʉ sĩebahab ajim anʉm. Ma sĩi, “Pʉch khapeenjã wir aig pʉchjo daupii abá” a simgui ajim anʉm. Ẽwandamau nem waupi jaau sim gaai chamʉ khʉʉn numiim khãai ʉ̃rpaim chan chukhumgui ajim anaabá irig.

³² Magbaawai mag chi machdamau jũrr irig, —Maestro, ʉu pua ag eyaa jaaubapʉim, jãan chadaugui ajim anʉm. Maach Ẽwandaman ich appaita sĩerrʉm; ijom chan tag chukhum.

³³ Ẽwandamta dich thãraucha khõsinaa dich khapeenjã daupii nʉmta Aai i jeeujem deg mawia nemchaain khapan thõonaa phaa nʉmua ʉ̃gthaag jeeu nʉm khãaijã ajapcha simgui ajim anʉm.

³⁴ Jesuu oowai mag wounau chadcha agcha ich iek ʉkhabaawai irig, —Pʉʉn pom waaurba chirʉmgui ajim anʉm, Ẽwandamta pʉch Porkhapieg. Bigaaum khʉʉnau mag oobaawai ãbmuajã tag irig jeeubajierram aajem.

¿Mesías khai iewaa ajĩ?

³⁵ Jesús Aai i jeeujem deg Ẽwandam iek jaau sĩewia jũrr ich garmua aig narr khʉʉnag magjim anʉm: —¿Khan jãgwia Moiseeu Ẽwandam iek phã pʉatarr jawaag chi machnaan iek mag Cristo rey David khararr ag chaain ewagam khʉʉn den aajẽ? ajim anʉm.

³⁶ Ich Daviiuchajã Ẽwandam Akharau ichig iekhapibaawai ich ag Mesías igwiapai “maach Por” abajieb. Ante irua phã pʉarr gaai mag simgui ajim anʉm: “Maach Por Ẽwandamau maach Porog ‘Mʉch iek theeg chirʉmjo aag mʉ dʉi ãba mʉ juachaar gar jupbá ajim, pʉch oomapha aajem khʉʉn thum mua pʉch jua ee pʉrkha dee nʉm ora.’ ” (Sal. 110:1)

³⁷ Mag ich David khararrauchajã Ẽwandamau pʉiju aajerr igwia “maach Por” a iekhatarrta, ¿jãga pãar iek í David chaain ewagam khʉʉn denpai aju aajẽ? Mag sĩi ich chaaipai aju akhiin, ich paarmua mag “maach Por” abakhamgui ajim anʉm amag. Mag i ijẽjẽbkham õor pom aig thʉnarr khʉʉnau i iek ũrm khõsi ũr naajim aajem.

Jesuu chi machnaan igwia iekhatarr

³⁸ Jesuu Ẽwandam iek jaaumamua magjim aajem: —Moiseeu Ẽwandam iek phã pʉatarr jawaag chi machnaan dʉi khai, khĩir khaphʉ abat ajim anʉm. Jãkhʉʉnan sĩi khajũa bʉ duurg jũanaa kaaijã ee õrau amach saludaawaijã amach tho iekhapim khõsita sĩerrjeem ajim anʉm.

³⁹ Jãkhʉʉnan amach Ẽwandam i jaaujem deg weetwaijã amachta por garcha thumaam khʉʉnag khĩir jʉrkha juupjem, amachta warm khʉʉn khãaijã wajapcha nʉm awia. Maimua õor chaauram khʉʉnau amach aar thach khomkhĩir thʉ̃ʉrwaijã, parhooba jupba, amachdeuta khãidu wajapcharam jʉ̃a au sĩerrjeemgui ajim anʉm.

⁴⁰ Khoopaa ʉʉin dau aphʉʉm dijã khechthʉg aumaajerram. Mamʉ mag sĩerrjeemta chadcha amach magba chitheem amkhĩir, Ẽwandamag jeeuphobaademjã pʉa chʉuu aphobaadeejemgui ajim anʉm. Pari amach jãg sĩerrjeem paran Ẽwandamaujã am gaai jua khʉaba deejugui a jaaumajim aajem.

Khoopaa ʉʉi ofrenda

⁴¹ Biek ãb Jesús Ẽwandamag jeeujem deg am phatkhon phiejem khĩirphee oo sĩejim aajem. Mag oo simua jũrr bee thʉnʉm khʉʉnau ag ee phatkhon pʉapʉi ereu dich thʉnʉmta eerpa oo sĩejim anaabá. Irua oowai riknaanaun phatkhon pom dee naajim anʉm.

⁴² Mamʉ riknaanau mag phatkhon dʉrrcha dee pʉa nʉm ee, khoopaa ʉʉi ãb aphʉʉ khitʉm beejim aajem. Mag beewi phatkhon chi dau daídam numpai wai sĩerr warre mag numwe ag ee dee pʉapʉijim anaabá.

⁴³ Mag khoopaa ʉʉyau phatkhon bʉ̃rʉʉ wai kherarrdam thum deebarm oowia Jesuu ich khapeen ich aig thʉ̃rkha auwia, —Keena, mua pãrag jaaukhimgui ajim anʉm. Jãg khoopaa ʉʉi dau aphʉʉ khitʉmua phatkhon bʉ̃rʉʉ deejieb mamʉ, Ẽwandam dakhĩiran tagam khʉʉn khãaijã ʉ̃rʉʉchata deebarmgui ajim anʉm.

⁴⁴ Warm khʉʉnaun sĩi amach den sobtarr eemta Ẽwandamag dee naabahab. Mamʉ jãg khoopaa ʉʉi aphʉʉ khitʉmua chan magba, ich den ãbmiecha agua ich thach khoju arrdamta warre thum deebarmgui a jaaujim aajem.