San Lucas 19 - Wounaan Meu

Zaqueo Jesús dʉi ootarr

¹ Mag wetumua ya phobor Jericó anʉm dakha narr aawai warag Jesús ag phobor ee dubwia dichmaa ajim aajem.

² Mag phobor ee sĩejim aajem woun ãb phatkhon paraam. Ma, Zaqueo ajim aajem, õrau gobiernoog debpaar paraa nʉm jeeujem khʉʉn por.

³ Mag wounau Jesús khĩir oog ẽkhaajeejim aajem, mag õor pom wejom eemua. Mamʉ joointa bʉthʉ khitarr aawai pod ooba aajeejim anaabá, bʉ dʉrr khabam gaaimua.

⁴ Mag warm khʉʉn por ʉ̃rmua ichdeu pod ooba abaawai, na khaphig mawia, pabʉ jeeubahkhar neneree khitʉm gaai waaidʉwia nʉbaadejim anʉm, ich eegar dichpinaa oog.

⁵ Mag i pa gaai ʉ̃gthaa simta, Jesuu beewia, ʉ̃gthaag oonaa, i thʉ̃r thʉ̃rnaa irig, —Zaqueo, jopai eeg ʉʉrbabaad, maimua marrau; ĩsin mʉʉn pʉ aigta jẽerimajugui ajim anʉm.

⁶ Magbaa chadcha jopkharraapai ʉʉrbawia, Zaqueoou onee Jesús ich di aar athaadejim aajem.

⁷ Mamʉ chi dʉi wenʉrrarr khʉʉnau oowai, Jesús Zaqueo degta jẽerimaag waaidʉbaadem oobaawai, thumaam khʉʉnau, —Keena, pãade oobat. Jesuun, pekau pooma sim degta waaidʉbaademwai anaajim anʉm.

⁸ Magbaawai Zaqueoou maach Por Jesús khĩirphee bʉjãau dʉnʉʉunaa irig thumaam khʉʉn dakhĩir, —Ũrbá, mua mʉchdeu nem wai chirʉm eem jãrrcha ar aphʉʉ khitheem khʉʉnag deejugui ajim anʉm. Maagwai iwiir ãbam den khãijã seukhawi mua phatkhon khũgur autarr khai, jũrr mua ag khãyau ʉ̃r biek jayap deejugui ajim anʉm.

⁹ Magbaawai Jesuu irig magjim aajem: —Zaqueo, pʉjã ĩchab jooi Abrán khararr ag chaain ewagam khʉʉn deneu, mamʉ ĩsta pua irua ʉkhaajerrjo ʉkha chirsimgui ajim anʉm. Mag gaaimua ĩsin chadau pʉchjã peerdʉwia, mʉg degam khʉʉnpa peerdʉju ed pabaadem.

¹⁰ Mʉch chi Emkhooi Iewaan chadcha õor amach khaibag gaaimua okhoo khitheem khʉʉn jʉrwia, peerdʉ awaanta beejimgui ajim anʉm.

Ãbmua ich chognaanag phidkhamkhĩir phatkhon dee pʉatarr

¹¹ Jesuu Zaqueo dʉi ãba nʉmua iekhatarr ũrwia thumaam khʉʉnau khĩirjuawai, Jesuuta Ẽwandamau pʉitarr aawai, Jerusalenmua ya ichta thumaam khʉʉn Porkhaagpampii naajim anaabá. Mamʉ mag nʉm ee ya chi Jerusalén phobor dakha narr aawai, amau mag ajappai khaugba khĩirju nʉm ajapha khap amkhĩir, amag mʉg nem ĩgkhaadam jaaujim aajem.

¹² Mag ĩgkhamamua amag magjim anʉm: —Woun ãb sĩejimgui ajim anʉm, thethem iewaa. Ma, ich thʉ̃rbapäaiwai, deeum durr majim aajem, jua theeg apiwia reikhapieg. Mamʉ mag mawia iin deeu beeju ajiebma.

¹³ Mag chadcha ya ich maagpamua ich chognaan diez thʉ̃rkha auwia, phatkhon agdaujo amachpierr dʉrrcha jigpʉiwia, “Mʉg phatkhon mua pãrag jig pʉa chirʉmʉn, mʉch bee nʉm ora agua phidkhawia warag ʉ̃r aumkhĩrau” ajim anʉm.

¹⁴ Mamʉ mag woun ich dʉi ãbam durr ee naajem khʉʉnaupaijã i kha khõchkhaba aajeejim aajem. Maagjerr aawai i petam ẽudee õor pʉiwia makhʉʉn dʉi, “Pʉ chan marau maach durr reikhapimapha nʉm” a jaaupʉijierram aajem.

¹⁵ Mamʉ amau mag nʉm ãba, deeu beewia, ichta ya thumaam khʉʉn rey khabaicheewai, mag ich maagpamua phatkhon jig pʉatarr khʉʉn deeu thʉ̃rkhʉʉipʉijim aajem, ich phatkhon jigtarrau phidkhawia chi ʉ̃rʉm aumatarr khap aag.

¹⁶ Magbaawai chi nacha deetarr beewi, “Rey, cha kherʉm pʉ phatkhondam. Pua mʉrʉg deetarrau jũrr mua ag ʉ̃r diez veces gan aujim” ajim anʉm.

¹⁷ Magbaawai chi reíu irig, “Ʉu kherʉm” ajim anʉm. “Pʉ chadcha piyón ajaphamʉu. Mʉg phatkhon pom khaba deetarrau pua jãgbarm khai, jãgan jãgtarr jũrr mua pʉrʉg phobor diez deekhimgui ajim anʉm chi reíu, pʉchta ag eem khʉʉn gobernador khamkhĩir.”

¹⁸ Magbaawai ãbmuajã beewia, irig, “Rey, cha kherʉm pʉ phatkhon” aichejim anʉm. “Mʉrʉgjã pua dee pʉatarrau cha mua ag ʉ̃r cinco veces gan wai chirʉm” ajim anʉm.

¹⁹ Magbaawai ĩchab magʉgjã chi reíu, “Puajã jãgan phobor cinco jʉ̃ajugui” ajim anʉm.

²⁰ Thumaam khʉʉnag mag jeeukha oomam aawai deeum thʉ̃rpʉijim aajem. Magua paawai beewia magchejim anʉm: “Rey, pua mʉrʉg phatkhon deetarr mua sĩi putdam ee pʉreunaa ãkha kherjim, akhoom ugua. Magtarr aawai cha sim” ajim anʉm “pʉ phatkhondam, ich agpierrpai.

²¹ Mua pʉ phatkhonau bʉ̃ʉrjã phidkhabajim, pʉch jãg õor dʉi atcha athuu sĩerrʉm khaphʉ chitaawai. Mua agua phidkhawia gantarr akhiin, chi ʉ̃rʉm pua sĩi khecheu aukhamgui” ajim anʉm, “pʉ den sĩi chikham jua phithur atarrta pʉch denjo aadep aajeewai.”

²² Magbaawai chi reíu magjim aajem irig: “Pʉʉta mʉ chog chi khaigbampama. Pʉ gaaita thumaam khʉʉn khuseugan thʉnʉm. Pʉch iiupaita pua mʉ mag jaau chirʉm khai, magan muajã pʉ dʉi pʉchdeu jaau simjo ajugui” ajim anʉm.

²³ “Pʉ iek mag mʉ athuuchanaa chikham phithurg wautarrta mʉch denjo aajem anʉpí, ¿jãgwi mʉ phatkhon banco ee deen mabajĩ” ajim anʉm, “mʉch beewai ʉ̃rʉʉpai bãau sim oochemkhĩir?”

²⁴ Maimua jũrr thum aig narr khʉʉnag magjim aajem chi reíu: “Jãg ichig deetarrpierrpai wai sim den khecheunaa, jũrr ar ichig deetarr ʉ̃r diez gan autarragta deebat” ajim anʉm.

²⁵ Magbaawai chi aig narr khʉʉnau chi reíg, “Rey, mamʉ ya irua nem pom wai sim. ¿Khanthee tag irig deeju aai sĩ?” ajierram anʉm.

²⁶ Magbaa chi reíu, “Mua pãrag jaaukhimgui” ajim anʉm. “Ar mʉ athee nem wawaag nem par daúa ooba aajem khʉʉn dʉin mua mʉch garmuajã ajapha aju, amau chokhõgba mʉ athee nem wau naawai. Mamʉ ar mag nem waumapha nʉm khʉʉn dʉi chan magba, mʉchdeu amag nem deetarrjã warag am jua eem khecheu aumaju.

²⁷ Maimua ĩchab ar chi mʉ khĩir oomaphanaa mʉrʉg amach reikhapimapha narr khʉʉn, mʉig mʉ aig aubeenaa mʉ dakhĩir khechbapʉit” ajim anʉm.

Jesús Jerusalén phobor dubimatarr

²⁸ Mag jaau dichwia Jesús Jerusalén phoborog petajim aajem.

²⁹ Mag mamua phobor Betfagé anʉm dʉi ãb agjo Betania anʉm dakha durrsĩ Olivo anʉm aar barbaimaawai ich khapeen eem numí thʉ̃rkhanaa pʉyaagpamua amag magjim aajem:

³⁰ —Achá maach khĩirphee phobordam sim ee ereubaadet. Nau chi phobor ee dub nʉm aig pãrau burrodam pa gaai jʉ̃ kherʉm ooimaju. Mag burro gaai chan agtha ni ãbmuajã waaidʉba khitʉm. Ma ẽer aipidut ajim anʉm.

³¹ Ãbmua khãijã beewia pãachig, “¿Khanthee jãg nemchaai ẽer arraag ẽkha nʉ?” a jeeubaawai, sĩi ithũu irig, mua ig chiraawaita arrum abat ajim anʉm.

³² Mag jaaubaawai ereubaadeeu chadcha amachig jaaupʉitarrjoo ooimajierram anaabá.

³³ Mag oobaimaawai ya chi burrodam aibeeg ẽer nʉm ee, chi papkhʉ beewia amag, —¿Khanthee pãrau mʉ nemchaai ẽer warrúma? aichejim anʉm.

³⁴ Magbaawai amachdeu irig, —Maach Por Jesuu ig naawaita marau arrubahab ajierram aajem.

³⁵ Mag chadcha Jesús aig chi burrodam aibeewi, amach khajũa jũa nʉm ʉ̃r joothʉ jũajem manto anʉm ẽerkhanaa, jũrr chi burro phõ ʉ̃r theernaa, ag ʉ̃r chi Jesús jiirpʉijierram aajem.

³⁶ Magbaawai ĩchab warm khʉʉn am dʉi wenʉrrarr khʉʉnaujã agjo mag manto joothʉ jũa narr ẽerkhanaa i maju khʉd ee theerkhamajierram aajem, ichta chadcha am Porou awia.

³⁷ Maimua ya durrsĩ Olivo anʉm aigmua ʉʉrba nʉm dakha aadem ee, õor pom i ẽudee onee pos wedurum khʉʉnau amachdeu ag na mag nem ooba aajempa Jesuu waumaajem oojem khĩirjunaa Ẽwandamag jeeu nʉmua ĩchab “Ʉu ajim” a serereu khaphobaadejim aajem.

³⁸ Mag Ẽwandamag jeeu nʉmua, —Ʉucha abarm Ẽwandam; ich mʉʉta pʉchdeu pʉch jũrr maar Reikha pʉibarmʉugui ajierram anʉm. Mʉg Rey pʉibarm gaaimua pʉchdeu jʉr aumam khʉʉnan ʉ̃gtharm magwe pʉ dʉi khõinaa wenʉrraju. Ʉu abarm Ẽwandam. Pʉjom chan ãbjã chukhumgui ajierram aajem.

³⁹ Mag õor pom wenʉrrʉm ee ĩchab chi fariseonaanjã dʉi wenʉrrarr aawai, mag õor serereukham ũrwia, Jesuug magjierram anʉm: —Maestro, ¿jãgwia pua pʉch igar nʉm khʉʉnag iekhabama, khĩupagkhamkhĩir?

⁴⁰ Magbaawai ich Jesuu jũrr amag, —Mamʉ amau mag nʉm chadcha khabahab ajim anʉm. Õor mag serereukham khʉʉnag mua iekhabaawai am chadcha khĩuu nʉisikhiinjã, jũrr ar mokdau thʉnʉmua amau serereukharr iekpai wounaan denjo sereu phobaadebajup ajim anʉm.

⁴¹ Mag wetumua ya chi Jerusalén phobor dakhacha aadeewai, phobor eerpa wai sĩi awia, thumaa khĩirjuwia Jesús bĩebaadejim aajem.

⁴² Mag bĩemamua chi phoborpien igwia magjim anʉm: —¡Eh, Jerusalenpien! Ẽwandam dʉi pãach khõinaa wenʉrramkhĩir pãachig mua jaaujerr iek pãachdeu isegtarr, ĩs mʉgnaa khãijã deeu ãsie thumaa khĩirjuwia igkhiin, pãar ʉu peerdʉkhamgui ajim anʉm. Mamʉ khanii magʉm iek pãar khĩirjug ee barjupa.

⁴³ Pãar jãg nʉʉ awi pãar oju ed barbaicheewai, pãach oomapha aajem khʉʉnau sĩi pãar phʉʉrthuur auchewia, phobor igaau warpham magwe pãar oberm ugua thuur phʉʉrdʉpʉijugui ajim anʉm. Magnaa pãar obeerwaim athee oopaar aju,

⁴⁴ pãar thum khechpʉpʉigmamua ni ãbjã bʉ euheu khitʉm ooba sĩwaag. Magbarm aigmua atag di jãg ãbam ʉ̃r joothʉ eu sĩsidʉmjã tag pãrau ich jãg oobajugui ajim anʉm, Ẽwandamau ich garmua pãach oon beetarrjã warag i isegtarr gaaimua.

Aai i jeeujem degmua Jesuu õor jʉrkhʉʉitarr

⁴⁵ Maimua chi Jerusalén phobor eecha pachewia, Ẽwandamag jeeujem deg dubwia, ag ee tiendegamjo nem per narr khʉʉnag magjim aajem Jesuu:

⁴⁶ —Ẽwandamau ich igwia ich iek gaai, “Mʉ diin sĩi mʉrʉg jeeujem diiu” a sim. Mag simta pãachdeuta ag ee mʉg nem parhẽpag per nʉmua sĩi chikham khũguurjem dikha wai naabma ajim anʉm. Mag warag meeurraunaa dawag jʉrkhʉʉipʉijim anaabá.

⁴⁷ Magtarr khurjã ed eepierr ich ag Ẽwandamag jeeujem degpai õrag Ẽwandam iek jaaujeejim aajem. Mamʉ chi phadnaan porkha nʉm khʉʉnau chi machnaan dʉimua, phobor eem khʉʉn chi thethemnaan dʉimua meraa i thõopäaig ẽkhaajeejim anaabá.

⁴⁸ Mamʉ pod i chig aju khaba aajeejim aajem, õor pom thʉnʉm khʉʉnau sĩi ãba i iek ũrm khõchgau bʉ̃ʉrjã i kha ogdʉba aajerr aawai.