Judas 1 - Wounaan Meu

Salud

¹ Mʉʉn Judaau, Jesucristo chog; mʉchpaiu Santiago eeum. Muata pãrag mʉg ẽsap phã chirʉm, pãar ar ich Ẽwandamaujã khõsinaa ich iek ʉkhamkhĩir ichdeucha thʉ̃r autarr khʉʉn aawai Jesucristoou thʉa wai sĩejem khʉʉnag.

² Keena, mʉ salud athat. Muan Ẽwandamagta pãar kõit jeeu chirʉm, ichdeuta dʉrrcha pãar eeg oowia pãach eejã khõinaa apinaa ich denjo warag dich khapeenjã kha khõsi apimkhĩir.

Chad khabam iekta jaaujem khʉʉn

³ Keena, maach peerdʉajem iek maach thumaam khʉʉnau ãba wai nʉm jawaagta mʉg ẽsap phãm khõchaaga chirajim; pari magtarrta jãg Ẽwandam iek ʉkha nʉm awi amach khaugbajupii awi hermanonaan chaar ee jãg seukha nʉrrjee aawaita eeupemjo mʉg pãrag phã deepʉi chirʉm, pãachdeu ʉkha nʉm iek isegba warag ag kõitta dich khapeen kõit jãau nʉmjo dʉi ubʉ am dʉi iek thierrkha durrumua ʉdʉʉr pãach khũgur aupimaaugau. Jãg pãrau ʉkha nʉmta Ẽwandam iek charau, ar Jesuu ich i jaaumkhĩir ichdeucha jʉr autarr khʉʉnau nacha pãachig jaautarr. Jãg amau pãrag jaautarran, parhoobam khʉʉnau agjo i iek awi jaau nʉm ʉkham ugua ajim.

⁴ Pari jãg seukha nʉrrjeem khʉʉnan õor khaigbam khʉʉnau; jãkhʉʉn Ẽwandamau ich iek gaai jaau simjo jerrba khĩmie durr barkhʉʉiju khʉʉn khabahab. Maguata amau maach Por Jesucristo ichta ãbpai thumaam khʉʉn khãaijã ʉ̃rpai sĩerrʉmta igba, warag i isegnaa, Ẽwandam õor dʉi wajapha khitaawai amach chig abaju awi, sĩi amachdeu nem waum aigta waaujem.

⁵ Mua khaphʉ chirʉm, pãrau meraa khaba nʉm cha mua jawaagpam iek. Pari khĩirjubat jãgajĩ warrgarjã Ẽwandamau ich isegtarr khʉʉn dʉi: Maach Por Ẽwandamau maach jooin israelnaan ichdeu Egiptopien jua eemua ʉu peerdʉ aujim. Pari magtarrjã ichdeu nem jaau sim ipierraa khaba arr khʉʉnan israelnaan arr ãba ichiita khechpʉijim.

⁶ Maimua agjo khĩir eyaa abat ĩchab, jãga ich Ẽwandam chognaan ich Ẽwandam dʉicha naajerrta ich khãai ʉ̃rpai aju ẽkhatarr gaaimua ich chognaan arr ãba ich aarmua barkhʉʉipʉijĩ. Pãade khĩirjubat ĩs am jãga nʉ: Ẽwandamau jʉ̃khanaa khĩchag ee am preso phe wai sim, ich maig oberaajã khaugba, ichdeu mʉg durr i agkham edta warag am khaibag wauwi ich mag wenʉrraju jawaag.

⁷ Khĩir eyaa abat ĩchab jãgajĩ Ẽwandamau Sodomapien dʉi, Gomorrapien dʉi maimua ag dakha deeum phobor nʉnʉid arr khʉʉn dʉijã agjo. Amau parhooba sĩi amach ʉʉin khabam dʉita amachdeu am aig anaa amach khamannaan aphajã ʉʉin dʉímjo aajeejim. Amach mag thʉnarr gaaimua Ẽwandamau sĩi chi phobor thum ag ee õor thʉnarrpa warre orpʉijim. Mag am ortarran, magʉm gaaimua jãga khĩmie durrjã mag phobor ortarrjo õt uu wejom thõjã thõba sĩerrʉm eeta ichdeu barkhʉʉiju thumaam khʉʉnag khap amkhĩir ajim.

⁸ Warrgarwe Ẽwandamau õor khaigbam khʉʉn dʉi maagjerr khaphʉ nʉmta, jãg pãrag seukha nem jaaujem khʉʉnaun warag Ẽwandamauta amach khãaipi auwia iek durag jaautarr wajapha khaphʉ nʉm awia, warag amachdeupai amach morjã sʉrkhaba ãrpinaa bigaaum khʉʉnjã ãrpiejem. Mag nʉm dʉi ĩchab maach Por Ẽwandam chadcha jua theeg sĩerrʉmta serbiibag phenaa amachdeuta khapcha nʉm awia, Ẽwandam chognaan wa mepeen awiajã ogkhaba jũur iekhaajem.

⁹ Pari am khãai Ẽwandam chognaan por Arcángel Miguel aajemuajã, Moisés meebaadeewai, i mor athee mepeer dʉi jũrr chikham ipeer ahau khaawaijã bʉ̃ʉrjã irig khaigbajã iekhaba, sĩi warag “Pʉch mʉ dʉi jãg chirʉm paar nau Ẽwandamauta pʉrʉg meeurrau sĩujugui” ajim.

¹⁰ Ẽwandam chogaujã khaigba iekhaba arrta, magju khãai sĩi jãg seukha nem jaau nʉrrjeem khʉʉnauta amachdeu nem khaugbam igwiapa khaigba iekhaajem. Maimua mag amau nem khaphʉ nʉm anʉmjã sĩi nemchaain khĩirjugjopai nʉmta mag khaphʉ nʉm aajem. Mag khaphʉ nʉm anʉmʉn sĩi wir aig amachdeupai amach khaibag wau nʉmjo nʉmta mag nʉm.

¹¹ ¡Eh, apdurr jãg nʉrrjeem khʉʉn! Jãgʉm khʉʉnan Caínjo dich khapeen oomaphanaa amach daar nem wajapha waauwaijã khõchkhabata sĩerrjeem. Jãgʉm khʉʉnan ĩchab Balaamjo sĩi phatkhon ganam khõchgaupaita jãg nʉrrjeem; magnaa amachta warrgar woun Coré aajerrjo chi porkham khõchkha nʉm. Coré mag Moisés isegwia jũrr ichta chi porkham khõchkhatarr paarjã ich igar narr khʉʉnpa Ẽwandamau warre khechpʉitarrjo amjã agjo khechpʉiju ich Ẽwandamau.

¹² Jãgʉm khʉʉnan Cristo maach kõit meetarr khĩir eyaa aag biirdʉnaa pãar dʉi ãba thach khoowaijã, atcha thach pom waibeenaa dodojo pomjã waibee nʉm gaaimua sĩi pãar khĩir naaupiejem, mag waibeenaa khoowaijã warm khʉʉn dakhĩir jũrr amachta atchapai aawai. Jãgʉm khʉʉnau chan bigaaum khʉʉndamjã khĩirjuba sĩi amachpaita khĩirju sĩsidʉm. Jãg chadam iekjo nem jaau wenʉrrʉm khʉʉnan par noseg chebamta sĩi edjã noseg chejujo thʉnarr phũu aaisirbapäaiwai cheba sĩi õor khũguurjemjota sĩsidʉm. Jãgʉm khʉʉnan ĩchab nemjĩir bʉ̃ʉrjã cheba aajemjota sĩsidʉm, amau nem jaau nʉm ũrwia õrau bʉ̃ʉrjã khĩirjug wajaphamjã auba naawai. Amach mag sĩsidʉm gaaimua ya biek numí khechwia nʉmjota nʉm, amach khaibag ee ich mag thaabatarr gaaimua maimua Cristo iekjã isegwi i ichaaurta nem jaau nʉm gaaimua. Maigta ya pa chi khaarpa jẽunaa orbapʉimjo aju Ẽwandamau am dʉi.

¹³ Jãgʉm khʉʉnau chan nem wajapha wauba sĩi maach dawag khabam nem aphata waaujem. Mag amau nem wau nʉm khĩirjuawai chan sĩi do igaau nem maach inaam thʉʉuba thʉnʉmjota sĩsidʉm. Jãgʉm khʉʉnan ĩchab ar sĩi phĩdag phug mawia khĩchag ee chukkhu aadeejemjota sĩsidʉm, amau nem jaau nʉm gaaimua bʉ̃ʉrjã õrau nem wajapham khaugba aajeewai. Amach nem khaigba wau nʉm gaaimua amjã ich jãgta Ẽwandamau am khĩchag ee pʉib khaba pʉiju, ich mam naam iek nʉisimkhĩir.

¹⁴ Ich jãg khaigba seukha nem jaau nʉrrjee aju khʉʉn igwiata ĩchab Ẽwandam i jaaumie Enoc aajerraujã warrgarwe Adán omparr aigmua agtha õor pomcha khaba nʉwe ya ichdeu oo wai simjo magju khaphʉ mʉg phã pʉajim aajem: “Mua maach Por Ẽwandam oojimgui” ajim anʉm “ich chognaan pooma thʉnʉm dʉi urum.

¹⁵ Mag urumʉn õor thum khaigbam khʉʉnag amachdeu nem khaibag waunaa parhooba ich igwia iparii iekhaajerr paarjã am khaibag wauju jawaanta urumgui” ajim anʉm. Magta iekhajim aajem jooi Enoc aajerrau.

¹⁶ Maguata jãg seukha nem jaau nʉm khʉʉnan amach khaigba aawaijã sĩi khĩu jʉmba warag deeum khʉʉn gaai thʉwia chikham gaaimuata jãg nʉm aajerram; jãgʉm khʉʉnau chan amachdeu nem oowaijã sĩi par daúa ooba warre athuuchata jaaupʉimaajem. Mag ãba amachdeu nem khõsimpaita wau nʉm gaaimua amachpai ʉu ajuuta khĩirju sĩerrjeem. Amachpaita tho iekha sĩerrjeem; maimua chikham tho iekhaawaijã mag iekhabarm gaaimua jũrr amach dʉi wajapha amkhĩirpaita mag iekha sĩerrjeem.

Chi ʉkha durrum khʉʉn wawitarr

¹⁷ Khĩir eyaa abat keena, ar maach Por Jesucristoou doce ichdeucha jʉr autarr khʉʉnau pãachig jaautarr iek.

¹⁸ Amau pãrag magjierram: “Keena, ya Ẽwandamau maach i agkhaju gayaa paawai sĩi õor amach khõchagpierrta nem waum khõchkhanaa chi ʉkha durrum khʉʉnjã wau iekhaa neeme sĩsid aju” a jaaujierram pãrag.

¹⁹ Magtarr aawai chadcha merag chukkhu sĩsidʉm, ar pãar ee seukha wenʉrraajem khʉʉnau chan bʉ̃ʉrjã Ẽwandam Akhaar chukhu aawaita mag amachdeu nem waum aig waunaa õor o ãba thʉnarrjã warag aaidʉbapʉim.

²⁰ Hermanonaan, pari pãrau ʉkhatarr iek ich Ẽwandamauta khaugpitarr aawai bʉ̃ʉrjã mʉg eegarm khĩirjugjo khaba sim. Magua muan pãragan ag iek gaaita pãach khapeenjã agdaujo bãaupiju ẽkhabat a chirʉm. Pãach Ẽwandamag jeeuwaijã ich Ẽwandam Akharau jeeupi simjota jeeubat.

²¹ Ẽwandamau pãach khõsi sim khap nem wajapha wau nʉm gaaimua ich jãg pãach daupiita phe wai nʉrrapibat irig. Mag nʉmua ãba deeu maach Por Jesucristo beeju edta nʉbat; mag ich pierrwaita maach dau aug khaugwi ichjo ich mag tag meejã meeba ich dʉi phe wai sĩsiju.

²² Ar seukha nem jaau nʉm khʉʉnau deeum iekta jaau nʉm ũrwia maach Ẽwandam iek chaarta warag ʉkhaju khaugba aadephʉm khʉʉn dau aug khaug paraanaa warag amag Ẽwandam iek chaarta phʉʉrba jaaunaat, ũwaai ʉkhamkhĩir.

²³ Maimua ar warre parhoobam iekta ʉkha nʉm gaaimua ya õt uu thʉnʉm eeta dʉrbaagpamjo nʉm khʉʉnjã, okhoom iekcha okhooju nawe, am khaigper athat, Ẽwandam iek chaarta jaau nʉmua. Pari warm khʉʉn ar athuucha nʉm khʉʉnjã agjo dau ee aug khaug paraa abat; mag am dau aug khaug naab mamʉ, am dʉi khĩir khaphʉnaa amau nem waaujemjã put sor memerkhomjo warre isegbat. Jãkhʉʉnan amach parhooba pekau wau nʉm gaaimua khajũapata sĩi agua phuur sĩsidʉmjo sĩsidʉm.

Ãbmiecha Ẽwandam tho iekhatarr

²⁴ Pari pãar chadcha maach Ẽwandam ãbpai khitʉm den aawai oob khĩirjumiet. Ichdeuta maach Por Jesucristo gaaimua maach peerdʉ auwia, ich jua theegauta maach pekau ee burrpiba thʉanaa, maach i agkham edjã oneeta bʉ̃ʉrjã pekau chukhu phe auju, ich mag ich dʉi naamkhĩir.

²⁵ Mag Ẽwandamta warrgarwejã thumaam khʉʉn khãai chi wajapcharam anaa chi ʉ̃rʉʉcharamʉu; ichpaita mʉg atagjã chi jua thierr anaa ich mag iek theegjã sĩerraju. Mʉgdam ajim pãrag jaaum ig chirarr. Ayoo keena, Judas