San Juan 2 - Wounaan Meu

Õor jua pʉr nʉm ee Jesuu do vinoog paatarr

¹ Magtarr khur khãai thãrjup nʉm ee, Galilea durr phobordam Caná anʉm ee õor jua pʉr naajim. Maig Jesús ãdjã dʉi sĩejim.

² Mag jua pʉr nʉm ee, ich Jesujã thʉ̃rpʉiwia aig sĩerr aawai i ãdau irigta,

³ —Vino thumaa obaademwai ajim.

⁴ Magbaa chi chaairau irig, —¿Pua khanthee mʉrʉg mag sĩ? Mʉch nem wau chitʉm gaaimua agtha õrag mʉch khaugpiju ora khaba sĩebahab ajim ich ãdag.

⁵ Pari ich iewaau ichig magbaawai chi phiejãb wau narr khʉʉnagta warag ich ũan Mariaau, —Irua pãachig nem mag aawai i ipierraa abat ajim.

⁶ Judionaan amach i aawai Ẽwandam na amach wajapha nʉm aag jua dʉi bʉpa ʉpʉpʉi aajeejim. Magua, magaag athee dojã iigjerr aawai mag phiesta ee thũr mokdau den dʉrrcha khitheem seis wai naajim. Makhʉʉn thũr ee de cincuenta a setenta litros dʉrr aajeejim, do.

⁷ Maimua Jesuu mag chi phiejãb wau narr khʉʉnag makhʉʉn thũr doou ipiirkhapi jaaujim. Mag chadcha ich ipierr ipiirkhabapäaiwai amag,

⁸ —Jãimua ag eem joi arrwia chi phiesta ee nʉm khʉʉn porkha simʉg do oopibamit ajim. Magbaa chadcha ichdeu jaautarrjo i ipierr do oopijierram.

⁹ Pari mag chi phiesta ee nʉm khʉʉn porou mag do atarrta vinoog paa simjã khaugbata do sĩejim. Ãba chi phiejãb wau narr khʉʉnaupaita khaphʉ naajim, amach dakhĩir arr aawai. Mag do oowi chi porkha sĩerrau chi jua pʉr chirarr woundam thʉ̃r auwi

¹⁰ irig magjim: —Thumaam khʉʉnau vino chi wajapcharamta nacha õrag jiigjerram; maimua mag do nʉʉ awiata jũrr parhoobam vino jiigjerramgui ajim. Pari pua magba ewaata chi wajapcharam jigaagpamgui ajim irig, mag do atarrta vinoog paa simjã khaugba.

¹¹ Mag Galilea durr phobordam Caná anʉm ee do vinoog paatarrta warrpem õrau nem ooba aajem Jesuu wautarr ajim, mag wau sim gaaimua ich jua theeg oopieg. Mag, maach i dʉi wenʉrraajerr khʉʉnaujã warag wajapcha i khaphʉ nʉisijim, chadcha Ẽwandamau warrgarwe pʉiju a jaaujerr dʉita maach wenʉrrʉm. Magta marau warag i iek ʉkha nʉisijim.

¹² Maimua magtarr khur ich ag Galilea durr eepai deeum phobordam Capernaum anʉmʉg maar phe arrjim, ich ãd dʉi ich eeugpeenpa. Mag phobordam ee khãaidam khapanaa maar naaimajim.

Aai i jeeujem degmua Jesuu õor jʉrkhʉʉitarr

¹³ Judionaan phiesta Pascua aajem burrju gayaa arr aawai Jesús Jerusalenag majim.

¹⁴ Maimua irua ooimaawai, Aai i jeeujem degta sĩi phakjã pernaa, ovejajã pernaa, duburjã pernaa maimua sĩi õrag phatkhon cambie nʉm khʉʉnpata ohood thʉnʉm ooimajim.

¹⁵ Ichdeu mag oobaimaawai maar dakhĩraa aig jʉ̃gad werba sĩsid arr jãaupʉrnaa agua bobojog thum amach phak dʉi ovejapa dawag jʉrkhʉʉipʉijim. Magnaa chi phatkhon cambie narr khʉʉn mesjã jẽkhʉt sĩekhʉʉipʉpʉi khabaadeewai am phatkhonjã sĩi parhooba khuyiupʉimajim.

¹⁶ Magnaa chi dubur per narr khʉʉnag, —Jopkhaa pãach nemchaain mʉigmua phe athaadet; mʉ Aai di chan sĩi pãrau merrkaúg paapäaig khabamgui ajim amag.

¹⁷ Irua mag iekhabaawai maar khĩir ee dʉnʉisijim, Ẽwandam iek phã sim gaai, “Ẽwandam, pʉrʉg jeeujem di kõitan mʉʉn nem aneeme chitaawai ag gaaimua mʉʉn õor jua ãwatab khaba ãwatju” a phã sim.

¹⁸ Mag amach dakhĩir dawag õor jʉrkhʉʉibapʉim oobaawai judionaan chi pornaanau irig, —Pʉchdeu Ẽwandam di kõit jãg chirʉpí, pʉ iek mag pʉʉta Ẽwandamau warrgarwe pʉiju a jaaujerr anaawai magan maar dakhĩir ag na marau nem ooba aajem ich Ẽwandam denjo waubá ajierram irig.

¹⁹ Magbaawai ich Jesuu warag amag, —Pãrau magta oom khõsi nʉm khai, magan mʉg di chʉyeubapʉit; magbaa khãai thãrjup nʉm ee mua deeu eu dʉnʉʉujugui ajim.

²⁰ Magbaawai chi judionaanau irig, —Mʉg Aai i jeeujem di eu awaag cuarenta y seis años phidkhatarrta, ¿puata mag khãai thãrjuppaim ee deeu eu dʉnʉʉujũu? ajierram.

²¹ Pari Jesuu mag amag di a simjã chi di chaar igwia khaba, ich mor igwiata mag sĩejim.

²² I mag iekhatarr aawaita, amau i thõowia deeu iiu phiidʉtarr khurjã maach chi i dʉi ogdʉba wenʉrrarr khʉʉnaun i iekhatarr khĩir eyaa naajim. Mag warag warrgarwe Ẽwandam iek phã sĩsidʉm gaai Jesús igwia phã sĩsidʉmjã wajapcha khaphʉnaa ich Jesuu ich iiucha maachig nem jaaujerrjã warag marau khaphʉ nʉisijim.

Jesuu thumaam khʉʉn khaphʉ sĩerrʉm

²³ Mag Jerusalenag mawia am phiesta Pascua ee simua ich iiu aawai ag na õrau nem ooba aajempa wautarr oowia õor khapanaam khʉʉnau i iek ʉkhajierram.

²⁴ Pari mag õrau ich iek ʉkha nʉm anʉmjã ichdeu wajapha khaphʉ sĩejim, õrau chadcha thãraucha ich iek ʉkhaba nʉm.

²⁵ Pari mag khaug aumamjã õrau ichig jaaubamta sĩi ichdeupaita õor thumaam khʉʉn thãar khaug aumaajeejim.