Hechos 9 - Wounaan Meu

Saulo Jesús dʉi khʉd ee thẽutarr

¹ Mag nʉm ee warag Sauloou maach Por Jesús iek ʉkha durrum khʉʉn dakhãu nʉm pʉaba, warag phadnaan por aar mawia

² ichig ẽsap phã deepijim aajem, Damasco phobor ee judionaan Ẽwandam iek jaaujem degam chi pornaanag oopibaimaa, makhʉʉnau amach paarmua dʉi pʉrpi jaaubaawai, phithurg chukhu Jesús igar nʉm khʉʉn emkhooin dʉi ʉʉinpa Jerusalenag preso pʉrkha aibeeg.

³ Maimua chadcha ichig mag ẽsap phã deebaa ag dʉi igbaadejim aajem, Damasco phoborog khʉdau ma sim ee. Mamʉ mag mawia ya chi phobor dakpamam eeta, degolp edjã eemua pagthʉmdaujo phʉr jẽer athajim anʉm.

⁴ Mag phʉr jẽer athamua warre Saulo phãr werppʉimjota jẽkhʉt buju aimajim aajem. Mag jẽkhʉt panaa ũurwai õor chukag eemuata irig, —Saulo, ¿khantheeta pua jãgcha jãg mʉ iek ʉkha durrum khʉʉn khaibag wawaag am ẽudee ẽkha nʉrrʉ́ma? a sĩejim anʉm.

⁵ Magbaa Sauloou, —Señor, ¿ma pʉ khaíuma? ajim anʉm jũrr irig. Magbaa maach Por Jesuu, —Mʉʉn Jesuugui ajim anʉm. Pua jãg mʉ iek ʉkha durrum khʉʉn ẽudee ẽkha sim aig, mʉ ẽudeeta pua ẽkha nʉrrabahab ajim anʉm. [Pʉ jãg nʉrrʉm aiguin, phak emkhoíu phidkhamaaugau ewag thʉʉgwai ich bʉkhʉrr pa eudʉ jorraajem gaai miu ʉa sĩejemʉg thʉʉgjemjo, parta pʉchdeupai pʉch gaai mas wauju jʉr nʉrrʉmgui ajim anʉm maach Por Jesuu irig.

⁶ Mag ũrbaawai Saulo jãphierr ajaugau kha duui thʉnʉmua jũrr irig, —Señor, ¿khani pua mʉrʉg waupim khõsi chirʉ́wi? ajim anʉm.] Magbaa maach Porou irig, —Phiidʉbá, maimua warag phoborog petá ajim aajem. Nau jamta pʉchdeu nem wauju thum pʉrʉg khap jaaujugui ajim aajem.

⁷ Mag õor chukhu sim eemuata magbarm ũrbaawai i dʉi õor wenʉrrarr khʉʉnjã ĩchab jãphierr nʉm iekhau podjã iekhaba, sĩi warag khĩuu naajim anaabá.

⁸ Mag õor chukag eemua ichig magbaawai Sauloou phiidʉ dʉnʉisijim anʉm. Mag dʉnʉʉunaa par irua wajapha dau ẽenaa ookhakhakhamjã pod dau warphapaijã ooba aajeejim anaabá, dau khĩ thʉnarr aawai. Mag pod ooba aawai chi dʉi wenʉrrarr khʉʉnau sĩita i jua gaai pʉrnaa Damasco phobor ee warrjierram aajem.

⁹ Mam phobor ee pawijã Saulo khãai thãrjup sĩi dau khaugba sĩejim aajem. Mag nʉm dʉi thachjã khoba ni dojã doba sĩejim anaabá.

¹⁰ Mag Damasco phobor ee woun ãb sĩejim aajem, Ẽwandam iek ʉkhaajerr Ananías a thʉ̃r sim. Mag woun maach Por Jesuu ich dʉi khãai khõrkhapi auwia i thʉ̃rchejim aajem. Mag ich thʉ̃rbaichee Ananiaau, —Señor, mʉ cha chirʉmgui ajim anʉm.

¹¹ Magbaa maach Por Jesuu irig, —Phiidʉbá ajim anʉm, maimua kaaijã Chi Khajapham a thʉ̃ʉrjem ee woun Judas anʉm deg Saulo Tarsopierr jeeubaimá; maig mag wounau mʉrʉg oraa simgui ajim anʉm.

¹² Mag mʉrʉg jeeu simua ĩchab khãai khõrg ee ichdeu oobarmgui ajim anʉm, woun ãb Ananías a thʉ̃r sim i aar dubwi i ʉ̃r jua ausĩubaa ich dau eerdʉbarm.

¹³ Magbaa Ananiaau magjim aajem: —Señor, jãg woun khai ya mua ũur daar chitʉmgui ajim anʉm. Jã khai Jerusalén phobor ee ar pʉ igar ʉkha durrum khʉʉn dʉi nem khaibag sĩerrʉmgui ajim aajem.

¹⁴ Maagjem mʉigjã phadnaan chi porkha nʉm khʉʉnau warag amach ipaarmua irig jaau nʉmgui ajim anʉm, pʉrʉgpai jeeu durraajem khʉʉn pʉrkha arramkhĩir.

¹⁵ Magbaa maach Por Jesuu irig, —Petá ajim anʉm, muata pʉ pʉi chirʉm i aar. Jã mʉchdeu jʉr au chirʉm khabahab ajim anʉm. Jãguata mʉg atag israelnaanagjã mʉ iek jaaunaa durr warpham magwe mʉ iek reinaanagpa jaau nʉrrajugui ajim aajem.

¹⁶ Mua mʉchdeucha irig jaaukhimgui ajim anʉm, jãga mʉ gaaimua i dau aphʉʉ phithurg aju.

¹⁷ Maach Por Jesuu ichig magbaawai Ananías chadcha petajim aajem. Mag mawia, Saulo sim deg dubimawia, i ʉ̃r jua ausĩunaa irig, —Khodam Saulo, maach Por Jesús ar pʉ dʉi khʉd ee thẽutarrau mʉ pʉ aig pʉijimgui ajim anʉm, deeu ũmaai dau eerdʉbaadem dʉi ĩchab Ẽwandam Akhaarpa pʉch gaai phẽs wai chirsimkhĩir.

¹⁸ Mag, chadcha Ananiaau mag iekhabarm bʉrre Saulo dau gaau paphugmiejo cheu cheu cheu aadewi warre dau eerdʉ sĩsijim aajem. Magtarr aigmua ĩchab warre ich por choopijim aajem.

¹⁹ Mag por choo sĩsiewain chadau, thachdam khobaadee, kha theeg chukhu thʉnarrjã deeu khĩir ubag aadejim aajem. Maimua warag ich ag phobor ee chi Jesús iek ʉkha durrarr khʉʉn dʉi khãaidam khapanaa sĩsijim aajem, dapai maba.

Damasco phobor ee Sauloou Ẽwandam iek jaautarr

²⁰ Maimua Sauloou warag ich ipaarmua judionaan Ẽwandam iek jaaujem di sĩsidʉm ee jaau nʉrrʉmua Jesús igwia, “Chadchata jãan Ẽwandam Iewaa ichdeucha pʉitarraugui” a jaaujeejim aajem dʉi ich ipaarmua.

²¹ Mag irua jaaumam ũrwi thumaam khʉʉn jʉ̃gderraa naajeejim aajem. Mag nʉm iekhau amach wir aigpai jũrr amach khapeenag, “Keena, ¿ich mʉg woun khabajĩ Jerusalén phobor ee ar Jesuug jeeu durrum khʉʉn dajẽk wai nʉnʉʉu aajerr? Mawaam khʉʉnjã agjo pʉrkhanaa phadnaan chi pornaan aar preso phe arraan a beetarrta, ¿jãga ĩs jãg ich paarmua warag am ipierr ich ag iekpai dʉi jaau nʉrrʉ́ma?” aajeejim aajem jũrr amach eepai.

²² Mamʉ ichig maagwai chará, warag Sauloou iek khẽgkha jaaumamua, “Chadcha jãg Jesuuta ich Ẽwandamaucha warrgarwe jʉr auwia maach peerdʉ aumkhĩir mʉg durr gaai pʉiju aajerr khabahab” aajeejim anaabá. Mag nem icho khaisog jaaupʉpʉigmamua judionaan Damasco phobor ee narr khʉʉnjã pod iekhaju khaugba, warag ich garmua khĩupaa sĩumaajeejim aajem.

Saulo judionaan jua eemua dʉrtarr

²³ Maimua magtarr khur ewag pawia khãai khapan aadem ee, judionaan ãba biirdʉwia ihãba nʉisijim aajem, Saulo thõopäaig.

²⁴ Mag chadcha i thõopʉiju awi puertdi phobor ee duubjem sĩsidʉmpierr soldaaunagjã i nʉpiejeejim anʉm, edaram magwe. Mamʉ mag amau i eugar i thõoju dakhãu wai nʉm ya ich Saulooujã ũrbaadejim aajem.

²⁵ Mag khaphʉ wai naawai edau kheubaadeewai tagam khʉʉn agjo Ẽwandam iek ʉkha durrarr khʉʉnau thʉbʉt ee juppinaa jʉ̃gad gaai eeg jiir burrpʉijierram aajem, mag phobor thum igaaum magwe maach jua pʉrju khaba thuur phʉʉrdʉ sim ee warre phobor igaau. Mag, mag edaar Saulo dʉrmidjim aajem.

Saulo deeu Jerusalén phobor ee beetarr

²⁶ Mag mawia deeu Jerusalén phobor ee barbaimaawai aig chi ʉkha durrum khʉʉn dʉi khapeerkham iigjeejim aajem, ich Sauloou. Mamʉ thumaam khʉʉnau i ogkhaajeejim anaabá, agtha ʉkhaba simta sĩi amach khũguraagta mag nʉrrʉmpii awi.

²⁷ Magbaawai Bernabé anʉmua chi Saulo thʉ̃r auwi, ich Jesuucha jʉr autarr khʉʉn aar wai dubwia, amag jaaubaadejim aajem, jãga Saulo khʉd ee mamua Jesús dʉi thẽujĩ, maimua jãga ĩchab Damasco phobor eejã irua õrag Jesús igwia warag ogkhaba Ẽwandam iek jaaubaadejĩ.

²⁸ Bernabeeu mag jaaubaan chadau tag i ogkhaba nʉisijim aajem. Magbaa warag Jerusalén phobor ee thʉbawia am wenʉrrʉmpierr am dʉi nʉrraajeejim aajem.

²⁹ Mag nʉrrʉmua warag bʉ̃ʉrjã ogkhaba maach Por Jesús igwia i iek jaaujeejim aajem, judionaanta griegonaan meúa iekha nʉm khʉʉnag. Mamʉ makhʉʉnaujã i thõopʉiju ẽkha phobaadejim aajem.

³⁰ Mag amau i thõoju dakhãu wai nʉm chi Ẽwandam iek ʉkha durrum khʉʉnau ũrphobaadeewai deeum phobor Cesarea anʉm aar i arrwi maigmua jũrr ich durr phobor Tarso anʉmʉg pʉijierram aajem.

³¹ Mag Sauloou amach ipierr Ẽwandam iek ʉkha sĩsim khaug athaawain chadau, Judea durr, Galilea durr maimua Samaria durram magwe chi ʉkha durrarr khʉʉn thum ʉu khõinaa nʉisijim aajem. Mag khõinaa aphobaadem ee, sĩi warag maach Por Jesús ipierraa irua nem jaau simpai wauphobaadee ĩchab ich Ẽwandam Akharaujã chi ʉkha nʉm khʉʉn warag khapaana apijim aajem.

Pedroou woun Eneas anʉm monaautarr

³² Pedroou maach Ẽwandam iek ʉkha durrum khʉʉn amach nʉnʉidʉmpierr oo nʉrrʉmua ĩchab phobordam Lida anʉm ee Ẽwandam iek ʉkha narr khʉʉnjã oon majim aajem.

³³ Mag phobordam Lida anʉm ee woun ãb ooimajim aajem, Eneas anʉm. Mag woun kha chʉkhʉ khitarr aawai sĩi put eepai ocho años sĩejim aajem, pod ich appai phiidʉba.

³⁴ Magʉg Pedroou, —Eneas, phiidʉbá ajim anʉm; Jesucristoou pʉ monaaubarm. Pʉch putdam juur kherbá ajim anʉm. Magbaa chadcha ag bʉrre Eneas phiidʉbaadejim aajem.

³⁵ Mag Eneas monaautarr thumaam khʉʉnau Lida phobor ee khakhapdo aadem dʉi ĩchab khor pom wejom Sarón anʉm ee õor joobaajerr khʉʉnaupa khakhapdo aadejim aajem. Magtarr oowia, amach khaibag isegwi, jũrr maach Por Jesús iekta ʉkhajierram aajem.

Dorcas meewia phiidʉtarr

³⁶ Ich mag jaar ĩchab phobor Jope anʉm ee ʉʉi ãb Jesús iek ogdʉba ʉkha khitʉm sĩejim aajem. Mag ʉʉi thʉ̃r hebreonaan meúa Tabita aajeejim aajem, maagwai griegonaan meúata Dorcas aajeejim aajem. Mag ʉʉi thumaam khʉʉn dʉi nem o wajaugnaa aphʉʉm khʉʉndamau nem iigwaijã magʉmjã aba amag deejeejim aajem.

³⁷ Mag Pedro Lida phobor ee sim ee, Dorcas mor machpawia ich ag khamor machgau warag meejim aajem. Mag meebaadee ajapha domeerpinaa, ʉ̃gthaa dijã jarnaa, aar arrjierram aajem.

³⁸ Maagwai Jopepienau Pedro Lida phobor ee sim anʉmjã ũr naajim aajem. Mag Jopemua Lida barju warp khaba sĩerr aawai am iek ich ag bʉrre amau emkhooin numí jʉr auwia Pedro awaan mamkhĩir pʉijierram aajem.

³⁹ Magbaa makhʉʉnau wetwia, Pedro aar barwia, irig “Jopepienau jopkhaa pʉ thʉ̃r nʉm” a jaaubaimaawai ich ag bʉrre am dʉi beejim aajem. Mag i barbaichee aiguim khʉʉnau ʉ̃gthaa chi aphʉʉmdam wai narr aar i athaadeewai, khoopaa ũanaan thum aig narr khʉʉnau bĩe nʉmua dich monakha aawai khajũadam khamatarr thumaa irig oopimajierram aajem.

⁴⁰ Magbaawai ich Pedroou õor thum dawag jʉrkhʉʉipʉiwi, kanieu phõbkhanaa, Ẽwandamag oraajim aajem. Mag oraa aaipawi chi binaanag oonaa, —Tabita, phiidʉbá ajim anʉm. Magbaawai chadcha chi binaanau dau ẽe oowia Pedro khĩir eerpa athaawai phiidʉ oo sĩsijim anaabá.

⁴¹ Maig Pedroou i jua gaai pʉrkhanaa warag ʉ̃gthaag dʉnʉʉupi athajim anʉm. Magnaa Ẽwandam iek ʉkha nʉm khʉʉn thum khoopaa ʉʉin chi bĩe narr khʉʉnpa thʉ̃rkhanaa amag Tabita monakkha deeu oopijim anʉm, meeba arrjo.

⁴² Jope phobor ee thumaam khʉʉnau mag õor phiidʉtarr ũrwia, õor pom maach Por Jesús iek ʉkhajierram aajem.

⁴³ Magwiajã ich Pedro chan da mabajim aajem, Jope phobor eemua. Woun ãb Simón anʉm di aig khãai khapan sĩi awiata petajim aajem. Mag woun Simón anʉm nemheu den nem wau nʉm gaaita phidkhaajem ajim aajem.