Hechos 28 - Wounaan Meu

Pablo Malta morr gaai phẽeubatarr

¹ Mag do ee o jʉjʉr nʉʉ awi durr paaukhaau, õrau marag jaauwai mag morr Malta a thʉ̃ʉrjem anaajim.

² Mag maar durr paaukhabaadeewai mag morr gayam khʉʉn o ajaug sĩi maar amachig baarpi auwi bʉ̃ʉrjã maar chig abajierram. Ante noseg che sĩerrau maar jĩchkha narr aawai amachdeu õtdau orwi amach aig maar thʉ̃r aujierram, ẽt khãaimkhĩir.

³ Magbaawai Pabloou warag am juapierr õtdau uu apʉyaag awi, papiu pochag beewi, õt ee werppʉichejim. Mamʉ mag irua õt ee chi papiu werpbapäaiwai nemkhõrta õt eemua phiphichag oberwi sĩi i jua gaai jiir jopbaichejim.

⁴ Chi durr khʉʉnau amach daúa mag nemkhõrta i jua gaai jiir jopbaichem oobaawai amach appai, —Keena, pãade oobat. Jãgan jãg wounan õor thõomieuwai. Maguata phũas eemua peerdʉtarrjã, agtha pʉaba, Ẽwandamau i dʉi jãjãgkham. Ich iiuta juau i dʉi jãg sĩebahaba anaajim.

⁵ Mamʉ mag ich jua gaai jiir jopbaicheewai sĩi warag õt ee jĩphepʉiwi, bʉ̃ʉrjã chig aba, khaaba arrjo ich mag sĩsijim.

⁶ Mag i jua gaai jiir jopchetarr aawai amaun jua pom orrbaadejupii naajim, wa magbam khai sĩi chi meem khãijã degolp bäjä aimajupii naajim. Mamʉ amachdeu oowai magtarr aigmua ya dʉrrʉʉ aademjã bʉ̃ʉrjã chig aba abaawai jũrr amachdeupai ũmaai, —Keena, jã chan õor parhoobam khabam. Jãan jãgan Ẽwandamta jãg nʉrrʉmwai aphobaadejim i igwia.

⁷ Mag Pablo jua gaai nemkhõr jiir jopchetarr aigmua dakha mag morr gaai chi thethecharam jooi Publio anʉm den jẽb pom thʉnaajim. Mag jooirau maar ich di aar phe arrwi khãai thãrjup sĩi par maar jãhog wai sĩejim.

⁸ Maagwai ich Publio aai mor mas sĩejim. Joointa khʉʉu thʉnʉm dʉi ĩchab bagpata jʉ che kherajim, jʉkhaa nʉmua. Magbaawai Pablo i aar mawia i kõit Ẽwandamag jeeumamua i ʉ̃r ich jua ausĩubaawai warre monaau sĩsijim.

⁹ Pabloou mag jooi monaaubapʉim tagam khʉʉnau ũrphobaadeewai, tag deeum khamor machag paraa arr khʉʉnjã ich aig beemarr khʉʉnan thum Pabloou monaaupʉi maajeejim.

¹⁰ Mag mor mas sĩsid arr Pabloou monaautarr khʉʉnauta marau nemdam ig nʉmjã thumaa marag au dedee aajeejim. Maimua ya maar wetaagpaawaijã barco ee marau nemdam igju thumaa khĩirjunaa phedeejierram.

Pablo Roma bartarr

¹¹ Maar maig nʉm ee ich mag Malta phʉram gaai ĩchab barco ãb sĩejim, edau khõrg thʉnʉm khurau pod maju khaba aadeewai aig dochʉumie nʉ narr khʉʉn den. Mag barco khẽu gaai amach ẽwandamnaan Cástor anʉm dʉi ãb agjo Pólux anʉm khĩirkha wau sĩejim, pa den. Ich ma, Alejandría phoborom ajim, chi barco. Ya maar mag phʉram gaai ed thãrjup nʉm ee, mag barco mam aadeewai mag ee maar wetjim.

¹² Mag ereubaadewi, phobor Siracusa anʉm barwi, khãai thãrjup naaimajim mag phobor ee.

¹³ Maigmua do igaau phʉʉrdʉ wetumua jũrr phobor Regio anʉm naaimajim. Ag noram dojãrr paaukhabaadeeu, ʉu marmua badag phũ we thʉnʉisierr aawai, khãai numiim ee deeum phobor Puteoli anʉm barimajim.

¹⁴ Mag phobor ee ĩchab maach Por Jesús iek ʉkha nʉm gaaimua maach khodkha durrum khʉʉnpa thʉnarr aawai amach aig maar thʉajim, amach dʉi seman ãb naamkhĩir. Magbaawai chadcha am aig maar seman ãb naawi ocho diam gaaita Romaag wetjim, jũrr bʉʉu, maach barco pʉawi.

¹⁵ Mamʉ Jesús gaaimua maach khodnaan Roma phobor eem khʉʉnau ya maar amach aar wetum ũr wai narr aawai ãaur khʉʉnau maar khĩirphee phobordam Apio anʉm eem merrkau ee maar nʉ naajim. Maagwai tagam khʉʉnau jũrr dakhapai Las Tres Tabernas anʉm aig naajim, agjo maar nʉawai. Mag maach khĩirphee oon wettarr khʉʉn dʉi thẽubaimaawai Pabloou Ẽwandamag ʉu ajim awi onee aadejim.

¹⁶ Mag wetumua ya Roma paaukhabaimaawai chi capitán am phe arrtarrau jũrr aiguim cuartel ee chi porkha simʉg warre presonaan thum phedeeimajim. Mamʉ Pabloog cárcel deg sĩepiba, sĩi ich di khĩetta soldaaun ãbpaimʉg oo paraa apijim.

Thethemnaanag Pabloou Ẽwandam iek jaautarr

¹⁷ Pabloou ich Roma bartarr khãai thãrjupnaa, judionaan chi thethem khʉʉn thum thʉ̃rkhʉʉipʉijim. Mag thʉ̃rkhʉʉipʉiwi ãba naaicheewai amag magjim: —Keena, pãarjã judionaan aawai mua pãrag jaaukhimgui ajim: Mʉ chan mʉg chitʉm aig bʉ̃ʉrjã maach meeun iwiir ãbam dʉijã khaigba khaba, ni maach jooin i igwiajã khaigba iekhaba chitʉm. Mʉ mag chitʉmta sĩi mʉ eugar seukha nem ĩgkhawi Jerusalén phobor ee soldaaun Romapienag mʉ pʉr deejierramgui ajim.

¹⁸ Mag ya mʉ amach jua ee pabaadeewai makhʉʉnau wajapha mʉrʉg jeeumajierram, mag jeeumamua murua nem khaigba wautarr khãijã khaug athaawai mʉ thõopäaig. Mamʉ par mag wajapha jeeu buburrkhamjã, mʉ mag chadcha nem khaigbam wauba chirarr aawai, amach ap amuan mʉ pʉapʉim ig naajimgui ajim.

¹⁹ Mamʉ mag nʉm ee maach meeunaupaita ideu mʉ pʉapʉipiba, warag mʉ thõopi jaaubaawai, mua maigpai mʉch thõopiba, warag emperadorragta mʉch thõopiju awiajã mʉ dʉi ichdeu khap aju aai simgui ajim Pabloou ich jaaumamua. Mag jaaumamua, amau amach garmua mʉ dʉi magjieb mamʉ, mʉch garmua chan mua bʉ̃ʉrjã maach khapeen judionaan eugar nem khaigba jaaujujã chukhu chirʉmgui ajim.

²⁰ Mua chadcha pãar thʉ̃rkhʉʉitarran, pãar dʉi khĩircha oonaa iyʉʉmamua magʉm thum jawaagta pãar thʉ̃rkhʉʉipʉijimgui ajim. Magnaa, Ĩchab khaphʉ abat ajim keena: Pãrau mʉg mʉ caden jua paraa oo thẽu chirʉm oo nʉmʉn, jãan chadcha warrgarwe maach jooinau nʉajerr woun chadcha beewi ag iek ʉkha chitʉm gaaimuata amau mʉ mʉg wai nʉmgui ajim Pablooupai ichdeu Cristo iek ʉkha sĩerr jaaumamua.

²¹ Magbaawai mag judionaan chi thethemnaan aig narr khʉʉnau irig magjierram: —Ni ãbmuajã ẽsapdam phãnaa magʉm aarmua maachig jaaupʉiba aawai marau chan bʉ̃ʉrjã pʉ mag nʉrrʉm khaugba nʉmgui ajierram. Ni maach meeun aarmua bee nʉm khʉʉnaujã pʉ eugar maach jʉ̃gaag khaba jaauche nʉmjã marau bʉ̃ʉrjã ũrba nʉmgui ajierram.

²² Maraun pʉchdeuchata maachig ũrpim khõsi nʉm, khan iekta pua jaau chitʉ́, maachdeucha khap ũraag. Maumua marau ũurjemʉn, mag jãg Nazaretpierr igar ʉkha nʉm khʉʉnan mag durrpierram khʉʉnau am eugar khaigba iekhaajem anʉmta marau ũurjemgui ajierram irig.

²³ Maimua amach garmua Pabloog deeu ũmaai i aig beeju a jaautarr aawai, mag amach beeju arr ed ãspa eebaadee, õor khapan i jẽer sim di aig pos aichejim. Mag ich aig õor pom pierrwai edaupherr garwe jaaubaaderr khĩeb kheeurpamaa ajim, jãga Ẽwandamagta maadeu ʉdʉraa dich Porkhapiju aai nʉ a jaau simua. Mag jaau simua Ẽwandamau ich iek Moiseeg phãpitarr gaaim iek jaaunaa ĩchab warrgar Ẽwandam i jaaumienau phã pʉarr gaaim iekpa jaaumamua Jesús igar ʉkhapi auju ẽkhaajeejim.

²⁴ Ãaur khʉʉnaun mag irua jaaumam ʉkhajierram, mamʉ tagam khʉʉnau chan ʉkhabajierram.

²⁵ Mag o ãba khaba, ãaur khʉʉnau ʉkhanaa tagam khʉʉnau ʉkhaba aadephʉm gaaimua, warag khĩeb ereumaawai Pabloou amag magjim: —Jãg mʉgju khapta chadcha Ẽwandam Akharau warrgarwe jooi Isaías khararrag jaaupibaawai pãar igwia maach jooinag,

²⁶ “Jãkhʉʉnag mʉ iek jaaubamí” ajim ich Ẽwandamau. Maimua ichdeupai jaaumamua, “Muata amag mag jaaupʉi chirʉm abá” ajim: “Par pãrau mʉ iek ũr nʉmjã khaugbaju; mʉ jua theeg oo nʉmjã oobamjota aju.

²⁷ Pãran thãar theegta sĩsidʉm, sĩi kach ee therp phʉʉikhanaa daujã phãarjʉ̃ sĩsidʉmjo naawai. Par pãrag nem jajaaukhamjã ũrmapha, ni ʉkhajã ʉkhamapha nʉm. Par pãrag mʉch jua theeg oopi chirʉmjã bʉ̃ʉrjã khaug aubamjota nʉm. Magua mʉrʉg pãach khaibag chugpaamkhĩirjã mʉ igba nʉm” a jaaupijim ich Ẽwandamau. (Is. 6:9-10)

²⁸ ’Magtarr aawai mʉg pãachdeu ʉkhaba abarm gaaimua, warre khaphʉ abat ajim Pabloou: Ĩsmua atag Ẽwandamau judionaan khabam khʉʉnagta mʉg maach peerdʉajem iek jaaupi sim, amjã peerdʉju aai amkhĩir. Mag amachig jaaubaawai amaun chadcha ʉkhajugui ajim. [

²⁹ Mamʉ Pabloou mag iekhabarm judionaanau amach jʉ̃gʉucha ũrbaawai, amach wir aigpai sereu phobaadewi warag ereubaadejim.]

³⁰ Magtarr aigmua año numí enter Pablo ich mag phobor ee sĩejim, ich di alquilaa autarr ee. Mag ya ich dikha wai sĩewai ich aig õor beewaijã thumaa warag ierrag dubpiwi

³¹ amag jaaujeejim, jãga amaujã Ẽwandamagta ʉdʉraa amach Porkhapiju aai nʉ. Mag jaaumam dʉi ĩchab maach Por Jesucristo iekjã thumaam khʉʉnag wajapha jaaujeejim. Mag irua nem jaau sim tag jaaupimaaugau awijã ni ãbmuajã irig magʉm aba aawai ichdeu jaaum aig jaaujeejim. Magta maach peerdʉajem iek warag aaidʉmajim, durrpierr.