Hechos 27 - Wounaan Meu

Pablo Roma phoborog warrtarr

¹ Mag emperador aarchata Pabloou ich deepʉipi jaautarr aawai chadcha Italia durr Roma phoborog deepʉiju aphobaadejim aajem, mamta chi emperador sĩejerr aawai. Mag Pablo deepʉyaagpaawai soldaaun Augusto den anʉm eem capitán ãb Julio anʉmʉg jaaujim aajem, magua Pablo tagam presonaanpa ãba phe arramkhĩir. Mag i deepʉi nʉm dʉi mʉjã i daumaai majim.

² Mag chadcha puerto Adramitio anʉm aram barco Asiaag mam anʉm aig bar wejorr aawai mag ee marau waaidʉtkha phobaadejim. Mag maar wetum dʉi Macedonia durr phobor Tesalónica anʉm eem woun Aristarco anʉmjã maar dʉi majim.

³ Maigmua mag maar ereubaadeeu ag noram phobor Sidón anʉm barjim. Mam pabaimaa capitán Julioou bʉ̃ʉrjã Pablo chig aba, warag ich paarmua ʉdʉraa ich khapkhʉʉn aar mapinaa amau nem dee nʉmjã isegba aupiejeejim.

⁴ Mag Sidón naawia ereubaadeeu, phũ maar khĩir garmuata we sĩerr aawai, okhar chi Chipre morr eugar phũ chukag ee phʉʉrdʉ wetjim.

⁵ Mag wetumua waa Cilicia khĩirphee dojãrr thʉadʉdʉg, deeum durr Panfilia anʉm khĩirpheejã thʉadʉ dichwi, deeum phobordam Mira anʉm jerag phẽeubaimajim. Mag phobor, Licia durramʉu.

⁶ Mag phobor jerag mag soldaaun por chi capitanau phobor Alejandría anʉm aram barco Italiaag mam anʉm oobaawai marag ag ee waaidʉtkhapijim, jũrr mag ee wetaag.

⁷ Mag, chadcha dojãrr paaukhabaadewi ich mag biekkha kheubaadephʉmjã pomjã jẽedʉba, okhar ẽkha khodjorromuata khãai khapan pabaadem ee phobordam Nido anʉm khĩirphee barjim. Maimua deeu audʉtkhaau, agtha maar khĩir garmuata phũ we thʉnarr aawai, sĩi warag dojãag khajapha dʉrbawi, Puerto Salmón anʉm khĩirphee dichwi, morr Creta anʉm eugar phũ theeg magcha weba sim ee phʉʉrdʉ wetjim.

⁸ Mag phũ khurau pod dojãrr maju khaba aawai do igaau okhar ẽkha wetumua phobor Lasea anʉm dakha deeum phobordam Buenos Puertos anʉm barjim.

⁹ Sĩi mag phũ khaigbam gaaimua jẽedʉba aawai, okhar khodjorromua ya deeu noseg jaarjã dakpapakharr aawai, tag biekkhajujã khaba aadejim. Pabloou ichdeu mag khaphʉ aadeewai mag barco ee chi thethemnaan wetmaa arr khʉʉnag magjim:

¹⁰ —Keena, mua oowai ya mʉg noseg jaar dakpapakham ee warag maach wetmʉn, dojãrr aadeewai maach khaigbaju. Magbaadeewai maach barco okhoowi ag ee nem warrumjã thum okhoobaadem dʉi ĩchab maach chi wounaanpa khãijã thum odubjugui ajim amag.

¹¹ Mamʉ Pabloou amachig mamagkhamjã, chi soldaaun por capitán Julioou i iek asekasba, warag chi barco eem capitanau chi pap dʉimua jajaaukhamta dʉi ʉkhakha aajeejim.

¹² Mamʉ mag maar narr aig noseg jaar paawai pod barco barjopju khaba sĩerraawai khapanaam khʉʉnau warag aigmua ich ag Creta phʉram gaaipai deeum phobor Fenice anʉmʉg wetju aphobaadejim, jũrr maig nʉmua ideu noseg jaar dichpiwi dochʉumie nʉag. Mag Fenice phobor bechag ee ierr sĩewai ed burrjem garmua phũ beewaijã magcha nem theeg weba aajem.

Dojãrr wetum ee phũas meeukhatarr

¹³ Mag, chadcha chi ancla jiir auwi ereubaadejim. Mamʉ mag wetum ee, edau burrjem garmua phũdam thetheepai webaadeewai, amachdeu ig narrjo ich mag we thʉnʉisijupii awi, warag mag morr Creta anʉm igaau dohi dakha ereubaadejim.

¹⁴ Mamʉ mag wetumua agtha khodjorroocha khaba nʉm ee, degolp phũ ãsiebaadewi jũrr dohi garmuata phũ theega dojãag phua thʉnʉisijim.

¹⁵ Mamʉ mag dohi garmuata phũ theeg phua thʉnaawai parii dohieg pʉyaag chach ohookhamjã podba, warag dojãagta maar barco arrmajim. Mag par dohieg wetju ẽkha nʉm podba abaawai warag sĩi phʉʉrdʉ ũrr joisiwi ʉdʉraa phũug maach sir arrpijim.

¹⁶ Mag sĩi phʉʉrdʉ khodjorromua Creta dojãag deeum phʉramdam Cauda anʉm eugar paaukhabaadeewai ʉu chi phũjã magcha nem theeg weba aadejim. Mag agtha khĩir garmua we sim aawai okhar ẽkha wetumua maach barco khu gaai botedam jʉ̃ wai jorrarrjã ẽkha nʉʉ awi ʉu barco ee eudʉ aujim.

¹⁷ Mag chi botedam barco ee eudʉ auwi, chi barco bi agdaujo ubʉ khakhẽgamkhĩir, ag eegar kabchʉ dubpʉinaa thet ãbamʉg khẽu khõorjʉ̃ sĩujierram, thorrphewi sĩi eeuram ugua. Maimua chi barcopienau mospor sʉkag ʉ̃r amach jʉʉuwimaju khĩirjuwi, warag vel thum eeg burrkhapʉinaa, ich mag sĩi phʉʉrdʉ khodjoisijim, phũupai maach sir arrmkhĩir.

¹⁸ Maimua ag noram pamjã bʉ̃ʉrjã phũas thumbaa khaugba, amachdeu oowai warag phũasdau dap aadeewai barco ũpdʉmkhĩir ag eem nem do ee barkhʉʉi phobaadejim.

¹⁹ Maimua khãai thãrjup pamjã ich mag thumbaba aawai maachdeucha marau dʉi am juapierr chi barco dencha nem thʉnarrjã ãaurag barwerppʉijim.

²⁰ Dojãrr mamagkhamua khãai khapan pamjã bʉ̃ʉrjã marau edau khĩir oojojoojã khaba, ni edaar paawai phĩdag khĩirdamjã ooba aawai, ya marau maach peerdʉjujã khĩirjuba naajim.

²¹ Mamʉ mag khodjorromua khãai khapan aaijã thach khoba narr aawai Pabloou am jãrr dʉnʉʉunaa, —Keena, mua jaau chirarr ipierr Cretamua oberba arr amuan, wajapcha akhamgui ajim. Jãgtarr akhiin maach mʉg dau aug wauwi maach nemdamjã okhoobakham.

²² Maach mʉg aphʉʉ khodjorrab mamʉ, oob khĩirjumiet ajim. Maach barcoon chadcha joothũpwia okhooju, mamʉ maach chi wounaan chan ni ãbjã chig abamgui ajim.

²³ ¿Khan jãgwi mua khaphʉ mag chirʉ́? Mua mag chirʉmʉn mʉgaugui ajim: Mʉ mʉg chitʉm aig ãba Ẽwandamau nem khõsimta wau chitʉm, ichta mʉ Por aawai. Mag gaaimua edaar ich chog mʉ aig pʉiwia, beewia, mʉ thʉ̃rcha thʉ̃rthʉ̃rnaa,

²⁴ mʉrʉg khĩirjupibajimgui ajim, ichiita emperador dʉi khĩircha iekhab khaba iekhaju chiraawai. Mag gaaimua Ẽwandamau mʉ peerdʉ atham dʉi ĩchab pãar thum mʉ dʉi ãba khodjorrom khʉʉnjã peerdʉ auju a jaaujimgui ajim, chi Ẽwandam chogau mʉchigcha.

²⁵ Magtarr aawai onee abat keena; mua khaphʉ chirʉmgui ajim, chadcha Ẽwandamau ich chogag jaaupibaawai mʉchig jaautarrjo ich mag aju.

²⁶ Oob khĩirjumiet; maachin ichiita jerrba parhoobam morr gaai phũu sir werbajugui ajim Pabloou thumaam khʉʉnag.

²⁷ Mag dohijã ooba khodjorromua seman numiim ee, phũu barpʉiwi, jũrr deeum phũas Adriático anʉm ee nʉmta, edacha aadem ee, chi marinernaanau ya dohi dakpamam khaugaa aphobaadejim.

²⁸ Mag dohi dakha nʉmjoo abaawai, do naug khap aag awi chach oowai, veinte brazas sĩejim. Maimua khũchpai khodjorroo awi deeu chach oowai quince brazaspai aadejim, chi naug.

²⁹ Magbaawai eeu degolp mokpor jojoodog ʉ̃r khãijã maach jʉʉu jopimaju khĩirjuwi ancla jayap khu gar jʉ̃khanaa dubbapäaiwai ʉu makhʉʉnau chi barco wai joisijim. Mag dojãrrpai khodwejomua jopkharraajãta ãspapim khõsi aajeejim.

³⁰ Mag nʉm ee chi marinernaanau ãspaju nawe botedam ee dʉrju khĩirju phobaadewi, chi botedam do ee jiir burrpʉiwi, amach khaugpimaaugau, seukha deeum anclata jũrr khẽugar do ee barpʉyaag ẽkha nʉmjoo naajim.

³¹ Mamʉ Pabloou mag am dʉraag ẽkha nʉm ichdeu khaug athaawai chi soldaaunag jaauwi, chi capitanagjã, —Jãkhʉʉn marinernaanta inanaa barco ee naaba chadcha dʉrmidmʉn, pãar chan pod peerdʉbamgui ajim.

³² Magbaawai soldaaunau chi kabchʉ thʉrrbapäaiwai sĩi khĩchag ee parhooba phũu sir arrwi chi botedam ich mag okhoobaadejim.

³³ Maimua ãspa urum den ya edau aardʉdʉ khabaadeewai Pabloou ich khapeenag thach khomkhĩir am wawimamua magjim: —Keena, pãrau oo nʉm ya ĩsim khurau catorce días pamgui ajim, pãar aaijã khãiba, ni pãach thach khoojemjojã khoba, sĩi bʉ̃rʉʉm iiupai nʉm.

³⁴ Maagwai mua pãrag thach khobat a chirʉmgui ajim keena. Magba aawaita jãg warag pãach kha thũu pamabahab. Oob dojãrr pãach dau aphʉʉ aju chan khĩirjumiet. Maachin thumaa chig aba peerdʉjugui ajim.

³⁵ Pabloou mag iekhapet awi, pan jua ee auwi, thumaam khʉʉn dakhĩir Ẽwandamag jeeuwi, khõor khobaadejim.

³⁶ Mag Pabloou amach dakhĩir khobaadem oowi dʉi khõchkha khophobaadejim, tagam khʉʉnaujã.

³⁷ Aragan mag barco ee khodjorrarr khʉʉn thum maar doscientos setenta y seis naajim, chi khapanag.

³⁸ Maimua mag amachdeu khompierr khowi ag ee trigo wai jorrarrjã do ee barkhʉʉipʉijierram, chi barco ũpdʉmkhĩir.

Mos ʉ̃r jʉʉuwi khootarr

³⁹ Mag dojãrrpai jʉ̃ eewi ãspabaadeewai dohi oo aujierrab mamʉ, marinernaanau pod mag durr khaug aubajierram. Mamʉ bechag ee ierr mos bäau sim oo athaawai agʉg wetju aphobaadejim, jũrr mam barco wai jopimaag.

⁴⁰ Mag chadcha wetju aphobaadewi, amach anclaagjã ooba, sĩi warag chi kabchʉpa do ee ich mag thʉrrp pʉajierram. Magnaa chi barco pheerjem timonjã khũgdʉtkhanaa, khẽugarcharam veldam deeu waaur auwia, mag moshi bäau kherʉmʉg ãdeg phobaadejim.

⁴¹ Mamʉ mag ãdeg wetwi waa dojãrr mospor sʉkag ʉ̃r khẽúa mosjã ee thoodʉ jʉʉu jopbaimajim, pod phʉʉrphejujã khaba. Mag dojãagta khu ʉa wejom aawai oo nʉm dau eyaa phũasau bobojokhamua chi barco khu thorrchecheu khabaadejim.

⁴² Ya mag oobaadeewai, presonaan do ee dʉrbagkha wetwi phẽeubagkhabaimaawai warag dʉrju khĩirjuwi, chi soldaaunau warre khechpʉiju ẽkha phobaadejim, ãbjã peerdʉpiba.

⁴³ Mamʉ amau magbaawai chi capitán Julioou Pablo peerdʉ aum khõsi sĩerr aawai amag ʉdʉʉr presonaan khechpiba, sĩi warag chi iparaam khʉʉnag do ee dʉrbagkhapi jaaujim, amachta nacha do igaau phẽeubagkhawi durrag waaidʉtkhamkhĩir.

⁴⁴ Maagwai chi imeraam khʉʉnag jũrr tabal gaai wa chi barco perás phũasau ogreu werpmam gaai khãijã pʉrnaa okhar wetpi jaaujim, mag wetumua ĩchab do igaau phẽeubagkhamkhĩir. Mag, chadcha ʉu maach thumaa maar monakha do igaau phẽeubagkhawi peerdʉtkhajim.