Hechos 26 - Wounaan Meu

Pabloou ich kõit rey Agripaag iekhatarr

¹ Magbaawai rey Agripaau Pabloog iekhapijim anaabá, jũrr ich iekcha ũraag. Mag ichig iekhapibaawai, amach meeun ee thethemnaanag saludaajerrjo, chi rey oo simʉg ʉ̃gthaag jua ʉanaa Pabloou magjim aajem:

² —Rey Agripa, chadcha maach meeunaupai nem parhooba amachdeu thʉm aig mʉ gaai thʉ iekha thʉnʉm. Mamʉ ʉu pua mʉchigcha iekhapi chiraawai mʉ onee chirʉmgui ajim anʉm, mʉchdeucha wir aig mʉch jawaag.

³ Mua khaphʉ chirʉmgui ajim anʉm, pua chadcha maach meeun i wajapha khaphʉnaa ĩchab maach leijã wajapha khaphʉ sim. Maagwai pua sĩi mʉ iekdam wajapha ũrbarjugui ajim anʉm.

⁴ ’Judionaanaun thumaam khʉʉnau khakhapdo thʉnʉm, mʉch ẽwan gurwe jãga mʉ am ee chitaajeejĩ, mʉch durr chiraajeewai maimua Jerusalén chiraajeewaijã agjo.

⁵ Amau khaphʉ nʉmgui ajim anʉm ĩchab, warrgarwe mʉ ich mag fariseokha chitʉm. Pua khaphʉ sim, fariseonaanta chadcha bʉ̃ʉrjã maach jooin i pʉaba wajapcha ʉʉrkhaajem khʉʉnau. Amau chadcha nem agchata jaau nʉm akhiin, magʉmta bʉ̃ʉrjã meerba thum jaaukhamgui ajim anʉm.

⁶ Mamʉ magba amau sĩi mʉ mʉig wai nʉmʉn, warrgarwe Ẽwandamau maach jooinag jaautarrjo chadcha maach meewi deeu iiu phiidʉju ʉkha chitʉm gaaimuapaita amau mʉ mʉig wai naabahab ajim aajem.

⁷ Warrgarwe mag jaaujerr aawaita, maach jooin ãbam khodpai doce narr ag chaain thumaam khʉʉnau ĩs ewag pawiajã agtha ʉkha durrum iekhau edaram magwe Ẽwandamag jeeu durraba aajeeb ajim anʉm, ichdeu jaautarrjo iiu phiidʉtkhaag. Magnaa, Rey Agripa ajim anʉm, maach meeun thumaam khʉʉnau khabam, mamʉ iwiir ãbam khʉʉnau par chad khabamta iek pom mʉg mʉ gaai thʉ nʉmʉn, sĩi chadcha mʉchdeu mag Ẽwandamau maach iiupi aaujem anʉm ʉkhanaa jaau chitʉm gaaimuapaiu ajim anʉm.

⁸ Magnaa, Keena, magan pãrau khĩirjuawai Ẽwandamau chan maach chi meemjã pod phiriu auju khaba sĩeb ajim anʉm, pãar mʉ dʉi mʉg thʉnarram.

⁹ Magnaa ichdeupai, —Warran muajã chadcha jãg Jesús Nazaretpierr igar ʉkha wenʉrrʉm khʉʉn thum warre khaibag ee pʉiju aai nʉmpii chitajimgui ajim anʉm.

¹⁰ Mʉchdeucha mag khĩirju chitarr gaaimua, Jerusalén phobor een chadcha mua am gaai mas waaujeejim. Phadnaan chi porkha nʉm khʉʉnaujã amach paarmua mʉ igar narr aawai, mʉchig jaaubaa, chi ʉkha durrum khʉʉn khapan mua cárcel deg dubpʉimaajeejimgui ajim anʉm. Mag phãarkhanaa khechpi jaauwaijã mua dʉi am igar chiraajeejimgui a jaaumajim aajem ichdeucha.

¹¹ Magnaa, Magbaju khar mua sĩi pa gaai bʉʉrnaajã wʉ thʉnʉʉujeejimgui ajim anʉm, tag Jesús igar ʉkhapimaaugau. Mag chirʉmʉn Ẽwandam iek jaaujem di nʉnʉidʉmpierr ich mag chitaajeejimgui ajim anʉm. Khar warag khĩir machkhabaadeewai deeum phobor eem magwe mua am ẽudee ẽkhaajeejimgui a jaaumajim aajem ich Pablooucha.

Pabloou deeu jãga irua Ẽwandam iek chaar ʉkhajĩ a jaautarr

¹² Mag jajawagmamua khʉdau ee Jesús dʉi ich iekhatarr jũrr reígcha ũrmkhĩir awi, deeu ũwaai jaaubaadewi magjim aajem: —Mag chitʉmua biek ãb iek thethecha chitamkhĩir awi phadnaan chi porkha nʉm khʉʉnau mʉchig ẽsap wau deebaawai ag dʉi Damasco phoborog majimgui ajim anʉm Pabloou ich jaaumamua.

¹³ Magnaa, Rey, mamʉ pua ʉkhabamgui ajim anʉm, mag mʉ mamta, edausĩe thʉnʉm ee, cha edau wʉʉ thʉnʉm khãyaujã dau araraacha sĩi edjã eemua degolp pagthʉm daujo phʉr jẽer athamua warre maach chi wenʉrrarr khʉʉn thumwe maar khĩir arar wʉʉ jẽer athajimgui ajim anʉm.

¹⁴ Mag pagthʉm daujo degolp phʉr jẽer athamua warre maach thumwe maar jẽkhʉt thuphãau sĩujimgui ajim anʉm. Mag jẽkhʉt chirʉmua ũurwai, hebreonaan meúata mʉ thʉ̃rcha thʉ̃rnaa mʉrʉg, “¿Khantheeta pua jãgcha jãg mʉ iek ʉkha durrum khʉʉn khaibag wawaag am ẽudee ẽkha nʉrrʉ́ma?” a sĩejim mʉrʉg. “Jãg nʉrrʉm aiguin parta pʉchdeupai pua pʉch gaai mas aju jʉr nʉrrabahab ajim, phak emkhoíu phidkhamaaugau ewag thʉʉgwai ich bʉkhʉrr pa eudʉ jorraajem gaai miu ʉa sĩejemʉg thʉʉgjemjo.”

¹⁵ Magbaawai mua irig, “¿Ma pʉ khaíuma?” a chirajim. Magbaa ichdeu mʉrʉg ich thʉ̃r thʉ̃rnaa, “Mʉʉn Jesuu. Mʉʉta pua khaibag wauju ẽkha chitabahab ajim.

¹⁶ Jopkhaa phiidʉ dʉnʉisí, maimua mʉ iek ũrbá” ajim mʉrʉg. “Mua pʉrʉg mʉg mʉch oopibarmʉn mʉch chogkhamkhĩrau ajim, mag mʉ chog khabaadeewai pʉchdeu mʉg oobarm õrag jaaunaa ĩchab mʉg atag mʉchdeu pʉchig nem oopimampa thumaam khʉʉnag jaau chitamkhĩir.

¹⁷ Judionaanau wa judionaan khabam khʉʉnau khãijã pʉ chig am ugua, mʉchdeuta pʉ thʉa wai chitajugui ajim, chadcha judionaan khabam khʉʉn eejã mʉchdeuta pʉ pʉi chiraawai.

¹⁸ Mua am ee pʉ pʉi chirʉmgui ajim, am sĩi dau khĩsumjota naawai; pua mʉ iek jaaubaadeewai, dau egdʉtkha phobaademjo wajapha oophobaadeewai, tag amach pekau eepai khĩchag eemjo ich mag wenʉrram ugua. Mua pʉ pʉi chirʉmʉn, jãg sĩi dosãt ipierraa wenʉrraju khãai, Ẽwandamau khõsi simjota wenʉrramkhĩrau. Mag mʉ iek ʉkha phobaadeewai, Ẽwandamau amach khaibag chugpaabapäaiwain chadau, amjã judionaan chi ʉkha wenʉrrʉm khʉʉn dʉi ãba Ẽwandam chaainkha nʉisijugui” ajim. Maga maach Por Jesuu mʉrʉg iekhajimgui ajim anʉm Pabloou Agripaag, mag Damasco phoborog mamua khʉd ee Jesuu ichig iekhatarr jaaumamua.

¹⁹ Mag iekhakhagmamua ich Pablooupai, —Rey Agripa, mʉchdeucha mag oonaa mʉchigcha maach Por Jesuu ʉ̃gtharmua mag iekhatarr aawaita chadcha mua bʉ̃ʉrjã i ichaaur aba, sĩi warag i ipierraa ajimgui ajim anʉm.

²⁰ Nacha Damascopienagta mua jaaujim maach peerdʉajem iek. Magtarr khur Jerusalenpienag jaauwi, Judea durram khʉʉnagjã jaauwi, ĩchab judionaan khabam khʉʉnagpa thum jaau phʉʉrdʉ chitʉmgui ajim anʉm. Mag jaau chitʉmʉn, amag amach khaibag ãsie ewag khĩirjuwia isegnaa, Ẽwandamagta mag khaibag chugpaapi jeeumkhĩir jaaunaa, ĩchab thumaam khʉʉn daar nem wajaphata waupi jaau chitaajemgui ajim anʉm, bigaaum khʉʉnau mag oowai amach eugar, “Jãkhʉʉnan chadcha khĩirjug iiur wai nʉisim” amkhĩir.

²¹ Mag chitʉm gaaimuapaita chadcha Aai i jeeujem deg judionaanau mʉ pʉr auwia warre mʉ thõopʉim ig naajim.

²² Mamʉ ʉu Ẽwandamau mʉ eeg oowia agtha monakha i iek jaau pʉʉrba chitʉmgui ajim aajem, thumaam khʉʉnag. Chi thethem khʉʉnagjã jaaunaa ĩchab sĩi parhoobam khʉʉnagjã jaaujem. Mua mag jaaujemʉn, warrgarwe Ẽwandam i jaaumienau Moisés dʉimua jaauwai ĩs ewag paawai maach ee mag nem oomaju aajerrta muajã amag jaaujemgui ajim anʉm. Mag tag mua nem khĩethuu amag jaauba chitʉmgui ajim anʉm.

²³ Cha mua jaau chirʉmjo warrgarm khʉʉnaujã jaauwai, mag Cristota beewia, meewia, deeu ichta nacha iiu phiidʉjugui aajeejim anʉm; magbarmua judionaanagjã khap apinaa judionaan khabam khʉʉnagpa ichta ed khĩe ee õtdau paa dʉnʉmjo sĩerraawai, i igmʉn irua khap apijugui aajeejim anʉm, jãga Ẽwandam aar barju.

Pabloou rey Agripaagjã Cristo iek ʉkhapiju ẽkhatarr

²⁴ Pabloou peerdʉm khõchgau Cristo igwia mag iekha khitaawai Festoou irig, —Pablo, pʉʉn wajapta lokie chirʉmgui ajim anʉm. Atcha estudieuta sĩi warag pʉ por okhoo sĩebahab ajim anʉm irig.

²⁵ Magbaawai jũrr ich Pablo garmua Festoog, —Mʉ chan lokoo khaba chirʉm, muan agchata nem jaau chitʉmgui ajim anʉm. Maagwai mʉch iekhamamjã mua khaphʉ chitʉmgui ajim aajem irig.

²⁶ Magʉm iek rey Agripaaujã wajapha khaphʉ simgui ajim anʉm. Mag irua khaphʉ sim mʉchdeu khaphʉ chiraawai ĩs mag irig mʉch iek ũrpim okhota mʉ iekha chirʉmjã aba chirʉmgui ajim anʉm. Õor ãbpaimuajã khaba, ni õor chukag eejã khábata Jesús thõowia deeu iiu phiidʉba arr aawai, chadcha irua meraajã khaba sim mua khaphʉ chirʉmgui ajim anʉm.

²⁷ Magnaa irigchata, Rey Agripa, ¿Warrgar Ẽwandam i jaaumienau jaaujerr iek pua chadcha ʉkha chirabá? ajim anʉm. Mua khaphʉ chirʉm pua chadcha ʉkhaajem ajim Pabloou ichdeupai.

²⁸ Magbaawai chi reíu Pabloog, —Peerchata puan pʉch denjo mʉrʉg ʉkhapi athamgui ajim anʉm, pʉchjo Cristo den khamkhĩir.

²⁹ Magbaawai jũrr Pabloou chi reíg, —Mag sĩi peerta ʉkhabarmjã aba, thum mʉig thʉnʉm khʉʉnau mʉ denjota ʉkhakhiin ʉucha akhamgui ajim anʉm, pari cha mʉ chirʉmjo preso nʉmua khaba mamʉ.

³⁰ Pabloou magbarm ee chi rey phiidʉbaadeewai, chi gobernador, Berenice, maimua tag am dʉi ãba narr khʉʉnpa phiidʉtkha phobaadejim aajem.

³¹ Maimua amach ap wetwi Pablo ig iyʉʉ nʉmua jũrr amach wir aigpai, —Keena, mua oowai jãg woun bʉ̃ʉrjã iekkhõr chukhu sim anaajim aajem, magʉm gaaimua i thõopäaig; ni sĩi cárcel degjã wai naaju khaba simta amau jãg i phãar wai nʉmgui a iyʉʉ naajim aajem amach ap.

³² Mag iyʉʉ naawi Agripaau Festoog magjim aajem: —Jãg presoou ichdeucha emperador aarta ich deepʉipi jaauba arr akhiin, weeupʉiju aai sĩejimgui ajim anʉm. Mamʉ emperadorrauta i dʉi ichdeu khap aju aai sim atarr aawai pod weeupʉibamgui ajim anʉm.