Hechos 25 - Wounaan Meu

Pablo gobernador Festo na

¹ Mag chadcha Porcio Festo Judea durr barchewi jũrr gobernadorkha sĩsijim. Mag ich barchetarr khur khãai thãrjupnaa Cesareamua Jerusalenag majim.

² Mag i mawia barbaimaawai sĩi ʉʉr phadnaan chi porkha nʉm khʉʉn judionaan chi thethecharam khʉʉn dʉi i aig beewi irig Pablo eugar chad khabam iekta ĩgkhachejierram aajem.

³ Mag, amach iek ʉkhamkhĩir Festoog jajaau aajeejim aajem, Cesareamua Jerusalenag Pablo deepʉimkhĩir. Maan am denen amach appain ya, chi iekham arr aawai, mag i deebapäaiwai khʉd jãrr nʉnaa i thõopäaig ajim.

⁴ Mamʉ par amau mamagkham ãba, Festoou warag, —Pablo Cesarea phobor ee preso sĩebahab ajim anʉm. Maagwai mʉchchata mʉg khur jopcha agʉg maju a chirʉm,

⁵ maagwai pãar eem khʉʉn chi thethemnaan mʉ dʉi Cesareaag wetju aai nʉmgui ajim anʉm, mam pabaimaawai, chadcha ichdeu nem khaigba arr gaaimua iekkhõr paraa sim khai, warag thet pʉr awaag.

⁶ Mag jopcha ich Festo maju arr aawai ocho días khaba arr khai diez diasjopai Jerusalén phobor ee sĩewi deeu Cesareaag beejim. Mag beewia ich bartarr noram ich sie gaai jupwi ich aig Pablo aibeemkhĩir thʉ̃rpʉijim aajem, ichdeucha Pablo iek khap ũraag.

⁷ Mag thʉ̃rpʉitarr aa, ya amach aig dubbaicheewai, chi judionaan mag Jerusalenmua beetarr khʉʉnau dakhacha beenaa ich khĩircha nem khaigbacharamta i gaai thʉphobaadejim aajem. Mamʉ magʉmjã sĩi amach ipaita mag thʉnarr aawai pod i pʉr auba aajeejim aajem.

⁸ Mag am iekhapinaa jũrr Pabloou ich kõit ichdeupai, —Mʉ chan mʉg chitʉm aig bʉ̃ʉrjã nem khaigba wauba chirʉmgui ajim anʉm. Mua mag amau jaau nʉmjo judionaan ley ichaaurjã khaigba khaba, Aai i jeeujem di igwiajã khaigba iekhaba, ni Romaam emperador igwiajã bʉ̃ʉrjã i eugar khaigba iekhaba chirʉmgui ajim anʉm.

⁹ Mamʉ judionaan ich dʉi onee apim khõsim iekhau Festoou ich Pabloogta, —¿Jerusalén mawia jamta pua pʉch khĩircha warre pʉch dʉi jãga aju khap pʉchig jaaupim khõsi chirʉ́? a jeeujim anʉm.

¹⁰ Magbaawai jũrr Pabloou irig —Mʉ mʉig emperadorrau warre presonaanag amach khĩircha am khaibag wauju wa sĩi obeerpʉiju a jaaujem aigta chirabahab ajim anʉm. Maagwai mʉigweta warre mʉch khĩircha jaaupʉiju aai simta, ¿khanthee pua mʉ jam arrm ig chirʉ́? ajim anʉm. Pua pʉchdeujã khaphʉ chirʉm, mʉ judionaan iwiir ãbam dʉijã khaigba khaba chirʉm.

¹¹ Pua oowai mʉchdeu nem khaigba arr gaaimua chadcha amau mʉ thõoju aai nʉm khai, mua magʉmjã abam. Mamʉ bʉ̃ʉrjã mʉ khaigba khaba chirʉmta, sĩi mʉ eugar mag seukha thʉnʉm gaaimuapai chan mʉ dʉi amachdeu ampierr amkhĩir ni ãbmuajã pod mʉ amag pʉr deeju khaba simgui ajim anʉm. Magju khãai warre emperador aarchata mʉ deebapʉi. Jam irua mʉ dʉi ichdeu khap ajugui ajim anʉm ich Pabloou irig.

¹² Magbaa Festoou ich wawiejem khʉʉn dʉi iekhawi Pabloog, —Emperadorragchata pua pʉch dʉi ichdeu khap apim khõsi chiraawai magan ichiita emperador aar pʉ majugui ajim anʉm irig.

Pablo rey Agripa na

¹³ Mag Festo khĩirphee Pablo ijẽjẽbkharr khur pomcha khaba nʉm ee, rey Agripa ich ʉ̃phʉi Berenice dʉi Cesarea phobor ee beejierram, gobernador Festo oon.

¹⁴ Mag beewia da wetba nʉʉ arr aawai iyʉʉmamua Festoou rey Agripaag Pablo jaaumamua magjim aajem: —Woun ãb Pablo anʉm Feliiu preso pʉatarrjã mʉig simgui ajim anʉm.

¹⁵ Mʉch mʉig pachewi mʉ Jerusalén udthuurwai judionaan eem phadnaan chi porkha nʉm khʉʉnau agjo am eem chi thethemnaan dʉimua warre mʉrʉg i thõopʉipi naajimgui ajim anʉm.

¹⁶ Mamʉ mua amag jaaujimgui ajim anʉm, maach Romapienau pod khan gaaimuata mag woun preso wai nʉ a khaugba nʉwe chan jʉchag ag bʉrre presonaan dʉi dichdeu ampierr aba aajem. Magju khãai chi presoogjã mag ich leíg jaau wai nʉm khʉʉn dʉi khĩircha oonaa, ajapha i iek ũrnaata, i thõopi jaauju awiajã, thõopiju aai simgui a chirajim anʉm Festoou Agripaag.

¹⁷ Mag gaaimua amachta mua mau mʉch aar thʉ̃rpʉiwi bardʉtkhabaicheewai, ag noramwe mʉch sie gaai jupwi chi Pablo awaan mamkhĩir mua õor pʉijimgui ajim anʉm Festoou.

¹⁸ Maimua aipierrwai muan i dʉi mag thʉnarr khʉʉnaujã irua chadcha nem khaigba waaujerrta jaaujupii chirajimgui ajim anʉm chi Festoou Agripaag ĩgkhamamua.

¹⁹ Mamʉ magjã magba, ãba amau i gaai thʉmjo thʉ narran, amach jooin i jaau nʉm maimua ãb mag woun Jesús a thʉ̃r sĩerr meetarr anʉmʉ́, Pablo iek mag agtha iiu sim a jaau nʉmpaita i gaai thʉ naajimgui a ĩgkhamajim anaabá.

²⁰ Mag ĩgkhamamua, Mamʉ sĩi magʉm gaaimuapai arr aawai, chadcha mʉchdeu jaauju khaugba aadee, warag ich Pabloogta, “Pʉ mam khõs akhiin, warag Jerusalenag makhamgui” a chirajim, “jam panaata pʉchigcha warre pʉ dʉi jãga aju khai a khap jaaumkhĩir.”

²¹ Mamʉ magbaawai ichdeu, “Magju khãai warre emperador César aarta mʉ deebapʉit, jamta irua mʉ dʉi ichdeu khap aju” abaawai, ich magpai sĩuwi, deeu mua ich sĩejem cárcel deg arrpiwi, sĩi oopaar apijimgui ajim anʉm, emperador aar pʉi nʉm ora. Magta Pablo cárcel deg simjã Festoou Agripaag jaaumajim aajem.

²² Magbaawaita jũrr rey Agripaau chi gobernador Festoog, —Muajã mag woun iek ũrm khõsi chirʉmgui ajim anʉm. Magbaa Festoou, —Magan nan mua pʉrʉg i iek ũrpikhimgui ajim anʉm irig.

²³ Magtarr aawai chadcha ag noram Agripa Berenice dʉi amach khajũa ooimʉcharam jũa beewi ãba amach biirdʉajem ee dubjierram aajem. Am dʉi ĩchab beejierram aajem soldaaun chi pornaan maimua ich ag phobor eepaim khʉʉn chi thethemnaanjã agjo. Ya mag thum bardʉtkhabaicheewai Festoou Pablo awaan mapijim aajem.

²⁴ Magbaa i jʉraan wetwi aipierrwai magjim aajem ich Festoou: —Rey Agripa, maimua pãar mʉig maar dʉi nʉm khʉʉn: Cha simgui ajim anʉm, pãar õor ig narr. Jerusalén phobor ee maimua ich mʉigjã judionaan thumaam khʉʉnau mʉg woun iekkhõr pom sim a jaauchenaa warre mʉrʉg thõopʉipi jaau nʉmgui ajim anʉm.

²⁵ Mamʉ mua oowai irua bʉ̃ʉrjã nem khaigba wauba sim, magʉm gaaimua i thõopäaig. Mamʉ ichdeucha jũrr emperador César aarta ich deepʉipi sĩewai, ¿muajã jãgbarju? Ichiita mua i deepʉijugui ajim anʉm, jam paawai i dʉi ichdeu khap amkhĩir.

²⁶ Mag i deepʉiju a chirʉmjã agtha khaugba chirʉmgui ajim anʉm, khan ata maach por emperadorrag mua jaaupʉiju khai, mʉg i preso wai nʉm khap amkhĩir. Mamʉ rey Agripa, pʉʉta rey aawai, pʉrʉgta ʉ̃rcha khap amkhĩir thʉ̃rpʉiwi cha simgui ajim anʉm chi Festoou. Pʉchdeucha ich dʉi iyʉʉ awia wajapha khaphʉ aadeewai mʉrʉg jaaubá ajim anʉm, muajã jãga emperadorrag ẽsap gaai phã deepʉiju aai chirʉ́ a khap aag.

²⁷ ¿Khan jãgwi mua mag chirʉ́? Mua mag chirʉmʉn mʉgaugui ajim anʉm: Mua oowai, mag preso deepʉyaagpam anʉmta, emperadorrag khap amkhĩir ĩs mag gaaimuata i pʉr auwi chadcha i khaibag wau nʉm a jaaupʉiba chan bʉ̃ʉrjã ʉu khaba sĩewaita mag chirʉmgui ajim anʉm chi Festoou rey Agripaag.