Hechos 24 - Wounaan Meu

Pabloou ich kõitpai gobernador Feliig iekhatarr

¹ Mag soldaaunau Pablo Cesarea phobor ee gobernador aar deethurtarr khur cinco días nʉm ee, phadnaan por Ananías, agjo judionaan chi pornaan dʉi amach abogado Tértulo anʉmpa barjim aajem am nʉm aar. Makhʉʉnau amach thum gobernador aar wetwi nem chad khabamta seukha chadam iekjo Pablo gaai thʉjierram anaabá, i khaibag waumkhĩir.

² Mag nʉm ee ĩchab ich Pablojã amach aig waipierrwai chi abogado Tértuloou Pablo khĩir gobernador Feliig, —Señor gobernador, ʉu pʉ gaaimuata maar khõinaa wenʉrrʉmgui ajim anʉm. Pʉch jãg phidkhaagjã khĩirjugdam khaphʉ khitʉm gaaimua, mʉg durr eejã chadcha ʉu warag pua nem khĩir pogkhe waumam õrau khakhapdo thʉnʉmgui ajim anʉm.

³ Maagwai maach thumaam khʉʉnau pʉrʉg ʉu ajim anʉm, chadcha maach thumaam khʉʉn atheeta pua jãg sĩewai. Jãg oowai chadcha maar onee nʉmgui ajim anʉm, pʉ gobernador wajapham aawai.

⁴ Mamʉ pʉ jua phidag pom wai sim maachdeu khaphʉ naawai sĩi khũchpai pʉrʉg maach iek ũrpim khõsi nʉmgui ajim anʉm.

⁵ Mag marau pʉrʉg jaaum ig nʉmʉn mʉgaugui ajim anʉm: Marau wajapcha oowai mʉg wounan sĩi õor wawí nʉrrʉmua õor meeukhapimieu. Maguata sĩi ich nʉrrʉmpierr judionaan wawie gaaita nʉrraajemgui ajim aajem, õor meeukhapiwi iek phithurg amkhĩir. Mag nʉm dʉi ĩchab mag am iek iiur “Nazaretpierr i” anʉm ee ichta chi porkha simgui ajim anʉm.

⁶ Mag ichta chi porkha chirʉm awi, Aai i jeeujem di igwiajã khaigba iekhanaa ag ee judionaan khabam khʉʉn dubpiba aajemta ierr ich dʉi phe wai sĩejimgui ajim anʉm. [Mag nʉrrʉm atheeta chadcha marau i pʉr auwi maach ley gaai jaau simjo ich agpierr am ig naajim i dʉi.

⁷ Mamʉ ya marau magaagpamta, comandante Lisias beewi, ajués maar jua eem khecheu arrwi, jũrr maachigta mau pʉ aar beepijimgui ajim anʉm.]

⁸ Mamʉ maar seu am ugua, pʉchdeucha irig wajapha jeeu ooju aai chirʉm, khan gaaimuata marau mʉig ich khĩircha pʉrʉg mag jaau nʉ a khap aag athee.

⁹ Chi Tertuloou mamag khaawai tagam judionaan aig narr khʉʉnaujã ĩchab ich magta warag i ipierr, “Jãan chadaugui” aajeejim anʉm.

¹⁰ Magbaawai chi gobernadorrau Pabloog iekhamkhĩir jaaubaawai Pabloou iekhamamua thumaam khʉʉn jʉ̃gdaar magjim aajem: —Ʉu pua mʉrʉg iekhapibarm. Mua pʉchigchata jaaum khõchag chirajimgui ajim anʉm, pʉchta chadcha nem ĩs khabam mʉg durr ee año khapan chi thethemkha chiraawai. Maagwai pʉrʉg khap amkhĩir, mʉchdeupai mʉch kõit iekhakhimgui ajim anʉm.

¹¹ Mamʉ wajapcha khap aag, pʉchdeuchajã pua bigaaum khʉʉnag jeeu ookhiin, eeu ĩsta doce diaspai simgui ajim anʉm, Jerusalén mʉ barchetarr. Tagam nem atheejã khaba, mʉʉn ãba Ẽwandamag jewaanta beejimgui ajim anʉm.

¹² Magtarr aawai ni ãbmuajã khĩir mor chigpai mʉ chikham dʉi ipeer ahaukhamjã ooba, ni Aai i jeeujem deg, Ẽwandam iek ũraag biirdʉajem deg, wa kaaijã ee khãijã mua õor meeukhapiwi jũrr chikham jĩerrarraukham õrau bʉ̃ʉrjã ooba aajemgui ajim anaabá.

¹³ Mʉ bʉ̃ʉrjã magba chitʉm aawai mʉkhʉʉn wounaanau pod pʉrʉg, “Chadcha marau maach daúa i mag sim oobajieb” a iekhaju khaba nʉmgui ajim anʉm, sĩi amach khĩirjug eemuapai mag naawai.

¹⁴ Magarrau mʉchdeujã mua mʉch meerba jaau chirʉmʉn mʉgau: Muan warrgarwe maach jooinau jeeujerr ag Ẽwandamagta agtha jeeu chitʉm dʉi Jesús iek ʉkha wenʉrrʉm khʉʉn igar ʉkha chitʉmgui ajim anʉm. Maata amachdeu jaauwai mag mua sĩi Ẽwandam i khabamta ʉkha chitʉm aajem. Mamʉ muajã am denjo ʉkha chitʉmgui ajim anʉm. Ẽwandamau Moiseeg ich iek phãpitarr iek maimua ĩchab Ẽwandam i jaaumienau phã pʉatarr iek sĩsidʉmpa thum mua ʉkha chitʉmgui ajim anʉm.

¹⁵ Õor otarr khʉʉn chi theerjã chukhu ajapha arr khʉʉn dʉi ãkhãraa arr khʉʉnpa thum ãba deeu Ẽwandamau iiu phiidʉtkhapi auju anʉm amau ʉkha naawai muajã agjo ʉkha chirʉmgui ajim anʉm ĩchab, am denjo.

¹⁶ Maguata mʉʉn mʉch chitʉmpierr Ẽwandam dau najã wajapha chitanaa õor eejã wajaphata chitaju ẽkhaajemgui ajim anʉm, naspawia mʉchdeu nem khaigba wautarr gaaimuajã okhĩirjuu oo chiraba aag.

¹⁷ ’Mʉch durr khabam ee añodam khapanaa phʉʉrdʉ chitʉʉ awi, aphʉʉm khʉʉn athee phatkhondam aibeetarr deewi, mʉch ofrendajã Ẽwandamag deeg ĩschata deeu mʉch durr barchewi chirʉmgui ajim aajem.

^18-19 Magaag atheeta beetarr aawai Aai i jeeujem deg mawia, Moiseeu iek phã pʉarr gaai jaau simjo thum mua wau dichwia, Ẽwandam na wajapha chirsimta judionaan Asia durrmua beetarr khʉʉnau mʉ oochejierram. Maagwai chan mamʉ õor khapan khaba, ni sĩi õor meeukha nʉrrjeejã khaba thʉnaajimgui a jaaumajim aajem. Leinaanag mʉ khaibag waupi jaauju awiajã, mag Aai i jeeujem deg mʉ ooimatarr khʉʉnauta mʉig beewi mʉ jaauju aai nʉmgui ajim anʉm, khani mua am dakhĩir khaigba wau chirajĩ.

²⁰ Wa magbam khai, chi mʉig nʉm khʉʉnaujã jaauju aai nʉm: Ar judionaanau amach Asamblea ee amach na mʉ wai nʉm ed, ¿khaíu khap ajĩ, khan nem khaigba mua wautarr gaaimua amau mʉ jãig wai naajĩ?

²¹ Sĩita chadcha mua ikhʉaba amag mag chirajim: “Pãar iek mag mʉ iekkhõr pom chiraawaita mʉ mʉig wai nʉm anʉmʉn, sĩi õor otarr khʉʉnta deeu iiu phiidʉ nʉrrjee aju jaau chitʉm gaaimuapaita pãrau mʉ mʉig wai nʉmgui” a chirajim amag. Mag tag mua bʉ̃ʉrjã iek chigaa iekhabajimgui a jaaumajim aajem Pabloou ich kõit.

²² Mamʉ chadcha Jesús iek ʉkha durrum khʉʉnau mag õor meeukhapiba aajem ich Feliiujã wajapha khaphʉ sĩerr aawai Pablo iekhamam ũrwia warag, —Comandante Lisias pierrwaita pãrau i dʉi mag thʉnʉm wajapha khap aag irig wajapcha jeeu oomajugui ajim aajem.

²³ Maimua warag chi capitanag Pablo chig apiba jaauwia sĩi oopaar apijim aajem. Mamʉ mag nʉm dʉi ĩchab sĩi preso khaba simjo i khapkhʉʉnagjã ʉdʉraa i oon beepinaa irua nemdam igbarmjã parhooba au deepi jaaujim aajem.

²⁴ Amau i dʉi mag thʉnarr khur agtha khãaidam khapancha khaba nʉm ee, chi gobernador Félix ich ʉʉi Drusila dʉi beewi Pablo awaan mapijim aajem, õrau Jesucristo iek ʉkhaajem jaaumam jũrr amachdeu ũraag. Mag ich Félix ũan Drusila anʉm Judeapie ʉʉi ajim.

²⁵ Mamʉ Pabloou, jãga Ẽwandam dau na maadeu nem agchata wau wenʉrraju aai nʉ a jaauwi, dich morjã wir aig ajaphata sʉrkha wenʉrraju aai nʉm a jaaumam dʉi ĩchab, Ẽwandamau maach chacham edjã dichdeu nem waumatarrpierr thum ich agjoo maach dʉi aju anʉmpa jaaumam ũrwia, Feliiu ich khap Pabloog magjim aajem: —Pablo, ideu magpai sĩuwia pʉchta deeu pʉch sĩejem cárcel deg petá. Mʉch jua parii abarm ed deeu mua pʉ thʉ̃rpʉijugui ajim anʉm, cha pua jaau sim ũraag.

²⁶ Mag simʉn mamʉ chi gobernadorrau ich odegpain, ich weeupʉi nʉm paar Pabloou ichig phatkhonaujã phagpim khõsi sĩerr aawaita mag sĩi i dʉi iyʉʉ aagpaijã ʉ̃iba ich aar i thʉ̃rpʉpʉi aajeejim aajem.

²⁷ Ich mag simua ya año numí sĩejim ich mag cárcel degpai. Mag nʉm ee Félix oberwia jũrr deeum Porcio Festo anʉmta Judea durr gobernadorkha sĩsijim. Mamʉ ich Félix judionaan dʉi iekkhõr aumaaugau, mag ich oberaagpamjã Pablo obeerpiba, ich mag cárcel deg pʉajim.