Hechos 22 - Wounaan Meu

¹ —Keena khodamnaan, jooinpa thum, mʉ iek ũrbat, mua mʉchdeupai mʉch khaigper iekhaagpamgui ajim.

² Pabloou amachig hebreonaan meúata mag iekhabaadem ũrbaawai chará warag sĩi khĩuu ũrphobaadejim. Mag õor khĩu thʉnʉm ee, iekhamamua Pabloou mamagag majim:

³ —Mʉʉn judío charau. Mʉ Cilicia durr thaabajimgui ajim, phobor Tarso anʉm ee. Mamʉ mʉch erraawe mʉig Jerusalén beewia ich mʉigpai jooipa chirʉmgui ajim. Mʉ maestro Gamalielau mʉrʉg wajapha maach jooin iita thumaa jaau bãaujimgui ajim. Magtarr aawai mʉch thãardamaucha Ẽwandam dau na nem ajapha waum khõsi waujuuta ẽkha chitaajemgui ajim, ich jãg pãrau aajemjo ĩchab.

⁴ Warran chadcha mua mʉg Jesús iek ʉkha wenʉrrʉm khʉʉn pʉr auwi dau aphʉʉ wawaag am ẽudee ẽkhaajeejim. Mag pʉr auwi, ʉʉin awiajã, bʉ̃ʉrjã dau aug khaugba cárcel deg dubpʉimaajeejimgui ajim, mʉchdeucha.

⁵ Mua maagjerr phadnaan porou khaphʉnaa ĩchab chi pornaan i khãai jua eegpaim khʉʉnaujã khaphʉ nʉmgui ajim, amach paarmua mʉrʉg ẽsap wau deejerr aawai. Biek ãb amachdeucha mʉrʉg ẽsap wau deejierramgui ajim, Damasco phobor ee maach khodnaan judionaan aar mag ẽsap dʉi mawi, Jesús iek ʉkha durrum khʉʉn pʉrkha authurwi, mʉig Jerusalén aipierrwai am gaai amachdeu ampierr aag.

Pabloou ichdeu Ẽwandam iek ʉkhatarr jaautarr

⁶ Pabloou mag ichdeupai ich jajawagmamua, —Mamʉ mag mʉchig ẽsap wau deebaawai ag dʉi mamta, ya Damasco dakha edausĩejo nʉm ee degolp pagthʉm daujo edjã eemua phʉr jẽer athamua

⁷ warre mʉ jẽkhʉt barwerppʉijimgui ajim. Mag jẽkhʉt chirʉmua ũurwai õor chukhu sim eemuata mʉ thʉ̃rcha thʉ̃rthʉ̃rnaa, “¿Khantheeta pua jãgcha jãg mʉ iek ʉkha durrum khʉʉn khaibag wawaag am ẽudee ẽkha nʉrrʉ́ma?” a sĩejim mʉrʉg.

⁸ Mʉchig magbaawai jũrr mua irig, “Señor, ¿ma pʉ khaíuma?” a chirajim. Magbaawai mag õor chukhu sĩerr eemua mʉrʉg, “Mʉʉn Jesús, Nazaretpierrau a sĩejim. Pua jãg mʉ khapeen ẽudee ẽkha nʉrrʉm aig, mʉ ẽudeeta ẽkha nʉrrabahab” ajim.

⁹ Magbaawai mʉ dʉi wenʉrrarr khʉʉn mag pagthʉm daujo pʉr jẽer atham oowia jãphierr nʉisijim. Mamʉ mag õor iekjo mʉrʉg iekhatarr chan pod amachdeu khaugbajierram, khan ata iekha sĩejim khai.

¹⁰ Magbaawai mua maach Por Jesuug, “Señor, ¿mua jãga aju aai chirʉ́?” a jeeujim, mʉchig mʉchdeu nem wauju jaaumkhĩir. Magbaa irua mʉrʉg, “Phiidʉwia warag pʉch maa arrag pet” ajim, “Damascoog. Jamta pʉchdeu nem wauju thum pʉrʉg khap jaaujugui” ajim mʉrʉg.

¹¹ Mag arar wʉʉ jẽer atharrau warre mʉ dau khaugba pʉabjerr aawai mʉ khapeenau sĩi mʉ jua gaai pʉrnaata Damascoog mʉ bãyeu arrjierramgui ajim Pabloou, ichpai jaaumamua.

¹² Magnaa, —Mag phobor ee sĩejimgui ajim, woun jooi ãb Ananías anʉm. Mag jooi Ẽwandam dau na agpierraanaa ĩchab Ẽwandamau Moiseeg ich iek phãpitarr gaai nem jaau sĩsidʉmjã ajapha ʉʉrkhaajerr aawai, judionaan thum mag Damasco phobor ee naajerr khʉʉnau i eugar ajapha ig iyʉʉ aajeejimgui ajim.

¹³ Mag jooirau mʉ jẽer chirʉm di aig mʉ oon beewi mʉ thʉ̃r thʉ̃rnaa mʉrʉg, “Ẽwandam gaaimua khodam, deeu dau wajapha eerdʉ chirsí” ajim. Mag chadcha irua magbarm bʉrre mʉ dau eerdʉbaadeewai mua i khĩir eerpa chirsijimgui ajim.

¹⁴ Mag iekhamamua mag jooirau mʉrʉg, “Maach jooin ag Ẽwandamauta pʉ jʉr athamgui ajim, ichdeu nem waupim khõsimta pʉrʉg khaphʉ apinaa, ĩchab ãb bʉ̃ʉrjã khaibag chukhu khitʉm pʉch daúacha oonaa pʉch jʉ̃gʉucha ich iekjã ũrmkhĩir.

¹⁵ Ya pua mag pʉch daúacha i oobaawai puata jũrr mʉg atagjã thumaam khʉʉnag i iek pʉchdeu ũrtarr jaaunaa ĩchab pʉch daúa ootarrjã jaau chitajugui” ajim.

¹⁶ Magnaa mʉrʉg, “¿Jãimua pʉ khani nʉ chirʉ́ma? ajim. Phiidʉwi, pʉch por choopibá. Magnaa Ẽwandamau pʉch khaibag chugpaamkhĩir Jesucristoog jeeubá” ajim ich jooi Ananiaau mʉrʉg.

Pabloou jãga maach Por Jesuu judionaan khabam ee ich pʉijĩ a jaautarr

¹⁷ ’Mag chadcha Ananiaau mʉchig jaautarrjo awi, mʉ deeu Jerusalenag mawia, Aai i jeeujem deg Ẽwandamag jeeu chirʉmta sĩi degolp mʉ dau eerthʉg athamjo abarm ee, Jesuuta mua oo athajimgui ajim Pabloou, ichpai jaaumamua.

¹⁸ Mag ich oopiwia mʉrʉg, “Mʉig Jerusalén chan par pua mʉ iek õrag jaauwiajã amau ʉkhabam. Mag khãai pʉchta jopkharraapai mʉg phobor eemua warag chawag petá” ajim.

¹⁹ Magbaawai mua irig, “Señor, thumaam khʉʉnau khakhapdo thʉnʉmgui” a chirajim, “mua Ẽwandam iek jaaujem dipierr mawia, pʉ iek ʉkha durrum khʉʉn pʉrkhawia, cárcel deg phãarnaa am wʉmaajerr. Maagjerr ãbmuajã meraa khaba simgui” a chirajim. “Mʉchdeucha amach mag waaujerrta mua amag pʉ iek jaauwai, ¿amau ʉkhabaju?

²⁰ Esteban khararr pʉ iek jaau khitʉm gaaimua thõo naawaijã dʉi aig chirarr aawai mʉch ipaarmua thõopi jaaunaa mag chi thõo narr khʉʉn khajũajã mʉchdeuta thʉa chirajim. Mʉ mag chitarrauta ĩs jũrr mʉch garmua amag pʉ iek jaauwai, ¿amau ʉkhabaju khai?” a chirajim irig mʉch garmua.

²¹ Magbaawai maach Por Jesuu deeu pʉaba mʉrʉg, “Petá; ichiita deeum durr durr warp mua pʉ pʉi chirʉmgui” ajim, “judionaan khabam khʉʉn ee.” Magta Pabloou ichdeu Jesús khaugtarrjã jaaujim judionaanag.

Cuartel ee peer Pablo wʉtarr

²² Warran mag iekhamam ʉu khĩu i iek ũr naajim. Mamʉ ãbmiecha irua mag iekhabapʉim ũrwia deeu sereu phobaadeeuta, “Jãg wounan warreta thõopʉiju aai sĩsim” khaphobaadejim.

²³ Mag serereukhamjã pʉam igba, warag khĩir machgau amach khajũa mor gaai jũa nʉmta thʉrreujujo, amachdeu wir aigpai eudʉdʉtkham dʉi jẽbpa thoinaa ʉ̃gthaag phopʉpʉi khaawai,

²⁴ chi comandanteeu warag Pablo cuartel ee ierrag arrpiwi wʉpi jaaujim. Pablo iek mag ich wʉbaadee, khan gaaimuata mag õor sereu thʉnʉmua i thõopi jaau nʉ a meerba jaaumkhĩir ajim aajem.

²⁵ Mamʉ mag ierr arrwi, i jua jʉ̃khanaa, ya ich wʉag abaawai, aig capitán sĩerrag ich Pabloou, —¿Pãrau sĩi ich jãg Romapien pãachdeu wʉm aig wʉju aai nʉwi ajim anʉm, khan gaaimuata mʉ mʉg wai nʉ a khap aagjã bʉ̃ʉrjã jeeu oojã jeeu ooba?

²⁶ Pabloou ichig magbaawai chi capitanau ag bʉrre mawia jũrr chi comandanteeg jaaujim anʉm: —Comandante, Pabloou ichdeu jaauwai i mag Romapierr anʉmta, ¿pua i wʉpi jaau chirʉ́?

²⁷ Magbaawai chi comandante Pablo aig beewi irig jeeumamua, —¿Chadcha pʉ Romapierrá? Pʉ Romapierr khai, mʉrʉg meerba jaaubá ajim anʉm. Magbaa jũrr ich Pabloou, —Mʉʉn chadcha Romapierrau perá ajim anʉm.

²⁸ Magbaa chi comandanteeu, —Mʉʉn Romapierr khaag phatkhon pom phagwiata Romapierr khajimgui ajim anʉm irig. Mamʉ jũrr Pabloou, —Mua chan phagjã phagba, sĩi mʉch dennaan Romapien arr aawaita mʉchjã Romapierrkha chirʉmgui ajim anaabá.

²⁹ Chi soldaaun mag i wʉju arr khʉʉnau mag ũrbaawai warre aigmua chawag ereubaadejim ajim. Mag nʉm dʉi ĩchab chi comandantejã ichpata jãphierrbaadejim anaabá, Pablo Romapierrkha simta ichdeu mag i jua jʉ̃khapinaa wʉpi jaautarr gaaimua jũrr ichta khaigba aju khĩirjuwi.

Pabloou judionaan chi pornaan na ich kõit iekhatarr

³⁰ Judionaanau Pablo dʉi mamagkham oowi chi comandanteeu khaphʉ am ig sĩejim aajem, khan gaaimuata amau i dʉi mag naajĩ. Mag, warag chi caden Pablo jua gayam ẽerpʉiwia chi phadnaan pornaan thum Asamblea eem khʉʉnpa ich aig thʉ̃rkhʉʉipʉijim aajem. Maimua ag noram ya chadcha thum ãba biirdʉ thʉnʉisiewai chi Pablo dawag aibeewi am na dʉnʉʉupi sĩujim aajem.