Hechos 21 - Wounaan Meu

Miletomua Pablo Jerusalenag matarr

¹ Mag Miletomua Efesopie jooin chi pornaan phepʉawia dojãrr paaukhabaadeeu sĩi marau khajappha dojãrr morrdam Cos anʉmʉg ereubaadejim. Maigmua ag noram sĩi ich maigpaimua thʉadʉ deeum phʉram Rodas a thʉ̃r sim gaai barwia, mammua jũrr dohieg phʉʉrpheeu, Pátara anʉm barjim.

² Mag phobor Pátara anʉm jerag barco ãb wejom marau ooimajim, Fenicia durr mam anʉm. Magbaawai marau ag ee waaidʉwia dojãrr paaukhabaadejim.

³ Mag wetumua khodjorroo awia dojãrr morr dʉrrcha sim Chipre anʉm dojãrrmua oo dichjim. Ma, maar juawe gar thʉbajim. Mag wetumua warag Siriaag wetjim. Mamʉ mag maar wetum barco eem nem ãaur Tiro phobor ee pʉaju atarr aawai mam dubimajim.

⁴ Mag phobor ee chi ʉkha durrum khʉʉn aar wetwi am dʉi maar siete días naaimajim. Ich maig mag chi ʉkha durrum khʉʉnag Ẽwandam Akharau jaaubaawai jũrr amachdeu Pabloog Jerusalenag mapiba jaaujim.

⁵ Mamʉ par mag mapiba jaau nʉm ãba, seman ãb dichdimam ee maar wetaagpajim. Mag maar wetum aadeewai Ẽwandam gaaimua maach khodkha nʉm khʉʉn thum amach ʉʉin dʉi amach chaainpa phobor igaau jer maar oopäain beejim. Maig jer mosjã ee pachewi, maach thum jĩepor phõbkhanaa, Ẽwandamag jeeujim.

⁶ Mag Ẽwandamag jeeuwia, thumaam khʉʉn dʉi agdaujo ayoo ayoo naawi, marau maach wetju barco ee waaidʉtkhabaadeewai amachjã ĩchab amach diig durr paaukhabaadejim.

⁷ Maimua ya ãbmiecha tag phũas jẽmerbaju athee, mag maach narr phobor Tiro anʉm aigmua jap ee paaukhawia, Tolemaidaag wetwi, barwi, aig chi ʉkha durrum khʉʉn dʉi saludaawia, warag am aig khãaim ãb enter kheujim.

⁸ Noram aigmua ereubaadeeu phobor Cesarea anʉm barwia woun jooi ãb maach peerdʉajem iek jaaumie Felipe anʉm di aar wetjim. Warr ich mag Felipe, iglesia eem chi pornaan juag oojem khʉʉn siete narr eem ajim.

⁹ Ich mag jooirau chaain ʉʉin appai chi daupeen jayap wai sĩejim, Ẽwandam i jaaumien.

¹⁰ Mag Felipe di aig maar khãaidam khapancha khaba nʉm ee, Judea durrmua woun ãb agjo Ẽwandam i jaaumie Agabo anʉm beejim.

¹¹ Mag beewia, maar dakhĩir Pablo ãi jʉ̃ajem auwia agua jũrr ich bʉ dʉi ich juapa jʉ̃pʉinaa, —Ẽwandam Akharau mʉrʉg jaauwai mʉgta jʉ̃ auju aajemgui ajim chamʉg ãi jʉ̃ajem pap, Jerusalén phobor ee judionaanau. Mag jʉ̃naa jũrr judionaan khaba, durr chaauram khʉʉnagta sĩi pʉr deeju aajemgui ajim Agaboou.

¹² Maach jʉ̃gʉucha mag ũrbaawai Cesareapien dʉimua marau Pabloog Jerusalenag mapiba jaau naajim.

¹³ Mamʉ mag mapimapha nʉm ee, jũrr ich Pabloou marag magjim: —¿Khantheeta jãg pãar dauhi paar thʉnarráma? Oob khĩirjumiet ajim. Pãar ich jãgta nʉmʉn magan mʉchpata okhĩirjuu apiju ẽkha nʉmgui ajim. Jerusalén pabaimaawai amau mag mʉ ibʉʉrwiajã, maach Por Jesús gaaimua khai, ideu mag sim. I gaaimuan mʉʉn magʉmjã aba thõju chirʉmgui ajim Pabloou.

¹⁴ Par mag jajaaukhamjã maach iek ʉkhaba abaawai warag ich magpai sĩuwia Ẽwandamagta marau, —Ẽwandam, pʉʉta maach Por aawai pʉchdeu khap irig nem jaaubá anaajim.

¹⁵ Magtarr khur khãaidam khapan khaba nʉm ee, marau maach nemdam khĩir khaugwia Jerusalenag durr paauhkhabaad.

¹⁶ Maar dʉi wetjim ãaur khʉʉn Cesareapien chi ʉkha durrarr khʉʉn. Makhʉʉnau woun ãb Chiprepierr Mnasón anʉm ag di aarta maar phebaadejim, Jerusalén phobor ee barwia ichdeu marag ich aig jẽermkhĩir di deeju a sĩerr aawai. Mag woun ag nawe maach Ẽwandam iek ʉkhawi sĩejim.

Pablo Jerusalén barwia Santiago oon matarr

¹⁷ Mag durr paaukhabaadewi ya Jerusalén paaukhabaimaawai, aig chi ʉkha durrarr khʉʉnau sĩi maar amach aig baarpi auwia thum onee nʉisijim.

¹⁸ Mag maach bartarr noram Pabloou maar ich dʉi phe arrjim Santiago oon. Mag Santiago di aig ĩchab iglesia eem chi pornaanjã narr aawai

¹⁹ Pabloou amag saludaawia okhar iyʉʉmamua amag jaaubaadejim, jãga judionaan khabam khʉʉn eejã Ẽwandamau irig ich iek jaaupinaa ĩchab nem khĩir pogkhe waupimaajeejĩ.

²⁰ Pabloou amachig mag ĩgkhamam ũrbaawai onee nʉm iekhau warag Ẽwandamagta, “Aay, ʉucha magbarm Ẽwandam” ajierram. Maimua jũrr amach garmua Pabloog, “Pʉde maar iek ũrbarí, marau pʉrʉg jaaukhim” awi, —Pua pʉchdeujã khaphʉ chirʉmgui ajierram, judionaan ee õor pooma thʉnʉm chi ʉkha nʉm khʉʉn, mamʉ thum mag thʉnʉm khʉʉn iek ichiita amau ich mag Moiseeu phã pʉatarr iek pʉaba ʉʉrkha wenʉrraju aai nʉm aajem.

²¹ Maimua amag jaauwai, mag judionaan thum amach durr chaaur jooba nʉm khʉʉnag pua Moiseeu iek phã pʉarr gaai nem jaau sĩsidʉmjã ʉʉrkhapiba jaaujem aajemgui ajierram. Mag nʉm dʉi ĩchab amag chaain meheudamjã thʉabichpiba jaaunaa warag maach jooin ijã isegpi jaaujem aajem.

²² Magnaa irig, ¿Jãgajuma maadeu ar chi mag khĩirju nʉm khʉʉnag, magʉm iek chad apim ugua? Amachdeu pʉ barbaichem a ũrbaawai, ichiita jerrba ãba biirdʉnaa amau pʉrʉg mag iek eudʉb khaba eudʉjugui ajierram.

²³ Chadcha pʉchta mag iekha chitʉm am ugua, jãg pua mʉgta abá, marau pʉrʉg khĩirjugdam deegpam: Mʉig õor jayap nʉmgui ajierram, Ẽwandam na ãba irigpai jewaag i athee sʉrkhaju a iekha nʉm khʉʉn.

²⁴ Jãg pʉ am dʉi Aai i jeeujem deg mawia am dʉi ãba pʉch khooipibá, Ẽwandam na wajapha chirsieg. Magnaa ĩchab pʉch por khõipibarm paarjã phagpʉinaa warm khʉʉn den paarjã phagbapʉi ajierram, am denjã agjo khõipʉimkhĩir. Õrau amach daúa pua magbarm oobaawai, jãgan seukhaawaita õrau pʉ eugar mag jaau naajim aju. Magbaawai ĩchab puajã amach denjo Moiseeu jaau pʉatarr ʉʉrkha sim ajugui ajierram chi Pabloog wawimamua.

²⁵ Magnaa, Ar judionaan khabam khʉʉn ĩchab maach Ẽwandam iek ʉkhatarr khʉʉnagjã ya marau ẽsap aaidʉpʉijimgui ajierram. Amag marau jaaupʉitarr gaai, õrau amach juau nem parhoobamta Ẽwandamkha waunaa agʉg jewaag nemchaain thõotarr modjã khopiba, nem thõowia ag bag den reyen wau sĩsidʉmjã khopiba, ni nem sĩi begone bag ãrba thõo sim modjã khopiba jaaupʉijim. Mag nʉm dʉi ĩchab dich õor khabam dʉi chan oob bʉ̃ʉrjã khapes apiba jaaupʉijimgui ajierram, Pabloog ĩgkhamamua.

Pablo Aai i jeeujem deg sim pʉr autarr

²⁶ Warm khʉʉnau ichig mag jaaubaa chadcha Pabloou makhʉʉn jayapam khʉʉn dʉi mawia, ag noram Ẽwandam na wajapha nʉisieg amach thum ãba amach khooipinaa, Aai i jeeujem deg dubjim, phadnaanag khan edta mag sʉrkha nʉm ober eebaadeewai ag paar nemchaaindam amach pipied khechju aai nʉ a jawaag.

²⁷ Mamʉ siete días mag sʉrkha naaju atarr aawai, ya sʉrkha oju dakpamam ee, judionaan Asia durrmua beetarr khʉʉnau Pablo Aai i jeeujem deg sim oophobaadejim. Mag amachdeu oo athaawai pʉrphobaadewi warag ähäakhamua sĩita õor phogueupʉijierram.

²⁸ Mag õor phogueupʉiwia warag, —¡Keena israelnaan, maar juag oobahuthʉ̃! aajeejim. Chamʉg wounauta durrpierr õor thumaam khʉʉnag maach jooin i isegpi jaaunaa, Moiseeu phã pʉatarr iekjã asekaspiba jaau nʉrranaa, ĩchab mʉg Aai i jeeujem di igwiajã khaigba iekha nʉrraba aajeeb ajierram. Mag nʉrrʉmua ĩs ag ee judionaan khabam khʉʉn dubju khaba aajemta warag ierr phe wai sĩewai mʉg diin ya khaigba sĩsimgui ajierram. Deeu wajaug paapʉibam aig chan pod ag ee Ẽwandamag jeeuju khaba simgui ajierram, ähäakhamua.

²⁹ Mag judionaan khabam khʉʉnpata Aai i jeeujem deg ierr thʉnʉnʉmkharran, amachdeu ich Pablo magju na woun Efesopierr Trófimo aajerr dʉi ãba nʉrrʉm ootarr aawaita mag edjã Pabloou mam ierr Aai i jeeujem deg ich dʉi wai simpii narr gaaimuata mamag khajierram.

³⁰ Mag ähäakham ũrbaawai sĩi õor pom khaphig bee thʉnʉisijim. Maimua khapanaam khʉʉnau Pablo pʉrphobaadewi, jũrram khʉʉnau dawag ethetherrg wai oberwi, ag bʉrre Aai i jeeujem den chi puertdi phãarkha sĩujim.

³¹ Mag dawag arrwi, khapanaam khʉʉnau aawai, ya Pablo thõopäaig ẽkha nʉm ee, Roma durram soldaaun pom thʉnarr eem chi comandanteeu ũr athajim, mag phobor eem õor thumta kaaijã ee thʉnʉm anʉm.

³² Magbaawai ag bʉrre capitannaan soldaaun dʉi thʉ̃rkha auwi mag am poposkham aar khaphig phobaadejim. Mag wetwi warm khʉʉnau mag comandante ich soldaaun dʉi pochag urum oo athaawai jũrram khʉʉnau Pablo photpʉpʉikharrjã tag dichbajierram.

³³ Mag barimawia, chi comandanteeu Pablo pʉr aupiwia, warre caden numiimua jʉ̃ sĩupijim. Maimua aig narr khʉʉnag, —¿Jã jamaam woun agá, maimua khani ichdeu jãg sĩejĩ? a jeeujim ajapha khap aag.

³⁴ Mamʉ mag sĩi irua khajapha jeeutarrta, deeu eeupemjo sereubaadewi sĩi ähäakhamua jũrr chikhaman ichaaur jaaupʉpʉi khaawai chi comandanteeu pod ʉkhajujã khaugba aadejim. Mag, sĩi warag ich soldaaunag chi Pablo cuartel ee arrpijim.

³⁵ Mag soldaaunau Pablo arrumua ya chi cuartel aiguim doig bʉkhʉrr pabaimaawai warag sĩi chaaijo jua ee jiir arrjierram, õrau amachig bãyeu aujujo aadep aawai.

³⁶ Mag thʉnʉmʉn am ẽudee serereug wetumua warreta Pablo thõopi jajaau aajeejim.

Pabloou ich kõitpai iekhatarr

³⁷ Mag arrumua ya ich cuartel ee wai dubaagpam oobaawai ich Pabloou mag soldaaun por chi comandanteeg griegonaan meúa jeeujim, jopcha i dʉi iyʉʉ aag. Chi comandanteeu ũurwai Pabloou ichig griegonaan meúata iekhabarm ũrbaawai irig, —Ãa, puan magan maar meujã iekhaajeebma ajim.

³⁸ ¿Pʉ Egiptopierr khabá, pua khabajĩ ar na biek ãb gobierno dʉi werbʉag chumanaan pom cuatro mil pʉch daumaai jʉr auwi õor barba aajem chʉʉi phe arrtarr? ajim irig.

³⁹ Magbaa Pabloou, —Mʉ chan Egiptopierr khabam. Mʉʉn judioougui ajim, Cilicia durr phobor Tarso aajem ee thaabatarr. Mʉ mag sĩi phobor parhoobam eemjã khabam. Mamʉ pua khõs akhiin, ideu mʉrʉg iekhapikham, mua õrag iekham khõsi chirʉmgui ajim.

⁴⁰ Mag chadcha chi comandanteeu Pabloog, “Pʉ iekhaju aai chirʉm” abaawai, Pabloou ajapha doig dag gaai dʉnʉʉunaa õor khĩupamkhĩir juau jaaubaawai, khĩu paaukhabaadee, jũrr hebreonaan meúa amag magjim: