Hechos 20 - Wounaan Meu

Pabloou Macedoniapien oothurwia Greciapienjã oothurtarr

¹ Maimua mag õor phogdʉwi sĩi kaaijã ee parhooba pos nʉrrjee thʉnaawia dichdimaawai Pabloou chi ʉkha durrarr khʉʉn thʉ̃rkha auwi am wawí wai sĩi ajim aajem. Mag am wawí wai sĩewi, ayoyoojii awi, deeum durr Macedonia anʉmʉg mawia,

² chi ʉkha durrum khʉʉn nʉnʉidʉmpierr Ẽwandam iek jaau phʉʉrdʉ nʉrrʉmua warag õor khĩir onee apiejeejim aajem. Mag nʉrrʉmua warag Greciaagjã mawia,

³ barwia, Greciapien ee ed thãrjup sĩejim aajem. Mag sĩi awia Grecia durrmua jũrr Siriaag maju awi barco nʉ sim ee ũrbaadejim aajem, judionaanau ich dakhãu wai nʉm. Mag sĩi ich baraata oo nʉm a ũrbaadeewai Siriaag maju arrjã maba, warag ich marr khʉd eepai ewag beewi, deeu Macedoniaag dichjim aajem.

⁴ Ya mag ich bʉpai ewag mam dʉi i daumaai õor wetjim aajem. Makhʉʉn ãb jooi Pirro iewaa Sópater anʉm ajim aajem, Bereapierr. Maimua dau numí Tesalónicapien ajim aajem, Aristarco Segundo dʉi. Maagwai dau ãb Derbepierr Gayo anʉm ajim aajem. Mag tag wetjim aajem Listrapierr Timoteo, maimua Asia durram khʉʉn agjo numí, Trófimo Tíquico dʉi.

⁵ Mamʉ makhʉʉn amach thum Pablo dʉi ãba mʉ chirarr phobor Filipos anʉm ee bardʉtkhachewi, jũrr maigmua amach ap ereubaadewia, Troas phobor maar nʉ naaimajim.

⁶ Magbaawai maachin okhar pan levadura chukhu wauwia khoojem ag phiesta dichtarr khurta Filipos phobor eemua wetjim ĩchab, dojãrr garmua barco ee. Mag wetwi, khodjorroo awia, cinco días naata mag maach na wettarr khʉʉn nʉm aar barimajim, Troas. Mag Troas phobor eejã maar siete días naaimajim.

Ãbmiecha Pabloou Troaspien oothurtarr

⁷ Domighed pan thorreuwi ãba khoju arr aawai maar ãba podpa nʉm aig Pabloou chi ʉkha durrum khʉʉn dʉi iyʉʉ simua amag Ẽwandam i jaau sĩejim. Mamʉ ich Pablo ag noram ãspaau maju arr aawai mag ijẽjẽbkhamua ya edacha pamaa ajim.

⁸ Maar thum ãba ʉ̃gthaagajãrcha õor podpaajem aar naajim. Maig lámpara khapan sĩi phuphup jiir ʉid thʉnaajim.

⁹ Mag edacha pamjã Pablo ijẽjẽbkham ee, ẽwan ãb Eutico anʉm ventan i gaai ʉ̃gthaa oo sĩejim. Mamʉ mag da oberba aawai ich oo sĩerr aigpai khãibaadewi, ʉ̃idʉau sĩi mam ʉ̃gthaa piso thãrjupam aarmua burrwi, warre chi meemta jiir aujierram.

¹⁰ Magbaawai Pablo ʉʉrbawia, mag chi meem ʉ̃r eeg thʉkhoonaa, warag o pʉr wai phiidʉnaa, chi aig narr khʉʉnag, —Oob jãphierrmiet, mʉg chaai meeba sĩebahab ajim.

¹¹ Maimua deeu ʉ̃gthaa amach narr aar mawia, Jesuu ich khapeenag thach khopi jaau pʉatarrjo, Pabloou pan thorreuwia, amach thumaa kho dichwia, ũmaai Ẽwandam iek amag jaaubaadejim. Mag jaau simua ich mag aardʉdʉkhamua ãspabaadeewai bʉ̃ʉrjã khãiba ich mag petajim.

¹² Mag i petaawai chi chaai burrwi meetarr ich Pabloou iiupi autarrjã meeba arrjo ich diig arrjierram. Pabloou amachig jaautarr ũrwi chaai chi meem iiupi autarrpa amach daúa oobaawai i ẽudee pawiajã ich mag onee nʉisijim.

Troasmua Miletoog biekkhatarr

¹³ Mamʉ mag i maju nawe maachta nacha jap ee paaukhajim, dojãrr garmua i na maag, mag wetwia phobor Aso anʉmta deeu maach ãba ooju a iekhatarr aawai. Maagwai ich, jũrr bʉʉu maju aadewi maar ẽudee beejim, bʉʉu.

¹⁴ Mag Aso bardʉtkhaimawia deeu i dʉi oowian chad maar ãba ãbam jap ee deeum phobor Mitilene anʉmʉg wetwi ich mag ãba barjim.

¹⁵ Mag barwi ag noram dojãrr phʉramdam Quío anʉm khĩirphee dichjim. Maimua ag noram deeum phʉramdam Samos anʉm gaai naaimajim. Mag Samos anʉm gaai khũchpai naawi dʉrbagkhaau deeu jẽb wapem gaaicha phobor Trogilio anʉm khãi eewia thʉgdʉtkhaaun chadau Mileto barjim.

¹⁶ Mag mʉg biekhau ich Pablo Efeso phoborjã maba arran, Asia durr makhiin da barbaju awiata mabajim, Jerusalén phobor ee jopkhaa barwia am phiesta Pentecostés kha nʉm ee dʉi sĩem khõchgau.

Pabloou Efeso iglesia eem chi pornaanag iekhatarr

¹⁷ Mag phobor Mileto anʉm ee barchewia sĩi Efeso iglesia eem jooin chi pornaanag iek jaaupʉijim, ich oon beemkhĩir.

¹⁸ Mag iek jaaupʉiwia chadcha bardʉtkhabaicheewai amag magjim: —Pãrau wajapha khaphʉ nʉmgui ajim, jãgata mʉ chitaajẽ pãar ee warrcha Asia ee mʉch pachetarr aigmua ĩs ewag pawiajã.

¹⁹ Ich mag bʉ̃ʉrjã mʉch thoba, maach Por Jesús athee sĩi dau aphʉʉ i chogkha chitʉmgui ajim. Mag phidkha chitʉmʉn, judionaanag maadeu Jesús iek jaau khitaawai ʉkhamaaugau dich dʉita khaigba aadep aawaijã, dich garmuan maadeu am dau aug khaugwi warag dauhi paraa khitaajemgui ajim.

²⁰ Mamʉ magʉm ãba, pãach ʉu wenʉrramkhĩir mua pãrag maach Ẽwandam iek jaaub khaba jaau chitajimgui ajim. Mua pãrag õor khapanag dakhĩirjã jaaunaa pãar di aarcha mawia pãach appai nʉm aigjã jaaujeejim.

²¹ Judionaanag jaaunaa maimua judionaan khabam khʉʉnagpa jaaujeejim, jãga amach khaibag thum ãsie ewag khĩirjuwia isegju aai nʉ, Ẽwandamau khõsi simjota wenʉrraag; magnaa jãga maach Por Jesucristo iekta ãba ogdʉba ʉkha wenʉrraju, magʉm thum mua jaaujeejimgui ajim.

²² Maimua ĩsjã ich Ẽwandam Akharauta mʉ pʉi sim aawai mʉ Jerusalenag ma chitʉmgui ajim, magʉm aar mʉch dau aphʉʉ ajujã khĩirjuba.

²³ Ẽwandam Akharau mʉchig jaaujeewai mua khaphʉ chirʉmgui ajim, amau mʉ dʉi amachdeu ampierr awi mʉ phãarju cárcel diin jam sĩsidʉm.

²⁴ Mamʉ mag mʉch dau aphʉʉ aju khaphʉ chirʉmjã magju khĩirjuwia gaai masi oo chirʉʉ aa khaugba chitʉm. Mʉ khĩirjugan ãba Ẽwandamau maach khõsi peerdʉ aaujem iek maach Por Jesuu mʉchig jaaupitarrta jaauju khĩirju chitʉmgui ajim.

²⁵ Mag jajawagmamua, —Pãach thumaam khʉʉnag khap amkhĩir ĩs mua warre pãrag jaaukhimgui ajim: Mua chadcha pãar ee ich mʉg Ẽwandam iek jaau phʉʉrdʉ chitʉmua pãrag jaaujeejim, Ẽwandamta pãach thãar ee athaawai ichta pãach Porkha sĩsimkhĩir. Mua mag pãrag jaau chitaajerr, ĩspai pãrau mʉ khĩir oowia ya tag pãrau mʉ oobamgui ajim.

²⁶ Mʉchdeu mag pãrag jaaujerr khaphʉ chiraawai ich agjo ĩsjã mua mag chirʉm. Mʉgnaa pãach meem ed Ẽwandamau pãach auba awiajã oob mʉ gaai thʉmiet ajim, pãachig bʉ̃ʉrjã jaaubajim awi.

²⁷ Ẽwandamau ichdeu õor peerdʉ aaujem iek mʉchig jaaupitarr thum bʉ̃ʉrjã meerba mua pãrag jaautarr aawai ya mʉ chan mʉg chirʉm aig bʉ̃ʉrjã iekkhõr chukhu chirʉmgui ajim, Ẽwandam dau na.

²⁸ Magua mua pãrag mag chirʉmgui ajim: Pãar ar chi ʉkha durrum khʉʉn porkha nʉm khʉʉn, pãach mor ʉʉrkhanaa ĩchab pãach khapeen chi ʉkha durrum khʉʉnjã wajapha thʉa wai nʉisit. Magaag magamkhĩirta Ẽwandam Akharau pãar jʉr aujimgui ajim, maach Por Jesuu ich bagau phag autarr khʉʉn ajapha thʉa wai wenʉrramkhĩir.

²⁹ ¿Khan jãgwia mua pãrag mag chirʉ́? Mua mag chirʉmʉn mʉgaugui ajim: Mʉ ẽudee amachdeupai amach igwia chi machnaan aajem khʉʉn pãar ee beeju. Makhʉʉnaun tigrieu ich aig nemchaain thʉ̃r aaujemjo sĩi chad khabam iekta chadam iekjo pãrag jaaubaicheewai pãar imeraa khũgur auwi warag pãar ee nem ãrchejugui ajim.

³⁰ Mag nʉm ee ĩchab pãach eepaim khʉʉnaujã sĩi seukha nem jaau nʉrrjee aphobaadeju, chadcha Ẽwandam iek chaarcha ʉkha durrum khʉʉn jũrr amach gar paa awaag.

³¹ Chadcha pãach magju mʉchdeu khaphʉ chiraawaita mua pãrag mag jaau chirʉmgui ajim, ag nawe khap amkhĩir. Khĩir khaphʉ nʉisit magʉm khʉʉn pãach ee beewaim athee. Año thãrjup sĩi edaram magwe gaai machgau dauhi paraa oo chirʉmua pãach wawiejerrta pãrau khĩir eyaa abat a wawimajim Pabloou.

³² Magnaa ĩchab, —Keena, ya mʉ tag pãar ee beebaju aawai ĩswe warre mua ich Ẽwandam jua eeta pãar thʉsĩe pʉagpamgui ajim, ichdeu maach khõsi peerdʉ aaujem iekta ogdʉba ʉkha wenʉrrʉmua ichta ãba chi jua thierr aawai ichdeuta warag pãar khĩirjug bãaupimamkhĩir. Ichdeuta mʉg atag paawai thum ich chaainkha wenʉrrarr khʉʉnag ãba ichdeu nem deeju a jaautarrjã deeb khaba deejugui ajim.

³³ Khaphʉ abat pãrau ĩchab: Mʉ chan mʉg chitʉm aig chikham phatkhondam wa khajũadam khãijã wajappha oowai, “¡Ih! jãgʉm thumta mʉ deneg pabaadekhiina” aba chitʉmgui ajim.

³⁴ Magju khãai mʉch juapadamauta phidkhawia, mʉchdeu nemdam ig chirʉm thum phe auwi, ĩchab mʉch khapeen mʉch dʉi wenʉrraajerr khʉʉnau nem ig nʉmjã mua mʉchdeu amag au deejeejimgui ajim.

³⁵ Mʉchjo mag phidkhamkhĩirta mʉch chitʉmpierr mua ich mag pãrag jaau chitaajem, mag phidkha nʉmua ĩchab dau aphʉʉ amachdeu nemdam ig nʉmjã pod auba durrum khʉʉn juag oo wenʉrramkhĩir. Pãade maach Por Jesuu iekhatarr khĩir eyaa abat ajim: Iin chadcha i iekhõoin “Dich garmua chikhamnag nemdam deewaita maach oneecha aajemgui ajim, chi au sim khãaijã.”

³⁶ Mag am wawí wai sĩewi iekha aaipabaadeewai jĩepor phõbkhanaa amach thumaam khʉʉn dʉi ãba Ẽwandamag jeeujim.

³⁷ Maimua mag Ẽwandamag jeeu aaipawi ya Pablo maagpabaadeewai, thumaam khʉʉn i athee dauhi paraa thʉnʉmua jũrram khʉʉnau i o phʉʉr jõinaa i khĩir ʉ̃ʉ ahau khajierram.

³⁸ Mag ich Pablooucha amag mag edpai amau i khĩir oowia tag oobaju a jaautarr aawai mag gaaimua okhĩirjuu aphobaadejim. Mag okhĩirjuu nʉm ãba, i dʉi wetwia khĩeb jer barco ee i oo deepʉithurjierram.