Hechos 19 - Wounaan Meu

Pablo Efeso phobor ee deeu beetarr

¹ Mag Apolos agtha Acaya durr Corinto phobor ee sim jaar, ich Pablojã durr Ẽwandam i jaau phʉʉrdʉ nʉrrawi beewi deeu Efeso phobor ee sĩeichejim aajem. Maig ĩchab naajim aajem, ãaur khʉʉn maach Por Jesús iek ʉkha nʉm khʉʉn. Mag am oobaawai iyʉʉmamua Pabloou amag,

² —¿Pãrau Jesús iek ʉkhaawai ĩchab ich Ẽwandam Akhaarjã aujierrá? a jeeujim anʉm. Magbaawai jũrr irig, —Ʉ̃hʉ̃, marau chan mag Ẽwandam Akhaar sim anʉmjã ũrba nʉmgui ajierram aajem.

³ Magbaa deeu ich Pablo garmua amag jeeumamua, —Magan ¿jãga awiata pãrau pãach por choopijimma? ajim anʉm. Magbaa jũrr amachdeu, —Juanau jaau nʉrrarr ʉkhawiata maraun maach por choopijimgui ajierram anʉm irig.

⁴ Magbaawaita Pabloou amag magjim anʉm: —Juanaun chadcha õrau amach khaibag isegwi Ẽwandamag chugpaapi jeeubaawaita am por choopʉimaajeejimgui ajim anʉm. Mag por choo nʉisib mamʉ, amau ĩchab i ẽudee ãb i khãaijã ʉ̃rpai sim urum iekta ʉkhaju aai nʉmgui aajeejim anaabá, ajapcharan Jesucristo igwiama.

⁵ Pabloou amachig mag ajapha jaaubaawai, ya ag nawe maach Por Jesús iek ʉkha narr aawai, sĩi i thʉ̃r gaaipai amach por choopijierram aajem.

⁶ Maimua am por ʉ̃r Pabloou jua ausĩubaawai, chadcha Ẽwandam Akhaar am gaai phẽs aicheewai, sĩi amach meu khaba, deeum meuta iekha phobaadejim anaabá. Mag thʉnʉʉ awi Ẽwandam iek ich mag parhooba jaau nʉisijim aajem.

⁷ Am iek mag Jesús thʉ̃r gaai por choopitarr khʉʉn thum emkhooin apha docejo naajim aajem, chi khapanag.

⁸ Mag Efeso phobor ee simua ed thãrjup ich mag judionaan Ẽwandam iek jaaujem deg maajeejim aajem, maach peerdʉajem iek jawaag. Mag bʉ̃ʉrjã ogkhaba jaau simua Jesuuta ich Ẽwandamau pʉitarr aawai i iekta ʉkhapi auju ẽkhaajeejim anaabá, ʉu amach peerdʉmkhĩir.

⁹ Mamʉ ãaur khʉʉn amach jʉ̃g khĩchag gaaimua ʉkhamaaugau, Cristo iek igwia ag eugar warag woun eugarmjo khaigba iekhaajeejim anʉm. Mag nʉʉ paawai Pabloou ichta warag am aigmua mawia, chi ʉkha durrarr khʉʉn ich dʉi phe arrwi, jũrr woun ãb Tirano aajerr ag degta ed eepierr amag jaau sĩeimajim aajem.

¹⁰ Ich mag jaau simua año numí sĩsijim aajem, Efeso phobor ee. Maguata thum judionaan maimua judionaan khabam khʉʉnpa Asia durr joobaajerr khʉʉnau maach Por Jesuu õor peerdʉ aaujem iek Pabloou jaau sim ũrjierram aajem.

¹¹ Maagwai Ẽwandamau ich iiuta magpi sĩewai Pabloog ich jua theeg deewi Pabloou õor ee nem khĩir pogkhe õrau ag na mag nem ooba aajempa wau nʉrrajim aajem ĩchab.

¹² Mag õor monawaag nem jua theeg sĩewai sĩi i khĩir jãarjem wa irua khajũa jũajem khãijã chi aaunaan aar arrwia, ag ʉ̃r ausĩubarmuapai kha machag chugpaanaa ĩchab mor ee ben khaigbam wai sĩsidʉmjã chadcha obeerpʉi maajeejim aajem.

¹³ Mamʉ ĩchab naajim anaabá, ãaur khʉʉn judionaan, sĩi parhooba wenʉrrʉmua õor mor ee ben khaigbam sĩsidʉm jʉr weerpjerr khʉʉn. Makhʉʉnau ĩchab Pablo denjo maach Por Jesús thʉ̃r thʉ̃rnaa õor mor eem ben khaigbam jʉrwerpju awi chi beneg, “Pabloou jaau nʉrraajem ag Jesús iekhau jãg woun mor eemua oberbaadet” aajeejim anʉm.

¹⁴ Chi mag wenʉrrarr khʉʉn ãbam khodpai siete naajim aajem. Makhʉʉn judío ãb phadnaan por Esceva anʉm ag chaain ajim aajem.

¹⁵ Mamʉ amach mag wenʉrraajerr aawai, biek ãb amach ipierraa ajupii awi mag iekhabaawai, chi mepeer woun mor ee sĩerrau jũrr amag, —Mua khaphʉ chirʉmgui ajim anʉm, khai agá Jesús, maimua khai agá Pablo. Jãkhʉʉnan chadcha nem jua theeg nʉm. Mamʉ pãrau chan oob mʉrʉg magmiet ajim anʉm.

¹⁶ Magwi chi woun mag ich mor ee ben khaigbam wai sĩerrau warag amag audimawi warag am dʉi jãaubaadejim anaabá. Mag jãaubaadewi, mag mepeer dʉi simua aawai, nem juapa theeg mag siete narrjã ich jua jʉmpiba amach gaai mas deebaadee, ogkhawi, warag amachta ag di aigmua khaphig phobaadejim aajem, sĩi kha pepethor ich mag khajũajã chukhu.

¹⁷ Mag ed magtarr õor thum judionaan khabam khʉʉnaupa Efeso phobor ee khakhapdo thʉnʉisiewai thãar paraa nʉm iekhau warag maach Por Jesús igwia i jua theegta tho iekhaajeejim aajem, õrau.

¹⁸ Magbaawai ĩchab khapan ag nawe Ẽwandam iek ʉkhawia narr khʉʉnjã beemawi ag na amachdeu nem khaigba waaujerrjã thumaam khʉʉn dakhĩir meerba jaaumaajeejim anaabá.

¹⁹ Mag nʉm dʉi ĩchab amachdeu Ẽwandam iek ʉkhaju nawe parhoobam iek ẽsap gayam khaugwia agʉmua benkhʉʉnkha sĩsid arr khʉʉnaujã magʉm ẽsap thum phe aibeewi, thumaam khʉʉn dakhĩir orpʉimajierram aajem. Mag ẽsap pom ordubtarr gaai phatkhon werbatarr khap aag awi, khĩirjunaa phã oowai, phatkhon pom cincuenta miljo oberjim aajem.

²⁰ Magʉm gaaimua Ẽwandamau ich jua theeg oopibaawai, õor pom maach Por Jesucristo iekta ʉkhamaawai, warag aaidʉa khaphí aaidʉmajim aajem ĩchab.

²¹ Magtarr khur sĩi awia Pablo Macedonia durram khʉʉn oon mawi ich mampaimua jũrr Acayapien oonjã dʉrbaju khĩirjubaadejim aajem. Mag ich phʉʉrdʉ nʉrraju khĩirju auwia ich odegpai, “Nacha jãg durr numí phʉʉrdʉpʉiwiata Jerusalenjã barthurwia jũrr Romapienjã oon majugui” ajim anʉm.

²² Mag chadcha ich Macedoniaag maju nawe ich na õor numí pʉijim aajem, ich juag oojem khʉʉn. Makhʉʉn, dau ãb Timoteo, maagwai ãbkhai Erasto ajim aajem. Makhʉʉn amach appai pʉiwi ichin khãai khapanaa Asia durr sĩsijim aajem.

Efeso phobor ee sĩi õor phogdʉ nʉrrjee thʉnarr

²³ Mag Pablo maju aadewi ich na õor pʉi nʉm jaar, Efeso phobor ee sĩi õor pom phogdʉwi meeukha nʉrrjee aphobaadejim anaabá, Pabloou Ẽwandam iek jaau nʉrrʉm aaidʉa khaphí aaidʉmam gaaimua.

²⁴ Mag kaaijã ee õor pos nʉrrjee thʉnarr mʉgta ajim aajem: Woun ãb sĩejim aajem, Demetrio anʉm. Mag wounau amach ẽwandam ʉʉi Diana anʉmʉg jeeujem di oowi agjoo daii phatkhon den waaujeejim anaabá. Maata i phidag ajim aajem Ich khapeen dʉimua mag waukhanaa per simua phatkhon at aba amachpierr aaujeejim aajem.

²⁵ Biek ãb chi Demetrioou ich dʉi phidkhaajem khʉʉn maimua deeum khʉʉn agjo ich agjom phidag gaai naajem khʉʉnpa ãbam aig thʉ̃rkhanaa amag, —Keena, pãrau khaphʉ nʉmgui ajim anʉm, maachin ãba mʉg phatkhon den didamkha wau nʉmuata phatkhon khĩirjo oojem.

²⁶ Mamʉ mag nʉm ee pãrau pãach daúa oonaa pãach kachiujã ũurjeewai pãrau khaphʉ nʉmgui ajim anʉm, Pabloou iekha nʉrrʉm. I iek mag “Õrau juau nem wautarr chan ẽwandam khabam” anʉm. Mag jaau nʉrraawai õor pom chadcha i igar ʉkha thʉnʉmgui ajim anʉm. Mag ʉkha nʉm chan mag ich mʉig Efeso eepaijã khaba, sĩi mʉg Asia durr ee peer thumaam khʉʉnauta ʉkha wejom. Pãrau khaphʉ nʉmgui ajim anʉm, mag sĩi õrau irua jaau nʉrrʉm ʉkha nʉm gaaimuapaijã khabam.

²⁷ Mua oowain maadeu nem wau nʉm õrau tag auba aadeewaita sĩi maach khaibag waubarmjota ajugui ajim anʉm. Maig ¿jamaam phatkhon maadeu ooju? Mag nʉm dʉi ĩchab maach ẽwandam ʉʉi Dianaag jeeujem dijã õrau warramjo khõchkhaba aademua mʉg atag paawai warag thʉ̃rphoo khaba sĩsijugui ajim anʉm, mʉg Asia durr maimua durrpierram khʉʉnau irig jeeujerrjã tag jeeuba aphobaadeewai.

²⁸ Demetrio mag iekhabarm chi khapeenau ũrbaawai chadcha i igar nʉm iekhau warag meeukha sereu phobaadewi, “Maach Efesopien ẽwandam ʉʉi Dianaan ichta ãba ich mag ẽwandamkha sĩerraju; ijom chan tag chukhumgui” ajierram aajem.

²⁹ Mag serereukham gaaimua sĩi warag kaaijã ee õor phogdʉ nʉrrjee maadeujã khaugba joisijim anaabá. Mamagkham ee õor pochag beewi, Pablo khapeen numí Macedoniapien Gayo dʉi Aristarco anʉm pʉrphobaadewi, amach thumaam khʉʉn ãba biirdʉajem di aar ethetherrg arrwi wai dubphobaadejim aajem.

³⁰ Magbaawai Pabloou mag õor pos thʉnʉm aig beewi dubwi õrag iekham ig sĩejim aajem, mamʉ ãaur khʉʉn ĩchab Ẽwandam iek ʉkha nʉm khʉʉnau ʉdʉʉr irig beepibajierram aajem.

³¹ Mag nʉm ee ĩchab ãaur khʉʉn Asia durr chi thethemnaan ich Pablo khapkhʉʉnaujã am mamagkham aar irig mapiba jaaupʉijierram anaabá.

³² Mag i am aig beeg ẽkhakhakham ee, ierr am biirdʉ thʉnʉm aar õor serereukham iek chan sĩi maadeu khaugbata wejoojim aajem. Mag sĩi õor phogdʉ thʉnaawai, ãaur khʉʉnau serereukhamua khĩet jajaau khaawai, tagam khʉʉnau agjo khĩet serereu aajeejim anaabá. Mamʉ õor pom mag thʉnʉmua ãaur khʉʉnau chan amachdeu mamagkhamjã khaugba, khan atheeta beewi naajĩ bʉ̃ʉrjã khaugba nʉmta, dʉi mamag aajeejim anʉm.

³³ Mamʉ woun ãb Alejandro anʉm aig sĩerr aawai ãaur khʉʉn judionaanau maata jũrr ajués õor khapanag na eudʉ deethurjierram aajem, jũrr õrag wajapha jaaumkhĩir. Magbaawai Alejandroou judionaan kõit iekhaag ʉ̃gthaag jua ʉanaa juaupai jajaau khabaadejim aajem, õor khĩupamkhĩir.

³⁴ Mamʉ õor pom mag thʉnarrau ich Alejandrojã ĩchab judiokha simta mag iekhaagpam khaug athaawai deeu eeupemjo sereubaadewi, “Maar Efesopien ẽwandam ʉʉi Dianaan ichta ãba ich mag ẽwandamkha sĩerraju; ijom chan tag chukhumgui” aajeejim anʉm. Ich mag serereukhamua ora numijo naajim aajem.

³⁵ Mag nʉʉ paawai chi phobor eem secretarioou ʉu ẽkha sĩi awia, khĩupaa athawi amag, —Keena, Efesopien ajim anʉm, mʉg durr gaai thumaam khʉʉnau khakhapdo thʉnʉm, ãba mʉg phoborouta mʉg maach ẽwandam ʉʉi Diana di thʉanaa i khĩirkha wau sim ʉ̃gtharmua burrchetarrjã thʉa wai naajem.

³⁶ Mag maadeu i dipa thʉa wai naajem chadcha aawai ni ãbmuajã maach ijũrr “Jãan seukhaawaiu” aju khabamgui ajim anʉm. Mag maadeu thumaam khʉʉnau khaphʉ nʉmta, ¿khanthee pãar jãg nʉma? Pãachta warag khĩu nʉisit ajim anʉm. Nacha ajapha khĩirjunaa khaba chan oob jʉchag jãgmiet ajim aajem.

³⁷ Chamʉ khʉʉn wounaan pãrau mʉig waiberr khʉʉnau chan bʉ̃ʉrjã maach ẽwandam ʉʉi Diana igwia khaigba iekhaba, ni ag degam nemjã jĩgkhaba nʉm.

³⁸ Demetrioou ich khapeen dʉimua iwiir ãbam eugar khãijã thethemnaanag jaaum ig nʉm khai, warre am aarcha mawia amagta jaauju aai nʉmgui ajim anʉm, magʉm atheeta am naawai. Maiguin chadau agdaujo khĩircha jũrr chikham jaauju aai nʉmgui ajim aajem.

³⁹ Wa magba deeum iek khãijã pãrau am dʉi iekhaag wai nʉm khai, leíu jaau simjo chi thethemnaan dʉi ãba biirdʉnaata iekhaju aai nʉmgui ajim anʉm, chi secretarioou.

⁴⁰ Magba sĩi cha nʉmjo chan ʉu khaba simgui ajim aajem. Mʉgbarm gaaimua Romapienau khãijã jũrr maachig, “¿Khan gaaimua pãrau jãg õor meeukhapijĩ?” a jeeukhiin, ¿maadeu amag khan abarju? ajim anʉm. Pod maadeu amag “Chadcha magbarm gaaimua ajim” aju khaba nʉmgui ajim aajem, sĩi maach garmuata nacha juau ogthom am khujʉrbarmjo arr aawai.

⁴¹ Chi secretarioou õor pom thʉnʉmʉg mag iekhapʉiwia, thumaam khʉʉnag obeerpi jaaujim aajem.