Hechos 17 - Wounaan Meu

Tesalónica phobor ee õor phogdʉ nʉrrjee thʉnarr

¹ Mag Pablo Silas dʉi Filipos phobor eemua ereubaadeeu phobor Anfípolis anʉm dichwia, Poloniajã dichwi, deeum phobor Tesalónica anʉm barimajierram aajem. Mag phobor ee judionaan Ẽwandam iek jaaujem di sĩejim aajem ĩchab.

² Pabloou mag mawia, tagam eejã ich mag dub nʉrraajerrjo, jua ʉ̃ʉijem ed paawai mag eejã dubwia seman thãrjup ich mag aiguim khʉʉnag Ẽwandam iek jaaujeejim aajem. Mag jaaumamua Ẽwandam iek phã sim gaaim iek igwia amag,

³ —Jesús ich Ẽwandamaucha pʉitarr awiajã ichiita ich jãg dau aphʉʉ awi meeju aai sĩejimgui ajim anʉm. Magtarr Jesuuta mua pãrag jaau chirabahab ajim anʉm; ichta chadcha Cristoou, warrgarwe õrau nʉajerr.

⁴ Pabloou mag jaaumam ũrwia ãaur khʉʉnaun chadcha ʉkhawia warag am dʉi khapeerkha nʉisijim aajem. Mag chi ʉkhamarr khʉʉnan ʉ̃rcha griegonaan chi emkhooin ag nawe Ẽwandam na agpierraanaa irig jeeu durraajerr khʉʉn ajim aajem. Mag chi ʉkha nʉm khʉʉn ee ĩchab chi thethemnaan ʉʉinpa khapan thʉnaajim aajem.

⁵ Mamʉ mamagkham oowia judionaan chi ʉkhaba narr khʉʉnau warag iekkhõr wau nʉmua õor sĩi phidag chukhu kaaijã ee wenʉrrʉm khʉʉn chi khaibagnaan wawikha aujierram anaabá, makhʉʉn dʉimua warag õor meeukhapieg. Magnaa chadcha woun ãb Jasón anʉm di aar wetwia, Pablo Silas dʉi aig nʉmpii awia, jʉrphobaadejim anʉm, õor khapanaam khʉʉnag pʉr deeg.

⁶ Mamʉ amachdeu mag Jasón di aig ooimaba abaawai ich chi di khʉʉta tagam khʉʉn chi ʉkha durrarr khʉʉn dʉi ajués ethetherrg aubeejierram aajem, chi thethemnaan aig. Magnaa serereukhamua chi thethemnaanag, —Pabloouta Silas dʉimua durrpierr parhooba nem jaau wenʉrrʉm gaaimua, õor meeukhapiju ẽkha wenʉrrʉmgui ajim anʉm. Maagjemta ya mau maach ee paaukhabaicheewai,

⁷ Jasonau ich di aig jẽermkhĩir thʉ̃rphe auwia, warag amach thumaam khʉʉnau maach Emperadorrau jaau sim chaaur jaaunaa, i khõchkhaba, deeum rey Jesús anʉmta wai nʉm aajem a jaaujierram aajem seukha amach khĩirjug eepaimua.

⁸ Seukha mag jaau nʉm chi thethem khʉʉnau phoborpien dʉimua mag ũrphobaadeewai sĩi phobor thumta phogdʉ thʉnʉisijim anaabá.

⁹ Mamʉ magbaawai chi thethemnaanau chi Jasonag ich khapeen dʉi, —Pãrau marag phatkhonau phagmʉn, marau pãar obeerpʉijugui ajim anʉm. Maimua Pablo Silas dʉi mʉg phobor eemua ereubaadeewai deeu pãar phatkhon deejugui ajim anʉm. Magbaawai chadcha Jasonau ich khapeen dʉimua phagpʉijierram aajem. Mag phagbapäaiwai chadcha ʉdʉraa am wetpijim aajem.

Pablo Silas dʉi phobordam Berea anʉm ee

¹⁰ Mag am jʉrbaadeewai ich ag edwe edau kheubaadeewai tagam khʉʉn agjo Ẽwandam iek ʉkha narr khʉʉnau Pablo Silas dʉi deeum phobordam Berea anʉmʉg pʉijierram aajem. Mag amach pʉibaawai wetwi, barwia, amach wenʉrrʉmpierr aajerrjo judionaan Ẽwandam iek jaaujem deg dubjierram aajem.

¹¹ Am iek mag phobor eem khʉʉn Tesalónicapien khãyaujã nem ajaugnaa ibebsugjã sĩsid ajim aajem. Maiguim khʉʉnaun Ẽwandam iek amau jaau nʉmjã ʉkham khõsi ʉkhawia ed eepierr Ẽwandam iek chi phãm sĩsidʉm gaaijã jʉʉrjeejim aajem, Pabloou Silas dʉimua jaau nʉm chadcha khai a khap aag.

¹² Amach mag nʉm gaaimua õor khapaana Ẽwandam iek ʉkhajierram anaabá. Griegonaan chi thethemnaan ʉʉinaujã khapan ʉkha wejoowai ĩchab emkhooin chi ʉkha nʉm khʉʉnjã ikhotoo khábata thʉnaajim aajem.

¹³ Mamʉ mag Berea phobor eejã Pabloou ĩchab Ẽwandam iek jaau sim chi Tesalónicapienau ũr athaawai, aig beewia amach aar atarrjo õor wawibaicheewai, warag õor meeukhapijierram anaabá.

¹⁴ Mamʉ magbaawai ag bʉrre aiguim hermanonaanau chi Pablo phũasieg pʉijierram aajem, õor dʉi. Maagwai Silas Timoteo dʉi ich ag phobor eepai nʉisijim aajem.

¹⁵ Maimua chi Pablo phũasieg arrtarr khʉʉnau warag phobor Atenas anʉmʉg arrwi mam i deethurjierram aajem. Maimua deeu ich deethurtarr khʉʉn wedurum gaau ich Pabloou iek jaaupʉijim aajem, Silas Timoteo dʉi jopkhaa ich aar wetamkhĩir.

Pablo Atenas phobor ee

¹⁶ Mag Pablo Atenas barwia Silas Timoteo dʉi nʉbaadejim aajem, ya ichdeu ag nawe am aar iek jaaupʉiwi sĩerr aawai. Mamʉ chi Pablo onee khaba sĩejim anaabá, mag phobor eem khʉʉnau amach juau nem wautarr khapaana thʉnʉmʉgta Ẽwandamagamjo jeeu nʉm oowia.

¹⁷ Mag gaaimua judionaan Ẽwandam iek jaaujem deg mawia, chi judionaan dʉi griegonaanpa ag nawe Ẽwandamag jeeu durraajerr khʉʉnag jaaunaa, ĩchab plaza ee mawia ed eepierr ag ee narr khʉʉnagjã jaaujeejim aajem.

¹⁸ Magbaawai ãaur khʉʉn maestronaan Epicuro khĩirjug jaaujerr khʉʉnau deeum maestronaan estoico anʉm khʉʉn dʉimua i dʉi iyʉʉ aphobaadewi amach wir aigpai, —Mʉg woun nem ieknem chirʉmua maachig ¿khan iekta jaau simʉ mag sĩma? anaajim aajem. Maagwai ãaur khʉʉnau, —Mʉ da een deeum durram ẽwandamnaanta jaau nʉrrʉmjoo simgui aajeejim anʉm. Amau mag narran, amachdeu ũurwai, Pabloou am jʉ̃g daar maach peerdʉajem iek jaaumamua ʉ̃rcha “Jesús” anʉm igwi mʉg atag maach iiu phiidʉtkhajujã jaaumam ũrwiata mag naajim anaabá.

¹⁹ Mag nʉmua buchagdam Areópago anʉm gaai amach ãba biirdʉnaa iekhaajerr aar i arrwia irig, —Cha pua iek iiur jaau nʉrrʉm marau ũrm khõsi nʉm, ¿khan iek agá? ajierram anʉm.

²⁰ Maragan cha pua jaau sim thum iek iiuriu. Maguata marau ajapcha khap am ig nʉm, ¿magʉm khanim iekhauma? a jeeujierram aajem chi Pabloog.

²¹ Amau mag narran, amach thum Atenas phobor ee joobaajerr khʉʉn ar bʉ̃ʉrjã amachdeu ag na magʉm iek ũrba aajem eeu ũrphobaadeewai ãba mag iekpaita ihig aajerr aawaita irig mag jeeu naajim anaabá, khap aag.

²² Magbaawai Pabloou mag ãba biirdʉ thʉnʉm ee am khĩirphee dʉnʉisiwia, —Keena, Atenapien ajim anʉm. Mua oowai pãrau chadcha at aba pãach ẽwandamnaanag ajapha jeeu wenʉrrʉm oo chirʉmgui ajim anʉm.

²³ Mua mag chirʉmʉn, pãar Aai i jeeujem dipierr phʉʉrdʉ chitʉmua oowai, pãar ẽwandamnaan thum thʉ̃r paar sĩsidʉm ee ãb sĩi thʉ̃rjã chukhu khãidu par sim aigta sĩi “Ẽwandam õrau khaugba sĩerrʉm athee” a phã sim ootarr aawaiugui ajim anʉm. Jãg pãrau pãachdeu khaugbamʉg jeeu naabá, ich mapaita muajã pãrag jaau chitabahab ajim anʉm,

²⁴ ar mʉg durr thum ompaawia ag gaai nem thʉnʉm thum ompaatarr ag Ẽwandam. Ichpaita edjã ee nem thʉnʉm porkhanaa, ĩchab mʉg jẽb gaaim nemjã thum khap sĩerrabahab ajim anʉm. Mag Ẽwandam chan õrau ich athee a di eutarr eejã joobaba,

²⁵ ni õor juajã igba sĩerrʉmgui ajim anʉm, ichig sĩi nem wau dedee amkhĩir. Mag õor jua igju khãai, ichdeuta maach ʉu iiupi wai sĩenaa, cha maadeu phũdam ʉ̃ihʉ̃i nʉmjã deenaa, tagam nemjã thum deejemgui a iekhamajim aajem Pabloou.

²⁶ Mag jaaumamua ichdeupai Ẽwandam igwia, —Ichdeuta warrchajã woun ãb ompaa auwia mag gaaimua mʉg jẽb gaai durrpierr õor pom ĩiupʉijimgui ajim anʉm. Mag õor pom ompaaju nawe, ichdeun am thaabajujã khaphʉnaa am jooba wenʉrrajujã khaphʉ sĩejimgui ajim anʉm.

²⁷ Mag ichdeu õor ompaatarran, chi peerdʉm khõsi nʉm khʉʉnau dau khĩsumjo jʉrkha jʉrkha wenʉrrʉmua khãijã amach peerdʉ aupim khõsi ich jʉrmkhĩraugui ajim anʉm. Ĩchab maadeu khaphʉ nʉmgui ajim anʉm, ar mag i jʉr nʉm khʉʉnag chan Ẽwandam maach aigmua warp khaba sim.

²⁸ Mʉg nʉm aig maachin i jua eeta wenʉrrʉmjo nʉmgui ajim anʉm. I khurauta maachin ʉu iiu durrumgui anaa ĩchab, I khurau khaba akhiin, maach chan chukhu aajeekhamgui ajim anʉm. Ich jãg pãach eepaim khʉʉn iekhõoin, “Maachin Ẽwandam dʉi thʉ̃r ãba nʉmgui” ajim aajem.

²⁹ Am iekhõoin mag chadcha maach Ẽwandam dʉi khodkha nʉm khai, pod maadeu, “Ẽwandaman sĩi õrau amach khĩirjug eemua phĩr den phatkhon den wa mokdau den khãijã ompaa autarrau” a khĩirjuju khaba nʉmgui ajim anʉm.

³⁰ Warrgarin õrau mag amachdeu nem wau nʉmjã khaugbam gaaimuata mag nem parhooba waunaa agʉmʉg jeeuwaijã Ẽwandamau sĩi ãwaatjeejieb mamʉ, ĩs chan ya tag mag khabamgui ajim anʉm.

³¹ ¿Khan jãgwi mag ãba ichpaita igpi sĩ? Ichdeu maach chachju aawaima ajim anʉm. Mamʉ mag maach chachbarm ed õrau amachdeu nem waumaajerrpierr amach khĩircha khap jajaau amkhĩir, woun ãb Jesús anʉm ya jʉr wai simgui ajim anʉm, thumaam khʉʉnag, chijã khʉʉnta ich aar auju wa chijã khʉʉnta sĩi isegwi barkhʉʉiju khãijã ichdeuta khap jajaau amkhĩir. Mag ich Jesuu thumaam khʉʉn dʉi mamag aju maachig khap amkhĩirta, meetarrjã, meeba arrjo deeu ũmaai ich Jooirau i phiriu aujimgui a jaaumajim aajem ich Pabloou.

³² Mamʉ mag i meewia deeu iiu phiidʉjim a ũrbaawai, aig narr khʉʉnau jũrr ich Pablota wau iekha phobaadejim anaabá. Maagwai ãaur khʉʉnau irig, —Okharta marau deeu pʉ iek ũrjugui ajierram anʉm.

³³ Magbaawai ich Pablo khapanag ee ober dichwia petajim aajem.

³⁴ Mamʉ mag i oberbaadeewai ãaur khʉʉnau i dʉi wetwi, amachig ajapcha jaaupiwia ʉkhajierram aajem. Mag chi ʉkhatarr khʉʉn ee woun ãb sĩejim aajem, Dionisio a thʉ̃r sim. Mag woun mag Areopagonaan anʉm khʉʉn eem ajim aajem. Ʉʉijã ĩchab sĩejim aajem, Dámaris a thʉ̃r sim, maimua mag tag khapan thʉnaajim aajem, chi ʉkhatarr khʉʉn.