Hechos 15 - Wounaan Meu

Jerusalén phobor ee ãba biirdʉnaa iekhatarr

¹ Ich mag jaar ãaur khʉʉn Judeamua Antioquiaag beewi chi ʉkha durrum khʉʉnag, —Pãrauta warrgar Moiseeu iek phã pʉatarr gaai jaau simjo pãach meheu phʉʉrbichba nʉm chan pãar pod peerdʉbamgui aichejierram anʉm.

² Magbaawai Pabloou Bernabé dʉimua amau nem agcha khábata jaau nʉm ũrbaawai jũrr am dʉi chikham ipeer ahau khaphobaadejim aajem. Mamʉ mamagkhamjã warm khʉʉnau warag amau jaau nʉm ichaaur iekha narr aawai iglesia ee chi ʉkha durrarr khʉʉnau ich Pablota Bernabé dʉi jʉr aujierram aajem, Jerusalenag pʉyaag. Mag, chadcha am daumaai õor jʉr auwi pʉijierram aajem, mam pabaimaawai jũrr ich Jesuu jʉr autarr khʉʉn dʉicha iglesia eem jooinpa ãba ich ag iek wajapha iekhaag.

³ Mag chadcha Antioquía phobor ee chi ʉkha durrarr khʉʉnau amach pʉibapäaiwai ereubaadewi, Fenicia durr dichwia, Samaria durrjã dichjierram aajem. Mag wenʉrrʉmua amach wetumpierr õrag jaaujeejim aajem, jãga judionaan khabam khʉʉnaujã amach jooin warrgarm khʉʉn i isegwia khĩirjug iiurta aujierrá, Ẽwandam iek chaarcha ʉkhaag. Mag amau nem ĩgkhamam ũrwia thum chi ʉkha durrum khʉʉn onee durrajim aajem ĩchab.

⁴ Mag jajawag wetumua, Pablo Bernabé dʉi tagam khʉʉnpa Jerusalén barimaawai aram iglesia eem jooinau chi pornaan dʉimua Jesuu ich i jaaumkhĩir jʉr autarr khʉʉnaupa amag, —Keena, ʉuchata pãar beejierramgui ajim anʉm. Mag barwi di garm khʉʉnag jaauphobaadejim aajem, jãgata Ẽwandamau am dʉi aajeejĩ amau i iek jaau wenʉrraawai.

⁵ Mamʉ Pabloou Bernabé dʉimua mag jaau nʉm ũrwia ãaur khʉʉn Moiseeg Ẽwandamau ich iek phãpitarr ajapcha ʉʉrkhaajerr khʉʉnjã ya Jesús igar ʉkhawi aig narr aawai makhʉʉnau bʉjãau dʉnʉʉunaa, —Keena ajierram anʉm. Judionaan khabam khʉʉnjã Ẽwandam iek ʉkhatarr khʉʉnagan ichiita thumwe meheu phʉʉrbichkhapi jaaunaa ĩchab Moiseeu phã pʉarr gaai jaau sĩsidʉmjã thum waupi jaauju aai nʉmgui ajierram aajem.

⁶ Magbaa Jesuu ich i jaaumkhĩir jʉr autarr khʉʉn dʉi jooin chi pornaanpa ãba biirdʉjierram aajem, deeu ũmaai ag iek ajapcha iekhaag.

⁷ Maimua mag ijẽjẽb nʉʉ awia Pedroou bʉjãau dʉnʉʉunaa amag, —Khodamnaan, pãrau khaphʉ nʉmgui ajim anʉm, nawe ich Ẽwandamauta chadcha mʉ jʉr aujim, judionaan khabam khʉʉnagpa jãga Ẽwandamau maach peerdʉ aaujẽ a jaaubaawai ĩchab amaujã ʉkhamkhĩir.

⁸ Ich Ẽwandam thumaam khʉʉn khĩirjug khaphʉ sĩerrʉmuata ĩchab amagjã ich Akhaar deejimgui ajim anʉm, ich jãg maachig deetarrjo. Jãg sim aig irua amag, “Mua pãarjã ig chirʉm mʉch chaainkha awaag” a sim khabahab ajim anʉm.

⁹ Ẽwandamau oowai maach chan am dʉi bʉ̃ʉrjã khĩethuupaijã khaba nʉmgui ajim anʉm Pedroou. Maagwai maachdeu ʉkhatarr gaaimua maach khaibag chugpaatarrjo, am denjã ich agjo irua chugpaa simgui ajim anʉm, amaujã chadchata ʉkha naawai.

¹⁰ Mag simta, ¿khan jãgwi pãrau Ẽwandamau ichdeu khap nem wau sim khõchkhamaphamjo nʉ? ¿Khanthee pãrau athuucha amag maachdeujã podba ni maach jooinaujã podba arr nemta waupi jaaum ig nʉ? ajim anʉm Pedroou jũrr amach khĩircha.

¹¹ Mag khĩirjuju khãyau maadeu khaphʉ aju aai nʉmgui ajim anʉm: maach Por Jesuu ich jãg ich garmua maach khõchkhawi ʉu peerdʉ autarrjo, ich agjota amjã ichdeuta peerdʉ au sim khabahab ajim anʉm Pedroou, mag Moiseeu phã pʉarr iek thum chan judionaan khabam khʉʉnau ʉʉrkhaju aai khaba nʉm a khap amkhĩir.

¹² Magbaawai jũrr Bernabeeu Pablo dʉimua jaauphobaadejim aajem, jãga Ẽwandamau amagjã judionaan khabam khʉʉn eejã ag na õrau nem mag ooba aajempa waupimajĩ. Mag jaaumam ũrwia sĩi thumaam khʉʉnau khĩuu ũr nʉisijim aajem.

¹³ Mag am den ĩgkha opinaa Santiagoou jũrr, —Khodamnaan, mʉ iek ũrbat ajim anʉm.

¹⁴ Ya pãrau Simón Pedro iek ũrbarm, jãga Ẽwandamau ĩsta warrpem judionaan khabam khʉʉnjã khĩir jãsenkhawi ĩchab ich chaainkha athá.

¹⁵ Jãgbarm aigta chadcha mua oowai warrgar Ẽwandam i jaaumienau phã pʉatarr eyaa obebergmamgui ajim anʉm ich Santiagoou. Mag jaaumamua Ẽwandamau ich i jaaumienag phãpitarr iek jaaubaadejim aajem. Mag Ẽwandamau õrag jaautarr iek Santiagoou igmatarr mʉg ajim aajem:

¹⁶ “Mʉʉgwaiwe chan pãrau mʉrʉg jeeubata wenʉrrʉm. Mag gaaimua pãran sĩi di burrtarr ʉ̃r dikhierr appai jʉjʉrʉʉ thʉbatarrjota nʉm. Mamʉ mʉg atag deeu mʉch pierrwain chadau, ich ag dibʉʉupai deeu eu au nʉmjo, ũmaai pãar chaain ewagam khʉʉn khĩirjugjã deeu mʉchig phũrreu athaawai mʉrʉgta jeeu nʉisiju, warr jooi David khararr jaar aajerrjo.

¹⁷ Magbaawain chadau durrpierram khʉʉnau judionaan khabam khʉʉnaupa mʉ jʉrwi, amaujã ĩchab mʉʉta amach Porkha auju.

¹⁸ Muata mag iekha chirʉm, mʉch chi warrgarwe magʉm nem thum õrag khaphʉ apiejemua” ajim aajem, Santiagoou ich Ẽwandamau iekhatarr igwia. (Am. 9:11-12)

¹⁹ Mag jaauwi, ich Santiagooupai, —Magua mua oowai, ar judionaan khabam khʉʉnta amach jooin i pʉawia jũrr Ẽwandam iek ʉkhamam khʉʉnag chan pod maadeu amag maach jooinau nem jaaujerr thum athuucha jaauju khaba nʉmgui ajim aajem ich jooi Santiagoou.

²⁰ Magju khãai sĩi amag ajapha ẽsap phãnaa ag gaai jaaupʉijugui ajim anʉm, Ẽwandam na tag ʉdʉraa amach ãrpim ugua. Mag ẽsap gaai tag nem parhoobamta ẽwandamkha waunaa agʉg jewaag nemchaain khechnaa ag khĩirphee wai narr nemek modjã khopiba jaaupʉijugui ajim aajem. Nem thõowia ag bag den reyen wau sĩsidʉmjã khopiba, ni nem sĩi begone bag ãrba thõo sim modjã khopiba jaaupʉijugui ajim anʉm. Mag nʉm dʉi ĩchab dich õor khabam dʉijã bʉ̃ʉrjã khapes apiba jaaupʉijugui ajim aajem Santiagoou.

²¹ Maimua ichdeupai, ¿Jãgwi mua mag chirʉ́? ajim anʉm. Mua mag chirʉmʉn, maachjo judionaan khabamta maach meeun dʉi ãba jooba wenʉrraajeewaita mag chirʉmgui ajim anʉm. Pãrau khaphʉ nʉmgui ajim anʉm, mag Moiseeu Ẽwandam iek phã pʉatarr iek phoborpierr judionaan Ẽwandam iek jaaujem di nʉnʉidʉm ee sabarhedpierr õrag ũrmkhĩir thʉ̃ʉrjem. Magua ichiita mʉkhʉʉnta ʉ̃rpai amau ʉʉrkhaju aai nʉmgui ajim aajem Santiagoou.

Judionaan khabam khʉʉnag ẽsap gaai jaaupʉitarr

²² Magbaawai Jesuu ich i jaaumkhĩir jʉr autarr khʉʉnau jooin chi pornaan dʉimua thum chi ʉkha durrarr khʉʉnpa ãba biirdʉ iekhawi chadcha Santiagoou jaautarrjo ẽsap warre phã aujierram aajem. Mag phã auwia ĩchab mag chi porkha nʉm khʉʉn eem warre õor numí jʉr aujierram aajem, Pablo Bernabé dʉi wetuwe am dʉi ãba Antioquiaag pʉyaag. Makhʉʉn Silas ajim aajem, woun ãb Judas anʉm dʉi. Ich mag Judapai ibʉʉr wauwia Barsabás aajeejim aajem.

²³ Mag chi ẽsap makhʉʉn dʉi pʉiju gaai mʉg phã sĩejim aajem: “Khodamnaan, maar Jesuu ich i jaaumkhĩir jʉr autarr khʉʉnauta jooin chi pornaan dʉimua tagam khʉʉn chi ʉkha durrum khʉʉn dʉimua ãba marau pãrag salud deepʉi nʉm. Pãar judionaan khabahab mamʉ, Ẽwandam gaaimua maach khodnaan aawai, thum Antioquiapienag, Siriapienag maimua Ciliciapienagjã salud deepʉi nʉm.

²⁴ Khodamnaan, marau maumua ũurwai, mag mau maar eem wettarr khʉʉnauta sĩi amach khĩrau wetwia, mag meheu phʉʉrbichpi jaaunaa, ĩchab Moiseeu iek phã pʉatarr gaai jaau simpa thum waupi jajaaukham gaaimua ideu pãar khõinaa naapiba nʉm anʉm marau ũr nʉm.

²⁵ Mag ũrbaawaita marau thumaa ãba biirdʉwi, ajap iekhawi, õor numí jʉr aujim, Bernabé Pablo dʉi pãar aar wetuwe am dʉi ãba pʉyaag. Pãrau khaphʉ nʉm, maach khod jooin Bernabé Pablo dʉi maadeu daupii aajem,

²⁶ maach Por Jesucristo iek jaau nʉm gaaimua amach thõjujã khĩirjuba warag ogkhaba õor ee jaau wenʉrraajeewai.

²⁷ Achá marau pãar aar Judas dʉi Silas pʉi nʉm. Ẽsap gaai cha maachdeu phã deepʉi nʉmjo amaujã ich agjo pãrag jaauwimaju.

²⁸ Ich Ẽwandam Akharaucha marag jaauwai pod pãrag judionaanagamjo nem phithurm nem waupi jaauju khaba nʉm. Mag nʉm dʉi maachdeu khĩirjuawaijã ʉucha sim, chadcha ichdeu jaau simpierrpai nem jawaag. Mag pãrag jaaupʉim ig nʉmʉn mʉgau:

²⁹ Par Ẽwandam chaar khabamʉg jewaag wai narr nemek mod oob khomiet. Nem thõowia ag bag den reyen wau sĩsidʉmjã khoba, ni nem sĩi begone bag ãrba thõo sim modjã oob khomiet. Mag nʉm dʉi ĩchab dich õor khabam dʉi chan oob bʉ̃ʉrjã khapes amiet. Cha marau jaaupʉi nʉmta chadcha pãrau mag sʉrkha nʉmʉn, magan pãar ʉu wenʉrrʉm. Ma ajim marau pãrag jaaum ig narr. Ayoo Keena” a phã sĩejim aajem, chi ẽsap gaai.

³⁰ Mag chadcha mag ẽsap dʉi amach pʉibapäaiwai ereuwi, Antioquía barwia, aig chi ʉkha durrarr khʉʉn thum ãba biirdʉnaa, mag ẽsap deejierram aajem.

³¹ Magbaawai ãbmua ẽreu auwia thʉ̃rbaadeewai onee aphobaadejim aajem, mag ẽsap gaai amach khĩir jãsenkha wawí nʉm ũrwia.

³² Mag nʉm dʉi ĩchab Judas Silas dʉi amach numwe Ẽwandam i jaaumien arr aawai warag amach ipaarmua am khĩir jãsenkha iekhamamua wawí wai nʉʉ ajim aajem ĩchab.

³³ Maimua warag am dʉi khãai khapanaa naawia deeu wetju aphobaadeewai aiguim khʉʉn chi ʉkha durrarr khʉʉnau am kõit Ẽwandamag jeeu nʉʉ ajierram aajem, ʉu chig aba deeu amach chogpʉitarr khʉʉn aar barmkhĩir. Mag oraawia am pʉijierram aajem. [

³⁴ Mamʉ chi Silas chan maba, aigpai sĩsijim aajem.]

³⁵ Maagwai Pablo Bernabé dʉi chi Antioquía phobor eepai nʉisiwi khapanaam khʉʉn dʉimua warag maach Por Jesucristo iek jaau nʉisijim aajem.

Pablo Bernabé kha ogdʉpʉiwi jũrr Silas dʉi biekkhatarr

³⁶ Mag Antioquía thʉbagkhawi agtha nʉʉcha khaba nʉm ee, Pabloou Bernabeeg, —Kake, magan maachdeu maach Por Jesús iek jaau wenʉrraajerrpierr ũmaai deeu oo phʉʉrdʉmierraugui ajim anʉm, phoborpierr, am maach ẽudee pawiajã jãgata nʉ a khap aag.

³⁷ Magbaawai Bernabeeu ʉkhawi chadcha wetju aphobaadejim aajem. Bernabeeu amach daumaai Juan am den ibʉʉr wauwi Marcos a thʉ̃ʉrjerr arram ig sĩejim aajem.

³⁸ Mamʉ Pabloou oowai irig mag ʉu khaba sĩejim aajem, napem biekhaujã am dʉi ãba mawi, Panfiliapai udthurwi, tagjã am juag ooba deeu Jerusalenag marr aawai.

³⁹ Mag, Juan Marcos gaaimua jũrr chikham ipeer ahaujii awi warag mag nʉm khãyau magan dich khĩkhĩetdo aaidʉjugui aphobaadejim aajem. Mag chadcha Bernabeeu ich daumaai Marcos jʉr auwi dojãrr phʉram Chipre anʉmʉg ag dʉi igbaadejim aajem.

⁴⁰ Magbaawai jũrr Pabloou Silas thʉ̃rpʉiwi ich khapeerkha athajim aajem, ag dʉi biekkhaag. Magbaawai chi ʉkha durrum khʉʉnau Ẽwandamag am thʉapaar wai nʉrramkhĩir, am kõit jeeu nʉʉ awi pʉijierram aajem.

⁴¹ Mag wetumua Siria durr dichwia deeum durr Cilicia anʉmjã dichjierram aajem, iglesiapierr mag jaau wenʉrrʉmua warag chi ʉkha durrum khʉʉndam khĩir onee apiewai.