Hechos 14 - Wounaan Meu

Pablo Bernabé dʉi Iconio ee

¹ Mag phobor Iconio anʉm ee naaimawia Pablo Bernabé dʉi amach numwe ãba dubjierram aajem, judionaan Ẽwandam iek jaaujem deg. Mag dubwi maach Por iek iek khẽgkha jaauphobaadeewai judionaan pom griegonaan dʉimua Ẽwandam iek ʉkhajierram aajem.

² Mamʉ ãaur judionaan chi ʉkhaba narr khʉʉnau jũrr judionaan khabam khʉʉn wawí phobaadejim anʉm, tag am iek ʉkhaba warag amach ipierrta am eugar khaigba iekhamkhĩir.

³ Mag gaaimua mag amachdeu jaau nʉmjã ʉkhamapha aawai warag ajapcha amag jawaag awi aigmua da wetbajierram aajem. Chi Pabloou Bernabé dʉimua maach Por amach dʉi sim khaphʉ narr aawai warag thãar phĩiuwi ogkhaba õrag jaaumajierram aajem, jãga Ẽwandamau amjã khõsi sĩerrʉ́. Maagwai amau jaau wenʉrrʉm õrau seukhaawai am ugua, am iek ich Jooiraujã ich jua theeg amag deejim aajem, ag na õrau ooba aajem nempa maach dauderraa am dakhĩir waumamkhĩir.

⁴ Maagwai chi phoborpien ãaur khʉʉn judionaan igar thʉnaawai tagam khʉʉn jũrr Jesuu ich i jaaumkhĩir jʉr autarr khʉʉn igar naajeejim aajem.

⁵ Mamʉ judionaanau amach pornaan dʉimua ãaur khʉʉn judionaan khabam khʉʉnpa beewi, mokou bar wai nʉmua amach thõopäain wedurum a ũrbaawai

⁶ deeum durr Licaonia anʉmʉg dʉr wetjierram aajem, chi Pablo Bernabé dʉi. Mag wetwi phobor Listra anʉm ee naawi ereubaadeeu jũrr agjo phobor Derbe anʉm ee naaimajim aajem.

⁷ Mag wenʉrrʉmua ag bigaau phobordam nʉnʉidʉm ee amach barmampierr jãga Ẽwandamau maach peerdʉajẽ a jaaumajierram aajem.

Pablo mokou bar wai nʉmua peer thõotarr

⁸ Mag Listra phobor ee woun ãb bʉ ãkhãraa khitʉm sĩejim aajem. Mag woun ich bi eewe bʉ ãkhãraa thaabawi sĩi jup kheraajeejim aajem, pod dʉrdʉr aju khaba aawai.

⁹ Ich mag wounau Pablo ijẽjẽbkhamʉg bʉ̃ʉrjã dau thõba ũr oo sĩejim aajem. Pabloou mag khitʉmʉg oowai, ich odegpain “Magʉm Ẽwandamaun chadcha mʉ monaaupʉiju aai sim” a simjoo oobaawai, irig eerpanaa khĩesir,

¹⁰ —Phiidʉwia bʉ ubʉ dʉnʉisí ajim anʉm. Magbaawai chadcha phuddʉ dʉnʉisiwia warag dʉr nʉnʉʉu khabaadejim aajem.

¹¹ Õor aig narr khʉʉnau Pabloou magbarm oobaawai sereubaadewi Licaoniapien meúata, —Keena, jãkhʉʉnan ẽwandamnaanta õor khĩir thegwia maach ee naaichemgui ajierram anʉm jũrr amach khapeenag.

¹² Mag amach ẽwandam anʉmua, Bernabé Zeus gaai thʉ̃rnaa Pablo jũrr Ermes gaai thʉ̃r wai naajim aajem, ichta ʉ̃rcha ijẽjẽb khaajerr aawai.

¹³ Mag phobor ee dub nʉm aigcha am ẽwandam mag Zeus anʉmʉg jeeujem di dʉnaajim aajem. Magphobaadee ag eem phadeu phak emkhooinpa pamaar den porsirkha sĩsidʉm puertdi aig phebeewi phaamamua amagta Ẽwandamagamjo jewam ig sĩejim aajem, õor khapan thʉnʉwe am dʉi ãba.

¹⁴ Pabloou Bernabé dʉimua ũurwai phadeu mag amach eugar mamagkham ũrbaawai gaai machgau amach khajũa mor gayam thʉrreunaa õor ee ähäag khaphig wetumua,

¹⁵ —Keena, ¿khantheeta pãrau maar dʉi jãg nʉma? ajierram anʉm. Maach wounaan ãba thʉnaabahab; maar chan Ẽwandam khabam. Maraun sĩita jãg ẽwandam anʉmjã maadeu nem igab simʉg jeeuju khãyau, maach Ẽwandam chaar ʉ̃gthar simʉg jeeumkhĩirta pãrag marau jaau wenʉrrabahab ajierram anʉm, ichdeuta mʉg edaujã wauwia, mʉg jẽbjã wauwia, phũas dʉi ag ee nem thʉnʉmpa thum ãba wautarr aawai.

¹⁶ Warrgarin chadcha thumaam khʉʉnau amachdeu nem khõsimʉg jeeu nʉmjã Ẽwandamau magʉm aba aajeejimgui ajim anʉm, amau wajappai ich khaugba narr aawai.

¹⁷ Mamʉ magʉm ãba, õrau ichigcha jeeumkhĩirjo, ich jua oopiejeejimgui ajim anʉm, am eeg oo simua. Mag, ichdeuta maach onee wenʉrramkhĩir, maach athee nosegjã chepinaa maach nemjĩirjã ajapha obeerpi nʉm dʉi ĩchab maachig thach khojujã ed eepierr deejemgui a jaaumajierram aajem amach numiim khʉʉnau, jũrr jaaupʉpʉigmamua.

¹⁸ Pabloou Bernabé dʉimua par mag jaau durrajieb mamʉ, ichiita thethe deejierram aajem, mag phak khechnaa phaa nʉmua amachig Ẽwandamagamjo jeeum ig narr jeeupiba aag.

¹⁹ Mamʉ amau mag nʉm ãba, judionaan beejierram aajem, Antioquiamua Iconiomuajã agjo. Mag beewi õor wawí phobaadee, amachig paa auwi, Pablo mokou barphobaadejim anaabá. Mag jũrram khʉʉnau bar wai nʉʉ awia chi meemjo aadee, meebaadempii awia phobor igaau eudʉ deethurjierram aajem.

²⁰ Mam mag eudʉ deebathuurwai, tagam khʉʉn agjo Jesús iek ʉkha narr khʉʉnau beewi ich ʉ̃r pos aicheewai, phiidʉbaadewi deeu phobor ee sĩeichejim anʉm, ich Pablo. Maimua ag noram Derbeeg petajim aajem, Bernabé dʉi.

²¹ Mag phobor Derbe anʉm ee maach peerdʉajem iek jaau wenʉrrʉmua õor pom Ẽwandam igar ʉkhapiwia deeu amach bʉ eepai ewag Listraag beejierram aajem: mag Listramua, Iconioog; mag Iconiomua, jũrr Antioquiaag.

²² Makhʉʉn phobordam ee chi ʉkha durrum khʉʉn khĩir onee apieg, am oo phʉʉrdʉ wenʉrrʉmua amachdeu maach Por iek ʉkhatarr iekta warag ogdʉba ʉkhapi jaaujeejim aajem amag. Mag nʉm dʉi ĩchab, “Ẽwandam sim aar mawia, i dʉi ich mag wenʉrraagan, ichiita ich jãg i gaaimua maach dau aphʉʉ wenʉrrajugui” aajeejim aajem.

²³ Mag wenʉrrʉmua ĩchab iglesiapierr jooin jʉr aumaajeejim aajem, makhʉʉnta chi porkhamkhĩir. Magnaa thach khoba sʉrkha nʉmua oraawia maach Por Jesuugta amach nʉnʉidʉmpierr thʉapaar amkhĩir irigta jaaujeejim aajem, amachdeujã i iekta ʉkha narr aawai.

Pablo Bernabé dʉi deeu Siria durram phobor Antioquía anʉmʉg beetarr

²⁴ Maimua Pisidia durr dichwia jũrr deeum durr Panfilia anʉm barjierram aajem, Pablo Bernabé dʉi.

^25-26 Maig phobor Perge anʉm ee Ẽwandam iek jaau naawia, jũrr Ataliaag wetwi, amachig phidag jaautarr thum wau aaipabaadee, ich aarpaimua jap ee paaukhawia, deeu Antioquiaag beejierram aajem, warrjã mag phobor eemuata chi ʉkha durrum khʉʉn pornaanau am pʉitarr aawai. Mag Antioquía phobor eemua ajim aajem, warrjã am pʉyaagpaawai Ẽwandam iek ogkhaba jaau wenʉrramkhĩir am ʉ̃r jua ausĩunaa am kõit irig jeeu nʉʉ awi pʉitarr.

²⁷ Mag beewi, chadcha deeu Antioquía barchewia, chi ʉkha durrarr khʉʉn thum ãbam aig biirdʉnaa, amag jaauphobaadejim aajem, jãga Ẽwandamau am dʉi ajĩ, maimua jãga maach Por Jesuu judionaan khabam khʉʉnagjã ĩchab ich iek ʉkham khõsi ʉkhapijĩ, amachpa peerdʉmamkhĩir.

²⁸ Maimua Pablo Bernabé dʉi warag aigmua da wetba, chi ʉkha durrum khʉʉn dʉi nʉʉ ajierram aajem.