Hechos 13 - Wounaan Meu

Bernabé Saulo dʉi warrpem Ẽwandam i jaaumkhĩir pʉitarr

¹ Antioquía phobor eem iglesia ee Ẽwandam i jaaumien dʉi maestronaan naajeejim aajem. Makhʉʉn thʉ̃r ãb Bernabé ajim aajem; ãb Simón, am den ĩchab “Chi Phʉich” a thʉ̃ʉrjerr; ãb Lucio, Cirenepierr; ãbakhai Manaén, Galilea durram gobernador Erodes aajerr dʉi ãba bãautarr; maimua Saulo.

² Ich makhʉʉn biek ãb thachjã khoba maach Por Jesuug jeeu nʉm ee, Ẽwandam Akharau amag, “Bernabé Saulo dʉi ideu sĩi sĩubat, mua am athee ya phidag jʉr wai chirʉmgui” ajim anʉm chi Ẽwandam Akharau.

³ Magbaawai chadcha mag Ẽwandamag jewaag sĩi thachjã khoba sʉrkha nʉmua makhʉʉn numiim ʉ̃rta jua ausĩunaa oraawi pʉijierram aajem.

Chipre phʉram gaai maach peerdʉajem iek jaautarr

⁴ Mag, ich Ẽwandam Akharau amachig wetpi jaaubaawai Bernabé Saulo dʉi Seleuciaag wetwi maigmua jũrr dojãrr phʉram Chipre anʉmʉg dʉrbajierram aajem.

⁵ Maimua Puerto Salamina barwi judionaan Ẽwandam iek jaaujem deg maach peerdʉajem iek jaauphobaadejim anʉm. Juan Marcos amach dʉi arrtarr aawai magua dʉi am ipierr jaaujeejim aajem.

⁶ Mag phobor Salamina anʉm eem khʉʉnag Ẽwandam iek jaauwia warag ich ag morr gaaipai phʉʉrdʉ wetumua deeum phobordam Pafos anʉm barjierram aajem. Maig woun ãb benkhʉʉn sĩejim aajem, Barjesús a thʉ̃r sim. Mag woun sĩi nem seunem ich ben khaugau parhooba nem wau nʉrrʉmta, iruan Ẽwandamau nem waupi simta wau chirʉm aajeejim aajem, ich iekhaupaita.

⁷ Mag benkhʉʉn Barjesús anʉm, gobernador por opherg sĩerrʉm Sergio Paulo anʉm dʉi sĩejeejim aajem. Mag gobernadorrau Ẽwandam iek ũrm khõsi sĩerr aawai Bernabé Saulo dʉi ich aar thʉ̃rkhʉʉipʉijim aajem, am iek ũraag.

⁸ Mamʉ Bernabé Saulo dʉi beewi Ẽwandam iek jaaubaicheewai mag chi benkhʉʉn griegonaan meúa Elimas a thʉ̃r simuata jũrr ideu chi gobernadorrag amau jaau nʉmjã ʉdʉʉr ʉkhapiba wai sĩsijim anaabá.

⁹ Magbaawai Sauloou ichpai ĩchab Pablo aajemua, ich gaai Ẽwandam Akhaar phẽs wai sĩerr aawai, irig eerpanaa thet khĩesir,

¹⁰ —Pʉrʉgan dosãtauta khĩirjug dee simgui ajim anʉm. Maguata jãg seunem sĩi õor khũgurjupai khap sĩerrʉm, bʉ̃ʉrjã nem ajapham khõchkhaba. Jãg maach Por Ẽwandam ichaaur aju khãai, jãg ideu chi ʉkham khõsim khʉʉnag i iek ʉkhapibáma ajim anʉm.

¹¹ Pʉch jãg chitʉm paar nau maach Por Jesuu warre pʉ dau khaugba apʉijugui ajim aajem. Magbarmʉn pʉʉn bʉ̃ʉrjã edau khĩir araragjã khaugba chitʉʉ awiata deeu dau eerdʉjugui ajim anʉm irig. Mag, chadcha Pabloou magbarm bʉrre chi Barjesús dau khĩbaademua pod majujã khaugba aadeewai, ãbmua khãijã ich jua gaai eudʉ arrmkhĩir awi õor jʉʉrwai, sĩi parhooba jʉrkha jʉrkha aadejim aajem.

¹² Mag maach dauderraa abarm chi gobernadorrau ich daúacha oobarm dʉi maach Por Jesús iek Pabloou Bernabé dʉimua jaau wenʉrrarr ich jʉ̃gaagaa ũrbaawai chadcha ʉkhajim aajem.

Pablo Bernabé dʉi Pisidia durr

¹³ Pablo ich khapeen dʉi mag phobordam Pafos anʉm ee naawi dʉrbagkhabaadeeu deeum durr Panfilia anʉm eem phobordam Perge anʉm phẽeubaimajierram aajem. Mamʉ mam paaukhabaimaa Juan Marcoou am kha ogdʉwi deeu Jerusalenag petajim aajem.

¹⁴ Maig Perge naawi Antioquiaag wetjim aajem. Mag Antioquía phobor deeum durr Pisidia anʉm dakha sĩejim aajem. Am iek mag phobor ee jua ʉ̃ʉijem ed pabaadeewai judionaan Ẽwandam iek jaaujem deg dubwi ohoodo aimajierram aajem.

¹⁵ Mag jupwi, Moiseeu iek phã pʉatarr thʉ̃rnaa Ẽwandam i jaaumienau phã pʉarr gaaijã ĩchab thʉ̃r dichdimaawai, mag judionaan eem chi pornaanau amag, —Keena khodamnaan, pãrau õor wawieg khĩirjugdam wai nʉm khai, warre marag ũrpibat ajierram aajem.

¹⁶ Magbaawai Pabloou bʉjãau dʉnʉʉunaa, õor khĩuu amkhĩir juau jaau jaaunaa, amag iekhamamua magjim aajem: —Keena israelnaan ajim anʉm, maimua pãar ar Ẽwandam iek ũrwi jʉ̃g ʉ̃rʉʉ aajem khʉʉn, mʉ iek ũrbat ajim anʉm.

¹⁷ Warrgarwejã Ẽwandamau maach joointa jʉr autarr aawai am chikham ee Egipto durr naajeewaiwe amachta Ẽwandamau nem khapan apiwi ich jua theegau deeu chawag phe arrjimgui a jaaumajim aajem.

¹⁸ Mag phe arrwi, õor chukag durr ich dakhĩir khaigba aadephʉm gaaimua khĩir machag ãwat nʉrrʉmjã, Ẽwandamau magʉm igba, cuarenta añosjo am dʉi ogdʉba sĩejimgui ajim aajem Pabloou amag jaaumamua.

¹⁹ Mag wenʉrrʉmua Ẽwandam jua theeg paarmua amachdeu Canaan durr siete naciones opʉitarr thum Ẽwandamau warag amag deejimgui ajim anʉm.

²⁰ Mag maach joointa Egipto durr nʉwe, Ẽwandamau jʉr autarr aigmua Canaan durr amachdeu jʉ̃athʉg auwi ma nʉm jaar, ya cuatrocientos años dichwi sĩejimgui ajim aajem Pabloou mag ijẽjẽbkhamua. Mag Pabloou jaau wai khitʉmua, —Magtarr khur Ẽwandamau amag leinaan jueces anʉm khʉʉn deebaawai makhʉʉnauta phobor thum khap nʉisijimgui ajim anʉm. Mag jueces anʉm khʉʉnta años khapan chi pornaankha wenʉrrʉʉ awi, jũrr jooi Samuelta chi porkha sĩsierr aigmua ewag paawai,

²¹ õrau amach garmua Ẽwandamag amach porkhamkhĩir rey jeeubaawai, woun ãb warr jooingar Benjamín aajerr ag chaain ewagam khʉʉn den woun Cis anʉm iewaa Saúl anʉmʉgta cuarenta años Ẽwandamau am reikhapijimgui ajim aajem.

²² Mamʉ mag nacharam rey ich Ẽwandamau isegpʉiwi jũrr deeum woun ãb David anʉmta reikhapijimgui a jaaumajim aajem Pabloou. Mag jaaumamua ichdeupai, Mag David igwiata ich Ẽwandamaucha, “David Isaí iewaan chad mua khõsi chirʉm; jãguan chad mʉchdeu nem mag abarm ipierraa ajugui” ajim aajem Pabloou amag, ich Ẽwandamau iekhatarr igwia.

²³ Magnaa, Ich Ẽwandamaucha maach jooinag jaaujerrjo, mag David chaain ewagam khʉʉn eemta Ẽwandamau Jesús thaabapijimgui ajim anʉm, maach israelnaan peerdʉajem khamkhĩir.

²⁴ ’Mamʉ mag ich Jesuucha Ẽwandam iek jaau nʉrraju nawejã Juan chi õor por choomieu israelnaan thumaam khʉʉnag jaaujeejimgui ajim anʉm, amach khaibag isegwi amach por choopimamkhĩir.

²⁵ Juanau mag jaau nʉrrʉmua ya ich thõju gayaa pamam ee õrag, “¿Pãrau khĩirjuawai mʉʉta ich Ẽwandamaucha jʉr auwia pʉiju aajerr khai?” ajim anʉm. Maimua ich Juanaupai, “Mʉ chan ar khabamgui” ajim aajem. “Mamʉ mʉ ẽudee ãb urumta ichiugui” ajim anʉm ich Juanau, Jesús igwia. “Maan chad mʉ khãyaujã ʉ̃rʉʉcha simgui” ajim anʉm. “Mamʉ mʉ chan mʉg chirʉm aig sĩi i chogkhaagpaijã bʉ̃ʉrjã serbiibata chirʉmgui” ajim aajem Juanau.

²⁶ Maimua mag chi Juan õor por choomieu iekhatarr jaau dichwia deeu ich Pablooupai, —Khodamnaan, jooingar Abrán khachitarr ag chaain ewagam khʉʉn, maimua pãar ar Ẽwandam iek ũrwia jʉ̃g ʉ̃rʉʉ aajem khʉʉn: mʉg maach peerdʉajem iek cha mua jaau chitʉmʉn pãach atheyaugui ajim aajem Pabloou amag.

²⁷ Jerusalén phobor eem khʉʉnau amach pornaan dʉimua bʉ̃ʉrjã pod Jesús khaug aubajierramgui ajim anʉm. Mag khãai ante i igwia Ẽwandam i jaaumienau phã pʉatarr iek sabarhedpierr thʉ̃r nʉmjã bʉ̃ʉrjã i khaug auba, warag amachdeuta warrgarwe Ẽwandam i jaaumienau jaauwai i dau aphʉʉ wau thõomamua thõopʉiju a jaaujerrjoo ajierramgui ajim aajem, i dʉi.

²⁸ Mag i thõog athee bʉ̃ʉrjã khaibag chukhu khitarr ãba, warag Pilatoog pʉr deewi i thõopʉipi jaaujierramgui ajim aajem.

²⁹ Mag jaaumamua ich Pablooupai, Maimua Ẽwandam iek phã sim gaai i igwia jaau sĩerrjo, thum mag i dʉi amachdeu ampierr awia, pakuls gaaimua eeg paa auwi, durrbʉ khõpag ee jẽbdi chi khorm sĩerr ee aukherjierramgui ajim anʉm.

³⁰ Mag amau i thõojieb mamʉ, Ẽwandamau deeu i phiriu aubajieb ajim anʉm.

³¹ Mag iiu phiidʉwia biek khapan ich oopijim anaabahab ajim anʉm, mag ich thõju gayaa paawai Galileamua Jerusalenag ich dʉi ãba wettarr khʉʉnag. Magtarr aawai mag amach daúa i ootarr khʉʉnauta jũrr ĩs õrag jaau wenʉrrʉmgui a jaaumajim aajem Pabloou, mag Antioquía phobor ee chi pornaanpa thʉnarr khʉʉnag.

³² Maimua warag mag jaaumamua, —Ẽwandamau warrgarwe maach jooinag jaauwai mag ich chaai pʉiju aajerr iekta maraujã pãrag jaau wenʉrrʉmgui ajim anʉm.

³³ Mag warrgarwe maach jooinag mag ich chaai deeju a jaautarr aawai chadcha ĩs ewag pawi maach chi ewagam khʉʉnagta Jesús iiu phiidʉbarm oopijimgui ajim aajem, magbarmua jãgan chadcha ich Iewaata maach ee nʉrrajim a khap amkhĩir. Magju arr aawaita i igwia Ẽwandam ẽsap Salmos numiim anʉm gaai Davidau phã pʉawai, “Pʉʉn mʉ Chaairau; ĩsin chad õrau pʉʉn mʉ Iewaa a khaphʉ nʉisimgui” a phãtarrjã jaaumamua,

³⁴ mag i phiidʉwia tag meeba ich mag iiu sĩerraju igwiajã ich Ẽwandamaucha ĩchab, “Mʉchdeu Davidag jaautarr chan par iekhaupai khaba chadcha aju” a iekhatarrpa jaaumajim aajem Pabloou.

³⁵ Mag jaaumamua ich ag Jesupai jaauwi, —Ich ag Salmo gaaipai ĩchab mag sim: “Ẽwandam, pʉch chaai bʉ̃ʉrjã pekau chukhu khitʉm pʉchdeucha jʉr autarr chan pua ʉdʉraa i eu jẽb ee miiupibamgui” ajim aajem.

³⁶ Pãrau khaphʉ nʉmgui ajim anʉm, chadcha Davidag sĩi Ẽwandamau nem jaaumamta wau khitʉʉ awi meetarr. Mag meebaadeewai parhoobam khʉʉn aukheerjemjo ich jooin dʉi ãba aukherwi ich ag eepai jẽbeg pajimgui ajim anʉm.

³⁷ Mamʉ mag Jesús mor chan bʉ̃ʉrjã ich aukhertarr jẽb degpai miiubajimgui ajim anʉm, ich Ẽwandamaucha phiriu autarr aawai.

³⁸ Maimua amag, —Khodamnaan, magua pãrau thumaam khʉʉnau khaphʉ aju aai nʉmgui ajim anʉm ich Pabloou, maraun sĩi Jesuuta maach khaibag thum chugpaapʉiju aai sim a jaau wenʉrrʉm.

³⁹ Maagwai Moiseeu iek phã pʉatarr gaai jaau simpierr ʉkha nʉmuapai pod peerdʉba arr khʉʉnaujã Jesús iek ʉkhamʉn, jũrr ichdeun chad thum peerdʉ auwia ajaug paapʉimaju, magbarmua tag bʉ̃ʉrjã ich dʉi iekkhõr chukhu nʉisimkhĩir a iekhamajim aajem Pabloou.

⁴⁰ Maimua, Khĩir khaphʉ abat ajim aajem, Ẽwandam i jaaumienau ẽsap gaai jaau pʉatarr pãach gaai pam ugua. Mag jaauwi, ich Ẽwandam iek phã simcha jaaubaadejim aajem, chi Pabloou. Mag irua jaautarr mʉg ajim aajem:

⁴¹ “Pãar ar Ẽwandam iek aawaijã warag i wau iekhaajem khʉʉn ũrbat: Mʉʉn Ẽwandamau. Pãach dakhĩir pãrau ag na ooba aajem mua wauju. Mamʉ nem thum magju nawe ãbmua pãrag jaaukhiinjã pãrau ʉkhabaju. Mamʉ ya pãach daúa oophobaadeewaita pãar jãphierr naawijã, ¿pãrau jãgbarju? Pãachdeu ʉkhaba arr gaaimua, maigta pãar oju edau” ajim aajem Pabloou, Ẽwandamau ich iek phãpitarr igwia. (Ab. 1:5)

⁴² Mag judionaan Ẽwandam iek jaaujem deg jaau naawi daau paaukha phobaadeeu, judionaan khabam khʉʉn am aig beewi, deeu ẽudeem semanau jua ʉ̃i nʉm ed paawai ãba biirdʉawaijã ich ag iekpai amachig jaaupijierram aajem, Pabloog.

⁴³ Mag ãba biirdʉ naawi aaidʉtkhabaadem ee, judionaan khapan Pablo Bernabé dʉi wetum ẽudee wetjierram aajem, judionaan khabamta eeu ʉkhawia judionaan igar theerbagkhatarr khʉʉnpa. Magbaawai mag amach ẽudee wetum khʉʉnag wawimamua, “Ich jãg thãraucha ʉkha wenʉrrʉmua Ẽwandam pãach daupii aajem gaaita ubʉ nʉisit” aajeejim aajem amag chi Pabloou Bernabé dʉimua.

⁴⁴ Maimua chadcha deeu ũwaai jua ʉ̃ʉijem ed pabaadeewai peer phobor thumta ãbam aig podpa nʉisijim anaabá, Ẽwandam iek jaaumam ũraag.

⁴⁵ Mamʉ judionaanau mag atcha õor pom thʉnʉm oobaawai iekkhõr wauphobaadewi, warag Pabloou jaau sim ichaaur õor wawinaa, irig sĩi parhooba iekha phobaadejim aajem.

⁴⁶ Magbaawai ĩchab Pabloou Bernabé dʉimua warag thãar phĩiuwia iek khẽgkha amag, —Ũrbat keena ajierram anʉm. Chadcha pãragta nacha marau mʉg Ẽwandam iek jaauju aai naajim, mamʉ pãar jãg ʉ̃gthar obermaphamjo Ẽwandamagjã ʉdʉʉr pãach peerdʉ aupiba i isegamjo naawai marau judionaan khabam khʉʉnagpa jaau wenʉrrʉmgui ajim aajem,

⁴⁷ maach Por Ẽwandamau thumaam khʉʉnag ich khap amkhĩirta ich iek jaaupi sĩewai. Maagwai chadcha ich Ẽwandam iek gaai ich Jesús igwi, “Iita judionaan khabam khʉʉn atheejã khĩchag ee õtdau phuu dʉnʉmjo sim, durrpierr ich iek ʉkha nʉm khʉʉn thum ichdeuta peerdʉ awaag” a phã simgui ajierram aajem. (Is. 42:6; 49:6)

⁴⁸ Pabloou Bernabé dʉimua mag jaaubarm ũrwia judionaan khabam khʉʉnau amach jʉ̃gʉucha mag amjã peerdʉju aai nʉm a ũrbaawai onegau, “Keena, mʉg Ẽwandam iekhan chadcha chi ajaphamʉugui” ajierram aajem, chadcha thãraucha amachdeu ʉkha nʉm iekhau. Mag thumaa ʉkhatarr khʉʉnan, nawe Ẽwandamau ichdeu oowai ich iek ʉkhaju khaphʉ wai sĩerr khʉʉn ajim.

⁴⁹ Mag jaau nʉmua mag amach nʉm durr eepain maach Por Jesús iek aaidʉbaadejim anaabá.

⁵⁰ Mag warag Ẽwandam i aaidʉmam oobaawai khĩir mor chigpai jũrr judionaanau amach ee riknaan ʉʉin Ẽwandamag jeeu durraajerr khʉʉn dʉi iekhawia phobor ee chi porkha nʉm khʉʉn dʉijã iekhajierram aajem. Magnaan chad Pabloou Bernabé dʉimua ʉu Aai i jaau durrarrta, am dʉi amachdeu ampierr awi warre amach durrmua jʉrkhʉʉipʉijierram aajem, aiguim judionaanau.

⁵¹ Mag amach jʉrbaadee warre ĩchab amach dakhĩirwe amach bʉ gayam jẽb ʉʉrphe ʉʉrphe apʉijierram anaabá. Mag nʉmua amach odegpain, “Pãar maar dʉi jãg nʉm gaaimua Ẽwandam dʉi khĩir khapnaat” anʉm ajima. Magwia ereubaadeeu deeum durr phobor Iconio anʉm naaimajim aajem.

⁵² Mamʉ chi Ẽwandam iek ʉkhatarr khʉʉnan am ereutarr khurjã ich mag oneenaa Ẽwandam Akhaarjã amach gaai phẽs wai nʉisijim aajem.