Hechos 12 - Wounaan Meu

Santiago thõopʉiwi Pedro cárcel deg pʉitarr

¹ Mag Bernabé Saulo dʉi Jerusalenpien athee phatkhon deen ma nʉm jaar, rey Erodeeu ãaur khʉʉn Jerusalén ee Jesús iek ʉkha durrarr khʉʉn pʉrkha aujim aajem, am dʉi ichdeu ampierr aag.

² Mag pʉrkha auwia ãb Juan dʉi khod ãbam Santiago a thʉ̃ʉrjerr ich soldaaunag thuthuíu o thʉappʉipijim anaabá.

³ Mag o thʉap thõobarm judionaan chi pornaanau warag khõchkhabarm oobaawai Pedrojã dʉi warre pʉr aupijim aajem, chi Erodeeu. Mamagkharran pan levadura chukhu wauwi khoojem ag seman ee ajim aajem.

⁴ Mag preso pʉr auwi, cárcel deg phãar sĩunaa, soldaaun dieciseis jʉr aujim aajem, nacha jayapam khʉʉnau thʉa wai nʉʉ awi jũrr agjo jayapam khʉʉnau ich mag theg ahau amkhĩir. Maan i denen, mag phãar sĩuwi nemkhoo pomaam dichdimaawaita dawag auju ajima, thumaam khʉʉn dakhĩir ich soldaaunag thõopi jawaag.

⁵ Mamʉ mag Pedro cárcel deg soldaaunau oopaar wai nʉmichin, ĩchab tagam khʉʉn chi ʉkha nʉm khʉʉnau pʉa chukhuu Ẽwandamag jeeu durrajim anaabá, i kõit.

Pedro cárcel degmua obertarr

⁶ Maimua chadcha mag phiesta dichwia, nanumjo Erodeeu amag Pedro jẽu deeju anʉm ee, ĩsimjo, kheubaadeewai soldaaun numiim khʉʉnau amachpierr Pedro jua gaai cadenau jʉ̃khanaa, amach jua gaaijã jʉ̃khanaa, amach jãrr wai khãiphobaadejim aajem. Maagwai tagam khʉʉnau puertdi aig thʉa nʉisijim aajem.

⁷ Mag Pedro khãi jẽer sim ee, Ẽwandam chog ʉ̃gtharmua i aig pierrwai cárcel di thum sĩi arar joisijim anaabá. Mag beewi, i ãi ee noinoinaa, phiriupʉiwi irig, —Pedro, jopai phiidʉbá ajim anʉm. Irua magbarm bʉrre chadcha caden Pedro jua gaai mag jʉ̃kha sĩerrta sĩi ẽedʉ khʉiphobaadejim anaabá.

⁸ Mag daukhanpabaadee, —Jua chʉphʉ pʉch ãi khõorjʉ̃wi jopai pʉch zapat jũabapʉi ajim anʉm deeu chi Ẽwandam chogau. Mag chadcha Pedro zapat jũa aaipabaadee, —Jãimua pʉch manto jũawi mʉ ẽudee pidú ajim aajem chi Ẽwandam chogau.

⁹ Magbaa chadcha i iek chi Ẽwandam chog ẽudee í oberbaadejim aajem. Mamʉ Ẽwandam chogau ich dʉi mamagkhamjã wajappai Pedroou khaugba, iruan sĩi ich khãai khõrkha chirʉmuata mamagkhampii ajim anaabá.

¹⁰ Mamʉ irua oowai, mag wetumua amach garcha soldaaun narr aig dichwia, ag atagaa narr aigjã dichwi, ya kaaijã eecha oberimaajem puertdi aar paaukhabaadejim aajem. Mam paaukhabaimaawai mag puertdi sĩi ich khĩrau weeudʉbaadem ee ober dichjierram aajem. Maimua ãba wetumua deeum kaaijã neer sim aar paaukhabaimaawai deeu Pedro ich appai aadejim aajem, chi Ẽwandam chog petaawai.

¹¹ Magbarm aigta Pedroou ajapcha khaug athaawai ich odegpai, “Ãa, jãgan chadchata Ẽwandamau ich chog pʉibarbma” ajim anʉm, “Erodeeu judionaan dʉimua mʉ dʉi amachdeu ampierr aju arrta i jua eemua peerdʉ awaag.”

¹² Mag ichdeupai ajap ich khaug athaawaita warag woun Juan anʉm ãd María a thʉ̃r sĩerr diig petajim aajem, õor khapan ãba biirdʉwi Ẽwandamag jeeu narr aar. Mag woun Juan anʉm ibʉʉr wauwi ĩchab Marcos a thʉ̃r sĩejim aajem.

¹³ Mag petwi, barwia, ũjãrram puertdi sirimajim aajem, ich weeu aumkhĩir. Magbaawai khap aag awi daupeer ãb Rode anʉmua puertdi aigcha ũraan beejim aajem.

¹⁴ Mag beewi Pedro iekcha ũr athaawai warag onegau puertdijã weeuba, sĩi ierrag khaphigbaadewi, —Ich Pedro khabahab ajim anʉm ierr narr khʉʉnag.

¹⁵ Magbaawai oraa narr khʉʉnau sĩi warag i lokag phewi ʉkhamapha naajim anaabá. Mamʉ mag ich iek ʉkhaba abaawai warag, “Chadcha Pedro iekta mua ũr ʉabajieb” anʉʉ paawaita, deeu ũmaai, —Keena, magan chadcha khai, jã sĩi i akhaar khabahaba ajierram anʉm.

¹⁶ Mamʉ magʉmich warag Pedroou puertdi bubuju khabaadejim anaabá, ich weeu aumkhĩir. Maimua weeunaa ichchata oo athaawai, khĩir eu awi jũrr wir aig amach khapeenag, —¿Jãgata jãg ʉu chig aba pierrúma? ajierram aajem.

¹⁷ Magbaawai ichdeu warag am khĩu amkhĩir juaupai jajaaujii awi amag ĩgkhabaadejim aajem, jãga cárcel deg i chirarrta maach Porou i dawag obeer aujĩ. Mag thum jaau dichwia, —Chamʉg mua pãachig nem ĩgkhabarm thum ich agjoo Santiagoog jaauwi tagam khʉʉn maach khodnaanagjã jaaubat ajim aajem. Mag jaauwia, aigmua oberwi, ichta warag chawag petajim aajem.

¹⁸ Am iekhan, maimua ag noram ãspaauta sĩi Pedro chuk eebaadeewai soldaaun amach eepai iek phithurg maadeujã khaugba joisijim anʉm, Pedro gaaimua.

¹⁹ Magbaawai Erodeeu jʉrpiwi par jʉr nʉmjã baauba abaawai, soldaaun chi thʉa narr khʉʉnta ãba thʉ̃rkha auwi par jeeu ohookhamjã ich mag khaugba buudimaawai, amachta phe arrwi khechpi jaaujim anaabá. Magtarr khur chi rey Erodes Jerusalén durrmua mawia jũrr phobor Cesarea anʉm ee sĩeimajim aajem.

Erodes meetarr

²⁰ Mag, Erodes Cesarea phobor sĩeimawi, Tiropien dʉi meeukhanaa, Sidonpien dʉijã meeukha sĩsijim aajem. Mamʉ magbaa warm khʉʉnau amach ap nacha ajapha iekhawia jũrr i dʉi iekhaan beejierram aajem. Mag beewi, chi rey den thethem woun ãb Blasto anʉm dʉi iekhawi, amachig paa auwi, rey dʉi iek deeju ajierram aajem, khõinaa wenʉrraag. Amau rey amach dʉi meeukhapimapha naajim anaabá, amachdeu chi rey durramta khoju per khoojerr aawai.

²¹ Maimua chadcha mag deeu ãba iekhaju arr ed rey Erodeeu ich khajũa ajapcharam jũanaa, ich khu juupjem gaai waaidʉwi jupwi, õrag iekhabaadejim aajem.

²² Mag iekhabaadee phoborpienau i tho nʉmua, “Mʉg wounan Ẽwandamjota iekha sim; jã chan sĩi khajapham woun khabamgui” a sereu phobaadejim anʉm.

²³ Õrau serereukhamua ichig mamagkhamjã bʉ̃ʉrjã amag iekhaba, warag ʉdʉraa ichigta Ẽwandamagamjo iekhapijim anaabá. Mamʉ magtarr kõit Ẽwandam chogau i bi ee odomie dau daau ompapiwi ich aguapai warag jʉ thʉrrdʉ meejim aajem, chi Erodes.

²⁴ Mag, par Erodeeu ich monakha aawai chi ʉkha durrum khʉʉn opʉiju ẽkhaajeejieb mamʉ, maach Por iek jaau nʉmʉn waragta durrpierr aaidʉnaa ĩchab chi ʉkha nʉm khʉʉnjã khapaana paaukhamajim aajem.

²⁵ Bernabé Saulo dʉi mag ofrenda deethurwi, Jerusalenmua deeu Antioquiaag wetumua amach dʉi woundam Juan anʉm arrjierram aajem. Ich mag Juanpai ibʉʉr wauwia Marcos a thʉ̃ʉrjeejim aajem.