Hechos 11 - Wounaan Meu

Pedroou Jerusalenpienag ichdeu nem ootarr ĩgkhaimatarr

¹ Mag judionaan khabam khʉʉnaujã Ẽwandam iek ʉkhabarm anʉm jopcha Judea durr tagam khʉʉn ich Jesuucha jʉr autarr khʉʉnau ũrphobaadejim aajem.

² Mag bĩi thʉnʉm ee, Pedro Jerusalén barbaimaawai ĩchab ag phobor ee judionaan Jesús iek ʉkha narr khʉʉnau sĩi amachig baarpi auwi irig magjierram aajem:

³ —¿Woun khan jãgwiata jãg maachjo judionaanjã khab sĩsidʉmta oon mawia warag am dʉi thachpa khobaadejĩma? ajierram anʉm. Pua jãkhʉʉn dʉi jãgju khaba sĩejim perá ajierram anʉm, maach jooinau jãgpiba jaaujeewai.

⁴ Magbaawai Pedroou amag thumaa jaaubaadejim aajem, warrjã jãga Ẽwandamau irig mag nem oopiwia judionaan khabam khʉʉn eejã ich i jaaumkhĩir i pʉiju ajĩ.

⁵ Mag jaaumamua ich Pedrooucha, —Warrcharan mʉʉn Jope phobor eeta chirajimgui ajim aajem, Ẽwandamag jeeuwai. Mag Ẽwandamag jeeu chirʉm eeta, degolp mʉ khãi athamjo abarm ee, sĩi dĩesjo nem pom khẽupierr khẽu khõorjʉ̃jʉ̃ʉd simta edjã eemua mʉ chirʉm aig burr urajimgui ajim anʉm.

⁶ Magbaawai ag ee sim khap aag awi mua ober oowai, ag ee nemchaain khĩirpierr thʉnaajimgui ajim anʉm: mʉg jẽb gayam bʉ jayapam khʉʉn, pabʉ eem chi dachʉphʉm, nemchaain jãau jẽedʉ nʉrrjee aajem khʉʉn, maimua nem ichpan khĩir pogkhe.

⁷ Mag mua ober oobaawai mag õor chukhu sĩerr eemuata mʉrʉg mʉ thʉ̃rcha thʉ̃rnaa ag eem nem inag thõonaa khopi jaaujimgui ajim.

⁸ Magbaawai mua, “Señor, mua chan mʉg chitʉm aig mʉch erraawe nem parhoobam chan bʉ̃ʉrjã mʉch i ee auba chitʉm. Magʉm jãg maach inaam chará mua khobamgui” a chirajim, “warrgarwejã maach jooinau khopiba jaaujerr aawai.”

⁹ Mua mag iekhabaawai deeu mag õor iekjo sĩerrau jũrr mʉrʉg, “Mua nem wajapha wautarr chan oob pua maach inaa sim a chiramgui” ajim ich Ẽwandamau mʉrʉg.

¹⁰ Mag nemchaain pos jojopkham biek thãrjup mʉrʉg oopiwia deeu ʉ̃gthaag edjã ee eudʉ athamjo abaawai chukkhu aadejim. Magta Pedroou ichdeu ootarr jaaujim aajem, ich khapeenag.

¹¹ Mag ichdeu nem ootarr jajawagmamua, —Mag chi dĩes ʉ̃gthaa pabaadem eeta, Cesarea phobormua woun ãb Cornelio anʉmua mʉ awaan mamkhĩir õor thãrjup pʉitarr khʉʉn mʉ chirʉm di jʉr wetumua mʉ aar barimajierramgui ajim anʉm.

¹² Mag am bardʉtkhabaimam ee, ĩchab Ẽwandam Akharau mʉrʉg bʉ̃ʉrjã magʉm aba am dʉi mapi jaaubaawai chadcha mʉ am dʉi majimgui a jaaumajim aajem ich Pedroou. Mag jajawagmamua, Mag mʉ mam dʉi ĩchab hermanonaan seis aig narr khʉʉnjã mʉ dʉi wetjimgui ajim anʉm. Mag wetwia mag woun Cornelio anʉm deg naaimajimgui ajim anʉm.

¹³ Mag maar bardʉtkhabaimaawai mag wounau jũrr mʉrʉg nem ĩgkhabaadejimgui ajim anʉm, jãga Ẽwandam chog i aig beewia, õor jʉr aupiwi, Jopeeg pʉipi jaaujĩ; ajapcharan mʉ jʉraanma.

¹⁴ Magá Ẽwandam chogau ich Cornelioogcha jaaujim aajem, mua maach peerdʉajem iek wajapha jaaubaawai peerdʉwi ĩchab thum i di aiguim khʉʉnjã peerdʉ nʉisiju.

¹⁵ ’Keena, magta chadcha mʉ i aar barwia mua Ẽwandam iek amag jawaagpajimgui ajim anʉm Pedro ich meeunag. Magnaa, Mag mawia amag jaaubaadem eeta Ẽwandam Akhaar am gaai phẽs aichejimgui ajim anʉm, na ar maach tagam judionaan chi ʉkha nʉm khʉʉn dʉimua nacha autarr edamjo.

¹⁶ Magbaawaita mua khĩir eyaa aadejimgui ajim anʉm Pedroou, maach Por Jesuu mʉchig, “Juan chi por choomieun chadcha dodamaupai pãar por choojieb mamʉ, mʉgtarr khur ich Ẽwandam Akhaarchata pãrau pãach gaai phẽs wai nʉisiju” a iekhatarr.

¹⁷ Magua keena, mua oowai mag ich Jesuucha magtarr aawaita mag edjã Cornelio dʉi ãba narr khʉʉnagjã Ẽwandamau ich Akhaar deebajieb ajim anʉm amag, ar maachdeu Jesucristo iek ʉkhaawai maachig deetarrjo. Keena, magtarr aawaita pod mua Ẽwandam ichaaur aju aai khaba chirajimgui ajim anaabá Pedroou ich khapeenag jaaumamua.

¹⁸ Pedroou mag jaaumam ũrwia, Jerusalenpien chi ʉkha narr khʉʉn sĩi warag khĩuu nʉisiwi, Ẽwandamag jeeuphoo thʉnʉmua, “Ʉuchata jãgbarm Ẽwandam” ajierram aajem. “Magan judionaan khabam khʉʉnaujã amach khaibag thumaa ãsie ewag khĩirjuwia pʉrʉgta chugpaapi jeeu nʉm khʉʉnan ʉu ĩchab ʉ̃gthar ober wenʉrrajugui” ajierram aajem, mag warag Ẽwandamag jeeumamua.

Antioquía phobor ee chi ʉkha durrarr khʉʉn

¹⁹ Mag Esteban thõowia chi Ẽwandam iek ʉkha durrum khʉʉn ẽudee ẽkha nʉm jaar, ãaur khʉʉn Feniciaag dʉr wetjim aajem; maagwai ãaur khʉʉn, Chipreeg; maimua tagam khʉʉn, Antioquiaag. Mag wetwi amach wenʉrrʉmpierr jaau wenʉrrajim aajem, jãga Ẽwandamau maach peerdʉ aaujẽ. Mamʉ mag jaau wenʉrrʉm chan parhoobam khʉʉnagjã jaauba, ãba judionaanagpaita jaaujeejim anaabá.

²⁰ Mamʉ mag dʉr wettarr khʉʉn ee naajim aajem, Chiprepien Sirenepien dʉi. Makhʉʉnaun chad Antioquía phobor ee amach bardʉtkhaimaawai, parhooba griegonaanagpa maach Por Jesús igwi thumaa jaauphobaadejim aajem, amjã peerdʉju aai nʉm a khap amkhĩir.

²¹ Maach Por Jesuuta mag ich i jaaumkhĩir ich juapá amag dee sĩerr aawai chi ũr nʉm khʉʉn khapan warr amachdeu chadpii aajerr khĩirjug isegwi jũrr maach Por Jesús iek jaau nʉmta ʉkhajierram aajem.

²² Antioquía phobor ee mamagkham Jerusalenmua chi ʉkha durrum khʉʉnau ũr athaawai am aar Bernabé pʉijierram aajem, khap oon mamkhĩir.

²³ Mag mawia chadcha Ẽwandamau mamaam khʉʉnjã ʉu peerdʉ atham oobaimaawai Bernabé onee aadejim aajem. Maimua warag thumaam khʉʉnag, “Ich jãg thãraucha warag maach Por Jesús iek ʉkha wenʉrrʉmua i gaaita ubʉ nʉisit” ajim aajem, am wawimamua.

²⁴ Ich Bernabejã woun ajapham ajim aajem. Magua irua ich gaai Ẽwandam Akhaarjã phẽsnaa ĩchab ãba Ẽwandam gaaipaita thãraucha ʉkhaajeejim aajem. Mag Ẽwandam Akhaar ich gaai phẽs wai simua jaaumam ũrwi warag khapankham khʉʉnau ʉkhawi maach Por Jesús denkhamaajeejim anʉm.

²⁵ Maig sĩi awi ich Bernabé jũrr Tarsoog majim aajem, Saulo jʉraan. Mag mawia aig oobaimaa, ich dʉi eeurrwi Antioquiaag arrjim aajem.

²⁶ Mag Antioquía phobor barwi año ãb enter aig nʉmua warag õor khapankham khʉʉnag Ẽwandam iek jaaujeejim aajem. Maig mag Antioquía phobor eeta chi ʉkha durrarr khʉʉn warrpem cristianonaan a thʉ̃rjierram aajem bigaaum khʉʉnau, amach Cristo iek ʉkha durrum gaaimua.

²⁷ Ich mag jaar Jerusalenmua Antioquiaag Ẽwandam i jaaumien beejierram aajem.

²⁸ Mag beewia ãb Agabo anʉmua Ẽwandam Akharau ichig jaaupibaawai õrag jaaujim anʉm, durrpierr jãdau theeg burrju. Magtarr khur Claudio reikha sim jaar, chadcha ich Agaboou jaautarrjoo ajim anaabá.

²⁹ Mag jãdau theega aademua khoju chukkhu aadeewai Antioquiapien Jesús igar durrarr khʉʉnau agdaujo amachdeu deeju ayaampierr ofrendadam jʉrphe auju aphobaadejim aajem, Judea durr agjo chi ʉkha durrum khʉʉnag deepäaig.

³⁰ Mag chadcha ya chi phatkhon wai nʉisiewai Bernabé Saulo dʉi jʉr auwi makhʉʉn dʉi deepʉijierram aajem, jũrr Jerusalenam iglesia eem chi pornaanag deeimamkhĩir.