Hebreos 9 - Wounaan Meu

Warrgarm phadnaanau aajerr chan ĩs Cristoou maach kõit aajem dʉi barba sim

¹ Mag Ẽwandamau nacha maach jooin dʉi iek deewai jaautarrjo Aai i jeeujem di eutarran, sĩi ich mʉig eegarm dipaaupai eu sĩejim aajem. Mamʉ magʉmjã, ag ee parhooba aju khaba, ich Ẽwandamau jaau wai sĩejim anaabá, jãga õrau ichig jeeuju khap amkhĩir.

² Mag di mʉgta eu sĩejim aajem: Di ãbpai simta, ag ee thuram numí thuurkha sĩejim aajem. Nacharam, “Lugar Santo” a thʉ̃r sĩejim anaabá; maigpain phadnaan parhooba dubju aai naajim aajem. Mag ee lámpara ausĩiujem dʉi Ẽwandam athee pan ausĩiujem mesjã sĩejim aajem.

³ Maimua ãbakhai agjo ich ag gaaipai eugar thuur sim “Lugar Santísimo” a thʉ̃r sĩejim aajem. Mag een ãba chi phadnaan porkha sim appaita año gaai biek ãbpai duubjeejim anaabá.

⁴ Mag dub nʉm aig sĩejim aajem, incienso phaag khʉrr phĩr den nasãdjo ʉ̃gthaa wau sim; maimua ierr sĩejim aajem ĩchab, baaudí phĩr den. Mag baaudí, Ẽwandamau mag maach jooin dʉi iek deewai ich iek phã deetarr ag ãkhaajem baaudí ajim aajem. Chi baaudeg “maná” anʉmjã sĩejim aajem, jarr por agjo phĩr den sim ee. Mag tag naajim aajem ag ee: Aarón khararrau bordón jua ee wai nʉrraajerr, biek ãb õrrdʉwi sũrkhatarr; maimua Ẽwandamau Moiseeg ley mokdau gaai phã deetarrjã agjo.

⁵ Mag ee nem thʉnʉm baaudí ʉ̃rta ich Ẽwandam sĩejeejim anaawai, mag ʉ̃rta ĩchab querubinnaan numí naajeejim aajem, ich paraa ich ãdekkher irig jeeu nʉmjo waukha sim; ajapcharan angelnaanma. Mag agdaujo khĩircha ag ʉ̃r dʉnʉʉutkha naawaita amach ichiu chi baaudí borr wai nʉmjo naajeejim anaabá. Maigta beewi phadnaan porou mag biek ãbpai año gaai mag baaudí ʉ̃r nemchaain bagau jĩphemamua Ẽwandamag jeeujeejim anaabá, õor pekau kõit. Magʉm jaauju pooma wai chirab mamʉ, magʉm jawaagta mʉg ẽsap phãba chiraawai magdampaita jaau chirʉm.

⁶ Mag sim aawai mag “Lugar Santo” anʉm eepain nemchaain khechnaa phadnaan ʉ̃iba dudub aajeejim aajem, Ẽwandamag õor pekau kõit jewaag.

⁷ Mamʉ ag eugar mag “Lugar Santísimo” anʉm gar chan phadnaan awijã pod parhoobam khʉʉn dubba, ãba am por appaita año gaai biek ãbpai duubjeejim anʉm. Mag duubwaijã ich jua par khaba, nemchaain bag dʉita duubjeejim anʉm, ich kõit jeeuwi khar õrau amachdeu nem wau nʉmjã khaugba nʉm gaaimua pekau ee burr nʉm khʉʉn kõitpa jeeumamua mag baaudí ʉ̃r chi nemchaain bagau jĩpheeg.

⁸ Mag sim aig, ĩs Ẽwandam Akharau jaauwai, mag phadnaan dudub aajerr aigta agtha Ẽwandamag jeeu nʉwe chan Lugar Santísimo gar dubaag put parrg eu wejorr agtha weeudʉba sĩerr aawai, pod parhoobam khʉʉn Ẽwandam aarcha dubju khaba naajim a simʉu.

⁹ Magta mag ley Moiseeu jaau pʉarr gayamjo sĩi Ẽwandamag nem inagdam deenaa irig jeeujeejim aajem. Mamʉ ĩs maadeu khaphʉ nʉm, mag nemchaain khechnaa jeeu nʉmuapai pod mag chi jeeu durrum khʉʉn thãar ajaug paa auba aajeejim Ẽwandam dau na.

¹⁰ ¿Jãgwi? Agtha mag ley serbiiba apʉyaag Cristoou iek iiur aibeeba sĩerr aawaima; magnaa ĩchab amach ley gaai jaau simjo sĩi nem parhoob khoba nʉm dʉi nem parhoobajã dobanaa tagam nem mag leíu waupiba jaau sim ʉʉrkha nʉm gaaimuapaita amach ajaug paa auju ẽkhaajerr aawaima.

¹¹ Mamʉ ĩs chan ya mag ley gaai jaau sim wauba, ya ich Cristocha beewi ĩsin ichta ʉ̃gtharmua maach kõit iekhaajem chaarkha sĩsiewai, ichdeuta chadcha õor dʉijã ajapha aadem, Ẽwandamau warrgar õor dʉi aju jaaujerrjo. Ĩs mag maach kõit i iekhaajem di chan mʉig eegar Aai i jeeujem di khĩir khaba, ag khãaijã ajapchata sim. Mag di chan eegarm khʉʉnau eutarr khaba, ich Ẽwandam juau.

¹² Mag õrau eutarr khaba sim eeta Cristo sim. Mamʉ ĩs chan ya tag mag chĩb bagta Ẽwandamag deeg khaba, ni phak emkhoi bagjã khaba, ich bagchata deejim. Mamʉ majã mag warm khʉʉnau aajerrjo biek khapan khaba, biek ãbpai magbarmua tag deeum bagjã igpiba aagta mag ich bagta deebarm. Magbarmuata ya maach peerdʉ aum iek peerdʉ atham.

¹³ Iin chadcha mag amau chĩb bag phak emkhoi bag dʉi aunaa, ĩchab mag phak ʉʉidam phaatarr khʉrr mephorrag pa simjã do ee waaureunaa, leíu jaau sim chaaur waubarm gaaimua Ẽwandamag jeeujujã khaba sĩi ãr sĩsim anʉm ʉ̃r jĩpheewaijã, ʉ̃rpain ʉu chadcha ajaug paa nʉmjo aajem, deeu Ẽwandamag jeeuju ayaa apieg.

¹⁴ Mag nemchaain bagaupai deeu Ẽwandamag jeeuju ayaa apiejerr khai, magan Cristo bag chará ag khãaijã ʉ̃rcha jua theeg sim, maach thãarpa Ẽwandam dau na ajaug paapäaig. Pari magaagan, Cristo meejã meeba ich mag sĩerrʉmta wounag pawi ichdeupai ichta nemchaai chi ajapcharamdamjo ʉdʉraa ich thõopijim maach kõit. Magtarr aawai i bagauta dich khĩirjug khaibag gaaimua maach okhoopijojoomjã warre chugpaapäaijem, ãba Ẽwandam chadcha ich mag iiu sĩerrʉmʉgta jeeu wenʉrramkhĩir.

¹⁵ Mag ich Jesucristo bag ãrtarrauta maach khaibagjã thum chugpaajeewai ichta maach khaigpeerjemkha sĩerrʉm, Ẽwandam dʉi ajapha nʉisimkhĩir. Ichdeu maach kõit mag sim aigta Ẽwandamau õor dʉi iek deewai maach khaibagjã chugpaanaa maach peerdʉ auwi ich aarcha phe auju atarrjã chadcha ich ag ee ober sim. Magtarr aawai mag ich thõopibarmuata warr mag ley jooi gaai jaau simjo nem waaujerr khʉʉn pekaujã chugpaawi ĩchab ewag pawi maach ich Ẽwandamau jʉr aumam khʉʉn denjã chugpaajim, magbaawai ich Ẽwandamau nawe deeju jaau wai sĩerrjo chadcha ich dʉicha ãba wenʉrrʉmua ich juagam nemjã ich mag jʉ̃a nʉisimkhĩir.

^16-17 Mag Jesuu ich thõopibarmuata Ẽwandamau ich iekhatarr chadcha ag ee oberpi sim a chirʉmʉn mʉgta sim: Õrau khar amach meeju nawe ẽsap gaai phã sĩiujem, ich meebaadeewai ich nem dʉi jãga aju aai nʉ a khap amkhĩir. Mamʉ mag thum ẽsap gaai jaau sĩubarmjã chi phãtarr woun meebam aig chan bʉ̃ʉrjã mag ẽsap gayam iek baleeba aajem. Maimua ya meebaadeen chad mag ẽsapta nem iek theeg aadeejem. Maguata mag ẽsap gaai jaau simjo aagan, ichiita chi phãtarr woun chadcha meebaadeeta ichdeu phã pʉatarrjo i juagam nem jigju khai jiigjem.

¹⁸ Maguata nacha Ẽwandamau õor dʉi iek deetarr iek theeg apiegjã, ĩchab nemchaaindam khech nʉm aig am bagdam ãr nʉmuata mag ley iek theeg apijim.

¹⁹ Mamʉ mag Ẽwandamau amach dʉi iek deetarr iek khap apieg, Moiseeu thumaam khʉʉnag ũrmkhĩir thʉ̃rjim aajem, ag gaai ich Ẽwandamaucha amachig nem waupi jaau sim thumaam khʉʉnag khakhapdo amkhĩir. Magnaa landam oveja khaar den phurii khitʉm dʉi isopo piu ãba bʉʉr aujim aajem. Magnaa mag phak bag chĩb bag dʉi do ee waaureu sim ee thʉnaa, mag Ẽwandamau amach dʉi iek deetarr phã sim ag libro ʉ̃r jĩphenaa, ĩchab õor ʉ̃rjã thumaam khʉʉn ʉ̃r jĩphemajim anaabá.

²⁰ Magnaa ich Moiseeupai, “Mua mʉg bagau pãar ʉ̃r mʉg jĩphe chirʉm aig, Ẽwandamau ich garmua maach dʉi iek deebarmta jaau chirʉmgui” ajim anʉm. “Mag maach dʉi iek dee sim chadcha ich iekta wounjo iek theeg apiegta mua mʉg chirʉmgui” ajim anʉm, “ĩsmua atagan ag gaai waupi jaau simjota aju aai nʉm a khap apieg.”

²¹ Mamʉ magpaijã khaba ich Moiseeupai mag nemchaain khechnaa jeeujerr aigjã, dijã thum bagau jĩphepʉiwi ag eem chi phadnaan jua choogjem nemjã thumaa ich ag bagau jĩphepʉijim anaabá.

²² Ajapcharan mag ley jooi gaai jaau sim oowai, Ẽwandamag jeeuwain peer nem thʉnʉm thumta bagau jĩpheejeejim anaabá, chi jeeuju khʉʉnpa, Ẽwandamag jeeuju ayaa amkhĩir. Maguata bag ãrba chan pod pekau chugpaa auba aajeejim aajem.

Cristo meetarr gaaimuata õor pekau chugpaa aaujem

²³ Mag, sĩi ʉ̃gthar Ẽwandam khĩircha Jesuu maach kõit iekhaajemjota aju ẽkha durrarr aawai ichiita amau mag nemchaain khechnaa ag bagauta Ẽwandamag jeeuju aai naajim. Mamʉ ʉ̃gthar chan mag mʉig eegarmjo sĩi nemchaain bagpai khaba ag khãaijã ajapcharamta ig sĩejim.

²⁴ ¿Jãgwi? Cristoou sĩi õrau di eutarr eepai dubba, warre Ẽwandam dʉi khĩircha maach kõit iekhaag ʉ̃gtharchata dubtarr aawaima. Mʉig eegarm khʉʉnau nem waaujerran sĩi ʉ̃gthar jãga sĩerrʉ́ a jaau nʉm den chi seudampai ajim.

²⁵ Mʉig eegarin añopierr phadnaan por Aai i jeeujem deg nemchaain bag dʉita duubjeejim aajem, õor pekau kõit jewaag. Mamʉ Cristoou chan am denjo khaba aawai biek ãbpai ich bagchata maach kõit ãrpijim. Mag biek ãbpaita ich thõopitarr aawai am dubwi obeber aajerrjo khaba, biek ãbpai ʉ̃gtharjã oberwi ich mam sĩerrʉm.

²⁶ Maataa, mag biek ãbpai ich thõopibarmua nemchaain bag denjo pod õor pekau chugpaa auba arr amuan chad, phadnaanau biek khapan nemchaain kheechjerrjo mʉig jẽb gaai õor nʉisierr aigmua agjo biek khapan õor pekau paar ich thõopienjã udkhʉrrkhakha aajeekham. Pari magba ĩsta ya Cristo udthurwi biek ãbpai warrgarm khʉʉn kõitpa ich thõopibarm. Mag ich thõopibarmuata mag nemchaain kheechjerr tiempojã opʉiwi ya jũrr õor peerdʉju ayaam jaar khabapʉim.

²⁷ Maadeu khaphʉ nʉm, maach cha khitheem khʉʉn thum biek ãbpaita meejem, maimua mʉg atag Ẽwandamau maach i agkham edta ichdeuta maachig maach jãga wenʉrrajĩ a jaauju.

²⁸ Ich jãgta ĩchab ich Cristojã biek ãbpai ich thõopijim chikhamnaan pekau kõit, mag biek ãbpai arrau warre thumaam khʉʉn pekau chugpaa auju ayaa apäaig. Mamʉ í deeu beeju; mag urum chan ya tag pekau chugpaag deeu ich thõopieg khaba, ich beejujukhamjã chadcha i beepim khõsi ich nʉ naajerr khʉʉn phe awaanta urum.